Kwa Nini Mashahidi Huendelea Kutembelea Watu?

‘NDIO hao tena! Lakini walikuwa huku majuma machache tu yaliyopita!’ Je! hayo hupitia akilini mwako utembelewapo na mmoja wa Mashahidi wa Yehova? Mamilioni leo hutembelewa kwa ukawaida na Mashahidi wa Yehova. Huenda ukauliza, Kwa nini wao hudumu hali wanajua kwamba watu walio wengi wana dini zao wenyewe au hawapendezwi? Swali hilo lastahili jibu.

Daraka Mbele ya Mungu

Mashahidi wa Yehova wamejifunza kutokana na Maandiko kwamba tangu 1914, mwaka ambao Vita ya Ulimwengu 1 ilianza, matukio ya ulimwengu yamekuwa yakitimiza unabii mbalimbali wa Biblia kuhusiana na mwisho wa mfumo wa ulimwengu uliopo na utawala unaokuja wa Ufalme wa Mungu juu ya dunia hii. Karibu karne moja ya ujeuri, umwagaji wa damu, na chuki yaonekana imewaacha wanadamu wakiwa mbali zaidi kuliko wakati mwingine wowote kutoka kwa suluhisho la kisiasa kwa matatizo yao. Vita na uharamia ambao bado huitaabisha familia ya kibinadamu ni ushuhuda wa kwamba utawala wa kibinadamu umeshindwa kubadili mioyo, akili, na mitazamo ya watu. Chuki iliyoimarika sana kuelekea mambo yaliyotokea huko nyuma katika historia ingali inaathiri vibaya mahusiano kati ya vikundi vya kikabila, rangi, na kidini. Hilo ni kweli katika maeneo mbalimbali kufikia Afghanistan, Afrika Kusini, India, Ireland Kaskazini, Mashariki ya Kati, na iliyokuwa Yugoslavia. Kwa hiyo, ni nini suluhisho pekee lenye kudumu?

Ni Nini Huwachochea Mashahidi?

Mashahidi wa Yehova hutambua kwamba suluhisho la Mungu—utawala wake wa Ufalme ulioahidiwa kupitia Kristo Yesu—ndilo jibu pekee liwezalo kufanya kazi. Yesu hata alitia ndani dua kwa ajili ya utawala huo wa Ufalme katika sala yake mashuhuri ya kigezo: “Basi, ninyi salini hivi; Baba yetu uliye mbinguni, jina lako litukuzwe, ufalme wako uje, mapenzi yako yatimizwe, hapa duniani kama huko mbinguni.” Mashahidi huamini kwamba kwa kweli sala hii huomba kujiingiza kwa Mungu katika mambo ya wanadamu.—Mathayo 6:9, 10.

Kwa hiyo kwa nini Mashahidi wa Yehova huhisi uhitaji wa kuendelea kwenda nyumba kwa nyumba ili kujaribu kupeleka ujumbe huo? Kwa sababu ya amri mbili ambazo Yesu alikazia: “Mpende Bwana Mungu wako kwa moyo wako wote, na kwa roho yako yote, na kwa akili zako zote. Hii ndiyo amri iliyo kuu, tena ni ya kwanza. Na ya pili yafanana nayo, nayo ni hii, Mpende jirani yako kama nafsi yako.”—Mathayo 22:37-39.

Mashahidi wanataka baraka ya Mungu iwe juu yao wenyewe, na kwa sababu wanawapenda majirani wao, wanawataka wawe na baraka iyo hiyo. Hivyo, wakifuata kielelezo cha Yesu, wanahisi kushurutishwa na upendo usio na ubinafsi kuwatembelea majirani wao. Wanataka angalau kuwatolea fursa ya kupata kujua yale ambayo yule “Mungu mwenye furaha” ameahidi kwa ajili ya wanadamu watiifu juu ya dunia itakayosafishwa.—1 Timotheo 1:11; 2 Petro 3:13, NW.

Mishonari Mkristo Paulo aliamini ahadi za Mungu na hivyo angeweza kuandika hivi: “Paulo, mtumwa wa Mungu, na mtume wa Yesu Kristo; kwa ajili ya imani ya wateule wa Mungu, na ujuzi wa kweli ile iletayo utauwa katika tumaini la uzima wa milele, ambao Mungu asiyeweza kusema uongo aliuahidi tangu milele.” Ndiyo, Mungu “asiyeweza kusema uongo,” “aliuahidi” uhai udumo milele kwa ajili ya wale ambao hujitahidi kwa unyenyekevu kumjua na kumtimikia.—Tito 1:1, 2; Sefania 2:3.

Je! Mashahidi Hulipwa?

Pindi kwa pindi watu fulani wamedai kwamba Mashahidi wanalipwa kwa ajili ya huduma yao. Sivyo hata kidogo! Wanachukua kwa uzito maneno haya ya Paulo kwa kutaniko la Korintho: “Sisi si kama walio wengi, walighoshio neno la Mungu; bali kama kwa weupe wa moyo, kama kutoka kwa Mungu, mbele za Mungu, twanena katika Kristo.”

