“Fanyeni Yote kwa Utukufu wa Mungu”
Mambo Makuu Kutoka Wakorintho ya Kwanza
UTUKUFU wa Yehova Mungu una umuhimu wa kuhangaikiwa na wote wamwabuduo “katika roho na kweli.” (Yohana 4:23, 24) Kwa sababu hiyo, mtume Paulo aliwaambia Wakristo wenzake hivi katika Korintho la kale: “Mlapo, au mnywapo, au mtendapo neno lo lote, fanyeni yote kwa utukufu wa Mungu.” (1 Wakorintho 10:31) Kufanya hivyo hutaka kwamba tuikubali njia ya Yehova ya kutatua matatizo yetu katika ulimwengu huu wenye kufuatia vitu vya kimwili, wenye ukosefu wa adili ambao umehusika mno katika dini bandia.
Wakristo Wakorintho walihitaji msaada wa kimungu ili kutatua matatizo, kwa maana waliishi katika jiji lenye ufanisi na ukosefu wa adili, lililojawa na dini bandia. Ukiwa kwenye isthmasi (shingo ya bara) kati ya Ugiriki ya kikontinenti na Peloponisosi, Korintho ulikuwa ndio mji mkuu wa mkoa wa Kiroma wa Akaya na ulikuwa na idadi ya watu wenye kukadiriwa kuwa 400,000. Paulo alianzisha kundi huko katika karibu 50 W.K.—Matendo 18:1-11.
Wakorintho walikuwa wamemwandikia Paulo wakiuliza juu ya ndoa na kula nyama iliyokuwa imetolewa kwa sanamu. (7:1) Yeye alisononeka kwa sababu migawanyiko na kisa kimoja cha ukosefu mzito wa adili kilikuwa katikati yao. Walihitaji ushauri juu ya njia ifaayo ya kuadhimisha Mlo wa Jioni wa Bwana. Hata kulikuwako tisho la uasi-imani, na kundi lilihitaji shauri juu ya upendo. Kwa sababu hizo, Paulo aliwaandikia Wakorintho barua yake ya kwanza iliyovuviwa akiwa Efeso katika karibu 55 W.K. Lakini sisi pia twaweza kunufaika nayo.
Mwungamano na Usafi wa Kiadili Ni vya Muhimu
Sisi ‘tukifanya yote kwa utukufu wa Mungu,’ hatutafuata mtu yeyote anayetafuta kusababisha mgawanyiko katika kundi—moja la matatizo yaliyokabiliwa na Wakorintho. (1:1–4:21) Paulo aliwahimiza ‘wanene mamoja na kuhitimu katika nia moja na shauri moja.’ Mwungamano utakuwako tukifuata shauri hili na kusitawisha sifa za kiroho. Badala ya kujisifu katika binadamu yeyote mwenye dhambi, twapaswa kukumbuka kwamba ingawa sisi ‘twapanda na kutia maji, mwenye kukuza ni Mungu’ kwa njia ya kiroho. Wenye kujisifu katika Korintho hawakuwa na chochote wasichokuwa wamepokea; kwa hiyo acheni sisi tusijifikirie kamwe kuwa bora kuliko waamini wenzetu. Roho ya unyenyekevu wa jinsi hiyo itatusaidia tuendeleze mwungamano.
Ikiwa mwungamano utaendelea kuwapo, ni lazima wazee waliowekwa wachukue hatua ili kuweka kundi likiwa safi kiroho. (5:1–6:20) Madhali “chachu kidogo hulichachusha donge zima,” waasherati wasiotubu, watu wenye pupa, waabudu sanamu, watukanaji, walevi, au wanyakuzi ni lazima watengwe na ushirika. Ukosefu wa usafi wa kiadili, ambao huchafua hekalu la Mungu, ni lazima usivumiliwe miongoni mwa watu wa Yehova. Badala ya hivyo, ni lazima wafanye mambo yatukuzayo Mungu.
