Je! Wema wa Mungu Wakuvutia Wewe?
JE! WEWE una rafiki wa karibu sana? Ikiwa ndivyo, umepata kufikiria ni nini kilichokuvutia kwenye mtu huyo? Je! ni sura yake? Je! ni uhakika wa kwamba mlipendezwa na mambo mamoja? Au ni sifa za kina kirefu zaidi, kama fadhili au hekima? Ikiwa wema ndiyo sifa iliyofanya urafiki wenu ugandamane, basi mna uhusiano wenye utajiri kweli kweli. Wema halisi hupatikana mara haba leo wakati ambapo, kwa kadiri kubwa, watu ni “wasiopenda mema.”—2 Timotheo 3:3.
Kwa Mkristo, uhusiano ulio wa maana zaidi maishani si ule wa pamoja na mwanadamu mwingine bali wa pamoja na Mungu. Kwa hiyo wewe ufikiriapo uhusiano huu, je! umepata kuwaza hivi: ‘Ni ipi ya sifa za Mungu hunivuta zaidi kwa Mungu?’
Sifa Kuu za Mungu
Kwa uhakika, Biblia yaeleza juu ya sifa nyingi za kutokeza za Mungu. Kwa kawaida zile nne ambazo zakaziwa sana ni upendo wake, haki yake, hekima yake, na nguvu zake za uweza-yote. (Kumbukumbu 32:4; Ayubu 12:13; Zaburi 147:5; 1 Yohana 4:8) Kama tungelazimika kuchagua miongoni mwa sifa nne hizi zilizo za kutokeza, labda tungesema kwamba upendo wa Mungu ndio uliotuvutia zaidi. Hata hivyo, wenye kushirikiana kwa ukaribu na upendo wake ni wema wake ambao wapita mwinginewo wote. Waandikaji wa Biblia waliandika kifasaha kuuhusu, na wema huo waweza kuvuta wanadamu waingie katika uhusiano wenye afya na upendezi pamoja na Muumba wao.
Kwa kielelezo, mwishoni mwa karne ya sita K.W.K., nabii Zekaria alipaaza mshangao huu kuhusu Yehova: “Wema wake ni mkubwa kama nini, naye ana sura yenye kuvutia kama nini!” (Zekaria 9:17, AW) Miaka mingi iliyomtangulia Zekaria, Isaya alimsifu Mungu vivyo hivyo alipoandika hivi: “Mimi nitataja fadhili-upendo za Yehova, . . . hata ule wema mwingi sana kwa nyumba ya Israeli ambao yeye amewatolea wao.”—Isaya 63:7, NW.
Karne tatu mapema, Mfalme Daudi alikuwa ameandika kuhusu wema wa Mungu kwa njia yenye kugusa moyo. Daudi aliandika kutokana na aliyojionea mwenyewe, akiwa amekwisha kuona shangwe ya wema huu muda wote wa maisha yake. Mungu alikuwa mwema kwa Daudi kwa kadiri izidiyo, hasa baada ya dhambi zake zilizo nzito sana kuhusiana na Bathsheba na Uria mume wake, wakati ambapo Mungu alimwonyesha rehema. (2 Samweli 12:9, 13) Kwenye Zaburi 31:19, NW, Daudi alijulisha wazi hivi kwa uthamini: “Wema wako ni mwingi kama nini, ambao wewe umeuweka kuwa hazina kwa ajili ya wale wanaokuhofu wewe!”
Je! wewe wathamini wema wa Mungu sawasawa na waabudu hao wa kale? Ikiwa ndivyo, utapata “amani [halisi] ya Mungu, ipitayo akili zote,” na pia moyo utakusukuma kwa kina kirefu ufanye penzi la Mungu nyakati zote. (Wafilipi 4:7) Acheni sasa tufikirie kwa muda mchache ni mambo gani yahusika katika wema wa Mungu na jinsi ulivyo na mweneo wa kustaajabisha. Hakika hiyo itaongeza kina cha uthamini wetu kwa Baba yetu wa kimbingu mwenye upendo.