Kuwapo kwa Mesiya na Utawala Wake

“Huyu Yesu aliyechukuliwa kutoka kwenu kwenda juu mbinguni, atakuja jinsi iyo hiyo mlivyomwona akienda zake mbinguni.”—MATENDO 1:11.

1, 2. (a) Malaika wawili waliwafarijije mitume wa Yesu alipopaa kwenda mbinguni? (b) Ni maswali yapi yanayotokezwa na lile taraja la kurudi kwa Kristo?

WATU 11 walisimama kwenye mteremko wa mashariki wa Mlima wa Mizeituni, wakikodolea macho mbingu. Punde tu Yesu Kristo alikuwa amepaa kutoka miongoni mwao, umbo lake likififilia mbali mpaka lilipofunikwa kwa wingu. Katika ile miaka waliyokuwa pamoja naye, wanaume hao walikuwa wamemwona Yesu akitoa uthibitisho mwingi kwamba alikuwa ndiye Mesiya; hata walikuwa wameishi kupitia ule wakati wenye kuvunja moyo wa kifo chake na ule msisimuko wa ufufuo wake. Sasa alikuwa ameenda.

² Malaika wawili walitokea kwa ghafula na kusema maneno haya yenye kufariji: “Enyi watu wa Galilaya, mbona mmesimama mkitazama mbinguni? Huyu Yesu aliyechukuliwa kutoka kwenu kwenda juu mbinguni, atakuja jinsi iyo hiyo mlivyomwona akienda zake mbinguni.” (Matendo 1:11) Hilo latumainisha kama nini—kupaa kwa Yesu mbinguni hakukumaanisha kwamba yeye hakuhangaikia tena dunia na ainabinadamu! Tofauti na hilo, Yesu angerudi. Bila shaka maneno hayo yaliwajaza mitume tumaini. Mamilioni ya watu leo hushikamanisha umaana mkubwa kwa ile ahadi ya kurudi kwa Kristo. Wengine husema juu yayo kuwa “Kuja kwa Pili” au “Adventi.” Lakini, wengi huonekana kutatanishwa juu ya maana hasa ya kurudi kwa Kristo. Kristo arudi katika njia gani? Wakati gani? Na hilo huathirije maisha zetu leo?

Jinsi ya Kurudi kwa Kristo

3. Watu wengi huamini nini juu ya kurudi kwa Kristo?

³ Kulingana na kitabu An Evangelical Christology, “kuja kwa pili au kurudi kwa Kristo (parousia) kunasimamisha Ufalme wa Mungu, hatimaye, waziwazi, na kwa umilele wote.” Ni imani ya wengi kwamba kurudi kwa Kristo kutaonekana waziwazi, kukionekana kihalisi na kila mtu kwenye sayari. Ili kuunga mkono wazo hilo, wengi huelekezea Ufunuo 1:7, linalosomwa hivi: “Tazama, yuaja na mawingu; na kila jicho litamwona, na hao waliomchoma.” Lakini je, mstari huo uchukuliwe kihalisi?

4, 5. (a) Tunajuaje kwamba Ufunuo 1:7 halina maana ya kihalisi? (b) Maneno ya Yesu mwenyewe yanathibitishaje uelewevu huo?

⁴ Kumbuka, kitabu cha Ufunuo kimetolewa “kwa njia ya ishara.” (Ufunuo 1:1, NW) Kwa hiyo, fungu hilo lazima liwe la ufananisho; kwa vyovyote vile, wale “waliomchoma” wangewezaje kuona kurudi kwa Kristo? Wamekuwa wafu kwa karibu karne 20! Zaidi ya hayo, malaika walisema kwamba Kristo angerudi “jinsi iyo hiyo” alivyoondoka. Basi, aliondokaje? Kukiwa na mamilioni wakitazama? La, ni waaminifu wachache tu waliotazama tukio hilo. Na wakati malaika waliposema nao, je, mitume walikuwa wakimtazama Yesu kihalisi akisafiri moja kwa moja hadi mbinguni? La, funiko la wingu lilikuwa limemfunika Yesu asionekane. Muda fulani baadaye, ni lazima awe aliingia mbingu za roho akiwa mtu wa roho, asiweze kuonekana kwa macho ya kibinadamu. (1 Wakorintho 15:50) Kwa hiyo, kile ambacho mitume waliweza kuona tu ni mwanzo wa safari ya Yesu; wasingeweza kuona mwisho wayo, kurudi kwake kwenye kuwapo kwa kimbingu kwa Baba yake, Yehova. Wangeweza kutambua hilo tu kwa macho yao ya imani.—Yohana 20:17.

