Upanuzi kwa Baraka za Yehova

PROGRAMU ya kuweka wakfu katika jioni ya Septemba 18, 1995, ilikazia kwamba kwelikweli Yehova Mungu amebariki upanuzi wa Mashahidi wake katika eneo la makao yao makuu ya ulimwengu katika Brooklyn, New York.

Zaidi ya watu 6,000 walisikiliza hiyo programu ya kuweka wakfu. Walikusanyika Brooklyn, ambapo programu ilifanywa, pamoja na sehemu nyinginezo, kutia ndani majengo makubwa ya Mashahidi wa Yehova karibu na Patterson na Wallkill, New York, na kwenye tawi lao karibu na Toronto, Kanada. Wale waliokuwa kwenye maeneo mengine isipokuwa Brooklyn walisikiliza kupitia simu.

Programu Yenye Kuchochea

Wanabetheli, kama waitwavyo wafanyakazi wa kujitolea, waliokuwa wakisikiliza programu walikuwa sehemu kubwa ya familia ya Betheli ya ulimwenguni pote yenye washiriki zaidi ya 16,400. Washiriki hao hutumika katika nchi mia moja hivi, ambapo wao huchapisha fasihi za Biblia na kuandaa utumishi mbalimbali wa kutegemeza yale makutaniko zaidi ya 78,600 ya Mashahidi wa Yehova ulimwenguni.

Kulikuwa na hamu nyingi programu ilipoanza saa 12:30 jioni kwa wimbo, na kufuatwa na sala iliyotolewa na Karl Klein. Mwenyekiti wa programu, Lloyd Barry, aliwakaribisha wote kwa uchangamfu kwa maneno machache juu ya umaana wa hiyo pindi. Albert Schroeder alifanya pitio la funzo la Mnara wa Mlinzi la hilo juma, naye Daniel Sydlik, akazungumza juu ya kichwa “Utumishi Wetu Mtakatifu Katika Betheli.” Hawa wa kwanza kwenye programu walikuwa washiriki wa Baraza Linaloongoza la Mashahidi wa Yehova.

Sehemu mbili za programu zilizofuata—“Kukabili Mahitaji Yetu ya Makao Yanayoongezeka, 1974-1995,” na “Mambo Makuu Juu Ya Marekebisho na Ujenzi wa Betheli Katika Brooklyn”—zilionyesha mambo makuu kuhusiana na ujenzi au ununuzi wa majengo yaliyowekwa wakfu. Hayo maelezo yalitoa uangalifu kwenye makao yaliyomalizika majuzi ambapo Wanabetheli karibu elfu moja wanakaa kwa sasa. Makao haya yenye kimo cha meta 115 huko 90 Sands Street huungana na kiwanda cha uchapishaji.

Programu ilitia ndani hotuba ya kuweka wakfu iliyotolewa na Milton Henschel, msimamizi wa Watch Tower Bible and Tract Society. Alikazia vielelezo vya Biblia vya kuweka wakfu majengo yaliyokusudiwa kutumiwa kwa ajili ya utumishi wa Yehova. Baada ya wimbo programu ilimalizika kwa sala iliyotolewa na Carey Barber, aliye pia mshiriki wa Baraza Linaloongoza. Lakini ni yapi baadhi ya mambo makuu ya hiyo programu?

Majengo Yawekwa Wakfu

Mwangalizi wa Kao la Betheli, George Couch alieleza kwamba makao 17 yalikuwa yameongezwa tangu kuweka wakfu kwa mwisho kwa kao la Betheli katika Brooklyn Mei 2, 1969.a Hayo yalikuwa makao yaliyojengwa majuzi au majengo yaliyonunuliwa na kurekebishwa. Kuweka wakfu kulikuwa kwa ajili ya makao haya 17, majengo mawili madogo—yaliyonunuliwa katika miaka ya 1940 lakini yakafanyiwa marekebisho yawe makao ya Betheli mbalimbali—pamoja na majengo ya kiwanda na ofisi yaliyokuwa yamejengwa au kununuliwa baada ya kuweka wakfu ofisi za makao makuu ya Mashahidi wa Yehova Machi 15, 1982.b

Jengo kubwa zaidi lililowekwa wakfu ni lile lililoko 360 Furman Street. Mwanzoni lilijengwa katika 1928, lilinunuliwa na Mashahidi wa Yehova Machi 15, 1983, na kurekebishwa kabisa. Lina sakafu yenye ukubwa wa meta 93,000 za mraba, au karibu ekari 23. Majengo mengine yaliyowekwa wakfu pia yalikuwa kile kiwanda katika 175 Pearl Street na gereji kubwa-kubwa zilizojengwa katika miaka ya majuzi.

