Wakati Ujao Wako Njia Nzuri Zaidi ya Kujifunza Juu Yao

KATIKA 1962, wanajimu wa India walitabiri angamizi la ulimwenguni pote “kwa sababu ya sayari nane kuungana kwa njia inayoweza kutukia mara chache sana zikiunda ishara ya Kaprikoni.” Ijapokuwa hivyo, hakuna jambo lililotokea. Hivi majuzi zaidi, mwishoni mwa 1980, hesabu kubwa ya wanajimu Wafaransa walikuwa na oni la kwamba aliyekuwa rais wa Ufaransa wakati huo, Giscard d’Estaing, angechaguliwa tena kwa muhula wa pili. Lakini mpinzani wake, François Mitterrand, ndiye akashinda uchaguzi. Hali kama hizo za kushindwa zinatukumbusha kwamba unajimu si njia hakika ya kujulia wakati ujao.

Basi je! kuna njia nyingine? Kwa mfano, je! jitihada za wanasayansi kutabiri wakati ujao zitakusaidia wewe? Hapa pana utabiri uliofanywa na Taasisi ya McGraw Hill ya United States katika 1970 juu ya mambo ambayo yangetukia kufikia 1980: “Dawa za kushinda kansa, miruko ya vyombo vya anga za juu vyenye watu wa kuviendesha kwenda Mars na Venus, kuwako kwa kituo cha daima mwezini, magari yenye kuendeshwa na umeme, nyumba nyingi zenye kompyuta za matumizi ya kinyumbani, kuwa na uwezekano wa wewe kujichagulia mwenyewe jinsia ya mtoto unayetaka kuzaa, na kuwako kwa televisheni na sinema zenye kuonyesha mazingira matatu ya umbo lile lile moja kwa wakati mmoja.”

Kule nyuma katika 1970, wanasayansi wa taasisi hiyo walikuwa wanasema: “Njia hiyo [ya kutabiri] ina shabaha ya kuja kuweza kutoa utabiri unaotegemeka wenye kufanywa na kikundi cha wastadi wenye kukubaliana maoni.” Lakini matabiri ya wastadi hao yamethibitika kuwa yenye makosa katika nyanja hizo na nyingine nyingi, kama vile siasa na uchumi.

Chanzo Hakika cha Habari

Ikiwa wanajimu na wanasayansi hawawezi kutangulia kuona wakiwa na uhakika wo wote mambo yatakayotukia, je! hiyo inamaanisha kwamba haiwezekani kupata habari zinazotegemeka juu ya wakati ujao? Kabla ya kukatishwa tamaa na jambo hilo, inatupasa tuchunguze Biblia inasema nini juu ya habari hiyo. Kumbuka, Yehova, Mtungaji wa Biblia, anaelezwa kuwa ‘atangazaye mwisho tangu mwanzo, na tangu zamani za kale mambo yasiyotendeka bado.’​—Isaya 46:10.

Neno la Mungu lina mambo mengi ya unabii. Hayo yanatofautianaje na matabiri ya wanajimu? Hili ndilo jibu la kichapo kimoja chenye kichwa The Great Ideas: “Lakini kwa kadiri ambayo uwezo wa wanadamu wenye kufa ulivyo kuhusu kutangulia kujua yatakayotukia, manabii Waebrania wanaonekana kuwa wasio na kifani. Tofauti na waaguzi au wapiga ramli wapagani, . . . haiwi lazima wao watumie mambo ya ustadi au vyombo fulani ili maono yao yaweze kupenya katika siri za kimungu. . . . Kwa kadiri kubwa zaidi semi zao za kiunabii, ambazo ni tofauti na zile za waelezaji wa mafumbo, zinaonekana kuwa zenye kueleweka wazi. Angalau kusudi linaonekana kuwa ni kufunua, si kuficha, mpango wa Mungu juu ya mambo ambayo Yeye Mwenyewe anataka wanadamu watangulie kuona mwendo wa kimungu.”

