“Salini kwa Ajili ya Mtu na Mwenzake”
YEHOVA ndiye “Msikiaji wa sala.” (Zaburi 65:2, NW) Sikuzote yeye husikia sala za wale wenye kujitoa kwake kwa moyo mzima, nasi twaweza kuwa na uhakika kwamba yeye husikiliza wakati wasalipo kwa ajili ya mtu na mwenzake.
Lakini kwa nini kusali kwa ajili ya mtu na mwenzake? Sala hizo zapasa kutolewa kuhusu nini? Na ni sifa gani za kimungu huongezewa ubora tusalipo kwa ajili ya mtu na mwenzake?
Kwa Nini Kusali kwa Ajili ya Mtu na Mwenzake?
Maandiko huwatia moyo watu wa Yehova wasali kwa ajili ya mtu na mwenzake. Sala zilizo kwa ajili ya wengine zilikuwa miongoni mwa maombi rasmi ya mtume Paulo kwa Mungu. (Wakolosai 1:3; 2 Wathesalonike 1:11) Zaidi ya hilo, mwanafunzi Yakobo aliandika hivi: “Salini kwa ajili ya mtu na mwenzake.”—Yakobo 5:16, NW.
Sala kwa ajili ya watumishi wengine wa Mungu huwa na matokeo. Hili laonyeshwa kwenye Yakobo 5:13-18, ambapo Mkristo aliye mgonjwa kiroho ahimizwa kuacha wazee wa kundi “wamwombee, na kumpaka mafuta kwa jina la Bwana [Yehova, NW].” Kusikia sala yao huenda kukaimarisha mtu huyo mwenye kusononeka na kumsadikisha kwamba Mungu atajibu pia sala zake mwenyewe. (Zaburi 23:5; 34:18) Zaidi ya kusali pamoja na mtu huyo, wazee hujaribu kurudisha afya yake kiroho kwa kutaja mawazo ya Kimaandiko yaliyo kama mafuta yenye kutuliza.
Yakobo aongeza hivi: “Na kule kuomba kwa imani kutamwokoa mgonjwa yule, na Bwana [Yehova, NW] atamwinua.” Ndiyo, mgonjwa huyo wa kiroho ataelekea kusaidiwa kwa “kuomba kwa imani” kwa wazee. Zaidi ya hilo, Mungu “atamwinua” awe kwenye afya ya kiroho ikiwa ana nia ya kusaidiwa na Maandiko. Lakini namna gani ikiwa ugonjwa huo wa kiroho watokana na dhambi nzito? Basi, ikiwa mtu huyo ni mwenye toba, Yehova atamsamehe.
Hivyo, Yakobo asema kwamba, “ungameni dhambi zenu ninyi kwa ninyi, na kuombeana, mpate kuponywa. Kuomba kwake mwenye haki kwafaa sana, akiomba kwa bidii. Eliya . . . akaomba kwa bidii mvua isinye; na mvua haikunya juu ya nchi muda wa miaka mitatu na miezi sita. Akaomba tena, mbingu zikatoa mvua, nayo nchi ikazaa matunda yake.” (1 Wafalme 17:1-7; 18:1, 42-45) Mna nguvu katika sala ya mtu mwadilifu ipatanayo na mapenzi ya Mungu.—1 Yohana 5:14, 15.
Sali Juu ya Nini?
Jambo lolote laweza kutajwa katika sala zetu kwa ajili ya mwamini mwenzetu. Kwa kielelezo, Paulo aliomba wengine wasali ili awe na uwezo wa kuzisema habari njema. (Waefeso 6:17-20) Namna gani ikiwa twajua kwamba mtu fulani anajaribiwa? Twaweza kusali kwamba ‘asifanye lo lote lililo baya’ na kwamba Mungu asimwache kwenye kishawishi bali amkomboe kutoka kwa yule mwovu, Shetani Ibilisi. (2 Wakorintho 13:7; Mathayo 6:13) Na ikiwa mtu fulani ni mgonjwa kimwili, twaweza kumwomba Yehova ampe uthibitifu ambao wahitajiwa ili kuvumilia ugonjwa wake.—Zaburi 41:1-3.
Yafaa sikuzote kusali kwa ajili ya waabudu wenzi wenye kunyanyaswa wa Yehova. Paulo na washirika wake walipata mnyanyaso mwingi sana, naye akawaambia hivi Wakristo Wakorintho: “Ninyi nanyi [mwaweza kusaidiana, NW] nasi kwa ajili yetu katika kuomba, ili, kwa sababu ya ile karama tupewayo sisi kwa msaada wa watu wengi [kwa sababu ya nyuso nyingi zenye sala, NW].” (2 Wakorintho 1:8-11; 11:23-27) Hata ikiwa twatiwa gerezani, twaweza kusali kwa ajili ya ndugu wengine wenye kunyanyaswa, sikuzote tukikumbuka kwamba Yehova husikia “sala ya mwenye haki [waadilifu, NW].”—Mithali 15:29.
