“Fanyeni Kazi, Si kwa Ajili ya Chakula Ambacho Huharibika”

KAMA ILIVYOSIMULIWA NA DAVID LUNSTRUM

Ndugu yangu Elwood nami tulikuwa zaidi ya meta tisa hewani, tukipaka rangi maandishi mapya katika jengo la kiwanda cha Watchtower. Zaidi ya miaka 40 baadaye, yangali hapo, yakihimiza: “SOMA NENO LA MUNGU BIBLIA TAKATIFU KILA SIKU.” Kila juma, maelfu ya watu huona maandishi haya wavukapo Brooklyn Bridge ijulikanayo sana.

KUMBUKUMBU zangu za mapema zaidi zatia ndani siku ya familia ya kufua. Kufikia saa 11:00 asubuhi, mama angeamka, akifua nguo za familia yetu kubwa, naye baba angekuwa akijitayarisha kwenda kazini. Wangeanza kubishana tena vikali, baba akibisha kuwa mwanadamu aligeuka kwa mamilioni ya miaka, naye mama akinukuu kutoka kwenye Biblia ili kuthibitisha kwamba wanadamu walikuwa uumbaji wa moja kwa moja wa Mungu.

Hata nilipokuwa na miaka saba tu, nilitambua kwamba mama alikuwa na kweli. Ingawa nilimpenda baba sana, ningeweza kuona kwamba imani yake haikutoa tumaini lolote la wakati ujao. Jinsi mama angekuwa mwenye furaha kujua kwamba miaka mingi baadaye, wana wake wawili walipaka rangi maandishi yaliyowatia moyo watu kuisoma Biblia, kitabu alichokipenda sana!

Lakini naenda upesi mno. Nilikujaje kuwa na pendeleo hili kubwa la kufanya kazi Betheli? Nahitaji kurudi nyuma hadi kwenye mwaka 1906, miaka mitatu kabla ya mimi kuzaliwa.

Kielelezo cha Mama cha Uaminifu

Wakati huo mama na baba walikuwa wameoana karibuni tu na walikuwa wakiishi kwenye hema katika Arizona. Mwanafunzi mmoja wa Biblia, kama walivyoitwa Mashahidi wa Yehova wakati huo, alipitia hapo na kumtolea mama mfululizo wa vitabu vilivyoandikwa na Charles Taze Russell, wenye kichwa Studies in the Scriptures. Usiku kucha alivisoma na upesi akatambua kuwa hii ndiyo kweli aliyokuwa akitafuta. Alisubiri kwa hamu nyingi sana baba arudi nyumbani kutoka kutafuta kazi.

Baba pia hakuwa ameridhishwa na yale ambayo makanisa yalikuwa yakifundisha, hivyo kwa muda fulani alizikubali kweli hizi za Biblia. Hata hivyo, baadaye, alifuata njia yake mwenyewe ya kidini na hata akafanya iwe vigumu kwa mama kufuata ibada ya kweli. Lakini mama bado hakuacha kushughulikia mahitaji ya kimwili na hata yale ya kiroho ya watoto wake.

Sitasahau kamwe mama akishuka kila usiku kutoka orofa ya juu, baada ya kufanya kazi ngumu mchana kutwa, ili kutusomea kifungu cha Biblia au kushiriki nasi johari fulani za kiroho. Baba alikuwa mfanya kazi mwenye bidii pia, na nilipokuwa mkubwa, alinifunza kazi ya kupaka rangi. Ndiyo, baba alinifundisha kazi, lakini mama alinifundisha kitu cha kufanyia kazi, kama Yesu alivyoagiza, ‘chakula kisichoharibika.’—Yohana 6:27, NW.

Familia yetu hatimaye iliishi katika mji mdogo wa Ellensburg katika jimbo la Washington, karibu kilometa 180 mashariki mwa Seattle. Wakati sisi watoto tulipoanza kuhudhuria mikutano ya Wanafunzi wa Biblia pamoja na mama, tulikutana katika nyumba za kibinafsi. Wanaume wote waliacha kujifunza Biblia wakati ambapo uhitaji wa kushiriki katika huduma ya nyumba kwa nyumba ilipokaziwa. Lakini mama hakutikisika. Hili lilinikumbusha nyakati zote kutumainia mwelekezo wa tengenezo la Yehova.