Mfano wa jambo hilo ni kwamba habari nyingi juu ya Yesu ziliandikwa katika Biblia karne nyingi kabla ya kuzaliwa kwake. Biblia ilitoa unabii wa kwamba yeye angezaliwa katika mji wa Bethlehemu na katika ukoo wa jamaa ya Yese, baba ya Mfalme Daudi. (Mika 5:2; Isaya 11:1, 10) Maandiko yalitabiri pia kwamba yeye angeuawa juu ya mti lakini kwamba hakuna wo wote wa mifupa yake ungevunjwa, kama ilivyofanywa kwa desturi wakati wa kuua watu jinsi hiyo. Maelezo hayo madogo-madogo yakathibitika kuwa kweli, nayo ni mifano michache tu ya yale ambayo mwanachuo mmoja wa Biblia anakadiria kuwa mambo ya unabii zaidi ya 120 yaliyotimizwa katika Yesu.​—Zaburi 22:16, 17, 34:20.

Unabii Watimizwa Leo

Zaidi ya hilo Biblia ina mambo ya unabii yanayoelekeza fikira juu ya siku zetu. Acheni tufikirie moja la mambo hayo yaliyo ya maana zaidi. Inaeleza mfululizo wa matukio ambayo yangetia alama kipindi ambacho kingekuwapo mara tu kabla ya mwingilio wenye kutazamisha wa Ufalme wa Mungu katika mambo ya kidunia. Matukio hayo ni kutia ndani vita ya ulimwengu, matetemeko ya dunia, vipuku vya magonjwa, ukosefu wa chakula, na ongozeko la kutokutii sheria. Je! kuongezeka kwa uzito wa mambo hayo hakujawa tukio lenye kusikika sana katika habari za ulimwengu wakati wa karne yetu ya 20?​—Mathayo 24:3, 7-14; Luka 21:7, 10, 11; 2 Timotheo 3:1-5.

Yesu alieleza kwamba utimizo wa mambo hayo ya unabii ungetangaza kufika kwa Ufalme wake kwa uhakika ule ule ambao majani katika miti yanatangaza kufika kwa masika katika Palestina. Hata alisema wazi kwamba mambo hayo yangepasa kutimizwa katika muda wa ‘kizazi kimoja tu.’ Sasa, pande zote za ishara hiyo, kutia ndani mambo yote madogo-madogo yaliyotajwa juu, zimetimizwa mbele ya macho yetu tangu 1914.a Basi sisi tunaweza kuwa na uhakika kamili kwamba Ufalme utachukua hatua karibuni sana.—Luka 21:29-33.

Jambo jingine lililotolewa katika unabii kwa wakati huu lilikuwa “huzuni kuu ya mataifa wasijue njia ya kutokea.” (Luka 21:25, NW) Sasa, mbona kuna msisimuko huo leo wa mambo ya unajimu na namna nyingine za mafumbo? Gazeti la Kifaransa Le Monde Dimanche linajibu hivi: “Kwa kukabiliwa na hali hiyo yenye kutatiza sana, watu watafanya lo lote kupata kitulizo. Mambo yaliyo mfano wa matabiri ya matukio yanatoa faraja kubwa bila mtu kufanya jitihada kubwa, na katika kizazi hiki cha kisayansi ambacho kimetimiza mambo ya kuogopesha sana kama vile matendo hodari ya nguvu za nyukilia na kugawanya chembe ya kurithi tabia za uzazi, watu wanashawishiwa wakimbilie mambo yasiyojulikana na yasiyo ya kiakili, wakijaribu kugundua upya maana ya maisha.” Kwa hiyo haitupasi kushangazwa na jambo la kwamba watu wanapendezwa ko kote na mazoea ya kifumbo, kama vile unajimu. Hiyo ni moja ya dalili za “huzuni kuu” ambayo inawapata watu leo kwa utimizo wa unabii wa Yesu.