⁵ Biblia hufundisha kwamba Yesu arudi katika njia inayofanana sana na hiyo. Yesu mwenyewe alisema hivi muda mfupi kabla ya kifo chake: “Baada ya muda mrefu kidogo ulimwengu hautaniona tena.” (Yohana 14:19, NW) Alisema pia kwamba “Ufalme wa Mungu hauji kwa namna itakayoweza kuonekana.” (Luka 17:20, Habari Njema kwa Watu Wote) Kwa hiyo, “kila jicho litamwona” katika maana gani? Ili kujibu hilo, tunahitaji kwanza uelewevu dhahiri wa lile neno ambalo Yesu na wafuasi wake walitumia kwa habari ya kurudi kwake.

6. (a) Kwa nini maneno kama vile “kurudi,” “kuwasili,” “adventi,” na “kuja” si tafsiri zifaazo kwa lile neno la Kigiriki pa·rou·siʹa? (b) Ni nini kinachoonyesha kwamba pa·rou·siʹa, au “kuwapo,” hudumu muda mrefu zaidi ya tukio lolote la muda mfupi tu?

⁶ Jambo la hakika ni kwamba, Kristo afanya mengi zaidi ya “kurudi” tu. Neno hilo (“kurudi”) kama vile maneno “kuja,” “kuwasili,” au “adventi,” hudokeza tukio moja katika muda mfupi wa wakati. Lakini neno la Kigiriki ambalo Yesu na wafuasi wake walitumia humaanisha mengi zaidi. Neno hilo ni pa·rou·siʹa, linalomaanisha kihalisi “kuwa kando” au “kuwapo.” Wanachuo wengi hukubali kwamba neno hilo hutia ndani si kuwasili tu bali pia kuwapo kunakofuata—kama vile katika ziara rasmi ya mkuu fulani wa kifalme. Kuwapo huko si tukio la muda mfupi tu; hiyo ni muhula wa pekee, kipindi cha wakati chenye kutokeza. Kwenye Mathayo 24:37-39, NW, Yesu alisema kwamba “kuwapo [pa·rou·siʹa] kwa Mwana wa binadamu” kungekuwa kama “siku za Noa” zilizofikia upeo katika Furiko. Noa alikuwa akijenga safina na kuwaonya waovu kwa muda wa miongo kadhaa kabla ya Furiko kuwasili na kufutilia mbali huo mfumo wa ulimwengu wenye ufisadi. Vilevile, basi, kuwapo kwa Kristo kusikoonekana hudumu kwa kipindi cha miongo kadhaa kabla hakijafikia upeo katika uharibifu mkubwa.

7. (a) Ni nini kinachothibitisha kwamba pa·rou·siʹa haionekani kwa macho ya kibinadamu? (b) Maandiko yanayosimulia kurudi kwa Kristo kuwa kwenye kuonekana kwa “kila jicho” yatatimizwa kwa jinsi gani na wakati gani?

⁷ Pasipo shaka, ile pa·rou·siʹa haionekani kihalisi kwa macho ya kibinadamu. Kama ingaliweza kuonekana kihalisi, ni kwa nini Yesu alitumia wakati mwingi, kama vile tutakavyoona, akiwapa wafuasi wake ishara ya kuwasaidia watambue kuwapo huko?a Hata hivyo, Kristo anaporudi ili kuharibu mfumo wa ulimwengu wa Shetani, uhakika wa kuwapo kwake utadhihirika sana kwa wote. Ni wakati huo kwamba “kila jicho litamwona.” Hata wapinzani wa Yesu wataweza kutambua, kwa hofu yao, kwamba utawala wa Kristo ni halisi.—Ona Mathayo 24:30; 2 Wathesalonike 2:8; Ufunuo 1:5, 6.

Kunaanza Wakati Gani?