Hatimaye baba na mama wakawa na watoto tisa. Nilizaliwa Oktoba 1, 1909, nikiwa mtoto wao wa tatu. Sote pamoja, sita kati yetu tuliiga kielelezo chema cha mama na tukawa Mashahidi wa Yehova wenye bidii.

Wakfu na Ubatizo

Nilipokuwa katika miaka yangu ya mwisho-mwisho ya utineja, nilijiweka wakfu kwa Yehova, na kufananisha huo kwa ubatizo wa maji katika 1927. Huo ubatizo ulifanywa katika Seattle ndani ya jengo la zamani ambalo mbeleni lilikuwa kanisa la Kibaptisti. Nafurahi kwamba walikuwa wameutoa ule mnara wa zamani. Tulisindikizwa chini kuelekea kidimbwi kwenye chumba cha chini ambapo tulipewa joho refu jeusi tuvae. Ilionekana kana kwamba tulikuwa tukienda kwenye mazishi.

Nilikuwa Seattle tena miezi michache baadaye, na wakati huu nilipokea mwonjo wa kwanza wa kutoa ushahidi wa mlango kwa mlango. Aliyekuwa akiongoza alinielekeza, “Wewe nenda majengo haya, nami nitaenda majengo yale mengine.” Licha ya wasiwasi wangu, nilimwangushia mwanamke mmoja mzuri sana mafungu mawili ya vijitabu. Niliendelea na huduma ya nyumba kwa nyumba niliporudi Ellensburg, na sasa, karibu miaka 70 baadaye, ningali nafurahia huduma hiyo.

Utumishi Katika Makao   Makuu ya Ulimwengu

Si muda mrefu baadaye, mtu ambaye alikuwa ametumikia katika Betheli ya Brooklyn, makao makuu ya ulimwengu ya Watch Tower Society, alinitia moyo kujitolea kutumika huko. Muda mfupi baada ya mazungumzo yetu, tangazo lilitokea katika Mnara wa Mlinzi ambalo lilijulisha juu ya uhitaji wa msaada katika Betheli. Basi nikapeleka maombi. Sitasahau kamwe furaha yangu nilipopokea barua niripoti kwa ajili ya utumishi wa Betheli katika Brooklyn, New York, Machi 10, 1930. Hivyo ndivyo kazi-maisha yangu ya wakati wote ya kufanyia kazi ‘chakula kisichoharibika’ ilivyoanza.

Mmoja aweza kuwazia kwamba kwa sababu ya uzoefu wangu nikiwa mpaka-rangi, ningepewa mgawo wa kupaka rangi kitu fulani. Badala ya hivyo, kazi yangu ya kwanza ilikuwa kufanya kazi kwenye mashine ya kuunganishia vitabu na magazeti katika kiwanda. Ingawa hii ilikuwa kazi ya kuchosha sana, nilifurahia kazi hiyo kwa zaidi ya miaka sita. Ile matbaa kubwa ya rotari tuliyoiita kwa shauku manowari nzee ilichapisha vitabu ambavyo vilipelekwa kwenye orofa yetu ya chini kupitia mshipi wa uchukuzi. Furaha yetu ilikuwa kuona ikiwa tungeweza kuunganisha vijitabu hivyo kwa kadiri tulivyovipata kutoka kwa manowari nzee.

Baadaye nilifanya kazi kwenye idara kadhaa, kutia ndani idara ya kutengeneza vinanda. Tulitumia mashine hizo kuchezea ujumbe wa Biblia uliorekodiwa kwenye milango ya wenye nyumba. Kinanda kinachosimama kilibuniwa na kutengenezwa na wajitoleaji katika idara yetu. Kinanda hiki hakikucheza jumbe zilizorekodiwa mapema tu bali pia kilikuwa na sehemu ya pekee ya kubebea vijitabu na huenda hata vipande vya mkate. Nilikuwa na pendeleo la kuonyesha jinsi ya kutumia chombo hiki kipya katika mkusanyiko wa Detroit, Michigan, katika 1940.

