Ile Ishara Wewe Unaitii?
“SISI tunataka watu wa kila nchi wafurahie ufanisi, hali njema na furaha. Barabara ya kufikia jambo hilo inategemea kusonga mbele kwenye ulimwengu usio na nyukilia, usio na jeuri.”—Perestroika, kilichotungwa na kiongozi Mrusi Mikhail Gorbachev.
Kwa njia iliyo haki, wengi wanatia shaka juu ya kama mwanadamu kweli ana uwezo wa kutokeza hali kama hizo za ulimwengu. Kiongozi mwingine, Yesu Kristo, aliahidi jambo fulani chenye utukufu zaidi—dunia-paradiso ambamo hata ule utaratibu wa kufa-kufa utageuzwa. (Mathayo 5:5; Luka 23:43; Yohana 5:28, 29) Bila shaka, njia ya kutimizia jambo hilo ni hatua ya kimungu ya kuingilia mambo. Katika kujibu swali la ni “lini” hatua hiyo ya kuingilia mambo ingekuja, Yesu alisema: “Ufalme wa Mungu hauji kwa mwonekano wa kutazamisha.” Hapo kwanza, ni wenye macho ya uchunguzi wa makini tu walio na jicho la kitamathali lililo kama la tai ambao wangeng’amua jambo hilo. (Luka 17:20, 37, NW) Kwa nini?
Sababu kwa Nini Sisi Tunahitaji lle Ishara
Tangu kupaa kwake mbinguni, Yesu Kristo ‘hukaa katika nuru isiyoweza kukaribiwa; wala hakuna mwanadamu aliyemwona, wala awezaye kumwona.’ (1 Timotheo 6:16) Hivyo, macho halisi ya kibinadamu hayatamwona yeye tena. Kama vile Yesu alivyosema katika siku ya mwisho ya maisha yake ya kidunia: “Bado kitambo kidogo na ulimwengu haunioni tena.” (Yohana 14:19) Lakini yeye anaweza kuonwa kwa njia ya kitamathali tu.—Waefeso 1:18; Ufunuo 1:7.
Hata hivyo, Yesu alisema kwamba ingewezekana wanafunzi wake kutambua wakati Ufalme wa Mungu ungeanza kutawala Jinsi gani? Kupitia ishara fulani. Katika kujibu lile swali, “Ni nini itakayokuwa ishara ya kuwapo kwako?” Yesu alipangilia muhtasari wa uthibitisho wenye kuonekana wa utawala wake usioonekana wa wakati ujao.—Mathayo 24:3, NW.
Kilichotiwa katika ile ishara kilikuwa kielezi chenye kuonyesha ni watu wa aina gani wangenufaika kutokana nayo. “Po pote ulipo mzoga,” akasema Yesu, “ndipo watakapokusanyika tai [pamoja, NW].” (Mathayo 24:28) Wote wanaotaka kuokoka mwisho wa mfumo uliopo waingie katika ulimwengu mpya wa Mungu lazima ‘wakusanyike pamoja’ na kufurahia chakula cha kiroho pamoja na “wateule” wa Kristo walio kama tai—Mathayo 24:31, 45-47.
Kujihadhari Dhidi ya Ukosefu wa Subira
Hakuna mwanadamu anayeweza kukadiria-kadiria mpaka aipate tarehe ya mwisho wa mfumo mbovu uliopo. “Habari ya siku ile na saa ile hakuna aijuaye, hata malaika walio mbinguni, wala Mwana, ila Baba.”—Marko 13:32, 33.
Ingawa hivyo, je! huenda ikawa kwamba ile ishara ingeweza kutukia katika muda mrefu wa vizazi vingi vya kibinadamu? Hapana. Ile ishara imepasa kutukia wakati wa kizazi kimoja hususa. Kizazi kile kile kimoja kilichoshuhudia mwanzo wa ile ishara ndicho kitashuhudia pia upeo wayo katika “dhiki, jinsi isivyokuwa tangu mwanzo wa kuumba.” Wanahistoria watatu, Mathayo, Marko, na Luka, walitia katika kumbukumbu ya maandishi uhakikisho wa Yesu wa jambo hilo.—Marko 13:19, 30; Mathayo 24:13, 21, 22, 34; Luka 21:28, 32.
