Broshua Yenye Sura Mpya
HABARI zilizo katika makala iliyotangulia zilitolewa katika mapana ya dunia wakati wa mwaka 1986 kwenye “Amani ya Kimungu” Mikusanyiko ya Wilaya ya Mashahidi wa Yehova. Hapa tunatoa muhtasari ya maelezo zaidi ya kupendeza yaliyotolewa na msemaji:
“Tazama! Nayafanya Yote Kuwa Mapya!”—hicho kilikuwa kichwa cha kijitabu kilichochapishwa na Sosaiti huko nyuma katika 1959. Kijitabu cha jinsi hiyo kilikuwa kimeombwa na wamisionari wa Japani. Uhitaji ulihisiwa huko wa kichapo ambacho kingeutoa ujumbe wa Ufalme katika njia yenye kueleweka na rahisi kwa kuwafaidi wale ambao hawakufahamiana sana na Biblia yenyewe. Chini ya usimamizi wa Sosaiti ya Mnara wa Mlinzi, zaidi ya wamisionari 30 walishiriki katika kukikutunga kijitabu hicho. Je! kijitabu hicho kipya kiliweza kutimiza uhitaji wakati kilipokuja kuwa kifaa kikuu cha kuanzisha mafunzo mapya katika Japani?
Matokeo yanajisemea yenyewe. Wakati kijitabu “Tazama!” kilipotolewa, kulikuwa na kilele cha wahubiri wa Ufalme 1,390 katika Japani. Leo, kilele cha wahubiri ni 114,480. Karibu wote hao walianzishwa funzo la Biblia kupitia kijitabu “Tazama!”. Wakati wa miaka 27 iliyopita, zaidi ya nakala 8,750,000 za kijitabu hicho zimegawanywa katika lugha ya Kijapani peke yake. Na katika miaka 20 iliyopita Japani imeripoti kilele kipya cha wahubiri wa Ufalme kila mwezi isipokuwa miezi miwili tu. Ingawa bila shaka kuna sababu nyingine zinazochangia ongezeko hilo zuri, hakuna shaka kwamba kukitumia kijitabu “Tazama!” kuanzisha mafunzo ya Biblia kumekuwa ndilo jambo kubwa.
Sasa kijitabu hicho kimefanywa upya kulingana na hali za sasa, kulingana na mahitaji ya wakati uliopo, na kilitolewa kwenye “Amani ya Kimungu” mikusanyiko katika ukubwa unaolingana na gazeti kikiwa broshua yenye kurasa 32. Sehemu mpya imeongezwa yenye kichwa, “Mambo Mabaya—Sababu Gani Mungu Anayaruhusu?” Zaidi ya hilo, mafungu ya kumalizia yameandikwa upya ili kumpa mwanafunzi kitia-moyo ashirikiane na tengenezo la Yehova. Sasa kichapo hiki kinatokea kikiwa na maandishi makubwa yanayosomeka kwa urahisi na picha kadha zenye kufundisha. Pambo la jalada jipya la rangi lenye kupendeza sana la broshua hiyo linaonyeshwa kwa ukubwa uliopunguzwa katika ukurasa ule mwingine.
Je! broshua mpya hii, “Tazama! Mimi Ninafanya Vitu Vyote Kuwa Vipya!,” ni ya kutumiwa katika Nchi za Mashariki tu? Bila shaka itakuwa na matokeo mazuri sana huko. Ijapokuwa hivyo, inaaminiwa kwamba broshua “Tazama!” itakuwa yenye msaada sana katika sehemu zote pia za shamba la ulimwengu katika kuanzisha mafunzo ya Biblia. Karibu kizazi kimepita tangu kijitabu cha kwanza kitolewe. Wakati wa muda huo, maarifa ya Biblia yameshuka chini kwenye kina kipya, hata katika nchi ambazo zinajidai kuwa za Kikristo. Badala ya kusikiliza kutoka kwa wazazi wao hadithi zinazojulikana sana kutoka Biblia, kizazi kipya kimekua huku macho na masikio yacho yakiwa yamekazwa kwenye televisheni, kikiingiza ndani yacho mambo yote ambayo ulimwengu unatoa. Jambo hilo, pamoja na vikengeua-fikira vingine vya ulimwengu wenye kupenda anasa kupita kiasi, limejaza sana saa zenye thamani ambazo zingalitumiwa katika maendeleo ya kiroho. Kizazi cha sasa iwe ni katika Jumuiya ya Wakristo au kwingineko, kinajua machache sana kuhusu Neno la Mungu. Kinahitaji ‘maziwa ya neno,’ kama yanavyoonyeshwa wazi katika broshua “Tazama!”—Waebrania 5:12.
Ulimwenguni kote, kuna watu ambao mioyo yao imeelekea uadilifu na ambao watafurahi sana kujifunza jinsi ambavyo wanaweza kutambulishwa pamoja na “mkutano mkubwa” utakaookoka Har–Magedoni. (Ufunuo 7:9, 14) Katika utumishi wetu wa nyumba kwa nyumba, tunaweza kupata wengi ambao watapendezwa na jalada la kupendeza lenye rangi la broshua na maelezo yenye kupendeza sana kuhusu paradiso katika mafungu ya kwanza. Kwenye ziara ya kurudia, tunaweza kutumia maandiko yaliyoorodheshwa ili tuunge mkono mafungu hayo kuonyesha kwamba tumaini hilo si ndoto tu. Ndipo, kupitia funzo la Biblia la kawaida kwa kutumia broshua “Tazama!”, tunaweza kuwasaidia waingie katika njia ya uzima. Kama Yesu alivyosema katika sala kwa Baba yake, “Na uzima wa milele ndio huu, wakujue wewe, Mungu wa pekee wa kweli, na Yesu Kristo uliyemtuma.”—Yohana 17:3.
Sisi sote na tutumie kwa juhudi broshua hii “Tazama!” katika kuangaza ukweli wa Ufalme, huku “mkutano mkubwa” ukijiunga pamoja na mabaki ya makuhani wa kifalme katika ‘kuangaza nuru yao mbele ya watu.’ (Mathayo 5:16) Jina lisilo na kifani la Bwana Mwenye Enzi Kuu Yehova na litakaswe kwa ukamili. Na ionyeshwe kwa nyakati zote kwamba ahadi za Yehova Mungu, Muumba wa mbingu na dunia, sikuzote ni ‘za uaminifu na za ukweli.’ Yeye ndiye anayetangaza hivi kutoka kiti cha ufalme chake cha kimbingu: “Tazama! mimi ninafanya vitu vyote kuwa vipya.”—Ufunuo 21:5, NW.