Uwe Mwenye Ufikirio kwa Wengine
Ili ‘tufanye yote kwa utukufu wa Mungu,’ twahitaji kutumia shauri la Paulo juu ya ndoa na useja. (7:1-40) Wale walioungamana katika kifungo cha ndoa wapaswa kutoleana haki ya ngono kwa ufikirio. Mkristo aliyefunga ndoa hapaswi kujitenga kwa mwenzi asiyeamini, kwa maana ku-kaa pamoja huenda kukasaidia huyo apate wokovu. Ingawa ndoa huleta hangaiko lenye kuongezeka, useja waweza kunufaisha mtu anayetamani kusaidia wengine kiroho kwa kumtumikia Bwana bila vikengeusha-fikira.
Kuonyesha ufikirio kwa hali njema ya kiroho ya wengine ndio wajibu wa Wakristo wote, wawe ni waseja au waliofunga ndoa. (8:1–10:33) Kwa sababu hiyo, Wakorintho walishauriwa wasikwaze wengine kwa kula vyakula vilivyotolewa kwa sanamu. Ili kuepuka kuzuia wowote wasizikubali habari njema, Paulo hata hakujizoeza haki yake ya kupokea usaidizi wa vitu vya kimwili. Pia yeye ‘aliutesa mwili wake ili akiisha kuwahubiri wengine, mwenyewe asiwe mtu wa kukataliwa.’ Kuzingatia moyoni matukio ya jangwani ya Israeli wenye dhambi kutatusaidia tuepuke ibada ya sanamu na utendaji makosa. Zaidi ya hilo, ‘kufanya yote kwa utukufu wa Mungu’ kutatusaidia tuepuke kukwaza mtu yeyote.
Onyesha Staha na Udumishe Utaratibu
‘Kufanya yote kwa utukufu wa Mungu’ hutaka kwamba tuonyeshe staha ifaayo. (11:1-34) Mwanamke Mkristo wa karne ya kwanza alionyesha staha kwa ukichwa kwa kuvaa kifuniko cha kichwani wakati wa kusali au kutoa unabii katika kundi. Staha kama hiyo kwa ukichwa huonyeshwa na wanawake wa kimungu leo. Zaidi ya hilo, ili kuepuka kuwa kama Wakorintho waliohitaji sahihisho, ni lazima sisi sote tuonyeshe staha kwa Mlo wa Jioni wa Bwana.
Ili ‘kufanya yote kwa utukufu wa Mungu,’ ni lazima tuendeshe mikutano kwa njia yenye utaratibu. (12:1–14:40) Wakristo wa mapema walipokutana, zawadi za roho kama vile kusema ndimi zilipasa kutumiwa kwa staha na uthamini kwa chanzo na kusudi lazo. Ingawa sasa sisi hatuna zawadi hizo, sisi humletea Mungu utukufu kwa kuonyesha upendo, ambao ni bora kuzipita. Pia sisi humtukuza Yehova kwa sababu mikutano yetu hupangwa vizuri kitengenezo, nasi hutumia shauri la Paulo kwa staha: “Mambo yote na yatendeke kwa uzuri na kwa utaratibu.”
‘Kufanya yote kwa utukufu wa Mungu’ hututaka tustahi fundisho la Biblia na kusimama imara kiroho. (15:1–16:24) Yawezekana kwa sababu ya kuvutwa na falsafa ya Kigiriki, watu fulani katika kundi la Korintho walisema hivi: “Hakuna kiyama [ufufuo, NW] ya wafu.” (Linganisha Matendo 17:18, 32.) Huenda wakawa walishikilia maoni ya uasi-imani kwamba hakungekuwa na ufufuo wa wakati ujao bali Wakristo waliokuwa hai walikuwa wamepata ufufuo wa ufananisho, wa kiroho. (2 Timotheo 2:16-18) Paulo aliliunga mkono tumaini la kweli kwa kutaja ufufuo wa Yesu na pia akaonyesha kwamba ni lazima Wakristo wapakwa-mafuta wafe ili wainuliwe kwenye uhai usiokufa wa kimbingu. Katika njia nyinginezo pia, maneno yake yatusaidia tuepuke uasi-imani na ‘kusimama imara katika imani.’
