Muono-Ndani Juu ya Habari
“Kitu Kilicho Hatari Zaidi”
Kesi zilizoandikishwa mahakamani na wagonjwa ambao wamepata ugonjwa wa kufisha kupitia kutiwa damu mishipani zimeanzisha hangaiko jipya kwenye benki nyingi za damu. Kufikia katikati ya mwaka 1989 kesi zaidi ya 300 zilikuwa zimeripotiwa kuwa ziliandikishwa mahakamani dhidi ya benki za damu katika United States. Gilbert Clark, mkurugenzi mtekelezi wa Shirika la Kiamerika la Benki za Damu, alikiri kwamba “umma wataka damu iliyo salama kikamilifu,” lakini akakiri kwamba uhakikikishio kamili wa kupata damu hiyo hauwezi kutolewa.
Vivyo hivyo, Parade Magazine laripoti kwamba mtaalamu wa damu Dakt. Charles Huggins akiri kwamba “ni lazima damu ionwe kuwa yakosa usalama kwa njia isiyoepukika.” Yeye aeleza damu kuwa “kitu kilicho hatari zaidi ambacho sisi hutumia katika tiba.” Tangu mapema 1989 hesabu ya magonjwa ya kuambukiza ambayo benki za damu huyatafuta katika damu imeongezeka yakawa matano (HTLV-l, wenye kushirikishwa na leukemia wa watu wazima wa chembe-T, kaswende, “hepatitis B”, UKIMWI, na “hepatitis C”). Hata hivyo, kulingana na S. Gerald Sandler, mwakilishi wa Msalaba Mwekundu wa Kiamerika, “yaonekana kwamba muda si muda tutaona ugonjwa mwingine haba wenye kuenezwa kwa kutia damu mishipani.” Kujapokuwako uwezekano hatari huo, karibu Waamerika Wakaskazini milioni nne watarajiwa kutiwa damu mishipani wakati wa 1990. Kulingana na mwanasafu wa habari za gazeti W. Gifford-Jones, tatizo ni kwamba “wagonjwa walio wengi hawazungumzi kamwe juu ya uwezekano wa kutiwa damu mishipani, isipokuwa Mashahidi wa Yehova.”
Kwa miongo ya miaka Mashahidi wa Yehova kwa uaminifu ‘wameshika mwiko wa damu’ kwa namna yoyote kama vile Neno la Mungu liamuruvyo kwenye Matendo 15:28, 29; 21:25, NW. Ulinzi ambao jambo hilo limewapa wasipatwe na magonjwa yenye kuambukizwa kupitia kutiwa damu mishipani ni kielelezo cha kwamba yafaa kutii sheria za Yehova Mungu.
Je! Utokomee Bila Kuonwa?
Joachim Cardinal Meisner, aliyekuwa mtu mbishi alipowekwa Februari uliopita awe askofu mkuu wa Cologne, Ujeremani, alisema hivi majuzi kwamba hofu yake iliyo kubwa kabisa ni kwamba huenda siku moja kanisa “likatokomea—na labda likose kuelekezewa fikira na jamii ya watu.” Kulingana na gazeti la Kijeremani Rheinische Post, Meisner alisema hivi: “Nafsi yangu yashuka moyo kwamba jamii ya watu imekuja kuliona kanisa kuwa duni.” Alisema yawezekana kwamba sababu ni kuwa “sisi huongea mengi mno juu ya dunia wala hatuongei ya kutosha juu ya mbinguni, mengi mno juu ya wakati uliopo na kidogo mno juu ya umilele.”
Kwa kujipanga upande mmoja na wanasiasa na wanabiashara wa dunia badala ya kutumaini katika uwezo wa kimbingu kutatua matatizo ya ulimwengu, kwa kweli dini za Jumuiya ya Wakristo zimekanusha dai lao la kuwakilisha masilahi ya Mungu. Jambo hilo litakuwa na matokeo mazito. Kulingana na Biblia, karibuni dini yote bandia itatokomea—hilo likiwa ni tukio ambalo halitapita bila kuonwa na “wafalme wa dunia” na “wafanya biashara wanaosafiri wa dunia,” ambao watalia machozi kutokana na tukio hilo. Kwa sababu hiyo, wapendao uadilifu wahitaji kutii maneno haya: “Ondokeni katika [dini bandia] . . . ikiwa nyinyi hamtaki kupokea sehemu ya tauni zake.”—Ufunuo 18:4, 9, 11, NW.
Mwisho Waonekana
Magazeti fulani hueleza kwamba mauaji yenye kufanywa na serikali mbalimbali au matengenezo yenye kulindwa nayo ni “mauaji ya kiserikali.” Kwa uhakika, katika 1988, asema Gerry O’Connet, msemaji wa Amnesty International, “kulikuwako ongezeko la kuvunjwa kwa haki za kibinadamu, nako kumeendelea katika 1989.” Halafu aongeza hivi: “Mauaji yenye kuvunja sheria zitambuliwazo ulimwenguni pote yamefikia kadiri isiyopata kuwako wakati wowote ule.”
Kulingana na ripoti ya kila mwaka ya Amnesty, tarakimu zayo ni za kuogopesha sana: Wakati wa 1988 kati ya watu 50,000 na 100,000 katika mataifa 29 walichinjwa huku Serikali ikitazama tu kwa kutojali. Miongoni mwao walikuwa watoto, wazee, na wanawake, ambao uhalifu pekee waliotenda ulikuwa ule wa kuwa sehemu ya wachache wa kisiasa au sehemu ya makabila yenye watu wachache au kuwa wanaishi katika maeneo yenye kushindaniwa na vyama vyenye kuzozana. Wenye daraka la mauaji hayo ni pamoja na vikosi vya ufyatuzi wa foleni, wanamapinduzi, wachuuzi wa dawa za narkotiki (za kutuliza hisia), na vikundi vingine vinavyotumia jeuri kwa makusudi ya kisiasa. “Mara nyingi Serikali yenyewe hujificha nyuma ya vikundi vyenye silaha ili kuwakomesha kimwili wapinzani na watu kombo,” lataarifu La Repubblica.
Basi, Neno lililovuviwa la Yehova halifananishi serikali ya kibinadamu na “hayawani-mwitu” bila sababu. (Ufunuo 13:2, NW) Hata hivyo, uhabithi huo wenye kuchochewa na siasa hautadumu kwa wakati usio dhahiri. Kama vile Zaburi 92:7 isemavyo: “Wasio haki wakichipuka kama majani, na wote watendao maovu wakisitawi. Ni kwa kusudi waangamizwe milele.” Ufalme wa Mungu wa kimbingu ulio mikononi mwa Kristo Yesu, yule “Mwana-Mfalme wa Amani,” utafanya hivyo.—Isaya 9:6, NW; Danieli 2:44.