Yesu Kristo Alikuwaje Nabii Kama Musa?

YEHOVA MUNGU hasemi uwongo. (Tito 1:2; Waebrania 6:18) Kwa hiyo, unabii mbalimbali wa Neno lake, Biblia, unategemeka na ni wa kweli. Utatimizwa kwa hakika.

Miongoni mwa unabii huo wenye kupuliziwa roho kimungu ni ule ambao nabii Mwebrania Musa aliandika kuhusu Mesiya. Akimnukuu Yehova, Musa alitaarifu hivi: “Mimi nitawaondokeshea [Waisraeli] nabii miongoni mwa ndugu zao mfano wako wewe, nami nitatia maneno yangu kinywani mwake, naye atawaambia yote nitakayomwamuru.”—Kumbukumbu la Torati 18:17, 18.

Mtume Petro alitumia unabii huo kwa Yesu Kristo alipoandika hivi: “Musa kweli alisema ya kwamba, Bwana [Yehova, NW] Mungu wenu atawainulieni nabii, katika ndugu zenu, kama mimi; msikieni yeye katika mambo yote atakayonena nanyi.” (Mate-ndo 3:22) Kwa kweli, Yesu mwenyewe alikuwa ametaarifu hivi: “Kama mngalimwamini Musa, mngeniamini mimi; kwa sababu yeye aliandika habari zangu.” (Yohana 5:46) Yesu na Musa walifanana katika njia zipi?

Wenye Kufanana Mapema Katika Kazi-Maisha Zao

Musa na Yesu wote wawili waliokoka kuuawa kwa watoto wa kiume wachanga sana. Kitoto Musa alifichwa kati ya matete kando ya Mto Naili na hivyo akaokoka kuuawa kwa watoto Waisraeli wa kiume kama ilivyoamuriwa na Farao wa Misri. Akiwa mtoto mchanga, Yesu pia aliokoka kuuawa kwa wanaume wenye kufika umri wa miaka miwili katika Bethlehemu na wilaya zake. Machinjo hayo yaliamuriwa na Mfalme Herode Mkuu, ambaye, kama Farao, alikuwa adui wa Mungu na watu Wake.—Kutoka 1:22–2:10; Mathayo 2:13-18.

Roho ya hali pole, au ya usikivu, ilionyeshwa na Musa na Yesu pia. Ingawa alilelewa akiwa mwana katika nyumba ya mfalme wa Misri mwenye nguvu nyingi, Musa alipata ‘kuwa mpole sana zaidi ya wanadamu wote waliokuwa juu ya uso wa nchi.’ (Hesabu 12:3) Kwa ulinganifu, Yesu alikuwa ametumikia mbinguni akiwa Mikaeli mwana-mfalme mwenye nguvu lakini akaja duniani kwa unyenyekevu. (Danieli 10:13; Wafilipi 2:5-8) Isitoshe, Yesu alikuwa na huruma kwa watu naye aliweza kusema hivi: “Jitieni nira yangu, mjifunze kwangu; kwa kuwa mimi ni mpole na mnyenyekevu wa moyo; nanyi mtapata raha nafsini mwenu.”—Mathayo 11:29; 14:14.

Kwa ajili ya utumishi wa Yehova, Musa na Yesu pia waliacha vyeo mashuhuri na utajiri mwingi. Kumtumikia Yehova na watu Wake, Musa aliacha mali na mahali penye fahari huko Misri. (Waebrania 11:24-26) Vivyo hivyo, Yesu aliacha nyuma cheo chenye upendeleo mwingi na utajiri wa mbinguni ili kumtumikia Mungu na watu Wake duniani.—2 Wakorintho 8:9.

Musa na Yesu pia walipata kuwa wapakwa-mafuta wa Mungu. Nabii Musa alitumikia akiwa mpakwa-mafuta wa Yehova kwa taifa la Israeli. Kama alivyosema mtume Paulo, Musa ‘alihesabu ya kuwa kushutumiwa kwake akiwa Kristo [mpakwa-mafuta] ni utajiri mkuu kuliko hazina za Misri.’ (Waebrania 11:26; Kutoka 3:1–4:17) Yesu alikuwa Kristo, au mpakwa-mafuta, wakati gani? Hilo lilitukia alipopakwa mafuta kwa roho takatifu au nguvu ya utendaji ya Mungu, alipobatizwa. Yesu alishuhudia kwamba yeye alikuwa Mesiya, au Kristo, kwa yule mwanamke Msamaria kwenye kisima cha Yakobo huko Sikari na mbele ya kuhani mkuu wa Israeli alipokuwa akijaribiwa.—Marko 14:61, 62; Yohana 4:25, 26.

