Maisha na Huduma ya Yesu

Kiwango cha Juu kwa Wafuasi Wake

VIONGOZI wa kidini wanamwona Yesu kuwa mvunjaji Sheria ya Mungu na hivi majuzi hata wametunga hila ya kumwua. Kwa hiyo Yesu anapoendelea na Mahubiri ya Mlimani yake, yeye anaeleza hivi: “Msidhani ya kuwa nalikuja kuitangua torati au manabii; la, sikuja kutangua, bali kutimiliza.”’

Yesu anaiheshimu sana Sheria ya Mungu na anawatia wengine moyo wawe na heshima hiyo pia. Kwa kweli, yeye anasema: “Mtu ye yote atakayevunja amri moja katika hizi zilizo ndogo, na kuwafundisha watu hivyo, ataitwa mdogo kabisa katika ufalme wa mbinguni,” ikimaanisha kwamba mtu kama huyo hangeingia katika Ufalme huo hata kidogo.

Yesu analaumu sana hata mielekeo inayofanya mtu avunje Sheria ya Mungu, acha tu kuipuuza kwenyewe. Baada ya kutaja kwamba Sheria inasema, “Usiue,” Yesu anaongeza hivi: “Bali mimi nawaambieni, Kila amwoneaye ndugu yake hasira itampasa hukumu.”

Kwa kuwa kuendelea kuonea hasira mtu aliye mshirika ni jambo zito sana, labda hata likiongoza kwenye uuaji, Yesu anaonyesha ni wapi mtu anapaswa kufika ili kutafuta amani. Yeye anaagiza hivi: “Basi ukileta sadaka yako madhabahuni, na huku ukikumbuka ya kuwa ndugu yake ana neno juu yako, iache sadaka yako mbele ya madhabahu, uende zako, upatane kwanza na ndugu yako, kisha urudi uitoe sadaka yako.”

Akigeuza fikira zake kuelekea ile ya saba kati ya Amri Kumi, Yesu anaendelea kusema: “Mmesikia kwamba imenenwa, Usizini.” Lakini, Yesu analaumu sana hata kuwa na mwelekeo wa kuamka nyege za kutenda uzinzi. “Mimi nawaambia ninyi kwamba kila mtu anayeendelea kutazama mwanamke ili awe na nyege kwa ajili yake tayari ametenda uzinzi pamoja naye katika moyo wake.” (NW)

Hapa Yesu hasemi juu ya wazo la ukosefu wa adili la dakika tu, bali juu ya ‘kuendelea kutazama.’ Kuendelea kutazama hivyo kunaamsha nyege, ambazo zinaweza kufikia upeo wa kufanya uzinzi ikiwa nafasi inatokea. Mtu anaweza kuzuiaje jambo hilo lisitokee? Yesu anaonyesha jinsi kuchukua hatua zaidi sana huenda kukahitajiwa, akisema: “Jicho lako la kuume likikukosesha, ling’oe ulitupe mbali nawe . . . Na mkono wako wa kuume ukikukosesha, ukate uutupe mbali nawe.”

Mara nyingi watu wanakuwa na nia ya kujinyima mkono au mguu halisi ulio na ugonjwa ili waokoe maisha zao. Lakini kulingana na Yesu, ni jambo la maana hata zaidi ‘kutupa’ kitu cho chote, hata kitu kilicho cha thamani kubwa sana kama jicho au mkono, ili kuepuka mawazo na matendo ya ukosefu wa adili. Ama sivyo, Yesu anaeleza kwamba, watu kama hao watatupwa ndani ya Gehena (rundo la takataka zenye kuchomeka karibu na Yerusalemu), ambayo inafananisha uharibifu wa milele.

Yesu anazungumza pia jinsi ya kushughulika na watu wanaoumiza na kuudhi wengine. “Msishindane na mtu mwovu,” ndilo shauri lake. “Lakini mtu akupigaye shavu la kuume, mgeuzie na la pili.” Yesu hamaanishi kwamba mtu hapaswi kujikinga yeye mwenyewe au jamaa yake ikiwa wanashambuliwa. Kofi halitupwi ili kuumiza kimwili, bali, ili kuchokoza. Kwa hiyo, analosema Yesu ni kwamba mtu ye yote akijaribu kuchochea pigano au ubishi, ama kwa kupiga kofi halisi kwa mkono uliofumbuliwa ama kwa kuchoma sana mtu kwa maneno yenye kuumiza, lingekuwa kosa kulipa kisasi.

Baada ya kuelekeza fikira kwenye sheria ya Mungu juu ya kupenda jirani, Yesu anasema: “Lakini, nawaambia: Endeleeni kuwapenda adui zenu na kusali kwa ajili ya wale wanaowatesa ninyi.” Akitoa sababu yenye nguvu kufanya hivyo, yeye anaongeza hivi: “[Hivyo] mpate kuwa wana wa Baba yenu aliye mbinguni; maana yeye huwaangazia jua lake waovu na wema.”

Yesu anamalizia kisehemu hicho cha mahubiri yake kwa kutoa onyo hili la upole: “Ninyi mtakuwa wakamilifu, kama Baba yenu wa mbinguni alivyo mkamilifu.” Yesu hamaanishi kwamba watu wanaweza kuwa wakamilifu katika maana ya kabisa kabisa. Bali, kwa kuinga Mungu wanaweza kupanua upendo wao utie ndani hata adui zao. Masimulizi ya Luka yanayolingana na hayo yana kumbukumbu hili la maneno ya Yesu: “Endeleeni kuwa wenye rehema, sawasawa na vile Baba yenu alivyo mwenye rehema.” Mathayo 5:17-48, UV; Luka 6:36, NW.

◆ Yesu alionyeshaje heshima nyingi kwa Sheria ya Mungu?

◆ Yesu alitoa mafundisho gani ili kung’oa visababishi vya uuaji na uzinzi?

◆ Yesu alimaanisha nini aliposema juu ya kugeuza shavu lile jingine?

◆ Tunaweza kuwaje wakamilifu kama vile Mungu alivyo mkamilifu?