Tumaini Langu la Maisha Yangu Yote—Nisife Kamwe
KAMA ILIVYOSIMULIWA NA HECTOR R. PRIEST
“Hii kansa haiwezi kutibika,” daktari akasema. “Hakuna kitu kingine tuwezacho kukufanyia.” Ugunduzi huo ulifanywa zaidi ya miaka kumi iliyopita. Na bado ningali ninashikilia tumaini lenye kutegemea Biblia la kuishi milele duniani bila kufa kamwe.—Yohana 11:26.
WAZAZI wangu walikuwa Wamethodisti wanyoofu waliohudhuria kanisa katika mji mmoja mdogo wa mashambani, karibu na shamba la familia yetu. Nilizaliwa katika bonde zuri la ukulima la Wairarapa, karibu kilometa zipatazo 130 kaskazini-mashariki mwa Wellington, New Zealand. Huko tulifurahia kuona milima yenye vilele vya barafu, mito safi ya milimani, vilima vyenye miinuko na miinamo, na nyanda zenye rutuba.
Katika Kanisa la Methodisti, tulifundishwa kwamba watu wote wazuri huenda mbinguni na kwamba wabaya huenda helo, mahali pa mateso ya moto. Sikuelewa ni kwa nini Mungu hakuwaweka wanadamu mbinguni ikiwa alitaka waishi huko. Sikuzote nilikuwa nikihofu kifo na mara nyingi nilijiuliza ni kwa nini ni lazima tufe. Katika 1927, nilipokuwa na umri wa miaka 16, familia yetu ilipata msiba. Ni msiba huo ulioniongoza kutafuta majibu kwa maswali yangu.
Kwa Nini Reg Alikufa?
Ndugu yangu Reg alipokuwa na umri wa miaka 11, akawa mgonjwa sana. Daktari alishindwa kujua tatizo lake naye hakuweza kumsaidia. Mama akamwita mhudumu wa Methodisti. Alimwombea Reg, lakini hilo halikumfariji mama. Hata alimwambia mhudumu huyo kwamba sala zake hazikutimiza chochote.
Reg alipokufa, mama alikuwa akiongea na mtu yeyote na kila mtu kujaribu kupata majibu ya kweli kuhusu ni kwa nini mwana wake mchanga alikufa. Alipokuwa akiongea na mfanyabiashara mmoja mjini, aliuliza ikiwa huyo mfanyabiashara alijua lolote kuhusu hali ya wafu. Hakujua, lakini alisema: “Mtu fulani aliacha kitabu hapa ambacho unaweza kuchukua.”
Mama alienda nacho nyumbani akaanza kukisoma. Hakuweza kuacha kukisoma. Polepole mtazamo wake ukabadilika. Akaiambia familia yetu, “Ndiyo hii; hii ndiyo kweli.” Kitabu hicho kilikuwa The Divine Plan of the Ages, buku la kwanza la Studies in the Scriptures. Mwanzoni nilikuwa na shaka nikijaribu kubisha yale kitabu hicho kilisema kuhusu kusudi la Muumba. Hatimaye ubishi wangu ukaisha.
Nakubali Kweli ya Biblia
Nikawaza, ‘Wazia kuishi milele, bila kufa kamwe!’ Tumaini kama hilo ndilo mtu aweza kutarajia kutoka kwa Mungu mwenye upendo. Dunia iliyo paradiso! Ndiyo, ningeishi humo.
Baada ya kujifunza kweli hizi za ajabu, mama pamoja na dada watatu Wakristo kutoka Wellington—Dada Thompson, Barton, na Jones—wangeenda siku kadhaa kwa wakati mmoja, wakieneza mbegu ya Ufalme kotekote mashambani. Ingawa baba hakuwa na roho ya umishonari kama ya mama, alimuunga mkono katika utendaji wake.
Nilisadiki hiyo kweli, lakini kwa muda sikufanya mengi kuhusu itikadi zangu. Katika 1935, nilifunga ndoa na Rowena Corlett, na hatimaye tukabarikiwa kupata binti, Enid, na mwana, Barry. Nilifanya kazi ya kununua mifugo, nikinunua maelfu ya mifugo kutoka kwa wakulima waliokuwa karibu. Wakulima hao walipojadili siasa, nilikuwa nikihisi vizuri nilipowaambia: “Jitihada hizi za wanadamu hazitafaulu. Ufalme wa Mungu ndio serikali pekee itakayofanikiwa.”