Musa na Yesu pia walifunga kwa siku 40. Mapema katika kazi-maisha yake akiwa msemaji wa Mungu, Musa alifunga kwa siku 40 alipokuwa katika mlima wa Sinai. (Kutoka 34:28) Yesu alifunga kwa siku 40 katika jangwa na kisha akapinga kishawishi cha kishetani mapema katika kazi-maisha yake akiwa Mesiya aliyeahidiwa.—Mathayo 4:1-11.

Wanaume Wote Wawili Walimtukuza Yehova

Yehova aliwatumia Musa na Yesu pia kulitukuza jina Lake takatifu. Mungu alimwambia Musa awaendee Waisraeli katika jina la ‘BWANA [Yehova, NW], Mungu wa baba zao.’ (Kutoka 3:13-16) Musa alimwakilisha Mungu mbele ya Farao, aliyehifadhiwa ili uwezo wa Yehova uweze kuonyeshwa na jina Lake litangazwe duniani pote. (Kutoka 9:16) Yesu pia alikuja katika jina la Yehova. Kwa mfano, Kristo alisema hivi: “Mimi nimekuja kwa jina la Baba yangu, wala ninyi hamnipokei.” (Yohana 5:43) Yesu alimtukuza Baba yake, alidhihirisha jina la Yehova kwa wale watu aliopewa na Mungu, na akalijulisha sana duniani.—Yohana 17:4, 6, 26.

Kwa nguvu ya kimungu, Musa na Yesu pia walifanya miujiza iliyomtukuza Mungu. Musa alifanya miujiza kuthibitisha kwamba yeye ndiye aliyepewa utume na Yehova Mungu. (Kutoka 4:1-31) Muda wote wa kazi-maisha yake, Musa, aliyetumiwa na Mungu kugawanya maji ya Bahari Nyekundu, aliendelea kufanya miujiza iliyomtukuza Yehova. (Kutoka 5:1–12:36; 14:21-31; 16:11-18; 17:5-7; Zaburi 78:12-54) Vivyo hivyo, Yesu alimletea Mungu utukufu kwa kufanya miujiza mingi. Ilikuwa hivyo sana hata Yesu akaweza kusema hivi: “Mnisadiki ya kwamba mimi ni ndani ya Baba, na Baba yu ndani yangu; la hamsadiki hivyo, sadikini kwa sababu ya kazi zenyewe.” (Yohana 14:11) Mmoja miongoni mwa miujiza yake ulikuwa kukomesha dhoruba kali ya upepo, hivi kwamba Bahari ya Galilaya ikatulia.—Marko 4:35-41; Luka 7:18-23.

Mambo Mengine ya Maana Yenye Kufanana

Musa na Yesu pia walishirikishwa na uandalizi wa chakula wa kimuujiza. Waisraeli walipoandaliwa chakula kimuujiza Musa alikuwa nabii wa Yehova. (Kutoka 16:11-36) Vivyo hivyo, katika vipindi viwili vilivyoandikwa katika Biblia, Yesu aliwalisha watu wengi kimuujiza kwa chakula cha kimwili.—Mathayo 14:14-21; 15:32-38.

Mana kutoka mbinguni iliunganishwa na utumishi wa wote wawili Musa na Yesu. Musa alikuwa akiwaongoza Waisraeli wakati walipoandaliwa mana ambayo ilikuwa ni kama kutoka mbinguni. (Kutoka 16:11-27; Hesabu 11:4-9; Zaburi 78:25) Katika njia yenye kulinganishwa na hiyo lakini yenye umaana sana, Yesu aliandaa mnofu wake mwenyewe kuwa mana kutoka mbinguni kwa ajili ya uhai wa ainabinadamu tiifu.—Yohana 6:48-51.

