Tumaini Hushinda Kutamauka!

KATIKA Webster’s Ninth New Collegiate Dictionary, kutamauka hufasiliwa kuwa “kukosa tumaini kabisa.” Kwa wazi, basi, ili kushinda kutamauka, tunahitaji tumaini!

Mtu aliye katika hali ya kusikitisha anayelazimika kuishi kwenye kijia cha kando ya barabara hatatamauka kabisa ikiwa ana tumaini. Tumaini laweza kuwapa wale wanaotatizwa na ugonjwa wa kushuka moyo ujasiri na nguvu ya kuvumilia. Lakini ni lazima tumaini hilo liwe lenye kutegemeka! Hilo lamaanisha nini?

Msingi wa Tumaini

Ebu fikiria lile lililompata Sara, mke wa mzee wa ukoo Abrahamu. Akifikia umri wa miaka 90, yeye bado alikuwa tasa na alikuwa amekwisha tamauka zamani juu ya kupata kumzaa mtoto wakati wowote. Hata hivyo, mume wake alipokuwa na umri wa miaka 99, Yehova alirudia ahadi ambayo alikuwa amefanya miaka kadhaa mbeleni—Abrahamu kwa kweli angekuwa na “mbegu,” au mrithi. Abrahamu alijua kwamba hiyo ilikuwa ahadi yenye kutegemeka. Ebu wazia jinsi Sara alivyokuwa mwenye furaha wakati, kwa muujiza, jambo hilo lenye furaha lilipotukia, naye akamzaa Isaka! (Mwanzo 12:2, 3, NW; 17:1-4, 19; 21:2) Tumaini la Abrahamu katika Mungu halikuwekwa pasipofaa, kama vile mtume Paulo alivyoeleza: “[Abrahamu] akiona ahadi ya Mungu hakusita kwa kutokuamini, bali alitiwa nguvu kwa imani, akimtukuza Mungu.”—Warumi 4:20.

Akiwaandikia Wayahudi waliokuwa wamekuwa Wakristo katika siku yake, Paulo alitoa sababu kwamba wangeweza kutegemea ahadi ya Mungu ya wokovu kupitia Yesu kwa sababu mbili za hakika. Akitaja ahadi ya Mungu kwa Abrahamu na kiapo Chake cha kimungu kilichoandama, mtume alitoa hoja hivi: “Wanadamu huapa kwa yeye aliye mkuu kuliko wao; na kwao ukomo wa mashindano yote ya maneno ni kiapo, kwa kuyathibitisha. Katika neno hilo Mungu, akitaka kuwaonyesha zaidi sana wairithio ile ahadi, jinsi mashauri yake yasivyoweza kubadilika, alitia kiapo katikati; ili kwa vitu viwili visivyoweza kubadilika, ambavyo katika hivyo Mungu hawezi kusema uongo, tupate faraja iliyo imara, sisi tuliokimbilia kuyashika matumaini yale yawekwayo mbele yetu.” (Waebrania 6:16-18) Ndiyo, ahadi za Mungu ni za kweli na zenye kutegemeka. Yehova ni mweza yote na aweza kwa njia isiyo na kifani kuthibitisha utimizo wa neno lake mwenyewe.

Tumaini—“Imara na Thabiti”

Paulo aliandika kwamba tumaini la Kikristo ni “imara na thabiti.” (Waebrania 6:19, Habari Njema kwa Watu Wote) Paulo alijua msingi wa tumaini lake. Aeleza hivi: “[Tumaini] lapenya lile pazia.” Hilo lamaanisha nini? Paulo alikuwa akirejezea kwa wazi lile hekalu la kale katika Yerusalemu. Ndani yalo kulikuwa chumba cha Patakatifu Zaidi, kilichotenganishwa na sehemu ile nyingine ya jengo kwa pazia. (Kutoka 26:31, 33; Mathayo 27:51) Bila shaka, hekalu halisi katika Yerusalemu limekwisha haribiwa zamani. Kwa hiyo, leo, hapo Patakatifu Zaidi hulingana na nini?