Viongozi fulani wa kidini huhubiri ili kuchuma pesa, iwe ni malipo kwa ajili ya mahubiri ya kidini au kuendeleza shughuli za kibiashara katika huduma zao za televisheni. Dini zilizo nyingi zina makasisi wa kulipwa.—2 Wakorintho 2:17.

Tofauti na hayo, Mashahidi hawana makasisi wa kulipwa, na mara nyingi fasihi zao za Biblia hutolewa kwa michango midogo kwa watafutaji wa kweli wenye mioyo myeupe. Hiyo hutumiwa kulipia gharama za kazi hii ya kuhubiri ulimwenguni pote. Kwa kupatana na shauri la Yesu: “Mmepata bure, toeni bure,” Mashahidi hutumia nyenzo zao kwa hiari, kutia na wakati na nishati, katika kutoa mamilioni ya saa kila mwaka kwa utumishi wa Mungu. Hivyo, wao hufundisha watu wenye kupendezwa kutoka nyumba kwa nyumba na kupitia mafunzo ya Biblia nyumbani.—Mathayo 10:8; 28:19, 20; Matendo 20:19, 20.

Mambo ya hakika yanathibitisha kwamba wala Mashahidi wa Yehova wakiwa watu mmoja-mmoja, wala makutaniko yao, wala Watch Tower Society hawachochewi na pesa. Hakuna apokeaye malipo yoyote kwa ajili ya kwenda nyumba kwa nyumba. Kwa hiyo kazi hugharimiwaje? Kwa michango ya kujitolea kutoka kwa watu wenye uthamini kotekote ulimwenguni. Pesa hazikusanywi kamwe.

Uvutano wa Ushahidi Wao

Je! huduma ya nyumba kwa nyumba na kuhubiri ki-vivi-hivi kwa Mashahidi kuna uvutano juu ya watu kwa ujumla? Uthibitisho katika vyombo vya habari hutolea swali hilo jibu la ndiyo lenye sauti kuu. Mashahidi wa Yehova wametajwa katika programu za televisheni na sinema wakati mtu anapoonyeshwa akipiga hodi mlangoni. Katuni zimewataja Mashahidi. Utendaji wao wenye bidii unajulikana vema sana hivi kwamba wachoraji wa katuni kotekote ulimwenguni wametia ndani marejezo kwa Mashahidi wa Yehova. Huenda hizi zikaonekana kuwa zenye kudharau, lakini kwa kawaida zinategemea jambo hakika la msingi—kwamba Mashahidi wanajulikana kwa udumifu wao wa kuhubiri nyumba kwa nyumba.—Matendo 20:20.

Katuni moja ya karibuni ilimwonyesha mtu akipanda mlima kumwendea “guru” (mwalimu wa kiroho) fulani ili kupata mashauri. Alisema hivi: “Niambie mambo ya ajabu yatakayokuja!” Huyo “guru” alijibuje? “Ebu tuone . . . Kutakuwa na njaa kali, magonjwa ya kipuku, na matetemeko ya dunia. Jua litageuka kuwa giza, na mwezi kuwa damu.” Muuliza-maswali huyo akauliza: “Habari njema ni nini?” Huyo “guru” akajibu hivi: “Mungu atafuta kila chozi . . . na hakutakuwa na kifo tena wala huzuni wala umivu!” Mgeni akauliza hivi: “Wajuaje mambo hayo?” Jibu likawa nini? “Hakuna awaepukaye Mashahidi wa Yehova!” Na ni lazima iwe ilikuwa hivyo kwa habari ya yule mchoraji wa katuni mwenyewe!

Jambo la kuvutia kuhusu katuni hiyo na nyinginezo ni kwamba haifunui tu uendelevu wa ziara za Mashahidi bali pia upatano wa ujumbe wao. Kwa maneno machache tu, mchoraji huyo wa katuni alitoa sehemu kuu ya ushahidi wao wa nyumba kwa nyumba, akanukuu maandiko.—Linganisha Mathayo 24:7, 29; Ufunuo 21:3, 4.

Jambo la kwamba watu walio wengi hukataa ujumbe huo haliwavunji moyo Mashahidi au kupunguza bidii yao. Mtume Petro alionya hivi: “Katika siku za mwisho watakuja na dhihaka zao watu wenye kudhihaki, wafuatao tamaa zao wenyewe, na kusema, Iko wapi ahadi ile ya kuja kwake? kwa maana, tangu hapo babu zetu walipolala, vitu vyote vinakaa hali iyo hiyo, tangu mwanzo wa kuumbwa.” Yajapokuwa hayo, wakiwa wanachochewa na upendo, Mashahidi huendelea kuwatembelea majirani wao na watafanya hivyo hadi Mungu aletapo mwisho wa mfumo mfisadi uliopo.—2 Petro 3:3, 4.

Yesu alisema kwamba katika siku za mwisho, habari njema zingepasa kuhubiriwa kwanza. Ili uchunguze zaidi kwa nini na jinsi gani, ona makala mbili zifuatazo.—Marko 13:10.

[Picha katika ukurasa wa 9]

Mashahidi wa Yehova hawana jamii ya makasisi wa kulipwa mishahara—wote ni wahudumu wenye kujitolea