Musa na Yesu pia waliongoza watu kutoka katika utumwa hadi kwenye uhuru. Musa alitumiwa na Mungu kuwaongoza Waisraeli kutoka katika utumwa kwa Wamisri hadi kwenye uhuru wakiwa watu Wake. (Kutoka 12:37-42) Vivyo hivyo, Yesu Kristo amekuwa akiwaongoza wafuasi wake hadi kwenye uhuru. Kristo bado ataongoza ainabinadamu tiifu hadi katika uhuru kutoka katika utumwa wa tengenezo la Shetani Ibilisi, pamoja na kutoka katika dhambi na kifo.—1 Wakorintho 15:24-26; Wakolosai 1:13; 1 Yohana 5:19.

Musa na Yesu pia walipatanisha maagano. Musa alikuwa mpatanishi wa agano la Sheria, kati ya Yehova Mungu na Waisraeli. (Kutoka 19:3-9) Yesu ni Mpatanishi wa agano jipya, kati ya Mungu na Israeli ya kiroho.—Yeremia 31:31-34; Luka 22:20; Waebrania 8:6-13.

Musa na Yesu Kristo pia walikabidhiwa kutoa hukumu. Musa alitumikia akiwa hakimu na mtoa-sheria kwa Israeli ya kimnofu. (Kutoka 18:13; Malaki 4:4) Yesu atumikia akiwa Hakimu na ameipa “Israeli wa Mungu” ya kiroho sheria na amri zayo. (Wagalatia 6:16; Yohana 15:10) Kristo mwenyewe alisema hivi: “Baba hamhukumu mtu ye yote, bali amempa Mwana hukumu yote; ili watu wote wamheshimu Mwana kama vile wanavyomheshimu Baba. Asiyemheshimu Mwana hamheshimu Baba aliyempeleka.”—Yohana 5:22, 23.

Musa na Yesu pia walikabidhiwa ukichwa juu ya nyumba ya Mungu. Musa alikuwa mwaminifu akiwa kichwa juu ya nyumba ya Mungu katika Israeli ya kale. (Hesabu 12:7) Kwa ulinganifu, Yesu alifanywa Kichwa cha nyumba ya Yehova ya wana wa kiroho na amethibitika kuwa mwaminifu juu yayo. Kwa kweli, Yesu ‘alikuwa mwaminifu kwake yeye aliyemweka, kama Musa naye alivyokuwa, katika nyumba yote ya Mungu. Kwa maana huyo amehesabiwa kuwa amestahili utukufu zaidi kuliko Musa, kama vile yeye aitengenezaye nyumba alivyo na heshima zaidi ya hiyo nyumba. Musa kweli alikuwa mwaminifu katika nyumba yote ya Mungu kama mtumishi, awe ushuhuda wa mambo yatakayonenwa baadaye; bali Kristo, kama mwana, juu ya nyumba ya Mungu; ambaye nyumba yake ni sisi, kama tukishikamana sana na ujasiri wetu na fahari ya taraja letu mpaka mwisho.”—Waebrania 3:2-6.

Musa na Yesu walifanana, hata kwa namna ya kifo. Kwa njia gani? Yehova aliuondoa mwili wa Musa, hivyo akiwazuia watu wasiunajisi au kuufanya uwe sanamu. (Kumbukumbu wa Torati 34:5, 6; Yuda 9) Vivyo hivyo, Mungu aliuondoa mwili wa Yesu, hakuukubali uone uharibifu na hivyo akiuzuia usiwe kikwazo cha imani.—Zaburi 16:10; Matendo 2:29-31; 1 Wakorintho 15:50.

Toa Uangalifu kwa Unabii

Hizo ni baadhi ya njia ambazo Yesu Kristo alithibitika kuwa nabii kama Musa. Maneno ya Mungu kwa Musa kuhusu kuja kwa nabii huyo yalitimizwa vizuri ajabu kama nini!

Hakuna shaka yoyote kwamba Yehova alitimiza ahadi yake ya kiunabii ya kutokeza nabii kama Musa. Maneno ya Kumbukumbu la Torati 18:18 yalitimizwa katika maisha na maono ya Yesu Kristo. Na utimizo wa jinsi hiyo unatupa sababu ya kuwa na uhakikishio katika sehemu nyinginezo za kiunabii za Neno la Mungu. Kwa hiyo, acheni tutoe uangalifu kwa unabii wa Biblia sikuzote.