Wahitimu wa Gileadi Hupata “Furaha Zaidi Katika Kutoa”
MNAMO Jumapili, Machi 6, 1994, familia ya Betheli ya makao makuu ya ulimwengu ya Mashahidi wa Yehova na wageni walikusanyika kwa ajili ya pindi yenye furaha—kuhitimu kwa darasa la 96 la Watchtower Bible School of Gilead. Katika maelezo yake ya utangulizi, mwenyekiti wa programu Karl F. Klein, ambaye ametumikia katika Baraza Linaloongoza la Mashahidi wa Yehova kwa karibu miongo miwili, aliwaambia wale wanafunzi 46 hivi: “Yesu alisema kwamba kuna furaha zaidi katika kutoa kuliko kulivyo katika kupokea. Ndivyo itakavyokuwa katika mgawo wenu wa mishonari—kadiri mtoavyo zaidi, ndivyo mtakavyokuwa na furaha zaidi.”—Matendo 20:35.
Maneno ya Kuaga Yenye Himizo
Mfululizo wa hotuba kwa wanafunzi ulifuata. Leon Weaver, kiungo cha Halmashauri ya Idara ya Utumishi, alikuza kichwa “Uvumilivu Humtukuza Yehova.” Sisi sote hukabili majaribu. (2 Wakorintho 6:3-5) “Tunapokuwa chini ya mkazo,” akasema Ndugu Weaver, “ni rahisi sana kujitegemea.” Hata hivyo, aliwakumbusha wanafunzi hivi: “Yehova anapendezwa na jaribu lolote lile unalolazimika kukabili lililo kawaida ya wanadamu. Yeye hatakuruhusu ujaribiwe kupita uwezavyo kustahimili.”—1 Wakorintho 10:13.
“Thamini Mgawo Wako Sikuzote” ndicho kilichokuwa kichwa cha hotuba iliyofuata, iliyotolewa na Lyman Swingle wa Baraza Linaloongoza. Waisraeli hawakuchagua sikuzote mahali ambapo wangeishi na yale ambayo wangefanya. Kila kabila liligawiwa sehemu ya bara, na Walawi waligawiwa wajibu hususa wa kufanya. Vivyo hivyo, wengi katika utumishi wa wakati wote wa pekee leo—kama vile wamishonari na viungo vya familia ya Betheli—hawajiamulii mahali watakapoishi na kazi watakayofanya. Namna gani ikiwa mtu ahisi kutokuwa na uhakika kuhusu mgawo wake? “Ukimkazia macho Wakili Mkuu wa imani yetu, Yesu, na kufikiria sana kielelezo chake, hutazimia,” akasema Ndugu Swingle.—Waebrania 12:2, 3.
Leonard Pearson, wa Halmashauri ya Watchtower Farms, alifuata na habari “Endelea Kukaza Fikira Zako.” Alisema hivi: “Waweza kuwa na kamera iliyo nzuri zaidi, mandhari yenye kupendeza zaidi, mazingira bora zaidi, na bado utokeze picha mabaya—ikiwa kamera yako haikukaziwa lenzi vizuri.” Kama vile lenzi yenye pembe-pana, mwono wetu wapaswa kutia ndani kazi ya kuhubiri ulimwenguni pote inayofanywa. Hatupaswi kamwe kusahau mambo yote yanayotiwa ndani. “Wale wakazao fikira juu yao wenyewe hawatakuwa na furaha katika migawo yao,” akasema Ndugu Pearson. “Wale wakazao fikira juu ya Yehova na juu ya kazi ambayo amewapa wafanye watafanikiwa.”
“Mengi Sana ya Kutufanya Tushukuru” ndicho kilichokuwa kichwa cha hotuba iliyofuata, iliyotolewa na John E. Barr, kiungo kingine cha Baraza Linaloongoza. “Usipoteze kamwe hisia yako ya shukrani kwa Yehova,” Ndugu Barr akawahimiza wanafunzi. “Hicho ni kimojapo vyanzo vya uradhi, haidhuru wewe una mgawo gani.” Mtazamo wenye shukrani ulimchochea Daudi aandike hivi: “Kamba zangu zimeniangukia mahali pema, naam, nimepata urithi mzuri.” (Zaburi 16:6) “Una urithi wenye thamani sana katika kuhisi ukaribu na Yehova katika maisha yako ya kila siku,” akasema Ndugu Barr. “Yehova hataondoa kamwe uhusiano huo kutoka kwako maadamu waendelea kuuona kuwa jambo zuri sana ambalo lakufanya ushukuru.”
