Kile Ufalme wa Mungu Uwezacho Kumaanisha Kwako

YESU KRISTO alifundisha wafuasi wake wasali: “Ufalme wako uje.” (Mathayo 6:9) Maneno hayo yameelekezewa Mungu mara nyingi kama nini na wale wanaodai kuwa wafuasi wa Yesu!

Hata hivyo, Yesu alifanya zaidi ya kufundisha wanafunzi wake kusali Ufalme wa Mungu uje. Alifanya Ufalme uwe habari kuu ya kazi yake ya kuhubiri. Kwa kweli, Encyclopædia Britannica husema kwamba Ufalme wa Mungu “huonwa kwa kawaida kuwa kichwa kikuu cha mafundisho ya Yesu.”

Wafuasi wa Kristo wanaposali Ufalme uje, wao husali juu ya nini hasa? Ufalme wa Mungu waweza kuwa na maana gani kwao na kwako? Na Yesu aliuonaje?

Maoni ya Yesu Juu ya Ufalme

Yesu mara nyingi alijiita mwenyewe “Mwana wa Adamu [binadamu, NW].” (Mathayo 10:23; 11:19; 16:28; 20:18, 28) Hilo latukumbusha juu ya rejezeo la nabii Danieli kwa “mwana wa binadamu.” Kuhusu tukio la kimbingu la wakati ujao, Danieli alisema hivi: “Nikaona katika njozi za usiku, na tazama, mmoja aliye mfano wa mwanadamu [mwana wa binadamu, NW] akaja pamoja na mawingu ya mbingu akamkaribia huyo mzee wa siku, wakamleta karibu naye. Naye akapewa mamlaka, na utukufu, na ufalme, ili watu wa kabila zote, na taifa zote, na lugha zote, wamtumikie.”—Danieli 7:13, 14.

Akisema juu ya wakati ambao angepokea utawala huo, Yesu aliwaambia mitume wake hivi: “Atakapoketi Mwana wa Adamu [binadamu, NW] katika kiti cha utukufu wake, ninyi nanyi mtaketi katika viti kumi na viwili.” Yesu alisema pia: “Hapo atakapokuja Mwana wa Adamu [binadamu, NW] katika utukufu wake, . . . mataifa yote watakusanyika mbele zake; naye atawabagua kama vile mchungaji abaguavyo kondoo na mbuzi . . . Hao [wasio waadilifu] watakwenda zao kuingia katika adhabu ya milele; bali wenye haki watakwenda katika uzi_-ma [uhai, NW] wa milele.”—Mathayo 19:28; 25:31, 32, 46.

Marejezeo hayo ya kiunabii kwa viti vya utawala na vikundi vyote vya kitaifa yanaonyesha kwamba Ufalme ni serikali ambayo katika hiyo Yesu na baadhi ya wafuasi wake wangekuwa watawala juu ya ainabinadamu. Serikali hiyo ingekuwa na uwezo wa kukatalia mbali wale wasio waadilifu katika kifo. Hata hivyo, chini ya utawala wa Ufalme, wale walio na mwelekeo wenye kufaa wangepokea kutoka kwa Mungu zawadi ya uhai wa milele.

Kwa wazi, basi, Ufalme wa Mungu ni serikali ya kimbingu yenye kufanyizwa kimungu. Ufalme sio kanisa, wala Maandiko hayaruhusu kuwe na maoni ya kilimwengu juu yao. Zaidi ya hayo, serikali ya kupewa na Mungu isingekuwa kitu tu kilicho moyoni mwa mtu. Kwa kuwa Ufalme wa Mungu ni serikali, hauwi kitu kilicho moyoni mwetu tunapokubali Ukristo. Lakini ni kwa nini wengine hufikiri kwamba Ufalme ni hali inayohusu moyo?

Je! Ufalme Umo Ndani Yetu?

Wengine huhisi kwamba Ufalme umo ndani ya moyo wetu kwa sababu ya njia ambayo Luka 17:21 imefasiriwa na watafsiri fulani wa Biblia. Kulingana na New International Version (na Union Version), Yesu alisema hapo: “Ufalme wa Mungu umo ndani yenu.”

Kwa habari hiyo The Interpreter’s Dictionary of the Bible hutaarifu hivi: “Ingawa hutajwa mara nyingi kuwa mfano wa ‘ufumbo’ au ‘undani’ wa Yesu, ufasiri huo hutegemea hasa tafsiri ya zamani, ‘ndani yenu [you],’ . . . unaoeleweka katika maana ya ki-siku-hizi isiyofaa ya ‘yako’ ikiwa katika hali ya umoja; lile neno ‘yenu [you]’ . . . limo katika hali ya wingi (Yesu anasema na Mafarisayo—mstari 20) . . . Ile nadharia ya kwamba ufalme wa Mungu ni hali ya kindani ya akili, au ya wokovu wa kibinafsi, huwa kinyume cha muktadha wa mstari huo, na pia kinyume cha utolewaji wote wa A[gano] J[ipya] wa wazo hilo.”