Hata hivyo, tulikuwa tunafanya mengi zaidi ya mashine zenye ustadi. Pia tulikuwa tunafanya mabadiliko yenye umaana kiroho. Kwa mfano, Mashahidi wa Yehova walikuwa wakivaa pini yenye msalaba na taji. Lakini tukaja kuelewa baadaye kwamba Yesu aliuawa katika mti ulio wima, si katika msalaba. (Matendo 5:30) Kwa hiyo kuvaa pini hizo kukakomeshwa. Lilikuwa pendeleo langu kuondoa zile sindano kwenye pini hizo. Baadaye ile dhahabu iliyeyushwa na kuuzwa.

Ingawa tulikuwa na ratiba ya kazi yenye shughuli nyingi ya kila juma ya siku tano na nusu, tulihusika katika huduma ya Kikristo kwenye miisho-juma. Siku moja, 16 kati yetu tulishikwa na kuwekwa gerezani Brooklyn. Kwa nini? Basi, siku hizo tulielewa jina dini kumaanisha dini ya uwongo. Hivyo tulibeba maandishi yaliyosema upande mmoja “Dini Ni Mtego na Hila” nao ule upande mwingine “Mtumikie Mungu na Kristo Mfalme.” Kwa sababu ya kubeba maandishi haya, tuliwekwa gerezani, lakini Hayden Covington, wakili wa Watch Tower Society, alitutoa kwa dhamana. Wakati huo kesi nyingi zilizohusu uhuru wa ibada zilikuwa zikifanywa katika Mahakama Kuu ya Marekani, nalo lilikuwa jambo la kupendeza kuwa Betheli na kusikia habari za kwanza juu ya ushindi mbalimbali.

Hatimaye nilipewa mgawo wa kazi ambao ungetumia uzoefu wangu wa kupaka rangi. Katika Staten Island, moja kati ya maeneo matano ya New York City tulikuwa na stesheni yetu ya redio WBBR. Minara ya redio ya stesheni hiyo ilikuwa kimo cha zaidi ya meta 60, na ilikuwa na mafungu matatu ya waya. Niliketi juu ya ubao wenye urefu wa meta 0.9 na upana wa sentimeta 20 huku mfanyakazi mwenzangu akinipandisha juu. Nikiwa nimeketi juu sana kutoka kwa ardhi kwenye hicho kiti kidogo, nilipaka rangi hizo waya pamoja na hiyo minara. Wengine wameniuliza ikiwa sikutoa sala nyingi wakati wa kufanya kazi hiyo!

Kazi ya wakati wa kiangazi ambayo sitasahau kamwe ilikuwa kuosha madirisha na kupaka rangi vibao vya madirisha ya jengo la kiwanda. Tuliita kazi hiyo likizo yetu ya kiangazi. Tulitengeneza jukwaa letu la mbao na kwa kutumia roda tulijibeba juu na chini kando ya lile jengo la orofa nane.

Familia Yenye Kutegemeza

Katika 1932 baba yangu akafa, nami nilijiuliza niende nyumbani na kusaidia kumtunza mama. Hivyo kabla ya chakula cha mchana siku moja, niliweka barua ndogo ukingoni mwa meza mahali ambapo msimamizi wa Sosaiti, Ndugu Rutherford alikuwa akiketi. Katika barua hiyo niliomba kuongea naye. Alipojua hangaiko langu na kuwa nilikuwa na akina ndugu na dada waliokuwa bado wakiishi nyumbani, yeye aliuliza, “Je, wataka kukaa Betheli na kufanya kazi ya Bwana?”

“Bila shaka nataka,” nikajibu.

Kwa hivyo akadokeza nimwandikie mama kuona ikiwa alikubaliana na uamuzi wangu wa kukaa. Nikafanya vivyo hivyo, naye akanijibu akionyesha amekubaliana kabisa na uamuzi wangu. Nilithamini sana fadhili na ushauri wa Ndugu Rutherford.

