Kutazama Mbele ya “Amani na Usalama” Wenye Kufanyizwa na Binadamu

Ukweli ni kwamba, wanadamu hawawezi kamwe kuleta amani ya kweli, yenye kudumu. Kwa nini sivyo? Kwa sababu wanadamu sio wavunja-amani halisi, ingawa wanashiriki hatia ya historia yao yenye hatia ya umwagaji damu. Mvunjaji-amani halisi ni mwenye uwezo mwingi kuliko binadamu. Si mwingine ila Shetani Ibilisi, anayeelezwa katika Biblia kuwa ‘akiudanganya ulimwengu wote.’—Ufunuo 12:9.

BIBLIA husema hivi: “Dunia yote pia hukaa katika yule mwovu [Shetani].” (1 Yohana 5:19) Kwa hiyo, ni lazima kupata amani ya kweli na usalama wenye kudumu kuhusishe kumwondoa Shetani mahali pake pa utendaji pamoja na mfumo wa ulimwengu ambao amejenga na ambao kwa wazi unadhibitiwa na yeye. (Linganisha Isaya 48:22; Warumi 16:20.) Wanadamu hawawezi kufanya hivyo.

Basi, amani na usalama waweza kutimizwaje? Kwa uweza wa yule aliye na nguvu nyingi sana kuliko Shetani. Mungu Mweza Yote amewekea kikomo cha wakati wa utendaji wa Shetani miongoni mwa ainabinadamu. Kikomo hicho cha wakati kiwasilipo, ‘uharibifu wa ghafula’ utaujia ulimwengu ulio chini ya uweza wa Shetani. (1 Wathesalonike 5:3-7) Ushuhuda wote unaongoza kwenye umalizio kwamba hilo litatukia karibuni.

Amani na Usalama Sasa!

Ingawaje, ni vipi sasa? Kadiri fulani ya amani na usalama wa kweli inawezekana hata leo. Jinsi gani? Si jinsi viongozi wengi wa kidini wamejaribu, kwa kujihusisha katika siasa za ulimwengu huu, bali ni kwa kufuata amri na shauri za Mungu.

Je! njia hiyo kweli kweli yaweza kutokeza amani? Ndiyo, yaweza. Kwa mfano, Mashahidi wa Yehova wameijaribu na kupata kwamba inawezekana kweli kweli kuonea shangwe amani pamoja na kadiri fulani ya usalama. Kufuata amri za Mungu kama vile zilivyofunuliwa katika Biblia kumewawezesha kuja pamoja wakiwa tengenezo la kimataifa katika amani ya kweli, bila kujali rangi, taifa au lugha yao.—Zaburi 133:1.

Kwa kutii sheria ya kimungu, wao kwa ufananisho ‘wamefua panga zao ziwe majembe na hawajifunzi vita tena kamwe.’ (Isaya 2:2-4) Wanahisi usalama katika upendo wa Mungu nao wana uhakika kwamba ndugu zao wa kiroho huwajali. (Warumi 8:28, 35-39; Wafilipi 4:7) Ikiwa una shaka kama hilo ni kweli, tunakualika uwatembelee katika mojawapo Majumba ya Ufalme yao na kujionea mwenyewe.

Amani na Usalama Ulimwenguni Pote

Hata hivyo, huo sio utimizo wa mwisho wa ahadi ya Biblia ya amani na usalama wa kweli. Hata kidogo! Huo ni wonyesho wa kimbele wa vile ambavyo ulimwengu huu ungekuwa kama kila mtu angefuata sheria za Mungu. Karibuni wonyesho huo wa kimbele utageuka kuwa uhalisi.

Mtume Paulo alisema hivi: “Wakati wasemapo [wale ambao hawamtumikii Mungu], Kuna amani na salama, [wakidhani kwamba hatimaye wameleta amani na usalama kwa njia yao wenyewe] ndipo uharibifu uwajiapo kwa ghafula.” (1 Wathesalonike 5:3) Mungu ataamua kwamba Shetani ameidanganya ainabinadamu muda mrefu wa kutosha. Kisha itakuwa wakati wa kumwondoa penye mahali pake pa utendaji, pamoja na mfumo wa ulimwengu mpotovu ulio chini ya uweza wake. Halafu utakuwa wakati wa utimizo wa unabii wa Danieli: “Na katika siku za wafalme hao Mungu wa mbinguni atausimamisha ufalme ambao hautaangamizwa milele, wala watu wengine hawataachiwa enzi yake; bali utavunja falme hizi zote vipande vipande na kuziharibu, nao utasimama milele na milele.”—Danieli 2:44.

Je, hicho kitakuwa kitendo kisicho haki kwa upande wa Mungu? Bila shaka sivyo. Uharibifu wa ghafula utawajia wale tu watakaoustahili kulingana na hukumu ya Mungu, viwango vya Mungu. Je, wewe una tumaini katika Muumba kwamba ataamua kwa haki katika jambo hilo? Bila shaka twaweza kuacha jambo hilo kwa usalama mikononi mwake! Na kazi yake ya kuhukumu itakuwa na tokeo gani? Mithali yasema hivi: “Maana wanyofu watakaa katika nchi, na wakamilifu watadumu ndani yake. Bali waovu watatengwa na nchi.” (Mithali 2:21, 22) Je, kuna mtu yeyote atakayehuzunika kwa ajili ya kuuawa kwa waovu?

Wavunjaji-amani wakiwa wameondolewa, amani na usalama wa kikweli utakuwa kwa ainabinadamu duniani pote chini ya utawala wa ukarimu wa Ufalme wa Mungu. “Hawatadhuru wala hawataharibu katika mlima wangu wote mtakatifu; maana dunia itajawa na kumjua BWANA [Yehova, NW], kama vile maji yanavyoifunika bahari.” (Isaya 11:9) Je, unaamini ahadi hiyo ya Biblia? Je, una uhakika kwamba mambo hayo yatatukia karibuni? Ikiwa una shaka lolote, tunakutia moyo uchunguze jambo hilo zaidi. Kwa kweli, njia ya Mungu ndiyo njia pekee ambayo mwanadamu atatimiza mradi uliotamaniwa kwa muda mrefu wa amani halisi na usalama wa kikweli.

[Picha katika ukurasa wa 8]

Watu wa Yehova huonea shangwe amani ya kweli na kadiri nzuri ya usalama leo