Kielezi-chini cha Luka 17:21 katika New International Version kinaonyesha kwamba maneno ya Yesu yangeweza kufasiriwa: “Ufalme wa Mungu umo miongoni mwenu.” Tafsiri nyingine za Biblia husoma: “Ufalme wa Mungu umo miongoni mwenu” au “umo kati yenu.” (The New English Bible; The Jerusalem Bible; Revised Standard Version) Kulingana na New World Translation of the Holy Scriptures, Yesu alisema hivi: “Ufalme wa Mungu umo kati yenu.” Yesu hakumaanisha kwamba Ufalme ulikuwa katika mioyo ya Mafarisayo wale wenye kiburi aliokuwa akisema nao. Badala ya hivyo, akiwa Mesiya na Mfalme-Mkusudiwa aliyengojewa kwa muda mrefu, Yesu alikuwa kati yao halisi. Lakini muda fulani ungepita kabla ya Ufalme wa Mungu kuja.

Wakati Ambapo Ungekuja

Baadhi ya wafuasi wa Yesu Kristo wamechaguliwa kuwa watawala wenzake katika huo Ufalme wa Kimesiya wa kimbingu. Sawa na Yesu, wao hufa katika uaminifu kwa Mungu na hufufuliwa waende kwenye uhai wa kiroho mbinguni. (1 Petro 3:18) Wakiwa wachache kwa ulinganifu, wao watakuwa wafalme na makuhani 144,000 walionunuliwa kutoka miongoni mwa ainabinadamu. (Ufunuo 14:1-4; 20:6) Watawala wenzi wa Yesu hutia ndani mitume wake waaminifu.—Luka 12:32.

Akisema na wafuasi wake katika pindi moja, Yesu aliahidi hivi: “Pana watu katika hawa wasimamao hapa, ambao hawataonja mauti kabisa, hata watakapomwona Mwana wa Adamu [binadamu, NW] akija katika ufalme wake.” (Mathayo 16:28) Kwa kupendeza, mstari ufuatao huonyesha kwamba ahadi ya Yesu ilitimizwa siku chache tu baadaye. Wakati huo yeye alipeleka watatu wa wanafunzi wake juu ya mlima mrefu alikogeuka umbo mbele yao, na hivyo wakawa na njozi ya yeye akiwa katika utukufu wa Ufalme. (Mathayo 17:1-9) Lakini Ufalme haukusimamishwa wakati huo. Hilo lingetukia wakati gani?

Kimojawapo vielezi vya Yesu huonyesha kwamba yeye asingewekwa kuwa Mfalme wa Kimesiya mara hiyo. Kwenye Luka 19:11-15, twasoma hivi: “Aliongeza kusema mfano, kwa sababu alikuwa karibu na Yerusalemu, na wao walidhani ya kuwa ufalme wa Mungu utaonekana mara. Basi akasema, Mtu mmoja, kabaila, alisafiri kwenda nchi ya mbali ili ajipatie ufalme na kurudi. Akaita watu kumi katika watumwa wake, akawapa mafungu kumi ya fedha, akawaambia, Fanyeni biashara hata nitakapokuja. . . . Ikawa aliporudi ameupata ufalme wake, aliamuru waitwe wale watumwa aliowapa fedha, ili ajue faida aliyopata kila mtu kwa biashara yake.”

Katika siku hizo ingechukua muda fulani ili mtu aweze kusafiri kutoka Israeli hadi Roma, angojee katika jiji hilo mpaka alipopata utawala wa kifalme, na kurudi mjini kwake akiwa mfalme. Yesu ndiye aliyekuwa yule “kabaila.” Yeye angepokea utawala kuwa Mfalme kutoka kwa Baba yake mbinguni lakini asingewekwa mara hiyo kuwa Mfalme wa Kimesiya. Wafuasi wake wangefanya biashara kwa kuendelea na ile kazi ya kupiga mbiu habari njema za Ufalme kwa muda mrefu kadiri fulani kabla ya yeye kurudi akiwa Mfalme.

Jinsi Ufalme Unavyokuja

Wapendao Mungu huomba nini wanaposali Ufalme wake uje? Kwa kweli wanaomba kwamba Ufalme wa kimbingu uchukue hatua ya kukata maneno kwa kuharibu mifumo ya kiserikali iliyofanyizwa na mwanadamu ambayo imeshindwa kutimiza ahadi yayo ya kuleta amani na ufanisi wa kweli. Akielekezea tukio hilo, nabii Danieli aliandika hivi: “Katika siku za wafalme hao Mungu wa mbinguni atausimamisha ufalme ambao hautaangamizwa milele, wala watu wengine hawataachiwa enzi yake, bali utavunja falme hizi zote vipande vipande na kuziharibu, nao utasimama milele na milele.” (Danieli 2:44) Hilo lingetukia wakati gani?