Wakati wa miaka yangu mingi katika Betheli, niliandikia familia yangu kwa ukawaida nikiwatia moyo wamtumikie Yehova, kama tu vile mama alivyokuwa amenitia moyo. Mama alikufa katika Julai 1937. Alikuwa kichocheo kama nini kwa familia yetu! Ni ndugu na dada yangu wakubwa, Paul na Esther, na dada yangu mdogo Lois tu ambao hawakuwa Mashahidi. Hata hivyo, Paul, alipendezwa na kazi yetu na alitoa uwanja ambapo tulijenga Jumba la Ufalme letu la kwanza.

Katika 1936 dada yangu Eva akawa painia, au mhubiri wa wakati wote. Mwaka huohuo akaolewa na Ralph Thomas, na katika 1939 wakapewa mgawo wa kazi ya kusafiri ili kutumikia makutaniko ya Mashahidi wa Yehova. Baadaye wakahamia Mexico, ambapo walitumia miaka 25 wakisaidia katika kazi ya Ufalme.

Katika 1939 dada zangu Alice na Frances pia wakaanza utumishi wa upainia. Ilikuwa furaha kama nini kumwona Alice kwenye dawati katika mkusanyiko wa St. Louis wa 1941 akionyesha jinsi ya kutumia kile kinanda ambacho nilisaidia kutengeneza! Ingawa Alice alilazimika kukatisha upainia wake nyakati fulani kwa sababu ya madaraka ya familia, kwa ujumla alitumia zaidi ya miaka 40 katika huduma ya wakati wote. Frances alihudhuria Shule ya Biblia ya Gileadi ya Watchtower katika 1944 na kutumika kwa muda fulani akiwa mishonari katika Puerto Rico.

Joel na Elwood, walio wachanga zaidi katika familia, wakawa mapainia huko Montana mapema miaka ya 1940. Joel ameendelea kuwa Shahidi mwaminifu na sasa anatumika akiwa mtumishi wa huduma. Elwood alijiunga nami katika Betheli mwaka wa 1944, hilo likiniletea shangwe nyingi moyoni. Alikuwa na umri unaopungua miaka mitano nilipoondoka nyumbani. Kama nilivyokuwa nimetaja, tulifanya kazi pamoja katika kupaka rangi yale maandishi kwenye jengo la kiwanda, “Soma Neno la Mungu Biblia Takatifu Kila Siku.” Mara nyingi nimejiuliza ni watu wangapi ambao wameona maandishi hayo kwa miaka hiyo wametiwa moyo kusoma Biblia zao.

Elwood alitumika katika Betheli kufikia 1956 alipomwoa Emma Flyte. Kwa miaka mingi Elwood na Emma walifanya kazi pamoja katika huduma ya wakati wote, wakitumikia kwa muda fulani katika Kenya, Afrika, na vilevile Hispania. Elwood alipatwa na kansa na kufa katika Hispania katika 1978. Emma alibaki Hispania katika kazi ya upainia hata leo hii.

Ndoa na Familia

Katika Septemba 1953, niliondoka Betheli ili kumwoa Alice Rivera, painia katika Kutaniko la Brooklyn Center ambalo nilikuwa nikihudhuria. Nilimjulisha Alice kuwa nilikuwa na tumaini la kimbingu, lakini bado alipendezwa kuolewa nami.—Wafilipi 3:14.

Baada ya miaka 23 ya kukaa Betheli, lilikuwa badiliko kwelikweli kuanza kufanya kazi ya kimwili nikiwa mpaka-rangi ili Alice na mimi tuendelee katika kazi ya upainia. Sikuzote Alice alikuwa mwenye kutegemeza, hata wakati ambapo kwa sababu ya afya alilazimika kuacha kupainia. Katika 1954 tulikuwa tunatarajia mtoto wetu wa kwanza. Kuzaliwa kwake hakukuenda sawa sawa, ingawa mwana wetu, John, aliendelea vyema. Alice alipoteza damu nyingi sana wakati wa upasuaji hivi kwamba madaktari hawakudhani kuwa angeishi. Wakati fulani hawangeweza hata kuusikia mpigo wa moyo. Lakini aliendelelea kuishi usiku huo na baada ya muda akapona kabisa.