Panalingana na mbingu yenyewe, ambapo Mungu mwenyewe ametawazwa! Paulo alieleza hilo wakati aliposema kwamba Yesu baada ya kupaa kwake “hakuingia katika patakatifu palipofanyika kwa mkono [katika hekalu Yerusalemu], ndio mfano wa patakatifu halisi, bali aliingia mbinguni hasa, aonekane sasa usoni pa Mungu kwa ajili yetu.” (Waebrania 9:24) Kwa hiyo tumaini la Kikristo, linalotusaidia tupigane vita dhidi ya kutamauka, hutegemea si wanasiasa wa kibinadamu bali mpango wa kimbingu. Linategemea Yule ambaye Mungu aliweka rasmi, Yesu Kristo, aliyetoa uhai wake kuwa fidia ya dhambi zetu na ambaye sasa huonekana usoni pa Mungu kwa ajili yetu. (1 Yohana 2:1, 2) Zaidi ya hayo, kama ionyeshwavyo mara nyingi katika safu za gazeti hili, Yesu uyo huyo ndiye aliyewekwa rasmi kimungu kutawala akiwa Mfalme wa Ufalme wa Mungu wa kimbingu naye amekuwa akifanya hivyo tangu 1914. Ufalme huo wa kimbingu hivi karibuni utaondolea mbali mambo yanayosababisha watu wengi watamauke.

Tumaini—“Nanga ya Nafsi”

Ili kusadikisha wasomaji wake kwamba tumaini lao la wokovu kupitia Yesu lilikuwa na msingi mzuri, Paulo alitumia mfano. “Tunalo tumaini hilo,” akaeleza, “kama nanga ya maisha [nafsi, NW] yetu.”—Waebrania 6:19, HNWW.

Nanga zilijulikana sana kwa wasafiri kama Paulo. Nanga za zamani zilifanana sana na za ki-siku-hizi, mara nyingi zikiwa zimefanyizwa kwa chuma zenye ncha mbili zilizo kama meno za kushika chini ya bahari. Njiani kwenda Roma yapata mwaka 58 W.K., merikebu ya Paulo ilikuwa katika hatari ya kukwama mwambani. Lakini merikebu ilipozidi kuingia kwenye maji machache zaidi, mabaharia ‘walitupa nanga nne za tezi.’ Kwa sababu ya nanga hizo, merikebu hiyo iliokoka dhoruba hiyo kwa usalama.—Matendo 27:29, 39, 40, 44.

Kwa hiyo, ni lazima ufanye nini ili tumaini lako liwe lenye usalama kama nanga hivi kwamba uweze kuokoka ugumu wa kiuchumi, ugonjwa wa kimwili au wa kihisia-moyo, au “dhoruba” zozote ambazo huenda ukapatwa nazo? Kwanza, jihakikishie mwenyewe kwamba ahadi za Biblia ni zenye kutumainika. “Hakikisheni mambo yote.” (1 Wathesalonike 5:21, NW) Kwa mfano, Mashahidi wa Yehova watakaposema na wewe wakati ujao, sikiliza lile watakalosema. Ikiwa hawatembelei hapo mara nyingi, watafute kwenye Jumba la Ufalme lililo karibu zaidi. Hutashurutishwa kujiunga nao, lakini utakaribishwa kukubali mtaala wa funzo la Biblia bila malipo, unaopangwa kuongozwa mahali popote na wakati wowote unaokufaa.

Funzo la jinsi hiyo litakuhakikishia kwamba Mungu “huwapa thawabu wale wamtafutao.” (Waebrania 11:6) Utajifunza kwamba hivi karibuni Ufalme wa Mungu chini ya Mfalme, Kristo Yesu, utaondolea mbali ufisadi na uonevu unaosababisha watu wengi sana watamauke leo. Chini ya Ufalme huo, dunia hii itarudishwa kuwa paradiso, na Mungu atawapa uhai wa milele wale wampendao. (Zaburi 37:29; Ufunuo 21:4) Hilo ni tumaini tukufu kama nini!

Soma Biblia kwa uangalifu ili uone kwamba tumaini hilo ni la kweli. Kisha jitahidi kusitawisha uhusiano wa kibinafsi wa karibu pamoja na Mungu, ukiwa rafiki yake jinsi Abrahamu alivyokuwa. (Yakobo 2:23) Kwa kuwa Yehova ndiye “Msikiaji sala,” mwambie mahangaiko yako. Ikiwa sala yako inatolewa kwa unyofu, basi hiyo itakusaidia uondoe mizigo yako na kushinda kutamauka kwako. Roho ya Mungu huenda pia ikafungua njia ya kubadili ile hali inayokutaabisha.—Zaburi 55:22; 65:2, NW; 1 Yohana 5:14, 15.