Mfunzi wa Gileadi Jack Redford ndiye aliyefuata akisema juu ya kichwa “Utatumiaje Ulimi Wako?” Usemi usiofikiriwa kimbele waweza kuharibu mambo kama nini! (Mithali 18:21) Ulimi waweza kudhibitiwaje? “Ni lazima uzoeze akili yako,” akajibu Ndugu Redford, “kwa sababu ulimi huonyesha yaliyo akilini na moyoni.” (Mathayo 12:34-37) Yesu aliandaa kielelezo bora kabisa; alitumia ulimi wake kutukuza jina la Yehova. “Leo kuna njaa ya kusikia maneno ya Yehova,” Ndugu Redford akaambia darasa hilo. “Mwayajua maneno hayo. Mna ‘ndimi za waliofundishwa.’ Kwa hiyo sikuzote acheni ndimi zenu ziongozwe na akili na moyo uliowekwa wakfu kwa Yehova kikamili.”—Isaya 50:4.
Umaana wa sala ulikaziwa katika hotuba “Je! Unatembea Kana Kwamba Yehova Yupo?” Ulysses Glass, msajili wa shule, alisema hivi: “Ikiwa baba fulani alikuwa akifanya kazi kwa bidii ili kutegemeza familia yake lakini hakusema kamwe nayo wala kutumia maneno ya kuonyesha upendo, familia yake ingeweza kwa kweli kukata maneno kwamba kusudi lake la kujitahidi hivyo lilikuwa kutimiza tu wajibu asiopendezwa nao wala si upendo. Ndivyo ilivyo nasi. Huenda tukawa wenye shughuli katika utumishi wa Mungu. Lakini tusiposali, basi tumejiweka wakfu kwa kazi fulani tu badala ya kwa Baba wa kimbingu mwenye upendo.”
Theodore Jaracz, wa Baraza Linaloongoza, alisema juu ya kichwa “Sababu Inayofanya Wengi Sana Washirikiane na Watu wa Mungu.” Kila mwaka mamia ya maelfu humiminika kwenye tengenezo la Yehova. (Zekaria 8:23) Ni nini kinachowatambulisha Mashahidi wa Yehova kuwa watu wa Mungu? Kwanza, wanakubali Biblia nzima kuwa Neno la Mungu. (2 Timotheo 3:16) Pili, ni wenye kutokuwamo kisiasa. (Yohana 17:16) Tatu, wanashuhudia jina la Mungu. (Yohana 17:26) Nne, wanaonyesha upendo wa kujidhabihu. (Yohana 13:35; 15:13) Tukiwa na sifa hizo za kustahili, twaweza ‘kuzitangaza fadhili za yeye aliyetuita tutoke gizani tukaingie katika nuru yake ya ajabu.’—1 Petro 2:9.
Baada ya hotuba hizo zenye kuchochea, wanafunzi wote 46 walipokea diploma. Wamegawiwa kwenda mabara 16 kotekote duniani.
Programu ya Alasiri Yenye Mambo Mbalimbali
Katika alasiri Funzo la Mnara wa Mlinzi lililofupishwa liliongozwa na Donald Krebs wa Halmashauri ya Betheli. Kisha wahitimu walitokeza programu yenye kichwa “Hekima Yaendelea Kulia kwa Sauti Mlemle Barabarani.” (Mithali 1:20) Waliigiza maono yenye kuthawabisha waliokuwa wamekuwa nayo katika kutoa ushahidi barabarani na katika maeneo ya kibiashara. Kwa kweli, Yehova hubariki wale wanaojipa moyo mkuu wa kuhubiri kivivi-hivi. “Napenda kufikiria sisi kuwa miundu mikononi mwa wavunaji wa kimalaika,” akasema mhitimu mmoja. “Kadiri stadi zetu zilivyo bora zaidi, ndivyo wale malaika watakavyoweza kututumia kwa kazi nyingi zaidi.” (Linganisha Ufunuo 14:6.) Programu ya wanafunzi ilitia ndani pia utoaji wa slaidi uliowapeleka wasikilizaji kwenye safari yenye kuelimisha hadi Bolivia, Malta, na Taiwan—matatu kati ya yale mabara ambako wahitimu wa darasa hili wametumwa.