8. Ni tukio gani linalotambulisha mwanzo wa kuwapo kwa Kristo, na hilo lilitukia wapi?

⁸ Kuwapo kwa Mesiya kunaanza na tukio linalotimiza kichwa kikuu chenye kurudiwa-rudiwa cha unabii mwingi wa Kimesiya. Anatawazwa kuwa Mfalme mbinguni. (2 Samweli 7:12-16; Isaya 9:6, 7; Ezekieli 21:26, 27) Yesu mwenyewe alionyesha kwamba kuwapo kwake kungehusiana na umaliki wake. Katika vielezi kadhaa, alijifananisha mwenyewe na bwana mkubwa anayeacha watu wa nyumbani mwake na watumwa wake, akisafiri kwa muda mrefu hadi “nchi ya mbali” anakopokea “ufalme.” Alitoa mfano mmoja wa jinsi hiyo ikiwa sehemu ya jibu lake kwa swali la mitume wake kuhusu wakati ambapo pa·rou·siʹa yake ingeanza; mwingine alitoa kwa sababu “wao walidhani ya kuwa ufalme wa Mungu utaonekana mara.” (Luka 19:11, 12, 15; Mathayo 24:3; 25:14, 19) Kwa hiyo katika wakati wake duniani akiwa mwanadamu, kutawazwa kwake kulikuwa bado ni kwa muda mrefu kutukia, katika “nchi ya mbali” ya mbinguni. Kungetukia wakati gani?

9, 10. Kuna uthibitisho gani kwamba Kristo kwa sasa anatawala akiwa mbinguni, na alianza utawala wake wakati gani?

⁹ Wanafunzi wa Yesu walipomwuliza: “Ni nini itakayokuwa ishara ya kuwapo kwako na ya umalizio wa mfumo wa mambo?” Yesu aliitikia kwa kuwapa ufafanuzi wenye mambo madogo madogo wa wakati ujao huo. (Mathayo, sura 24, NW; Marko, sura 13; Luka, sura 21; ona pia 2 Timotheo 3:1-5; Ufunuo, sura 6.) Ishara hiyo inajumuika kuwa ufafanuzi wa enzi yenye taabu. Ni wakati unaotambulishwa kwa vita vya kimataifa, ongezeko la uhalifu, maisha ya familia yenye kuharibika, mweneo wa magonjwa, njaa kuu, na matetemeko ya dunia—si yakiwa matatizo ya mahali fulani tu bali yakiwa taabu zenye kuenea duniani pote. Je! hayo ni mambo ambayo umezoelea kuona? Kila siku inayopita huhakikisha kwamba karne ya 20 hupatana kikamili na usimulizi wa Yesu.

¹⁰ Wanahistoria hukubali kwamba 1914 ulikuwa mwaka wa badiliko kubwa katika historia ya kibinadamu, mwaka mkuu ambao baada ya huo mengi ya matatizo hayo yasingeweza kudhibitiwa, yakiongezeka kwa kadiri ya duniani pote. Naam, matukio ya ulimwengu yenye kuonekana yanayotimiza unabii wa Biblia yote yanaelekeza kwenye 1914 kuwa ndio mwaka ambao Yesu alianza kutawala akiwa Mfalme mbinguni. Zaidi ya hayo, unabii katika Danieli sura 4 huandaa uthibitisho wa orodha ya tarehe za matukio unaotuongoza kwenye mwaka uo huo—1914—kuwa ndio wakati ambapo Mfalme aliyewekwa rasmi na Yehova angeanza utawala wake.b

Kwa Nini Uwe Wakati Wenye Taabu?

11, 12. (a) Kwa nini ni vigumu kwa wengine kuamini kwamba Kristo anatawala mbinguni sasa hivi? (b) Twaweza kutoa kielezi gani kuonyesha lile lililotukia baada ya Yesu kutawazwa kuwa Mfalme?

