Ripoti ya Watangazaji Ufalme
Majengo Yaliyopanuliwa Ili Kulingana na Ongezeko la Ufalme
SIKU ya wakfu wa majengo yaliyopanuliwa ya tawi la Mashahidi wa Yehova ilikuwa siku yenye furaha sana katika kisiwa Jamaika cha Karibea. Mpanuko huo ulikuwa umehitajiwa kabisa kwa sababu ya baraka ya Yehova juu ya jitihada za uaminifu za akina ndugu katika kuhubiri habari njema katika kisiwa hicho cha tropiki chenye kupendeza sana.
Makao ya wamisionari yalikuwa yameanzishwa katika Jamaika mapema mwaka 1946. Wamisionari wakiwa wanaongoza kazi, ongezeko katika wahubiri lilitokea haraka sana, hivi kwamba katika muda wa miaka kumi tu wastani wa hesabu ya Mashahidi wenye kuripoti kila mwezi iliongezeka kutoka 732 mpaka 3,216. Ndipo majengo mapya yakahitajiwa kabisa ili kutunza ongezeko hilo.
Katika 1954 sehemu ya ardhi inayofaa ilipatikana na ujenzi ukaanza wa jengo jipya imara la ghorofa mbili katika eneo tulivu la kando kando ya mji wa Kingston. Lilimalizwa Mei 1958. Hesabu ya wahubiri mwaka huo ilipanda ikafikia kilele cha 4,367.
Upandaji na utiaji maji uliendelea naye Yehova ‘akaendelea kufanya ikue’ (1 Wakorintho 3:6, NW), hivi kwamba kufikia 1983 hesabu ya wahubiri ilikuwa imeongezeka ikawa zaidi ya 7,000, jambo hilo likitokeza uhitaji wa mpanuko zaidi. Halmashauri ya Tawi, kwa kibali cha Baraza Linaloongoza, iliamua kupanua majengo ya sasa. Zaidi ya ndugu 250 kutoka sehemu zote za kisiwa walikuja kusaidia. Wafanya kazi walio na wasio na ustadi walijitolea kutumikia wakiwa waashi, maseremala, mafundi wa umeme na wa mabomba ya maji. Umri wao ulitofautiana kuanza 10 mpaka 86. Wengine walichangia mradi huo kwa njia ya pesa, wengine wakachanga chakula kusaidia kulisha wafanya kazi, na bado wengine wakafungua nyumba zao zikaliwe na wafanya kazi wa kujitolea waliotoka mbali. Katika muda wa mwaka mmoja shughuli hiyo, iliyokuwa ya kuongeza ghorofa ya tatu yenye vyumba vitano pamoja na eneo la tafrija, chumba kimoja katika ghorofa ya pili, na nafasi ya kuwekea vitu yenye maeneo ya meta za mraba 37, ilimalizwa, ikawa tayari kutumiwa na washiriki 11 wa jamaa ya Betheli.
Milton Henschel, mshiriki wa Baraza Linaloongoza kutoka Brooklyn, New York, alitoa hotuba ya wakfu Februari 22, 1986, juu ya kichwa “Andamano Lenye Ushindi.” (2 Wakorintho 2:14, NW) Wale wenye kusikiliza programu ya wakfu walijumlika kuwa 2,949—380 wakiwa katika Jumba la Ufalme na sehemu nyingine za jengo, na wale wengine wakiwa wanasikiliza katika Majumba ya Ufalme mengine yaliyo mjini na katika jumba la shule wakifikishiwa habari kwa kamba za simu na redio.
Walio wengi kati ya walioalikwa kwenye Jumba la Ufalme la tawi walikuwa akina ndugu na dada ambao walikuwa wamekuwa katika ukweli miaka 30 au zaidi. Maneno mengi ya uthamini yalisikiwa kwa sababu ya ongezo zuri sana kwa jengo hilo. Ni tumaini letu kwamba wengi zaidi wa “mkutano mkubwa” wa “kondoo wengine” bado watajiunga na hilo andamano lenye ushindi huku majengo ya tawi jipya yakitunza ongezeko la Ufalme katika Jamaika.