Hata hivyo, kuna hatari ya kukosa subira. Miaka 74 imepita tangu mfoko wa Vita ya Ulimwengu 1 katika 1914. Kutokana na kituo cha rai ya kibinadamu, huenda huo ukaonekana kama wakati mrefu sana. Lakini Wakristo fulani wenye macho kama ya tai ambao waliona Vita ya Ulimwengu 1 wangali hai, tena sana. Kizazi chao hakijapitilia mbali.
Wakati yeye alipotoa ile ishara, Yesu alionya juu ya hatari ya kukosa subira. Yeye alinena juu ya watu mmoja mmoja ambao wangesema katika moyo wao: “Bwana wangu anakawia.” Yesu alionyesha kwamba hisia hizo, zisipochungwa, zingeweza kuongoza kwenye kitendo cha upumbavu. (Mathayo 24:48-51) Mitume wa Kristo walisema mengi zaidi kuhusu hilo.
“Wenye Kudhihaki”
Kulingana na Yuda mwandikaji wa Biblia, mitume wa Kristo walivumisha onyo linalofuata: “Wakati wa mwisho watakuwako watu wenye kudhihaki, wakizifuata tamaa zao wenyewe za upotevu [za mambo yasiyo ya kutii Mungu, NW].”—Yuda 17, 18.
Mahali pa tamaa ya uhai katika ulimwengu mpya ulio safi panaweza kwa urahisi kuchukuliwa na ‘tamaa za mambo yasiyo ya kutii Mungu.’ Hilo ni jambo hatari hasa leo kwa sababu ya mbinu za ulimwengu zinazofanywa kwa mitazamisho na kwa mawasiliano. Hakujapata kamwe kuwa na wakati katika historia ya kibinadamu ambapo jeuri, upashanaji habari na ulimwengu wa roho, na ukosefu wa adili katika ngono yamekuwa mambo yenye kufuatana-fuatana kwa kadiri hii ya sasa. Mara nyingi hayo ndiyo kichwa cha habari za redio na maonyesho ya kimuziki, na yanaonwa katika programu nyingi sana za televisheni, vidio, matangazo ya kibiashara, vitabu, na magazeti.
Ile ishara inaelekeza kwenye mwisho wa ukosefu huo wa kutii Mungu. Basi, ni jambo la kiasili kwamba watu fulani walio na hamu ya mambo yasiyo ya kutii Mungu wanadhihaki ile ishara. Kama ilivyotabiriwa, wao wanabisha kwamba “vitu vyote vinakaa hali iyo hiyo, tangu mwanzo wa kuumbwa.”—2 Petro 3:3, 4.
‘Upendo Wapoa’
Hivi majuzi, mtungaji Mwamerika mwenye umri wa miaka 75, Paul Bowles, alihojiwa na gazeti Newsweek. Akijibu swali, “Rai yako wewe ni nini juu ya ulimwengu?” Bowles alisema: “Ulimwengu umevunjika vipande-vipande katika maana ya kiadili. Hakuna mtu aliye mfuataji haki tena kama walivyokuwa miaka 60 iliyopita. Kulikuwako hali ya kufikiria mwungwana ni nani; hiyo ilikuwa sifa yenye kuthaminiwa ya utamaduni wetu wa Magharibi. Sasa hakuna mtu [anayejali]. Pia mkazo mwingi mno unatiwa juu ya pesa.”
Hali hiyo iko sawa na vile Biblia ilivyotabiri. Yesu alitabiri hivi: “Kwa sababu ya kuongezeka maasi, upendo wa wengi utapoa.” (Mathayo 24:12; 2 Timotheo 3:1-5) Kadiri ambavyo ubinafsi na pupa inaongezeka, ndivyo upendo kwa Mungu unavyopungua. Watu wengi zaidi na zaidi wanaonyesha kwamba wao wanaweka tamaa zao wenyewe mbele ya sheria za Mungu kwa kujitia katika vitendo vya uhalifu, uvamizi-haramu, mazoea ya biashara zisizofuata haki, ukosefu wa adili katika ngono, na utumizi mbaya wa dawa za kulevya.
Watu fulani wanatambua utimizo wa ile ishara lakini hawachukui hatua kuhusiana nayo kwa sababu ya kujishughulisha sana katika kujifurahisha wenyewe. Kwa upande ule mwingine, kutii ile ishara kunataka uvumilivu katika kuonyesha upendo usio wa ubinafsi kwa Mungu na jirani.—Mathayo 24:13, 14.
