Kufanya Kazi Pamoja na Yehova kwa Uaminifu-Mshikamanifu
“O Mungu, wewe umenifundisha mimi tangu ujana wangu kuendelea, na hadi sasa mimi nafuliza kusema juu ya kazi zako za ajabu.”—ZABURI 71:17, NW.
1. Kwa nini twaweza kusema kazi ni zawadi kutoka kwa Yehova?
KAZI ni mojawapo zawadi za Mungu kwa binadamu. Kwa wazazi wetu wa awali, Adamu na Hawa, Yehova alisema: “Mkaijaze nchi, na kuitiisha.” Huo ulikuwa mgawo mkubwa wa kazi lakini ambao wangeweza kuumudu. Jitihada ya kimwili na kiakili iliyotakwa ingeongeza shangwe ya maisha yao, kupita chochote walichojionea wanyama walioshiriki nao makao ya kidunia.—Mwanzo 1:28.
2, 3. (a) Kazi imekuwa nini kwa wengi leo, na kwa nini? (b) Ni fursa gani ya kufanya kazi ya pekee tunayopaswa kufikiria?
2 Hata katika hali yetu ya kutokamilika, “kazi” yenye kutokeza “mema” ni “karama ya Mungu,” kama alivyoandika mwanamume mwenye hekima Solomoni. (Mhubiri 3:13) Binadamu angali ahitaji kushughulisha fani zake za akili na mwili. Kutokuwa na kazi hususha moyo. Hata hivyo, si kazi yote inayojenga au kustahili. Kwa wengi, kazi ni uchovu, inayofanywa kwa sababu ya lazima ya kutafuta riziki.
3 Hata hivyo, kuna kazi yenye kuthawabisha kikweli ambayo kwayo wote waalikwa kuishiriki. Lakini kuna wapinzani na matatizo mengi ya kushinda kwa wale watakaoishiriki. Kwa nini ni jambo la maana kwamba tustahili kazi hiyo? Twafanyaje hivyo? Kabla ya kujibu maswali hayo, ebu tufikirie hili kwanza:
Twafanya Kazi Kwa Ajili ya Nani?
4. Ni kazi ya aina gani iliyoleta shangwe na uradhi kwa Yesu?
4 Yesu Kristo alisema: “Chakula changu ndicho hiki, niyatende mapenzi yake aliyenipeleka, nikaimalize kazi yake.” (Yohana 4:34) Kufanya kazi kwa uaminifu-mshikamanifu kwa ajili ya Yehova kulimletea Yesu shangwe nyingi na uradhi. Kulimpa kusudi maishani, na mwishoni mwa huduma yake ya miaka mitatu na nusu, angeweza kumwambia kikweli hivi Baba yake wa kimbingu: “Mimi nimekutukuza duniani, hali nimeimaliza kazi ile uliyonipa niifanye.” (Yohana 17:4) Sawa na ambavyo chakula cha kimwili kinavyoruzuku, ndivyo pia kazi yenye upande wa kiroho. Yesu alikazia hili pindi nyingine aliposhauri hivi: “Msitendee kazi chakula chenye kuharibika, bali chakula kidumucho hata uzima wa milele.” (Yohana 6:27) Tofauti na hilo, kazi ambayo haina matunda ya kiroho huongoza kwenye kufadhaika na kifo.