¹¹ Lakini, wengine hutaka kujua, ‘Kwa nini ulimwengu ni wenye taabu sana ikiwa Mesiya anatawala mbinguni?’ ‘Je! utawala wake umekosa kufaulu?’ Kielezi chaweza kusaidia. Nchi inatawalwa na rais mwovu. Yeye ameanzisha mfumo wenye ufisadi unaosimamia mambo katika kila kona ya nchi hiyo. Lakini uchaguzi unafanywa; mtu mwema ashinda. Ni nini kitakachotukia sasa? Sawa na ilivyo katika baadhi ya nchi za kidemokrasia, kipindi fulani cha miezi kadhaa hufuata kabla ya rais mpya kuwekwa rasmi. Wanaume hao wawili wangetendaje wakati wa kipindi hicho? Je! yule mwanamume mwema ataanza mara moja kushambulia na kuvunja-vunja uovu wote ambao mtangulizi wake ameleta kotekote nchini? Je! badala yake asingekazia fikira jiji kuu kwanza, akianzisha baraza jipya la mawaziri na kuwaondosha marafiki na waandamani wapotovu wa rais wa zamani? Kwa njia hiyo, anapopata mamlaka kamili, aweza kutawala akiwa na mamlaka safi na yenye kufanya kazi vizuri. Kwa habari ya rais mfisadi, je, asingetumia kwa faida yake wakati mfupi alio nao ili kutwaa kutoka nchi zile faida zote za haramu awezazo kupata kabla ya yeye kupoteza mamlaka yote?

¹² Kwa kweli, ni vivyo hivyo kwa habari ya pa·rou·siʹa ya Kristo. Ufunuo 12:7-12 huonyesha kwamba Kristo alipofanywa Mfalme mbinguni, tendo lake la kwanza lilikuwa kuvurumisha Shetani na roho waovu wake kutoka mbinguni, akisafisha mahali maalumu pa serikali yake. Baada ya kushindwa kwake kulikongojewa kwa muda mrefu, Shetani atendaje katika “wakati [huu] mchache” kabla ya Kristo kutumia mamlaka yake yote hapa duniani? Sawa na rais huyo mfisadi, yeye hujaribu kupata yote awezayo kutoka katika mfumo huu wa kale. Yeye hatafuti pesa; yeye atafuta wafuasi. Anataka kuwatenganisha watu wengi awezavyo kutoka kwa Yehova na Mfalme Wake anayetawala.

13. Maandiko huonyeshaje kwamba mwanzo wa utawala wa Kristo ungekuwa wakati wenye taabu hapa duniani?

¹³ Haishangazi basi, kwamba mwanzo wa utawala wa Mesiya humaanisha wakati wa “ole kwa dunia.” (Ufunuo 12:12, NW) Vivyo hivyo, Zaburi 110:1, 2, 6 huonyesha kwamba Mesiya aanza utawala wake ‘kati ya adui zake.’ Ni baadaye tu kwamba ayaponda kabisa “mataifa,” pamoja na kila sehemu ya mfumo wa Shetani wenye ufisadi, usahauliwe kabisa!

Wakati Mesiya Anapotawala Dunia

14. Mesiya ataweza kufanya nini baada ya yeye kuharibu mfumo mbovu wa mambo wa Shetani?

¹⁴ Baada ya yeye kuuharibu mfumo wa Shetani na wote wanaouunga mkono, Mfalme wa Kimesiya, Yesu Kristo, atakuwa hatimaye katika hali ya kutimiza unabii mwingi wa Biblia ulio mzuri ajabu unaosimulia Utawala wa Mileani wake. Isaya 11:1-10 hutusaidia tuone hasa Mesiya atakuwa mtawala wa aina gani. Mstari 2 hutuambia kwamba atakuwa na “roho ya BWANA [Yehova, NW] . . . , roho ya hekima na ufahamu, roho ya shauri na uweza.”

15. ‘Roho ya uweza’ itamaanisha nini katika utawala wa Kimesiya?

