Wewe Unaijua Biblia Vizuri Jinsi Gani?

‘Kitabu cha Tomasi? Ndiyo hakika, hicho kimo katika Biblia. Lakini kitabu cha Yona hakimo. Mahali pa uzaliwa wa Kristo? Enhee, palikuwa Yerusalemu—au palikuwa Nazareti? Kwa kweli sina uhakika kama kitabu cha Isaya kimo katika sehemu ya kwanza au ya pili ya Biblia. Idadi ya mitume? Mimi kwa kweli sijui.’

“HAYO yaliyoonwa baada ya uchunguzi huenda yasishangaze ikiwa habari hizo zingekuwa zimekusanywa kati ya wasio Wakristo peke yao,” linasema gazeti Christianity Today. “Kinachoshangaza—na kutia wasiwasi—ni ukosefu wa maarifa ya Kimaandiko uliopatikana kati ya Wakristo waliozaliwa mara ya pili.”

Kwa mfano, asilimia 22 ya Wakristo wa jina tu ambao walichunguzwa walifikiri kwamba kwa kweli kulikuwa na kitabu cha Tomasi katika Biblia, hali asilimia 13 hawakuwa na uhakika. Kwa habari ya Yona, asilimia 27 walisema kwamba hakimo katika Biblia, na asilimia 12 hawakuwa na habari kamwe. Asilimia sita hawakuweza hata kukisia ni wapi Kristo alikozaliwa, hali asilimia 16 walisema ni Yerusalemu, na asilimia 8 wakasema ilikuwa Nazareti. Asilimia 13 kamili hawakuwa na habari kamwe ni wapi kitabu cha Isaya kingeweza kupatikana katika Biblia, hali asilimia 11 walikiweka katika Maandiko ya Kigiriki ya Kikristo (“Agano Jipya”). Na ingawa walio wengi walijua kwamba walikuwako mitume 12, asilimia 12 walitoa idadi nyingine, kutoka 2 mpaka 20, na asilimia 10 hawakuwa na habari hata kidogo.

Swali lililosumbua zaidi lilikuwa kama maneno “Mungu husaidia wale wanaojisaidia wenyewe” limo au halimo katika Biblia. Ni asilimia 38 tu ya “Wakristo” waliochunguzwa waliojua kwamba hayapatikani popote katika Biblia, hali idadi kubwa zaidi, asilimia 42, walifikiri hilo lilikuwa nukuu la Biblia. Wale wengine wote hawakujua.

“Kwa nini kuna ukosefu mwingi hivyo wa maarifa juu ya Biblia?” linauliza Christianity Today. “Inaelekea sana kwamba, unatokana na ukosefu wa usomaji wa Biblia. Nusu ya Waamerika wote hawaisomi Biblia. Wingi wa Wakristo wote waliozaliwa mara ya pili wanaisoma Biblia mara moja au mbili kwa juma, au hawaisomi hata kidogo. Si ajabu kwamba Wakristo wengi sana wanajua kidogo sana juu ya Maandiko!”