Miaka michache baadaye, baba ya Alice alipokufa, tulihamia mbali zaidi kwenye Long Island ili kuwa na mama yake. Kwa kuwa hatukuwa na gari, nilitembea au kutumia basi na reli za chini. Kwa njia hiyo niliweza kuendelea katika kazi ya upainia na kutegemeza familia yangu. Zile furaha za huduma ya wakati wote zapita kwa mbali dhabihu zozote zile. Kuwasaidia watu—kama vile Joe Natale, ambaye aliacha kazi maisha yenye matazamio mazuri sana ya kucheza besiboli ili awe Shahidi—kumekuwa moja kati ya baraka zangu nyingi.

Katika 1967, hali zilipozidi kuwa mbaya katika eneo la New York, niliamua kuwapeleka Alice na John hadi mji wa nyumbani Ellensburg ili kuishi huko. Sasa naona kuwa thawabu kuwaona wajukuu na vitukuu wengi wa mama yangu wakishiriki katika huduma ya wakati wote. Wengine wao hata wanatumikia katika Betheli. John pamoja na mke wake na watoto pia wanamtumikia Yehova kwa uaminifu.

Kwa kuhuzunisha, nilimpoteza mke wangu mpendwa, Alice, katika kifo katika 1989. Kuwa na shughuli katika huduma ya wakati wote kumenisaidia kuvumilia kifo hicho. Dada yangu Alice nami sasa twafurahia kupainia pamoja. Jinsi lilivyo jambo zuri kuishi pamoja tena na kuwa wenye shughuli katika kazi yenye umaana zaidi!

Kwenye masika ya 1994, nilitembelea Betheli kwa mara ya kwanza baada ya miaka 25. Ilikuwa furaha kama nini kuona wengi wa wale ambao nilifanya kazi pamoja nao zaidi ya miaka 40 iliyopita! Nilipoenda Betheli katika 1930, ni 250 pekee waliokuwa katika jamaa hiyo, lakini leo familia ya Betheli katika Brooklyn ina washiriki zaidi ya 3,500!

Kutegemezwa kwa Chakula cha Kiroho

Mapema asubuhi nyingi mimi hutembea kando-kando ya Mto Yakima karibu na nyumbani kwetu. Kutoka huko naweza kuona Mlima Rainier ulio mkuu ukifunikwa kwa theluji na ambao una kimo cha meta 4,300. Wanyama wa pori ni wengi sana. Nyakati nyingine mimi huona dubu, na wakati mmoja nilimwona elki.

Nyakati hizi nyamavu, za kuwa peke yangu huniruhusu kutafakari juu ya maandalizi ya Yehova ya ajabu. Naomba nguvu za kuendelea kwa uaminifu kumtumikia Mungu wetu, Yehova. Mimi pia hupenda kuimba ninapotembea, na hasa ule wimbo “Kufurahisha Moyo wa Yehova,” ambao maneno yawo husema: “Mungu tumenadhiria kufanya mapenzi yako. Tutafanya kwa hekima; kukufurahisha moyo.”

Ninafurahi kwamba nilichagua kufanya kazi ambayo inafurahisha moyo wa Yehova. Naomba kwamba niendelee kufanya kazi hii mpaka nipokee thawabu ya kimbingu ambayo imeahidiwa. Tamaa yangu ni kwamba habari hii na iwachochee wengine pia kutumia maisha zao katika ‘kufanya kazi kwa ajili ya chakula ambacho hakiharibiki.’—Yohana 6:27, NW.

[Picha katika ukurasa wa 23]

Elwood akipaka rangi yale maandishi “SOMA NENO LA MUNGU BIBLIA TAKATIFU KILA SIKU”

[Picha katika ukurasa wa 24]

Tukiwa na Grant Suiter na John Kurzen, tukionyesha jinsi ya kutumia kinanda kipya katika mkusanyiko katika 1940

[Picha katika ukurasa wa 25]

Katika 1944 sote tuliokuwa katika kweli tulikuwa katika huduma ya wakati wote: David, Alice, Joel, Eva, Elwood, na Frances

[Picha katika ukurasa wa 25]

Ndugu na dada zangu walio hai bado toka kushoto: Alice, Eva, Joel, David, na Frances