Kwa kuhuzunisha, nikawa mraibu wa tumbaku; kila mara nilikuwa na sigara mdomoni. Baada ya muda afya yangu ikazorota, nami nikalazwa hospitalini nikiwa na matatizo ya tumbo yenye maumivu mengi. Niliambiwa kwamba nilikuwa na mchochota-tumbo mbaya, uliosababishwa na uvutaji wangu. Ingawa niliacha zoea hilo, kwa kawaida niliota kwamba nilikuwa nikivuta sigara au sigareti ya milele. Tumbaku yaweza kuwa uraibu mbaya ulioje!
Baada ya kuacha kutumia tumbaku, nilifanya marekebisho mengine ya maana. Katika 1939, nilipokuwa na umri wa miaka 28, nilibatizwa katika Mto Mangatai karibu na nyumbani kwetu kule mashambani. Robert Lazenby, ambaye baadaye alisimamia kazi ya kuhubiri katika New Zealand, alisafiri mwendo mrefu kutoka Wellington kuja kutoa hotuba nyumbani kwetu na kunibatiza. Tangu wakati huo, nikawa Shahidi jasiri wa Yehova.
Kupanga Kitengenezo Kazi ya Kuhubiri
Baada ya kubatizwa niliwekwa rasmi kuwa mwangalizi wa Kutaniko la Eketahuna. Mke wangu, Rowena, hakuwa amekubali bado kweli ya Biblia. Hata hivyo, nilimfahamisha kwamba nitamwalika Alf Bryant aje kutoka Pahiatua kunionyesha jinsi ya kutoa ushahidi vizuri nyumba kwa nyumba. Nilitaka nipange kitengenezo kazi ya kuhubiri ili kulihubiri eneo letu kwa utaratibu mzuri.
Rowena akasema: “Hector, ukienda kutoa ushahidi nyumba kwa nyumba, sitakuwapo ukirudi. Nakuacha. Daraka lako liko hapa—nyumbani pamoja na familia yako.”
Sikujua la kufanya. Nikavaa kwa kusita-sita. ‘Ni lazima niende,’ Nikawa najiwazia kila mara. ‘Uhai wangu waitegemea, na ndivyo ilivyo na uhai wa washiriki wa familia yangu.’ Basi nikamhakikishia Rowena kwamba sikutaka kumhuzunisha kwa njia yoyote. Nilimwambia nampenda sana, lakini kwa sababu jina na enzi kuu ya Yehova, pamoja na uhai wetu wenyewe, zilihusika, ilikuwa ni lazima nihubiri kwa njia hii.
Alf nami tukaenda kwenye mlango wa kwanza, akaongoza katika mazungumzo. Lakini nikajikuta nikichukua mazungumzo, nikimwambia mwenye nyumba kwamba kile kilichotendeka katika siku ya Noa chafanana na kile kinachotendeka katika siku yetu na kwamba ni lazima tufanye jambo fulani la kutuhakikishia wokovu. (Mathayo 24:37-39) Nikaacha vijitabu kadhaa hapo.
Tulipokuwa tukiondoka, Alf akasema: “Ulipata wapi ujuzi huo wote? Wewe hunihitaji. Nenda peke yako, nasi tutaeneza mara mbili ya eneo hili.” Basi tukafanya hivyo.
Tulipokuwa tukirudi nyumbani, sikujua ni nini kilichotungoja. Kwa mshangao na shangwe, Rowena alikuwa ametutayarishia kikombe cha chai. Majuma mawili baadaye mke wangu alijiunga nami katika huduma ya peupe naye akawa kielelezo chema cha bidii ya Kikristo.
Miongoni mwa watu wa kwanza kuwa Mashahidi wa Yehova katika bonde letu la ukulima walikuwa Maud Manser, mwana wake William, na binti yake Ruby. Mume wa Maud hakuwa mtu wa kirafiki naye alikuwa mkali. Siku moja Rowena nami tulifika shamba lao kumchukua Maud twende kwenye huduma. William mchanga alikuwa amepanga tutumie gari lake, kumbe baba yake hakutaka.