Kisha, Wallace na Jane Liverance—waliokuwa wamishonari kwa muda wa miaka 17—walihojiwa. Katika Oktoba 1993 walialikwa Watchtower Farms, ambako Ndugu Liverance hutumikia sasa akiwa mmoja wa wafunzi wa Gileadi.
Utoaji wenye sehemu nne ukafuata, wenye kichwa “Kuwaheshimu Wale Wastahilio Katika Miaka Yao ya Umri Mkubwa Zaidi.” Watu wazeekapo, hofu za kuwa hawafai kitu na za kuachwa huenda zikasumbua hali yao ya kujiamini. (Zaburi 71:9) Utoaji huo wenye kugusa moyo ulionyesha jinsi wote kutanikoni waweza kutegemeza hao waaminifu wenye umri mkubwa zaidi.
Baada ya wimbo na sala ya kufunga, wote 6,220 waliohudhuria kwenye Jumba la Kusanyiko la Jersey City na majumba ya satelaiti walihisi wameburudishwa. Sala zetu ziko pamoja na hao wahitimu katika migawo yao mipya. Na waendelee kuona ile furaha zaidi inayotokana na kutoa.
[Sanduku katika ukurasa wa 26]
Takwimu za Darasa
Hesabu ya nchi zilizowakilishwa: 9
Hesabu ya nchi walikogawiwa: 16
Hesabu ya wanafunzi: 46
Wastani wa umri: 33.85
Wastani wa miaka katika kweli: 16.6
Wastani wa miaka katika huduma ya wakati wote: 12.2
[Sanduku katika ukurasa wa 27]
Uangalifu Waelekezwa Kwenye Malta
JUMUIYA YA WAKRISTO ilizuia Malta isipate kweli ya Biblia kwa miaka mingi. Wamishonari wa Gileadi wa mwisho kutumwa huko, Frederick Smedley na Peter Bridle, walihitimu kutoka darasa la nane huko nyuma katika 1947. Hata hivyo, walikamatwa na kuondoshwa nchini Malta muda mfupi baada ya wao kuwasili. Kitabu-Mwaka cha Mashahidi wa Yehova cha 1948 (Kiingereza) charipoti hivi: “Wamishonari hawa wawili wametumia kadiri ileile ya wakati mahakamani na pamoja na maofisa wa bara hilo kama ambavyo wametumia katika kufanya wajibu wao mbalimbali wa kihuduma, kwa sababu tu ya upinzani wa Jamii ya Mapadri ya Katoliki ya Roma. Mapadri wanasema kwamba Malta ni mali ya Wakatoliki na ni lazima kila mtu mwingine yeyote atoke.” Sasa, miaka 45 hivi baadaye, wamishonari wanne kutoka darasa la 96 la Gileadi wamegawiwa kwenda Malta.
[Picha katika ukurasa wa 26]
Darasa la 96 la Kuhitimu la Watchtower Bible School of Gilead
Katika orodha iliyopo chini, mistari imepewa nambari kuanzia mbele kurudi nyuma, na majina yameorodheshwa kuanzia kushoto kuelekea kulia katika kila mstari.
(1) Ehlers, P.; Giese, M.; Sellman, S.; Zusperregui, J.; Rowe, S.; Jackson, K.; Scott, T. (2) Liehr, T.; Garcia, I.; Garcia, J.; Fernández, A.; Davidson, L.; Liidemann, P.; Gibson, L.; Juárez, C. (3) Fouts, C.; Pastrana, G.; Claeson, D.; Fernández, L.; Walls, M.; Dressen, M.; Pastrana, F.; Burks, J. (4) Burks, D.; Scott, S.; Jackson, M.; Mauray, H.; Juárez, L.; Zusperregui, A.; Brorsson, C.; Rowe, C. (5) Sellman, K.; Liidemann, P.; Davidson, C.; Mauray, S.; Walls, D.; Dressen, D.; Schaafsma, G.; Liehr, S. (6) Claeson, T.; Gibson, T.; Giese, C.; Ehlers, D.; Fouts, R.; Schaafsma, S.; Brorsson, L