Yesu alitabiri kwamba hilo lingetukia katika kizazi cha wale ambao wangeshuhudia msukosuko usio wa kawaida katika mambo ya kibinadamu. Kuhusu “kuwapo” kwake, Yesu alitoa “ishara” yenye kutia matukio kama vile vita visivyo na kifani, matetemeko ya dunia, njaa kuu, magonjwa ya kipuku—naam, na kuhubiriwa kwa ulimwenguni pote kwa habari njema za Ufalme wa Mungu.—Mathayo, sura 24, 25, NW; Marko, sura 13; Luka, sura 21.

Unabii wa Yesu hutia ndani mambo yanayotukia hivi leo—katika karne yetu ya 20. Kwa hiyo, haitakuwa muda mrefu kabla ya Ufalme wa Mungu kuletea ainabinadamu mibaraka mitukufu. Wewe waweza kuwa miongoni mwa wale watakaoonea shangwe faida za utawala wa Ufalme. Lakini Ufalme wa Mungu waweza kuwa na maana gani hasa kwako na kwa wapendwa wako?

Mibaraka ya Utawala wa Ufalme

Furaha itaenea duniani pote. Chini ya “mbingu mpya”—ule Ufalme wa kimbingu—kutakuwako “nchi [dunia, HNWW] mpya,” jamii ya duniani pote ya raia watiifu wa Ufalme. “Mungu mwenyewe atakuwa pamoja nao,” akaandika mtume Yohana. “Naye atafuta kila chozi katika macho yao.” Hakutakuwako tena sababu ya jambo lolote ila furaha wakati huo, kwani “wala maombolezo, wala kilio, wala maumivu hayatakuwapo tena.”—Ufunuo 21:1-4.

Kifo hakitakuwapo tena. Kisababishi hicho kibaya sana cha huzuni hakitatunyang’anya tena marafiki na wapendwa. “Adui wa mwisho atakayeangamizwa ni kifo.” (1 Wakorintho 15:26, HNWW) Ni shangwe iliyoje itakayokuwako wakati mahali pa maziko panapochukuliwa na ufufuo wa wale walio katika kumbukumbu la Mungu!—Yohana 5:28, 29.

Afya tele itachukua mahali pa ugonjwa na udhaifu. Vitanda vya hospitali havitajawa tena na wale wanaosumbuliwa na magonjwa ya kimwili na ya akili. Yule Tabibu Stadi, Yesu Kristo, atatumia thamani ya dhabihu yake ya fidia “kuwaponya mataifa.” (Ufunuo 22:1, 2; Mathayo 20:28; 1 Yohana 2:1, 2) Yale maponyo aliyofanya alipokuwa duniani yalikuwa kiolezo tu cha yale atakayofanya kupitia Ufalme huo.—Linganisha Isaya 33:24; Mathayo 14:14.

Ugavi wa chakula utakuwa mwingi. Kama mtunga zaburi alivyosema, “kutakuwako na nafaka tele juu ya dunia; na juu ya milima kutakuwako mfuriko.” (Zaburi 72:16, NW) Kwa hilo, unabii wa Isaya waongezea hivi: “Katika mlima huu BWANA [Yehova, NW] wa majeshi atawafanyia mataifa yote karamu ya vitu vinono, karamu ya divai iliyokaa juu ya urojorojo wake, karamu ya vinono vilivyojaa mafuta, karamu ya divai iliyokaa juu ya urojorojo wake, iliyochujwa sana.” (Isaya 25:6) Kwa hakika, njaa haitawanyemelea wakaaji wa dunia chini ya utawala wa Ufalme.

Dunia yote itakuwa paradiso. Hivyo ahadi hii ya Yesu kwa mtenda maovu mwenye kutubu itatimizwa: “Utakuwa pamoja na mimi katika Paradiso.” (Luka 23:43, NW) Wewe pia waweza kuonea shangwe uhai wa milele kwenye dunia hii, dunia iliyosafishwa uovu na kubadilishwa kuwa tufe lenye kupendeza, lililo kama bustani ya starehe.—Yohana 17:3.

Matarajio hayo mazuri ajabu yamewekwa mbele ya ainabinadamu yote tiifu. Neno la Yehova lililopuliziwa roho, Biblia, hutoa mahakikishio hayo yenye baraka. Na hayo yote ndiyo kile Ufalme wa Mungu uwezacho kumaanisha kwako.

[Picha katika ukurasa wa 7]

Je! unaamini yale ambayo Yesu alisema juu ya Ufalme wa Mungu?