5. Nani aliyepinga kazi njema aliyofanya Yesu, na kwa nini?
5 “Baba yangu anatenda kazi hata sasa, nami ninatenda kazi.” Yesu alielekeza uneni huo kwa Wayahudi waliokuwa wakimlaumu kwa sababu siku ya Sabato alikuwa ameponya mwanamume ambaye alikuwa amekuwa mgonjwa kwa miaka 38. (Yohana 5:5-17) Ingawa Yesu alikuwa akifanya kazi ya Yehova, wapinzani wa kidini walikataa kukiri uhakika huo na walifanya kila jambo waliloweza ili kumkomesha. Kwa nini? Kwa sababu walikuwa wametoka kwa baba yao, Shetani Ibilisi, ambaye sikuzote amepinga kazi ya Yehova. (Yohana 8:44) Kwa kuwa Shetani aweza ‘kujigeuza awe mfano wa malaika wa nuru,’ akitumia “madanganyo yote ya udhalimu,” twahitaji ufahamu wa kiroho na kuwaza kuliko wazi ili kutambua kazi zake zilivyo kikweli. Ama sivyo, huenda tukajikuta tukifanya kazi yenye kupinga Yehova.—2 Wakorintho 11:14; 2 Wathesalonike 2:9, 10.
Wapinzani Wafanya Kazi
6. Kwa nini waasi-imani ni ‘wadanganyaji’? Toa kielezi.
6 Baadhi leo, kama waasi-imani fulani leo, wanafanya kazi kwa ukosefu wa uaminifu-mshikamanifu wakiwa mawakili wa Shetani wa kuharibu imani ya washiriki walioanza kushirikiana karibuni na kundi la Kikristo. (2 Wakorintho 11:13) Badala ya kutumia Biblia tu kuwa msingi wa mafundisho ya kweli, wao hukaza fikira kwenye kuvunjia heshima New World Translation of the Holy Scriptures, kama kwamba Mashahidi wa Yehova huitegemea hiyo kikamili iwaunge mkono. Lakini sivyo ilivyo. Kwa sehemu kubwa ya karne, Mashahidi walitumia hasa King James Version, Douay Version ya Katoliki ya Roma, au tafsiri zozote zilizopatikana katika lugha yao, ili kujifunza ukweli juu ya Yehova na makusudi yake. Nao walitumia tafsiri hizo zamani zaidi katika kupiga mbiu ya ukweli juu ya hali ya wafu, uhusiano baina ya Mungu na Mwana wake, na kwa nini ni kundi dogo tu litaenda mbinguni. Watu wenye habari pia wajua kwamba Mashahidi wa Yehova huendelea kutumia tafsiri nyi-ngi za Biblia katika kazi yao ya kueneza evanjeli ulimwenguni pote. Hata hivyo, tangu 1961, kuongezea hizo wameshangilia kutumia New World Translation, iliyo tafsiri ya kisasa, sahihi na yenye kusomeka vizuri.
7. (a) Ni kwa nini Yesu akana wengi wanaodai kuwa na imani katika yeye? (b) Kwa nini ni jambo la maana kutii ushauri katika 1 Yohana 4:1?
7 Yesu alisema angekana wengi wanaodai kuwa na imani katika yeye. Yeye alikiri kwamba huenda wakatoa unabii, kufukuza pepo, na ‘kufanya miujiza mingi’ katika jina lake. Bado, yeye awatambulisha wao kuwa wafanya “maovu.” (Mathayo 7:21-23) Kwa nini? Kwa sababu hawafanyi mapenzi ya Baba yake wa kimbingu nao hawastahili kwa maoni ya Yehova Mungu. Kazi zisizo za kawaida leo, hata zenye kuonekana kuwa za kimwujiza, zingali zaweza kutokana na mdanganyi-mkuu, Shetani. Mtume Yohana, akiandika barua yake ya ujumla ya kwanza miaka zaidi ya 60 baada ya kifo na ufufuo wa Yesu, alishauri kwamba Wakristo ‘hawapaswi kuamini kila roho, bali wazijaribu hizo roho, kwamba zimetokana na Mungu.’ Sisi twahitaji kufanya vivyo hivyo.—1 Yohana 4:1.