¹⁵ Fikiria lile ambalo ‘roho ya uweza’ itakalomaanisha katika utawala wa Yesu. Alipokuwa duniani, alikuwa na kadiri fulani ya uweza kutoka kwa Yehova, ukimwezesha kufanya miujiza. Na alionyesha tamaa ya kuhisiwa moyoni ya kuwasaidia watu, akisema, “Nataka.” (Mathayo 8:3) Lakini miujiza yake ya siku hizo ilikuwa wonyesho wa kimbele tu wa lile ambalo angefanya atakapokuwa akitawala kutoka mbinguni. Yesu atafanya miujiza duniani pote! Wagonjwa, vipofu, viziwi, viwete, na walemavu wataponywa kwa wakati wote. (Isaya 35:5, 6) Wingi wa chakula, kilichoenezwa kwa haki, utakomesha njaa milele. (Zaburi 72:16) Namna gani wale mamilioni wasiohesabika waliomo makaburini ambao Mungu hupendezwa kuwakumbuka? “Uweza” wa Yesu utatia ndani nguvu ya kuwafufua, akimpa kila mmoja nafasi ya kuishi milele katika Paradiso! (Yohana 5:28, 29) Hata hivyo, hata akiwa na uweza huo wote, Mfalme wa Kimesiya sikuzote atakuwa na unyenyekevu mwingi. Yeye hupata “furaha . . . katika kumcha BWANA [Yehova, NW].”—Isaya 11:3.

16. Mfalme wa Kimesiya atakuwa hakimu wa aina gani, na hilo litatofautianaje na mambo ya hakika ya mahakimu wa kibinadamu?

¹⁶ Mfalme huyo atakuwa pia Hakimu mkamilifu. “Hatahukumu kwa kuyafuata ayaonayo kwa macho yake, wala hataonya kwa kuyafuata ayasikiayo kwa masikio yake.” Ni hakimu gani, wa wakati uliopita au wa wakati huu, awezaye kuelezwa kwa njia hiyo? Hata mtu mwenye busara sana aweza kuhukumu tu kwa lile aonalo au kusikia, akitumia hekima au ufahamu wowote ambao huenda akawa nao. Hivyo, mahakimu na waamuzi wa ulimwengu huu wa kale huenda wakapotoshwa au kutatanishwa na kusababu kwa werevu lakini kusiko na msingi timamu, vitiba vyenye kuchekesha mahakamani, au ushahidi wenye kupingana. Mara nyingi ni matajiri na wenye nguvu wanaoweza kugharimia teteo lenye mafanikio, kwa kweli wakinunua haki. Sivyo itakavyokuwa chini ya yule Hakimu wa Kimesiya! Yeye husoma mioyo. Hakuna lolote atakalokosa kuona. Haki, iliyosawazishwa na upendo na rehema, haitauzwa. Itashinda sikuzote.—Isaya 11:3-5.

Jinsi Utawala Wake Unavyokuathiri Wewe?

17, 18. (a) Ni wonyesho gani wenye kuvutia sana wa wakati ujao wa ainabinadamu unaotolewa kwenye Isaya 11:6-9? (b) Unabii huo hutumika kwa nani hasa, na kwa nini? (c) Unabii huo utakuwaje na utimizo halisi?

¹⁷ Kwa wazi, utawala wa Mesiya una uvutano mwingi sana juu ya raia zao. Unabadili watu. Isaya 11:6-9 huonyesha kadiri hasa ya mabadiliko hayo. Unabii huo hutoa maelezo yenye kugusa moyo ya wanyama hatari wenye kuwinda—dubu, mbwa-mwitu, chui, simba, fira—wakiwa pamoja na wanyama wa kufugwa wasiodhuru na hata watoto. Lakini wanyama hao wa kuwinda hawasababishi hatari yoyote! Kwa nini? Mstari 9 hujibu hivi: “Hawatadhuru wala hawataharibu katika mlima wangu wote mtakatifu; maana dunia itajawa na kumjua [maarifa ya, NW] BWANA [Yehova, NW], kama vile maji yanavyoifunika bahari.”

¹⁸ Bila shaka, “maarifa ya Yehova” yasingekuwa na tokeo lolote juu ya wanyama halisi; hivyo mistari hiyo ni lazima itumike hasa kuhusu watu. Utawala wa Mesiya hudhamini programu ya kuelimisha duniani pote, ukifundisha watu juu ya Yehova na njia zake, ukifundisha wote wawatendee wanadamu wenzao kwa upendo, staha, na fahari. Katika Paradiso inayokuja, Mesiya atainua ainabinadamu kimuujiza wafikie ukamilifu wa kimwili na wa kiadili. Vitabia vya kuwinda na vya kinyama vinavyoharibu asili ya kibinadamu isiyokamilika vitapotelea mbali. Kwa maana halisi pia, ainabinadamu itakuja kuwa na amani pamoja na wanyama—hatimaye!—Linganisha Mwanzo 1:28.