“Masumbufu ya Maisha”
Pia Yesu alionya kwamba, mahitaji ya kimwili yaliyo halali, mbali na raha za ubinafsi, yangeweza kufyonza watu fulani katika shughuli hata wasijali ile ishara. Yeye alihimiza hivi: “Jiangalieni, mioyo yenu isije ikalemewa na ulafi, na ulevi, na masumbufu ya maisha haya; siku ile ikawajia ghafula, kama mtego unasavyo; kwa kuwa ndivyo itakavyowajilia watu wote wakaao juu ya uso wa dunia nzima.”—Luka 21:34, 35.
Bila shaka, Biblia inatia moyo kuwa na maisha yenye furaha ya jamaa. (Waefeso 5:24–6:4) Mara nyingi hii inataka kwamba kichwa cha jamaa ahusike katika kazi ya kuajiriwa au shughuli ya namna fulani ili kufanya maandalizi ya kiriziki kwa mke wake na watoto. (1 Timotheo 5:8) Hata hivyo, lingekuwa jambo la kutoangalia sana mambo ya mbele kuruhusu maisha ya mmoja yategemee mambo ya kijamaa, ya kishughuli, na ya kimwili tu. Kwa sababu ya hatari hiyo, Yesu alionya hivi: “Kama ilivyokuwa siku za Nuhu, ndivyo itakavyokuwa katika siku zake Mwana wa Adamu. Walikuwa wakila na kunywa, walikuwa wakioa na kuolewa, hata siku ile Nuhu aliyoingia katika safina, gharika ikashuka ikawaangamiza wote. . . . Hivyo ndivyo itakavyokuwa siku ile atakayofunuliwa Mwana wa Adamu.”—Luka 17:26-30; Mathayo 24:36-39.
‘Kutwaliwa’ au ‘Kuachwa’?
Wakati umesonga sana. Karibuni, Ufalme wa Mungu utachukua hatua kuingilia mambo ili kuyanyoosha. Hapo ndipo kila mwanadamu ataathiriwa katika moja ya njia mbili. Kama vile Yesu alivyoeleza: “Wakati ule watu wawili watakuwako kondeni; mmoja atwaliwa, mmoja aachwa; wanawake wawili watakuwa wakisaga; mmoja atwaliwa, mmoja aachwa.”—Mathayo 24:40, 41.
Wakati huo ulio wa maana kubwa sana uwasilipo, msimamo wako wewe utakuwa nini? Je! wewe utaachwa uwe wa uharibifu, au wewe utatwaliwa kwa ajili ya wokovu? Kukuongoza katika mwelekezo unaofaa, fikiria kielezi ambacho Yesu alitoa: “Po pote ulipo mzoga, ndipo watakapokusanyika tai [pamoja, NW].”—Luka 17:34-37; Mathayo 24:28.
Hivyo Yesu alikazia uhitaji wa kitendo cha kuona mbali, chenye muungamano. Wale wanaotwaliwa kwa ajili ya wokovu ni wale ambao hukusanyika pamoja kwa ukawaida na kunufaika kutokana na ulishaji wa kiroho ambao Mungu anaandaa. Mamilioni wamejionea kwamba malisho hayo ya kiroho yanakuja kupitia ushirika wa ukaribu pamoja na moja la makundi zaidi ya 55,000 ya Mashahidi wa Yehova na kupitia kujifunza vichapo vyenye msingi wa Biblia kama kile ambacho wewe unasoma sasa.
Mashahidi wa Yehova zaidi ya milioni tatu wanaonyesha imani katika ile ishara kwa kushiriki zile “habari njema za ufalme” pamoja na jirani zao. (Mathayo 24:14, NW) Je! wewe unaitikia habari njema hizo kwa mwelekeo chanya? Ikiwa ndivyo, unaweza kuthamini kwa moyo ile ahadi ya kuokoka uingie katika paradiso ya kidunia.
[Picha katika ukurasa wa 5]
Wengi wamefyonzwa sana katika shughuli za anasa hivi kwamba hawajali ile ishara
[Picha katika ukurasa wa 6]
Kutii ile ishara kunahusisha ndani kukusanyika pamoja kujilisha Neno la Mungu