Hali ikawa yenye wasiwasi. Nikamwambia Rowena ambebe, Enid, binti yetu aliyekuwa mtoto. Nikaingia ndani ya gari la William na kuendesha mbio kutoka nje ya mahali pa kuwekea gari huku Bw. Manser akiharakisha kufunga mlango wa mahali gari huwekwa kabla hatujatoka. Lakini hakufua dafu. Baada ya kwenda mwendo fulani katika barabara inayotoka nje, tukasimamisha gari, nikaondoka nje kukutana na Bw. Manser aliyejaa ghadhabu. Nikamwambia: “Tunaenda huduma ya shambani, na Bi. Manser anakuja nasi.” Nikamsihi, hasira yake ikapunguka kidogo. Nikikumbuka, labda ningalishughulikia hali hiyo kwa njia tofauti, lakini baadaye akapendelea zaidi Mashahidi wa Yehova, ingawa hakupata kuwa Shahidi.
Kulikuwa na watu wachache tu wa Yehova miaka hiyo, nasi tulifurahia sana na kunufaika kutokana na ziara za wahudumu wa wakati wote waliokaa pamoja nasi katika shamba letu. Wageni hao walitia ndani Adrian Thompson na dada yake Molly, ambao wote walihudhuria madarasa ya mapema ya Watchtower Bible School of Gilead kwa ajili ya wamishonari na kutumikia katika migawo ya kigeni Japani na Pakistan.
Yaliyoonwa Wakati wa Vita
Mnamo Septemba 1939, Vita ya Ulimwengu ya 2 ilianza, na katika Oktoba 1940, serikali ya New Zealand ilipiga marufuku utendaji wa Mashahidi wa Yehova. Wengi wa ndugu zetu Wakristo walipelekwa kwenye mahakama za nchi. Wengine waliwekwa katika kambi za kufanya kazi na kutengwa na wake na watoto wao. Vita ilipoendelea kupamba moto, hata kama tulikuwa na shamba la ng’ombe wa maziwa, nilikuwa na wasiwasi wa kusajiliwa katika utumishi wa kijeshi. Kisha tangazo likatolewa kwamba wakulima hawangechukuliwa tena kutoka mashamba yao kwenda kwenye utumishi wa kijeshi.
Rowena nami tuliendelea na huduma yetu ya Kikristo, kila mmoja wetu akitoa zaidi ya muda wa saa 60 kila mwezi katika kazi ya kuhubiri. Katika kipindi hiki, nilikuwa na pendeleo la kusaidia Mashahidi wachanga ambao walikuwa wakidumisha kutokuwamo kwa Kikristo. Kwa niaba yao nilitokea katika mahakama za Wellington, Palmerston North, Pahiatua, na Masterton. Mara nyingi kulikuwa na kasisi katika halmashauri ya usajili, nami nilifurahi sana kufunua utegemezo wao wa vita usio wa Kikristo.—1 Yohana 3:10-12.
Usiku mmoja Rowena nami tulipokuwa tukijifunza Mnara wa Mlinzi, tulivamiwa na wapelelezi wa polisi. Msako wao ukatokeza fasihi ya Biblia nyumbani mwetu. “Mnaweza kufungwa gerezani kwa ajili ya hii,” tukaambiwa. Wapelelezi hao walipoingia katika gari lao waende, waligundua kwamba breki zao zilikwama na gari halingeweza kusonga. William Manser alisaidia kutengeneza gari lao, nao hawakurudi tena.
Wakati wa marufuku, tungeficha fasihi ya Biblia katika jengo lililokuwa katika sehemu yenye upweke ya shamba letu. Usiku wa manane, ningeenda ofisi ya tawi ya New Zealand na kujaza gari langu fasihi. Kisha ningeileta nyumbani na kuiweka katika mahali pale penye upweke. Usiku mmoja nilipofika ofisi ya tawi kuchukua fasihi ya siri, mahali hapo pakawashwa taa kwa ghafula! Polisi wakapiga kelele: “Tumekushika!” Lakini, kwa kushangaza wao waliniacha bila matatizo mengi.
Katika 1949, Rowena nami tuliuza shamba na kuamua kupainia mpaka tuishiwe pesa. Tulihamia nyumba fulani katika Masterton na kupainia katika Kutaniko la Masterton. Katika kipindi cha miaka miwili Kutaniko la Featherston lilianzishwa likiwa na wahubiri watendaji 24, na nilitumikia nikiwa mwangalizi-msimamizi. Kisha, katika 1953, nilifurahia pendeleo la kusafiri kwenda Marekani kuhudhuria mkusanyiko wa kimataifa wa siku nane wa Mashahidi wa Yehova kwenye Stediamu ya Yankee katika New York City. Rowena hakuweza kuandamana nami kwa sababu alihitaji kutunza binti yetu, Enid, aliyekuwa na ugonjwa wa ubongo.