19. Utawala wa Mesiya huathirije maisha za watu katika siku hizi za mwisho?

¹⁹ Lakini, kumbuka kwamba Mesiya anatawala sasa. Hata sasa, raia za Ufalme wake wanajifunza kuishi kwa amani pamoja, wakitimiza Isaya 11:6-9 katika maana moja. Isitoshe, kwa karibu miaka 80, Yesu amekuwa akitimiza Isaya 11:10: “Na itakuwa katika siku hiyo, shina la Yese lisimamalo kuwa ishara kwa kabila za watu, yeye ndiye ambaye mataifa watamtafuta; na mahali pake pa kupumzikia patakuwa na utukufu.” Watu wa kila taifa wanamgeukia Mesiya. Kwa nini? Kwa sababu tangu wakati alipoanza kutawala, amekuwa ‘akisimama kuwa ishara.’ Amekuwa akijulisha kuwapo kwake ulimwenguni pote kupitia ile programu ya kielimu iliyoenea sana iliyosimulia juu. Kwa kweli, Yesu alitabiri kwamba kazi ya kuhubiri ya duniani pote ingekuwa ishara yenye kutokeza ya kuwapo kwake kabla ya mwisho wa mfumo huu wa kale.—Mathayo 24:14.

20. Raia wote wa utawala wa Mesiya wanapaswa waepuke mtazamo gani, na kwa nini?

²⁰ Kwa hiyo kuwapo kwa Kristo katika uwezo wa Kifalme si jambo la kuwaziwa, la kinadharia, habari tu ya kiakili ya kujadiliwa miongoni mwa wanatheolojia. Utawala wake huathiri na kubadili maisha hapa duniani, kama vile Isaya alivyotabiri ungefanya. Yesu ameongoza mamilioni ya raia za Ufalme wake kutoka katika mfumo huu wa ulimwengu wenye ufisadi. Je! wewe ni raia za jinsi hiyo? Kwa hiyo tumikia ukiwa na idili na shangwe ambayo Mtawala wetu astahili! Ni kweli, ni rahisi sana kuchoka, na kujiunga na dhihaka hii ya ulimwengu: “Iko wapi ahadi ile ya kuja [kuwapo, NW] kwake?” (2 Petro 3:4) Lakini kama vile Yesu mwenyewe alivyosema, “mwenye kuvumilia hata mwisho, ndiye atakayeokoka.”—Mathayo 24:13.

21. Sisi sote twaweza kuongezaje uthamini wetu kwa ajili ya tumaini la Kimesiya?

²¹ Kila siku inayopita hutuleta karibu zaidi na ile siku kuu wakati ambapo Yehova atamwelekeza Mwana Wake adhihirishe kuwapo kwake kwa ulimwengu wote. Usiache kamwe tumaini lako katika siku hiyo lififie. Tafakari juu ya Umesiya wa Yesu na juu ya sifa zake akiwa Mfalme anayetawala. Pia, mfikirie sana Yehova Mungu, mwanzilishi na mbuni wa lile tumaini kuu la Kimesiya linalotajwa katika Biblia. Ufanyapo hivyo, bila shaka utahisi zaidi na zaidi kama vile mtume Paulo alivyohisi alipoandika hivi: “Ee jinsi utajiri na hekima na maarifa ya Mungu yalivyo na kina!”—Warumi 11:33, NW.

[Maelezo ya Chini]

Ungejibuje?

◻ Kristo arudi kwa jinsi gani?

◻ Tunajuaje kwamba pa·rou·siʹa ya Kristo haionekani na hudumu kwa kipindi fulani cha wakati?

◻ Kuwapo kwa Kristo kunaanza wakati gani, na tunajuaje hilo?

◻ Mesiya ni Mtawala wa kimbingu wa aina gani?

◻ Utawala wa Kristo huathiri maisha za raia zao katika njia zipi?

[Picha katika ukurasa wa 15]

Tumaini la kwamba Yesu angerudi lilikuwa lenye maana sana kwa mitume wake waaminifu

[Picha katika ukurasa wa 17]

Akiwa anatawala kutoka mbinguni, Yesu atafanya miujiza duniani pote

[Hisani]

Dunia: Yenye msingi wa picha ya NASA