Kazi Zisizothawabisha
8. Twapaswa kuhisije juu ya kazi za mnofu?
8 Hata ikiwa hatufanyi kazi yenye kupinga matunda ya kiroho, kazi zetu ni za bure ikiwa zaendelea kushughulikia tamaa za mnofu wenye dhambi. Mtume Petro alisema kwamba tumefanya muda mrefu “mapenzi ya Mataifa . . . katika ufisadi, na tamaa, na ulevi, na karamu za ulafi, na vileo, na ibada ya sanamu isiyo halali.” (1 Petro 4:3, 4) Bila shaka, hilo halimaanishi kwamba wale ambao sasa ni Wakristo walio wakfu walifanya utendaji huo mbalimbali, bali lamaanisha kwamba mtazamo wa wale ambao wamefanya hivyo ulipaswa kubadilika haraka-haraka kwa kadiri ambavyo njozi yao ya kiroho ilivyositawi. Ulimwengu utawanenea kwa kuwatukana kwa sababu ya wongofu wao; hilo ni jambo la kutazamiwa. Lakini, lazima wabadilike iwapo watakuwa wafanya kazi waaminifu-washikamanifu katika utumishi wa Yehova.—1 Wakorintho 6:9-11.
9. Twajifunza nini kutokana na aliyoona Shahidi aliyeanza kufanya mazoezi kuwa mwimbaji wa tamthiliya?
9 Yehova ametupa sisi zawadi nyingi za kuonea shangwe, muziki ukiwa miongoni mwazo. Hata hivyo, kwa kuwa ‘dunia [ulimwengu, NW] yote hukaa katika yule mwovu,’ Shetani Ibilisi, je! halitii ndani ulimwengu wa muziki? (1 Yohana 5:19) Ndiyo, muziki waweza kuwa mtego wenye hila, kama alivyogundua Sylvana. Yeye alikuwa na fursa ya kupata mazoezi katika Ufaransa awe mwimbaji wa tamthiliya. “Bado mimi nilikuwa na tamaa yenye nguvu ya kutumikia Yehova,” afafanua. “Nilikuwa nikionea shangwe upainia msaidizi na nilitumaini kupatanisha mambo hayo mawili maishani mwangu. Lakini tatizo la kwanza nililopaswa kukabili katika kufuatia kazi-maisha yangu lilikuwa ni ukosefu wa adili. Hapo kwanza, washiriki wangu waliniona kuwa bozi (mjinga) wakati ambapo sikufuatana nao katika maongezi na kielelezo chao cha ukosefu wa adili. Baadaye, mazingira hayo mapotovu yakaanza kunitia sugu, yakinifanya niruhusu mambo ambayo Yehova huchukia. Mmoja wa walimu wangu akawa ananihimiza nifanye uimbaji wangu uwe dini, nami nilifunzwa kuwa mwenye matata jukwaani na kufikiri nilikuwa bora kuliko wengine wote. Hayo yote yalinifanya niwe na wasiwasi. Hatimaye, nikalazimika kujitayarisha kwa ajili ya jaribio pekee. Nilisali kwa Yehova aonyeshe wazi njia nipaswayo kuiendea. Ingawa niliimba vizuri na kuhisi mwenye uhakika, sikuwa miongoni mwa wale waliochaguliwa. Baadaye, niliijua sababu—matokeo yalikuwa yameamuliwa kisiri muda mrefu mbele ya shindano hilo. Lakini mimi nilipata jibu lililo wazi kwa sala yangu na nikaamua kuacha jukwaa la tamthiliya nikafundishe uimbaji nyumbani.” Mwishowe dada huyu aliolewa na mzee mmoja katika kundi la Kikristo, ambako wote wawili sasa watumikia kwa uaminifu-mshikamanifu kuendeleza masilahi ya Ufalme.
