Tazama! Jumba la Ufalme Katika Niue
NIUE ni kisiwa kidogo cha tumbawe katika Pasifiki ya Kusini, kilichoko kilometa 2,160 kaskazini-mashariki mwa New Zealand. Kulingana na broshua moja ya kusafiri, jina Niue latokana na maneno mawili, Niu, linalomaanisha “mnazi,” na e, linalomaanisha “angalia,” au “tazama.” Hiyo broshua yasema: “Hekaya yasema kwamba masetla Wapolinesia wa kwanza walitaja maneno haya walipofika na kuona minazi ikikua katika hicho kisiwa.”
Leo, Mashahidi wa Yehova katika Niue wanajivunia kuwaambia wageni, “E! Fale he Kautu ha mautolu!” yanayomaanisha “Tazama! Jumba la Ufalme letu!” Kwa nini wana hisia zenye nguvu kuhusu jumba hili? Mashahidi wa Yehova kila mahali hujivunia Majumba ya Ufalme yao, hasa ikiwa ni wao wenyewe walioyajenga. Lakini kujenga Jumba la Ufalme katika kisiwa cha mbali katikati ya Pasifiki ya Kusini iliyo kubwa mno ni jambo tofauti kabisa. Kwani, Niue ina eneo la kilometa 260 tu za mraba, na kuna watu 2,300 pekee kwenye kisiwa chote kizima.
Kulikuwa na swali la ni nani angejenga hilo Jumba la Ufalme. Lile kutaniko moja tu katika Niue lina Mashahidi 32 pekee. Vifaa vyote vikubwa vilivyohitajiwa, kama vile malori, tingatinga kubwa, na kreni, zilikuwa mali ya serikali. Isitoshe, karibu vitu vyote muhimu vya ujenzi—vyuma, mawe ya saruji, vifaa vya paa, vifaa vya umeme na vya mabomba ya maji, kikuza-sauti, na viti—vingehitaji kuingizwa kutoka New Zealand kwa usafirishaji ambao hufanya kazi mara moja tu kwa kila majuma matano. Mwishowe, uso wa kisiwa hicho chenye mawe-mawe ungefanya ujenzi kuwa mgumu, nalo jumba lilikuwa lazima lijengwe ili liweze kukinza vimbunga vya kitropiki. Kwa kweli, kazi kubwa sana kwa mtu yeyote!
Hata hivyo, kulikuwa na tofauti kubwa sana hapa. Kwa Mashahidi wa Yehova, Jumba la Ufalme ni kitovu cha ibada ya kweli ya sehemu wanakoishi, nao humwendea Yehova Mungu kwa ajili ya mwongozo na msaada. (Zaburi 56:11; 127:1) Ndugu Wakristo katika New Zealand, kutia ndani washiriki wa kutaniko la Kiniue katika Auckland, walitoa msaada kwa kundi dogo la Mashahidi katika Niue, wakiunga mkono kwa moyo wote ujenzi huo.
Uamuzi wa Kuendelea na Kazi
Katika Juni 1994 kwenye ujenzi wa Jumba la Ufalme katika Rotorua, New Zealand, mwito ulitolewa kwa wale waliopendezwa kushiriki katika mradi huo wa ujenzi wa Niue. Kwa kushangaza, ndugu na dada Wakristo 200 walijitolea. Kati ya hawa, watu 80 walichaguliwa, kutia ndani maseremala, wenye kufanya kazi ya chuma, mafundi wa mabomba ya maji, mafundi wa paa, mafundi wa kupiga plasta, wapaka-rangi, mafundi wa umeme, mafundi wa vikuza-sauti, wachanganyaji wa saruji, wajenzi wa mawe, na wafanyakazi wa mikono.
Akina ndugu walichora plani mbalimbali za ujenzi na kuendelea na kazi, wakitumaini katika Yehova. Mmoja wa wazee wawili wa kutaniko katika Niue, ambaye ni mfanyabiashara wa huko, alianza kufanya mipango ya kusafirisha vifaa vyote vilivyohitajiwa. Gharama nafuu ya kusafiri kwa ndege na ya malazi ilijadiliwa kwa ajili ya wafanyakazi wa mbali, waliojitolea kulipa gharama zao wenyewe, nazo tarehe za kujenga zikawekwa. Mradi huo ulikuwa umalizwe kwa siku 20, kutoka Machi 4 hadi Machi 23, 1995, wakati ambapo Jumba la Ufalme lingewekwa wakfu.