‘Inua Juu Kichwa Chako’

Inawapasa Wakristo wafanye nini wanapoona mambo yote hayo? Je! wajiachilie waingii na woga, kama watu wanaowazunguka? Yesu alitoa shauri linalofuata: “Lakini mambo hayo yaanzapo kutokea, jiinueni wima na kuinua vichwa vyenu juu, kwa sababu ukombozi wenu unakaribia.”—Luka 21:28, NW.

Je! wewe ungependa kujua wakati ujao wako kwa urefu zaidi? Basi chukua wakati wa kuchunguza Biblia kwa kina na ‘uzijaribu semi zilizoongozwa kwa roho, uone kama zimetokana Mungu.’ (1 Yohana 4:1, NW) Unaweza kufanya hivyo kwa msaada wa gazeti Mnara wa Mlinzi linalozungumza kwa ukawaida mambo ya unabii wa Biblia na kueleza matumizi yayo kwa siku zetu. Hivyo, wewe, pia, utaweza ‘kuinua kichwa chako’ juu unapoendelea kusadiki kwamba mwisho wa ulimwengu wa sasa wenye machafuko uko karibu. Utajua pia mambo ambayo lazima ufanye ili ufurahie baraka za Ufalme wa Kimasihi, ambao karibuni utaingilia mambo ya ulimwengu kwa manufaa ya watu wote wenye mioyo inayofaa.

[Maelezo ya Chini]

[Sanduku katika ukurasa wa 5]

“[Na] Ikatukia Hiyo Ishara”

“Kuna ubaya gani kwenda kwa mbashiri-matukio au kusoma nyota yako katika gazeti? Je! hiyo si njia ya kufurahisha tu isiyo na madhara?”

Biblia haichukui jambo hilo vivi hivi tu. Kwa kweli, inatutahadharisha sisi dhidi ya watu wanaotumiwa na roho waovu na dhidi ya waaguzi. Katika kitabu cha Kumbukumbu, Yehova anatoa onyo linalofuata: “Kukizuka katikati yako nabii, au mwotaji wa ndoto, akikutolea ishara au ajabu, [na] ikatukia hiyo ishara au hiyo ajabu aliyokuambia, akisema, Na tuifuate miungu mingine usiyoijua,... wewe usiyasikize maneno ya nabii yule, au yule mwotaji wa ndoto.”​—Kumbukumbu 13:1-3.

Angalia kwamba Maandiko hayatii shaka kwamba mengine ya matabiri ya wanaotumiwa na roho waovu na wanajimu huenda yakawa kweli. Bali, Biblia inatuonya, ikiwa matabiri hayo yanategemea ishara katika mbingu au njia nyingine za uaguzi, yanatokana na mashetani, ni yenye kudanganya, na yanaweza kuondoa watu kwenye yule Mungu wa kweli.​—Ona Matendo 16:16-18.

Kuelekeza fikira kwa unayoambiwa na wanajimu au wengine wanaodai kutabiri wakati ujao ni kujitia katika hatari ya kupatwa na matatizo mazito ya kiroho na kuja kujikuta ukiwa mtumwa wa “roho waovu katika mahali pa kimbingu.” (Waefeso 6:12, NW) Hivyo, Mungu anaona kuendea watu hao kuwa dhambi nzito, wale wanaozoea mambo kama hayo ni “chukizo” machoni pake na hawatarithi Ufalme wake.​—Ufunuo 22:15.

Hivyo ni kwa faida yetu wenyewe kwamba Biblia inatutahadharisha dhidi ya unajimu na namna nyingine zote za uaguzi.

[Sanduku katika ukurasa wa 6]

BIBLIA ILITABIRI MAPEMA KWAMBA:

◆ Yesu angezaliwa katika Bethlehemu. —Mika 5:2

◆ Angezaliwa katika jamaa ya Yese, baba ya Mfalme Daudi.​—Isaya 11:1,10

◆ Angeuawa juu ya mti.​—Zaburi 22:16,17

◆ Hakuna wowote wa mifupa yake ungevunjwa.​—Zaburi 34:20