10. Wewe wakata shauri gani kutokana na maneno ya Yesu katika Yohana 3:19-21?
10 Yesu alisema: “Kila mtu atendaye mabaya huichukia nuru, wala haji kwenye nuru, matendo yake yasije yakakemewa.” Kwa upande mwingine, “Yeye atendaye kweli huja kwenye nuru, ili matendo yake yaonekane wazi ya kuwa yametendwa katika Mungu.” (Yohana 3:19-21) Ni baraka iliyoje kufanya kazi kwa upatano na mapenzi na kusudi la Yehova! Lakini ili kufanya hilo kwa kufanikiwa, ni lazima sikuzote turuhusu kazi zetu zipekuliwe katika nuru ya Neno la Mungu. Sisi si wakongwe mno na si kuchelewa mno kubadili njia yetu ya maisha na kukubali mwaliko wa kuchukua utumishi wa Yehova unaostahili.
Kufanya “Kazi Njema” Leo
11. Wengi hufuatia nini kuwa “kazi njema,” na ni kwa nini hizo zaweza kuongoza kwenye mfadhaiko?
11 Kazi inayostahili leo lazima ionyeshe uharaka wa nyakati zetu. Watu wengi wenye mioyo myeupe hukubali na kujishughulisha na kazi ambazo mara nyingi huelezwa kuwa “kazi njema,” zinazofanywa kwa manufaa ya aina-binadamu kwa ujumla au kwa lengo moja hususa. Hata hivyo, jinsi kazi ya aina hiyo inavyoweza kufadhaisha! Katika Uingereza, CAFOD (Hazina ya Katoliki kwa Ajili ya Usitawi wa Ng’ambo), likiripoti juu ya kampeni yalo ya msaada wa njaa, lilisema: “Miaka mitatu iliyopita . . . mamilioni ya pauni yalichangwa kwa ajili ya kusaidia wahitaji. Maelfu ya maisha yaliokolewa. Sasa maisha hayo yako hatarini tena . . . Lakini kwa nini? Makosa yalitokea wapi?” Likiendelea na masimulizi yalo, CAFOD Journal lafafanua kwamba matatizo ya muda mrefu hayakutatuliwa na kwamba “mali zinazohitajiwa sana kwa ajili ya usitawi wa binadamu zimetumiwa kuongeza kuni kwenye mzozo [vita ya wenyewe kwa wenyewe].” Bila shaka, umekwisha sikia mawazo kama hayo yakirudiwa na mashirika ya kifadhili yanayoendesha kazi kama hiyo.
12. Jibu pekee kwa matatizo yanayokabili ulimwengu leo ni nini?
12 Njaa ni tatizo lenye uharaka. Hata hivyo, ni nani wanaotambulisha majanga ya leo ya njaa na vita kuwa yatimiza unabii wa Yesu Kristo, wenye kuonyesha mwisho wa mfumo mbovu wa mambo uliopo? (Mathayo 24:3, 7) Ni nani wamechapisha uthibitisho unaounganisha matukio hayo na ukimbiaji wa wale wapanda farasi wanne wanaoelezwa kwa uwazi katika kitabu cha Biblia cha Ufunuo, sura ya 6? Bila kigeu-geu, Mashahidi wa Yehova wamefanya hivyo kwa uaminifu-mshikamanifu katika jarida hili. Kwa nini? Ili kuonyesha kwamba binadamu hawezi kutokeza suluhisho lolote la kudumu. Hiyo haimaanishi kwamba Wakristo hawajali matatizo ya ulimwengu huu. Sivyo kamwe. Wao ni wenye huruma na watafanya yote wawezayo kupunguza taabu. Lakini, kihalisi wanakabili uhakika wa kwamba bila ya ujiingizaji wa kimungu, matatizo ya ulimwengu hayatapata kutatuliwa kamwe. Kama vile maskini, matatizo hayo yataendelea maadamu Shetani ameruhusiwa kuendelea kuwa mtawala wa ulimwengu huu.—Marko 14:7; Yohana 12:31.