“Kwa mara ya kwanza kabisa maishani mwangu, nilishtuka sana kuona mahali ambapo tungejengea jumba,” akasema mwelekezi wa huo mradi, aliyetoka New Zealand juma moja mapema ili kutayarisha mambo. “Ardhi ni mwamba mtupu. Itachukua majuma mawili kuchimba tu mashimo ya nguzo.” Lakini hakuwakadiria vizuri Mashahidi wa huko, baadaye alikiri. “Ndugu wa Niue wanajua kusoma miamba,” yeye akasema. “Wanajua mahali pa kugonga miamba ili visehemu vikubwa vipasuke.” Hayo mashimo ya nguzo yalimalizika kwa siku mbili!
Katika Machi 4 ndege ya kwanza yenye kubeba Mashahidi wa New Zealand ikafika, na kazi ya saruji ikafanywa. Vikundi vyenye kufuatana vya wafanyakazi vilipokuja, sehemu mbalimbali za huo mradi zilimalizika. Siku za kazi zilianza saa 1:00 asubuhi kwa mazungumzo mafupi ya andiko la Biblia la kila siku. Ndugu fulani walifanya kazi kwa muda wa saa 12 kila siku katika halijoto zenye kufikia digrii 36 za Sentigredi. Mwishowe, kufikia Machi 23, uwanja wa jumba ulikuwa umetengenezwa. Ishara yenye kuvutia kutoka kwa mwembe ilitambulisha hilo jengo kuwa “Jumba la Ufalme la Mashahidi wa Yehova.”
Roho ya Ushirikiano na Ukaribishaji-Wageni
Sehemu kubwa iliyochangia kufanikiwa kwa mradi huo ulikuwa ushirikiano wa Waniue. Wanavijiji wa huko, wakishikwa na roho ya akina ndugu, walichanga chakula na pesa. Wengi waliuona ujenzi wa hilo jumba kuwa mradi wao. Wakuu wa serikali na wafanyabiashara walitoa utumishi mbalimbali zaidi ya walivyoombwa. Vifaa vilivyohitajiwa vilitolewa kwa matumizi, hata walitumia kiwanda cha mbao. Kampuni ya kusafirisha vitu hata ilipanga njia ya meli yao vizuri ili kuhakikisha kwamba vifaa vilivyohitajiwa vingefika kwa wakati ufaao.
Wageni walithamini kwelikweli kazi ngumu na ukaribishaji-wageni wa Mashahidi wa Niue, ambao walishiriki nyumba zao na mali zao. “Dada wa huko walikuwa wazuri ajabu,” akasema mfanyakazi mmoja wa ujenzi. Zaidi ya kupika mlo wa alasiri, dada hao waliandaa kiamsha kinywa kilichotayarishwa kila asubuhi saa 12:30. Wengine waliamka saa 10:30 ya usiku kutayarisha chakula. Mfanyakazi mmoja wa ujenzi akasema: “Nafikiri tumeishi vizuri hapa Niue kuliko tunavyoishi katika nyumba zetu wenyewe.”
Katika Machi 10 Niue Star liliripoti hilo tukio katika habari ya ukurasa wa kwanza yenye kichwa “Jumba la Ufalme la Kwanza Katika Niue” na picha ya watu wa New Zealand na wa Niue wakifanya kazi huko. Lilieleza kwamba jumba hilo lina ukubwa wa meta 280 za mraba na watu kutokea 70 hadi 100 waweza kutoshea ndani. Hiyo makala iliongezea hivi: “Hiyo kazi kwa kweli inaweza kumalizwa kwa [majuma] mawili, lakini kwa habari hii muda utaongezwa. Kufikia wakati huu, siku mbili tu baada ya kazi kuanza, msingi, nguzo, boriti na paa ziko tayari, mbele ya wakati.”
Mfanyabiashara wa huko alieleza tamaa yake kwamba wote katika Kisiwa cha Niue wautazame huo mradi na kupata somo kutokana nalo. Yeye alisema kwamba alitumaini huo ungeonyesha kila mtu jambo liwezalo kufanywa kwa upendo na ushirikiano.
Umati wa watu 204 ukaja kwenye kuwekwa wakfu kwa jumba hilo. Jambo lililothibitika kuwa ono lenye kuchochea sana kwa wahudhuriaji wote lilikuwa utoaji wa kipekee ambao katika huo akina ndugu, dada, na watoto wa Niue walionyesha kwa kuimba na kucheza dansi huo ujenzi wa Jumba la Ufalme. Maneno ya shukrani yalielekezwa kwa kundi la wajenzi na kwa Yehova, ambaye roho yake ilisukuma akili, mioyo, na mikono ili kutimiza hiyo kazi.—Isaya 40:28-31.