Sikuzote Fanya Mambo kwa Utukufu wa Mungu
Shauri la Paulo katika Wakorintho ya Kwanza ni lenye manufaa leo kwa kadiri lilivyokuwa katika karne ya kwanza W.K. Huwasukuma Mashahidi wa siku hizi wa Yehova wamtumikie Mungu katika mwungamano wakiwa watu safi. Maneno ya mtume yapasa kutuchochea sisi tuwe wenye ufikirio kwa wengine na kuonyesha staha ifaayo. Aliyosema Paulo yaweza pia kutuimarisha tukinze uasi-imani na kusimama imara upande wa imani ya kweli.
Kwa uhakika, kila mtumishi mwaminifu wa Yehova ana tamaa yenye kuhisiwa moyoni ya kumbariki, kutangaza Ufalme wake, na kutukuza jina lake takatifu. (Zaburi 145:1, 2, 10-13) Kwa uhakika, barua ya kwanza ya Paulo kwa Wakorintho hutusaidia ‘tufanye yote kwa utukufu wa Mungu.’
[Sanduku/Picha katika ukurasa wa 24, 25]
KAWA NA UHAKIKA WA KUFA: Zaidi ya mara moja katika barua zake kwa Wakorintho, Paulo alidokeza juu ya kifo katika uwanja wa mapambano ya kumalizana. Mathalani, aliandika hivi: “Nadhani ya kuwa Mungu ametutoa sisi mitume mwisho, kama watu waliohukumiwa wauawe; kwa sababu tumekuwa tamasha kwa dunia; kwa malaika na wanadamu.” (1 Wakorintho 4:9) Huenda ikawa Paulo alikuwa akifikiria maonyesho ya bestiarii (wanaume waliopigana na hayawani) na wanaume wapambani (waliopigana na wanaume wengine). Baadhi yao walipigana ili walipwe mshahara, lakini wahalifu walishurutishwa kupigana. Ingawa hapo kwanza waliruhusiwa kutumia silaha, baadaye wafungwa hao waliletwa peupe bila kuvalishwa mavazi, bila kinga, wakiwa na uhakika wa kufa.
Huku watazamaji wakiwa ni “malaika” na “wanadamu” (wala si “ulimwengu” wa ainabinadamu tu), mitume walikuwa kama wale waliokaribia kufa katika tamasha hiyo ya umwagikaji damu. Paulo alisema ‘alipigana na hayawani wakali kule Efeso,’ lakini watu fulani hutia shaka kwamba raia Mroma angalitiishwa kwenye jambo hilo na husema kwamba alikuwa akidokeza juu ya wapinzani waliokuwa kama hayawani. (1 Wakorintho 15:32) Hata hivyo, taarifa ya Paulo kwamba Mungu alimwokoa “kutoka kitu kilicho kikubwa sana kama kifo” katika wilaya ya Esia (ambako Efeso ulikuwa) yapatana na tukio la kupambana na hayawani-mwitu halisi katika uwanja wa mapambano kuliko vile lipatanavyo na upinzani wa kibinadamu.—2 Wakorintho 1:8-10; 11:23; Matendo 19:23-41, NW.
[Sanduku katika ukurasa wa 25]
ENDELEA KUIONA ZAWADI: Paulo alitumia mambo ya michezo ya zamani ya Kigiriki kutoa kielezi cha mambo muhimu. (1 Wakorintho 9:24-27) Katika mashindano kama ile Michezo ya Isthmasi iliyofanywa baada ya kila miaka miwili karibu na Korintho, programu ilikuwa na mambo ya kukimbia, kupigana ngumi, na matukio mengine. Walipokuwa wakijitayarisha kwa ajili ya mashindano hayo, wakimbiaji na wapiganaji ngumi walipaswa kujizoeza kujizuia, kuishi kwa kula vyakula visivyo vinono vyenye kuleta afya, na kutokunywa divai kwa miezi kumi. Hata hivyo, badala ya kujitahidi ili kuvishwa msokoto wenye kunyauka wa maua ya msunobari au ya mmea mtambaazi ambayo yaliwekwa juu ya washindi wa Michezo ya Isthmasi, Mkristo mpakwa-mafuta hujitahidi kupata taji la uhai usiokufa ambalo haliharibiki. Ili ashinde zawadi hiyo, ni lazima aweke macho yake yakiwa yamekazwa juu yalo na kujizoeza kujidhibiti. Kanuni iyo hiyo yatumika kwa Mashahidi wa Yehova wenye tazamio la uhai wa milele wa kidunia.