Kazi Yenye Thamani Kuu Zaidi
13. Ni nini kazi yenye uharaka zaidi leo, na ni nani wanaoifanya?
13 Uhitaji wenye uharaka zaidi leo ni kuhubiri habari njema za kwamba Ufalme wa Yehova Mungu karibuni utachukua mahali pa serikali zote za kilimwengu na kuleta faraja ambayo watu wenye kuhofu Mungu waitamani. (Danieli 2:44; Mathayo 24:14) Yesu Kristo alifanya kuhubiri Ufalme wa kimbingu kuwa kusudi lake kuu maishani, ingawa kuhubiri kwake kulifanywa kwenye bara la Palestina pekee. Leo, kiwango cha kuhubiri huko ni ulimwengu wote, sawa na alivyosema Yesu ingekuwa. (Yohana 14:12; Matendo 1:8) Kushiriki, hata kwa udogo, katika kazi ya Mungu, ni pendeleo lisilo na kifani. Wanaume na wanawake, wazee kwa vijana pia, ambao wakati fulani hawakuwaza kamwe juu ya kuwa wahubiri wa habari njema wako mbele kabisa katika kazi ya kueneza evanjeli inayotimizwa na Mashahidi wa Yehova leo. Kama vile Noa na familia yake, wao wanafanya kazi ya Mungu kwa uaminifu-mshikamanifu chini ya utume kutoka Kwake, na kwa hiyo katika nguvu Zake, hii ikiwa ni kitangulizi cha mwisho wa huu mfumo wa mambo.—Wafilipi 4:13; Waebrania 11:7.
14. Kazi ya kuhubiri ni yenye kuokoa uhai na wakati ule ule ni ulinzi salama jinsi gani?
14 Kazi ya kutoa ushahidi ya Mashahidi wa Yehova wakati wa hizi siku za mwisho ni yenye kuokoa uhai kwa wale wanaosikiliza na wanaotenda kwa kupatana na habari njema wanazosikia. (Warumi 10:11-15) Pia ni ulinzi kwa wale wanaohubiri. Kwa kupendezwa kwa moyo mweupe kusaidia watu wenye matatizo makubwa zaidi ya yale yetu, hatutaelekea sana kuhangaikia mno matatizo tunayoweza kuwa nayo. Sisi twatambua kwamba ulimwengu huu wa viwango vyenye kuzorota ungependa kutupatanisha na njia zao. Kwa hiyo kujaza akili zetu mawazo ya Mungu wakati tunapohubiri kwatia imani nguvu nyingi sana; ni kwa masilahi yetu yaliyo bora. Ni sawa na alivyosema Shahidi mmoja: “Ikiwa sijaribu kubadili watu ninaokutana nao, wao wangenibadili mimi!”—Linganisha 2 Petro 2:7-9.
Kufanya Kazi Pamoja na Kundi
15. Ni madaraka gani yanayokalia wachungaji wa chini leo, na washiriki wa kiume wa kundi wapaswa kuhisije kwa sababu ya 1 Timotheo 3:1?
15 Waliopendezwa karibuni wanapokuja kundini, wao waja chini ya uangalizi wa Mchungaji Mkuu Zaidi, Yehova Mungu, na Mchungaji Mwema wake, Yesu Kristo. (Zaburi 23:1; Yohana 10:11) Wachungaji hao wa kimbingu wawakilishwa hapa duniani na wachungaji wa chini wa kundi walio na uaminifu-mshikamanifu, wanaume waliowekwa ndani ya makundi. (1 Petro 5:2, 3) Kuwa na cheo hicho ni pendeleo lenye bei kubwa katika hizi siku za mwisho. Kazi ya wachungaji hao ni nzito, yenye kutia ndani si kuongoza tu katika kufundisha kundini na katika kueneza evanjeli bali pia katika kuhami kundi na maadui wa kiroho na misukumo ya mazingira yaliyo mfano wa tufani katika ulimwengu wanamoishi. Hakuna kazi inayostahili zaidi kwa washiriki wa kiume wa kundi kujitahidi kuifikia kuliko ile ya kusaidia kutunza hali njema ya kiroho ya washiriki wa kundi la Kikristo linalopanuka.—1 Timotheo 3:1; linganisha Isaya 32:1, 2.
