Jihadharini na Waasi-Imani!

Mambo Makuu Kutoka Barua ya Yuda

NI LAZIMA watumishi wa Yehova ‘wachukie lililo ovu’ na ‘waambatane na lililo jema.’ (Warumi 12:9) Mwandikaji wa Biblia Yuda aliwasaidia wengine kufanya hivyo katika barua yake iliyopelekwa kutoka Palestina labda 65 W.K. hivi.

Yuda alijiita “mtumwa wa Yesu Kristo, ndugu yake Yakobo.” Yakobo huyo kwa wazi alikuwa ndugu-nusu wa Yesu aliyejulikana vizuri. (Marko 6:3; Matendo 15:13-21; Wagalatia 1:19) Hivyo basi Yuda mwenyewe alikuwa ndugu-nusu wa Yesu. Hata hivyo, huenda alifikiri haikufaa kutaja kifungo hicho cha mnofu, kwa kuwa Kristo wakati huo alikuwa mtu wa kiroho aliyetukuzwa mbinguni. Barua ya Yuda ilikuwa ya moja kwa moja sana katika kutoa shauri linaloweza kutusaidia ‘kuambatana na lililo jema’ na kujihadhari na waasi-imani.

‘Mshindanie’

Ingawa Yuda alikusudia kuandika kuhusu wokovu unaoshikiliwa na Wakristo wote, yeye aliona ilihitajika sana kuwahimiza wasomaji wake ‘waishindanie imani waliyokabidhiwa.’ (Mistari 1-4) Kwa nini? Kwa sababu wanaume wasiomcha Mungu walikuwa wamejiingiza kwa siri kundini na ‘kubadili neema ya Mungu wetu kuwa ufisadi.’ Wao waliwaza kimakosa kwamba wangeweza kuvunja sheria za Mungu na bado wakae miongoni mwa watu wa Yehova. Tusijiachilie kamwe kwa kusababu kuovu kama huko bali sikuzote tufuate sana uadilifu, tukiwa na shukrani kwamba kupitia damu ya Yesu kwa rehema Mungu alituosha dhambi zetu.—1 Wakorintho 6:9-11; 1 Yohana 1:7.

Maonyo Yaliyowekwa Mbele Yetu

Inahitajika sana kujilinda dhidi ya mielekeo fulani, mwenendo, na watu fulani. (Mistari 5-16) Kwa sababu Waisraeli fulani waliookolewa kutoka Misri walikosa imani, waliharibiwa. Malaika walioacha makao yawafaayo ‘wamewekwa katika vifungo vya milele chini ya giza la kiroho kwa hukumu ya siku ile kuu.’ Ukosefu wa maadili wa kuzidi mno ulileta ‘adhabu katika moto wa milele’ juu ya Sodoma na Gomora. Kwa hivyo, sikuzote na tumpendeze Mungu na tusiache kamwe “njia ya uzima.”—Zaburi 16:11.

Tofauti na yule malaika mkuu Mikaeli, ambaye hata hangeleta hukumu dhidi ya Ibilisi katika maneno ya kutusi, wanaume wasiomhofu Mungu walisema kwa matusi juu ya ‘watukufu,’ kwa wazi wale waliowekewa utukufu fulani juu yao na Mungu na Kristo wakiwa wazee waliopakwa mafuta. Sisi tusionyeshe kutokustahi mamlaka inayotokana na Mungu!

Mifano mibaya ya Kaini, Balaamu, na Kora ilifuatwa na wanaume wasiomhofu Mungu. Walikuwa tisho la kiroho lililolinganishwa na miamba iliyofichwa chini ya maji na walikuwa kama mawingu yasiyo na maji na kama miti mifu iliyong’olewa isiyotokeza manufaa yoyote. Waasi-imani hao walikuwa pia wanung’unikaji, walalamikaji, na ‘wanaopendelea watu wenye cheo kwa ajili ya faida yao.’

Endeleeni Kupinga

Kisha Yuda alitoa shauri juu ya kupinga mavutano mabaya. (Mistari 17-25) “Wakati wa mwisho” kungekuwa wenye kudhihaki, na ni lazima Wakristo wa kweli wawavumilie na maneno yao ya mzaha leo. Kupinga mavutano mabaya kama hayo, tunapaswa kujijenga juu ya ‘imani yetu iliyo takatifu,’ kusali pamoja na roho takatifu, na kuendelea katika upendo wa Mungu, tunapongojea rehema ya Yesu ionyeshwe.

Ni wazi kwamba wakiwa katika hali ya walimu bandia, wanaume wasiomhofu Mungu walifanya wengine wawe na shaka. (Linganisha 2 Petro 2:1-3.) Na wenye shaka walihitaji nini? Walihitaji msaada wa kiroho ili wanyakuliwe kutoka katika “moto,” uharibifu wa milele! (Mathayo 18:8, 9) Lakini wanaomhofu Mungu hawahitaji kuogopa mwisho huo, kwa sababu Yehova atawalinda ‘wasijikwae’ kuingia katika dhambi na uharibifu unaowangojea waasi-imani.

[Sanduku katika ukurasa wa 31]

Miamba Iliyofichwa: Yuda aliwaonya Wakristo wenzi juu ya ‘miamba iliyofichwa chini ya maji katika karamu zao za upendo.’ (Yuda 12) Wakijifanya kuwapenda waamini, waasi-imani hawa walikuwa kama miamba ya chini ya maji yenye vichonge ambayo ingeweza kuvunja merikebu au kukatakata na kuua wanaoogelea. Karamu za upendo zingekuwa karamu ambazo kwazo Wakristo wenye kufanikiwa kimali wangealika waamini wenzi walio maskini. Baba wa Kanisa Krisostomo (347?-407 W.K.) alisema hivi: “Wao wote walikutana kwenye karamu ya ujumla: walio tajiri wakileta vyakula, na walio maskini na wale wasio na chochote wakialikwa, wote walikula karamu pamoja.” Yoyote iliyokuwa namna ya karamu hizo za upendo, onyo la Yuda liliwasaidia waaminifu wajihadhari na ‘miamba iliyofichwa’ iliyo waasi-imani ambayo ingeweza kutokeza kifo cha kiroho. Ingawa Wakristo hawakuamriwa kuwa na karamu za upendo, na hazifanywi leo, watu wa Yehova husaidiana kimali wao kwa wao katika nyakati za uhitaji na pia huwa na ushirika wenye kupendeza.