Nuru Yao Haikuzimika

KATIKA nyakati za Biblia kulikuwa na Mashahidi waaminifu wa Yehova waliopata vizuizi na magumu. Walikabili upinzani na zile zilizoonekana kuwa hali za kushindwa. Na bado, hawakukata tamaa kwa ajili ya kuvunjika moyo. Kama tokeo nuru yao haikuzimika.

Kwa kielelezo, nabii Yeremia alipewa utume awe nabii wa Mungu kwa taifa la Yuda lenye kuasi imani. Alitangaza onyo kuhusu uharibifu wa Yerusalemu uliokuwa ukija. (Yeremia 1:11-19) Kama tokeo, Yeremia alikabili upinzani mwingi kutoka kwa watu wa nchi yake waliomwona kuwa mtangaza msiba.

Kuhani Pashuri, msimamizi mkubwa katika nyumba ya Mungu, wakati mmoja alimpiga Yeremia kwa sababu ya yale aliyokuwa ametabiri na kumfunga mikatale. Kukiwa na jambo hilo lionekanalo kuwa kizuizi, Yeremia alisema: “nimekuwa kitu cha kuchekesha, mchana kutwa; kila mtu hunidhihaki. Maana kila ninenapo napiga kelele; nalia, Dhuluma na uharibifu! kwa kuwa neno la BWANA limefanywa shutumu kwangu, na dhihaka, mchana kutwa.” Nabii huyo alikuwa amevunjika moyo kiasi cha kusema: “Sitamtaja [Yehova], wala sitasema tena kwa jina lake.”—Yeremia 20:1, 2, 7-9.

Hata hivyo, Yeremia hakuvunjika moyo. Akisema juu ya ‘neno la Yehova,’ alitangaza hivi: “Moyoni mwangu kumekuwamo kama moto uwakao, uliofungwa ndani ya mifupa yangu, nami nimechoka kwa kustahimili, wala siwezi kujizuia.” (Yeremia 20:8, 9) Akichochewa kwa nguvu kusema ujumbe mbalimbali wa Mungu, Yeremia alitegemezwa na roho takatifu naye akatimiza utume wake.

Mtume Paulo pia alikuwa na sababu nyingi za kuvunjika moyo, ikiwa angeziachilia zimshinde. Alivumilia misiba ya kiasili, kuvunjikiwa meli, mnyanyaso, na mapigo. Kuongezea hayo, ‘kilichomsonga ndani sana kila siku, kilikuwa kuhangaikia makutaniko yote.’ (2 Wakorintho 11:23-28, NW) Ndiyo, kila siku ilimbidi Paulo ashughulike na matatizo, akihangaikia makutaniko mapya aliyokuwa amesaidia kuanzisha. Zaidi ya hayo, alikuwa mtu asiyekamilika na ilimbidi ashindane na “mwiba katika mwili,” yawezekana ugonjwa wa macho. (2 Wakorintho 12:7; Warumi 7:15; Wagalatia 4:15) Wengine hata walimsengenya Paulo, naye akapata kujua hivyo.—2 Wakorintho 10:10.

Zaidi ya hayo, Paulo hakuruhusu kuvunjika moyo kumshinde. La, hakuwa mtu mwenye uwezo mwingi mno. (2 Wakorintho 11:29, 30) Ni kitu gani kiliendeleza ‘moto wake wa ndani’? Kwanza, alikuwa na wenzi waliomtegemeza, wengine hata wakienda pamoja naye hadi Roma alipokuwa amefungiwa ndani ya nyumba. (Matendo 28:14-16) Pili, mtume huyo aliona hali yake kwa njia iliyosawazika. Waliomnyanyasa na wapinzani wake ndio waliokuwa na makosa, si Paulo. Kuelekea mwisho wa maisha yake ya kidunia, alikadiria huduma yake kwa mwelekeo chanya na kusema: “Baada ya hayo nimewekewa taji ya haki, ambayo Bwana, mhukumu mwenye haki, atanipa.”—2 Timotheo 4:8.

Zaidi ya yote, kwa kawaida Paulo alimwendea Yehova Mungu kwa sala, naye ‘Bwana akasimama karibu naye na kumtia nguvu.’ (2 Timotheo 4:17, NW) “Nayaweza mambo yote,” Paulo akasema, “katika yeye anitiaye nguvu.” (Wafilipi 4:13) Kuwasiliana na Mungu na Wakristo wenzake, pamoja na kukadiria huduma yake kwa mwelekeo chanya, kulimsaidia Paulo kuendelea katika utumishi wa Yehova.

Mungu alimpulizia Paulo kuandika hivi: “Tusichoke katika kutenda mema; maana tutavuna kwa wakati wake, tusipozimia roho.” (Wagalatia 6:7-9) Kuvuna nini? Uhai udumuo milele. Hivyo basi, uwe kama Yeremia, Paulo, na mashahidi wengine wengi wa Yehova wanaotajwa katika Maandiko. Ndiyo, uwe kama wao, na usivunjike moyo. Usiache nuru yako izimike.—Linganisha Mathayo 5:14-16.

[Picha katika ukurasa w25]

Paulo na Yeremia hawakuacha nuru yao izimike