16. Wachungaji Wakristo hukamilishana katika njia zipi?
16 Hata hivyo, hatupaswi kusahau kamwe kwamba wachungaji hao ni binadamu, wenye nyutu zinazotofautiana na udhaifu kama sehemu nyingine ya kundi. Ingawa huenda mmoja akafana katika jambo fulani la uchungaji, zawadi za mwingine zitanufaisha kundi kwa upande mwingine. Kazi zao wakiwa wazee Wakristo zakamilishana ili kutia nguvu kundi. (1 Wakorintho 12:4, 5) Roho ya ushindani haipasi kamwe kuingia miongoni mwao. Pamoja wao wafanya kazi ya kulinda salama na kuendeleza masilahi ya Ufalme, “wakiinua mikono iliyotakata [yenye uaminifu-mshikamanifu, NW]” katika sala kwa Yehova, wakitafuta baraka na uongozi wake katika mashauri na maamuzi yao yote.—1 Timotheo 2:8.
17. (a) Sisi tuna jukumu gani? (b) Ni mambo gani tunayohitaji kuepuka ikiwa tutatimiza majukumu yetu kwa kutosheleza?
17 Kazi ya kuhubiri sasa yachukua uharaka zaidi kwa kadiri mwisho wa milki ya Shetani ukaribiavyo. Tukiwa na ukweli wa Neno la Yehova Mungu, tukiwa Mashahidi wake, tuna jukumu la kueneza habari njema katika kila fursa. Kazi iliyopo ni nyingi sana kuweza kutushughulisha, hadi mwisho. Hatupaswi kamwe kujiruhusu tupotoshwe na utafutaji usio wa adili wa raha na anasa au kulemewa na ufuatiaji mali. Hatupaswi kujihusisha na uwazaji wa kudhania-dhania, kujadili juu ya maneno, kwa maana hayo yaweza kuwa yasiyo na faida na yenye kumaliza wakati. (2 Timotheo 2:14; Tito 1:10; 3:9) Wakati wanafunzi walipomwuliza Yesu, “Bwana, wewe warudisha ufalme kwa Israeli katika wakati huu?” Yesu alielekeza tena kufikiri kwao kwenye kazi ngumu ya maana iliyokuwapo, akisema: “Nyinyi mtakuwa mashahidi wangu mimi katika Yerusalemu na katika Yudea yote na katika Samaria na kwenye sehemu ya mbali zaidi sana ya dunia.” Utume huo wapanuka hadi waleo.—Matendo 1:6-8, NW.
18. Kwa nini kufanya kazi pamoja na Yehova kwathawabisha sana?
18 Kufanya kazi pamoja na Yehova, kuhubiri pamoja na kundi lake la ulimwenguni pote leo, kwaleta furaha, uradhi, na kusudi halisi maishani mwetu. Hiyo ni fursa kwa kila apendaye Yehova kudhihirisha ujitoaji na uaminifu-mshikamanifu kwake. Kazi hii yenye pande nyingi haitarudiwa kamwe. Tukiwa na taraja la uhai wa milele lililo wazi mbele yetu, na tuendelee kwa uaminifu-mshikamanifu ‘kutolea Mungu utumishi mtakatifu kwa hofu na tisho la kimungu,’ iwe kwa sifa yake na kwa ajili ya wokovu wetu wenyewe.—Waebrania 12:28, NW.
Jibu Lako Ni Nini?
◻ Yesu alipata shangwe na uradhi kutokana na kazi gani?
◻ Ni nani wanaopinga kazi ya Yehova, na kwa nini?
◻ “Kazi njema” za kilimwengu na kuhubiri habari njema za Ufalme wa Mungu zalinganaje?
[Picha katika ukurasa wa 18]
Yesu aliwapa wanafunzi wake utume waende kuhubiri