Hasa twapaswa kusali kwa ajili ya ndugu zetu wachukuao madaraka makubwa ndani ya tengenezo la Yehova. Hii yatia ndani wale ambao huelekeza tengenezo na kutayarisha chakula cha kiroho kigawanywacho na “mtumwa mwaminifu mwenye akili.” (Mathayo 24:45-47) Mathalani, washiriki wa Baraza Linaloongoza la Mashahidi wa Yehova wastahili sala zetu, nasi twaweza kusali kwamba Mungu awape “roho ya hekima.”—Waefeso 1:16, 17.
Sifa za Kikristo Zaongezewa Ubora
Kwa kusali kwa ajili ya waamini wenzi, twajionyesha wenyewe kuwa wenye kuhangaikia wengine, kuwa wasio na ubinafsi, na wenye upendo. Hangaiko lisilo na ubinafsi na lenye upendo kwa ajili ya ndugu na dada zetu wa kiroho lapatana na wazo la Paulo kwamba upendo “hautafuti mambo yake.” (1 Wakorintho 13:4, 5) Kusali kwa ajili ya wengine ni njia moja ya ‘kutotafuta faida yetu wenyewe tu bali faida ya wenzetu.’ (Wafilipi 2:4, HNWW) Tufanyapo hali njema ya kiroho ya wengine iwe hangaikio letu katika sala, sisi pia hujikuta tukiwakaribia zaidi katika upendo wa kidugu ambao hutambulisha wanafunzi wa Yesu.—Yohana 13:34, 35.
Ubora wa hisia-mwenzi hukuzwa kuelekea wale ambao sisi husali kwa ajili yao. (1 Petro 3:8) Sisi tuna huruma kwao, tukishiriki katika mapendezi na misononeko yao. Katika mwili wa kibinadamu, mkono mmoja ukiumia, ule mwingine huutunza na kujaribu kupunguza mteseko usababishwao na kidonda kile. (Linganisha 1 Wakorintho 12:12, 26.) Vivyo hivyo, kusali kwa ajili ya ndugu na dada wenye kuteseka hukuza huruma yetu kwao na kutusaidia kuwakumbuka. Ni hasara kwetu ikiwa sisi twakosa kuwafikiria Wakristo wenzetu waaminifu katika sala zetu, kwa maana Mungu na Kristo hawaachi bila kuwajali.—1 Petro 5:6, 7.
Sifa mbalimbali za kimungu huongezewa ubora tusalipo kwa ajili ya wengine. Sisi hupata kuwa wenye uelewevu na wenye subira kuwaelekea. Uchungu ambazo ungewezekana uwepo hung’olewa, hiyo ikiruhusu nafasi ya mawazo yenye kujenga ambayo hutufanya tuwe wenye upendo na shangwe. Kusali kwa ajili ya wengine huendeleza pia amani na mwungamano miongoni mwa watu wa Yehova.—2 Wakorintho 9:13, 14.
Endeleeni Kusali kwa Ajili ya Mtu na Mwenzake
Kama Paulo, sisi twaweza kuwaomba wengine wasali kwa ajili yetu. Zaidi ya kusali pamoja nasi, huenda rafiki zetu wakasali kwa Mungu kwa faragha kwa ajili yetu, wakitutaja majina, wakitaja tatizo letu, na kuomba kwamba atusaidie. Na msaada utakuja, kwa maana “Bwana [Yehova, NW] anajua jinsi ya kuwaokoa katika majaribu watu wanaomcha Mungu.”—2 Petro 2:9, HNWW.
Mashahidi wa Yehova ambao hututaja sisi katika sala zao wana majaribu pia—yawezekana yenye kusononesha kuliko yetu wenyewe. Ingawa hivyo, wao hubeba mahangaiko yetu mbele za Mfalme wa Umilele, labda hata kutoa machozi kwa ajili yetu. (Linganisha 2 Wakorintho 2:4; 2 Timotheo 1:3, 4.) Yatupasa kuwa wenye shukrani kama nini kwa jambo hilo! Kwa hiyo, kwa sababu ya uthamini na sababu nyinginezo ambazo zimezungumzwa sasa hivi, acheni tusali kwa ajili ya mtu na mwenzake.