Baada ya kurudi New Zealand, ilinibidi nifanye kazi ya kimwili. Tulirudi Kutaniko la Masterton, ambako niliwekwa rasmi kuwa mwangalizi-msimamizi. Karibu na wakati huu William Manser alinunua jumba la Little Theater katika Masterton, nalo likawa Jumba la Ufalme la kwanza katika Wairarapa. Katika miaka ya 1950, kutaniko letu lilifurahia ukuzi mzuri wa idadi na wa kiroho. Basi, mwangalizi wa mzunguko alipozuru, mara nyingi angetia moyo wale wakomavu kuhamia sehemu nyinginezo za nchi ili kusaidia kazi ya kuhubiri huko, na watu kadhaa walifanya hivyo.
Familia yetu ilibaki Masterton, na katika miongo ya miaka iliyofuata, sikupata tu mapendeleo mengi kutanikoni bali nilifurahia pia migawo kwenye mikusanyiko ya kitaifa na kimataifa. Rowena alishiriki kwa bidii katika utumishi wa shambani, kila wakati akiwasaidia wengine wafanye vivyo pia.
Kuvumilia Majaribu ya Imani
Kama ilivyotajwa mwanzoni, katika 1985, niligunduliwa kuwa nina kansa isiyoweza kutibika. Mke wangu mwaminifu, Rowena, nami, pamoja na watoto wetu, tulitaka kama nini kuwa miongoni mwa mamilioni wanaoishi sasa ambao hawatakufa kamwe! Lakini madaktari walinirudisha nyumbani nife. Lakini, kwanza waliniuliza jinsi nilivyoona ugunduzi huo.
“Nitadumisha moyo wa utulivu na kuwa mwenye kutazamia mazuri,” nikajibu. Kwa kweli, methali ya Biblia ikanipa uthabiti: “Moyo ulio mzima ni uhai wa mwili.”—Mithali 14:30.
Hao wastadi wa kansa walisifu shauri hilo la Biblia. “Mtazamo huo wa kiakili ni tiba ya asilimia 90 ya wagonjwa wa kansa,” wao wakasema. Wao pia walipendekeza tiba ya mnururisho ya majuma saba. Kwa furaha, nilifaulu kupambana na kansa.
Katika kipindi hicho kilichokuwa kigumu sana, nilipata pigo kubwa sana. Mke wangu mrembo na mwaminifu alipata mvujo wa damu wa ubongo akafa. Nilipata faraja katika vielelezo vya waaminifu walioorodheshwa katika Maandiko na kwa jinsi Yehova alivyosuluhisha matatizo yao walipodumisha uaminifu-maadili. Hivyo, ningali nina tumaini kubwa la ulimwengu mpya.—Warumi 15:4.
Hata hivyo, nilishuka moyo nikataka kuacha kutumikia nikiwa mzee. Ndugu wa kwetu walinitia moyo mpaka nikapata nguvu ya kuendelea tena. Tokeo likawa kwamba nimeweza kutumikia kwa kuendelea nikiwa mzee na mwangalizi Mkristo kwa miaka 57 ambayo imepita.
Kukabili Wakati Ujao kwa Uhakika
Kumtumikia Yehova miaka hii yote kumekuwa pendeleo lisiloweza kukadiriwa. Nimepata baraka nyingi kama nini! Haionekani kuwa muda mrefu sana wakati, nilipokuwa mwenye umri wa miaka 16, nilipomsikia mama yangu akipaaza sauti: “Ndiyo hii; hii ndiyo kweli!” Mama yangu alidumu akiwa Shahidi mwaminifu na mwenye bidii mpaka wakati wa kifo chake katika 1979, alipokuwa na umri wa zaidi ya miaka 100. Binti yake na wana sita pia wakawa Mashahidi waaminifu.
Tamaa yangu kubwa ni kuishi kuona jina la Yehova likiondolewa masuto yote. Je, nitatimiza tumaini langu la maisha la kutokufa kamwe? Bila shaka hilo labaki kuonwa. Hata hivyo, nina uhakika kwamba wengi, ndiyo, mamilioni hatimaye watapata baraka hiyo. Basi, maadamu ninaendelea kuishi, nitathamini sana tazamio la kuhesabiwa kuwa miongoni mwa wale ambao hawatakufa kamwe.—Yohana 11:26.
[Picha katika ukurasa wa 28]
Mama yangu
[Picha katika ukurasa wa 28]
Nikiwa pamoja na mke wangu na watoto