“Lishikeni”

Baada ya kupendekeza kwamba wanafunzi wenzake ‘wathibitishe mambo yote,’ Paulo aliongeza hivi: “Lishikeni lililo jema.” (1 Wathesalonike 5:21) Njia moja ya kufanya hivyo ni kwa kushirikiana na watu ambao pia hulishika tumaini la Kikristo. Mfalme Sulemani mwenye hekima alionya hivi: “Enenda pamoja na wenye hekima, nawe utakuwa na hekima; bali rafiki wa wapumbavu ataumia.” (Mithali 13:20) Usiruhusu chuki isiyo na sababu au hisia za kutofaa zikuzuie usitafute ushirika mzuri. Kwa mfano, miongoni mwa Mashahidi wa Yehova kuna watu ambao zamani walikuwa wamekosa tumaini. Lakini funzo lao la Biblia, pamoja na ushirika wa furaha wa waamini wenzao, huimarisha uhusiano wao pamoja na Yehova na huwaandalia tumaini lenye kutegemeka, lililo kama nanga. Je! hilo kwa kweli hushinda kutamauka? Kwa hakika hilo hufanya hivyo.

Chukua kisa cha Annmarie aliyefanywa atamauke kwa sababu ya kutendewa kikatili na mume wake. “Niliamua kujiua,” yeye aeleza, “lakini kwa sababu fulani niliamua kusali kwa Mungu kwanza. Nakumbuka nikisema, ‘Kwa nini huwezi kunisaidia? Kwa muda mrefu sana nimekutumaini, lakini bila matokeo.’ Nilimaliza sala yangu nikifikiria hakuna kusudi la uhai, kwa hiyo yafaa nife. Wakati ule ule mlango ulibishwa. Niliamua kuupuuza, nikitumaini kwamba mtu yeyote aliyekuwa mlangoni angeenda zake hatimaye.

“Mlango uliendelea kubishwa, nikafadhaika. Nilipangusa machozi yangu na kwenda kuona ni nani aliyekuwa mlangoni, nikitumaini kumaliza shughuli hiyo upesi ili niweze kufanya kile nilichokuwa nimekusudia kufanya. Lakini,” Annmarie asema, “kwa sababu ya Yehova, mambo hayakutukia hivyo, kwani nilipofungua mlango, nilipata wanawake wawili wamesimama hapo. Ni kweli, nilikuwa nimevurugika sana, na kwa kweli sikuelewa lile walilokuwa wakisema. Lakini walinitolea kitabu ambacho kingeeleza kwamba uhai una kusudi. Ndilo jambo nililohitaji hasa kuhuisha kupendezwa kwangu na uhai.” Wageni wake walipanga funzo la Biblia la kawaida pamoja naye. Annmarie alijifunza kuwa rafiki ya Mungu. Hilo nalo, likampa kusudi maishani. Sasa yeye husaidia wengine wasitawishe tumaini katika Mungu.

Labda wewe umetumaini kuwe na mwisho wa kutamauka bila kutambua mambo yote yanayohusika. Lakini ikiwa umepata kusali: “Ufalme wako uje, mapenzi yako yatimizwe, hapa duniani kama huko mbinguni,” basi umesali juu ya kuja kwa Ufalme wa Mungu chini ya Yesu Kristo, ambao utafutilia mbali yale mambo yanayosababisha watu wenye mioyo inayofaa watamauke. (Mathayo 6:9, 10) Funzo lako la Biblia la kibinafsi na ushirika wako wa kawaida pamoja na wengine walio na uhakika huo huo utaimarisha kushika kwako tumaini la Ufalme wa Yehova unaokuja na kuleta Paradiso kwenye dunia yetu. (1 Timotheo 6:12, 19) Hilo ndilo tumaini tukufu ambalo gazeti hili hutangaza katika kila toleo. Likubali tumaini hilo kwa moyo wote ili upigane vita dhidi ya kutamauka. Kwa kweli, tumaini “halitahayarishi.”—Warumi 5:5.

[Picha katika ukurasa wa 7]

Kujifunza Biblia hutupa sisi tumaini linalotenda kama “nanga ya nafsi”