Kwa Nini Makao Zaidi Yahitajiwa

Katika 1969, wakati ambapo makao ya mwisho ya Betheli ya Brooklyn yalipowekwa wakfu, kulikuwa na kilele cha Mashahidi 1,336,112 wakihubiri habari njema za Ufalme wa Mungu ulimwenguni pote. Lakini katika 1995 kulikuwa na 5,199,895 wakifanya hivyo, zaidi ya mara tatu na nusu kwa wingi! Hivyo, ili kwenda sambamba na uhitaji unaoongezeka wa fasihi za Biblia, familia ya Betheli ya Brooklyn imeongezeka toka washiriki wa kawaida 1,042 katika 1969 hadi zaidi ya 3,360, ambao sasa wanaishi katika makao 22 mbalimbali!

George Couch alizungumzia jinsi uhitaji wa makao ya ziada ulivyotoshelezwa kuanzia 1974 hadi 1995. Katika miaka ya mapema ya 1970, orofa kadhaa katika Towers Hotel zilikodishwa na Mashahidi wa Yehova ili kuandaa makao kwa ajili ya familia ya Betheli iliyokuwa ikiongezeka. Katika Desemba 1973, Nathan Knorr, aliyekuwa msimamizi wa wakati huo wa Watch Tower Society, aliandikia Ofisi ya Betheli pamoja na usimamizi wa Towers, akisema kwamba Sosaiti ilipanga ‘kuhama kutoka Towers Hotel kabla ya Oktoba 1, 1974.’

Ndugu Couch alisema kwamba alishangazwa kwa kuwa hakukuwa na popote pa kuwaweka Wanabetheli waliokuwa wakiishi katika Towers. Wasimamizi wa Towers walishangazwa, kwa kuwa walikuwa wakitegemea fedha za kodi za Sosaiti ili kujiendeleza. Tokeo likawa kwamba wasimamizi wa Towers waliwahimiza Mashahidi wa Yehova kununua hiyo hoteli. “Mmekuwa mkiongezeka tangu tuwe ujiranini,” walisema, “nanyi mwahitaji hili jengo.”

“Limejaa wapangaji,” lilikuwa jibu la wawakilishi wa Sosaiti. “Tukilinunua, tungetaka kuweka watu wetu wenyewe huko.”

“Tutaondosha watu kutoka hilo jengo kwa ajili yenu,” wasimamizi wa Towers wakaahidi. Basi, muda mfupi baadaye Mashahidi wa Yehova wakanunua jengo la Towers kwa bei ifaayo. “Ni kwa nini Ndugu Knorr aliandika barua hiyo?” Couch akawauliza wasikilizaji wake waliokuwa wameshangazwa. “Huenda hata yeye mwenyewe hakujua, lakini hili ndilo lililofanya Towers Hotel iuziwe Watch Tower Society.”

Msemaji pia alieleza jinsi Mashahidi wa Yehova walivyonunua 97 Columbia Heights, ambalo mbeleni lilikuwa mahali pa Margaret Hotel iliyojulikana sana, ng’ambo tu ya barabara kutoka Kao la Betheli la awali. Mahali hapo pafaa, kwa kuwa paliweza kuunganishwa na majengo ya Betheli kupitia shimo la chini ya ardhi. Katika Februari 1980, wakati jengo hilo lilipokuwa likiendelea kujengwa upya, lilichomeka. Kisha, kwa kuwa mwenyewe alitatizika kusimamisha jengo jipya mahali palepale, aliwauzia Mashahidi wa Yehova ile sehemu.

Ndugu Couch akaeleza: “Kihalisi kila moja la majengo haya lilikuwa na hadithi ya kupendeza ambayo ilielekeza kwenye jambo lilelile—kwamba Yehova Mungu ndiye aliyelielekeza tengenezo lionekanalo ili kupata jengo hilo hususa.”

Hadithi ya 90 Sands

Yaliyo mapya na makubwa zaidi ni yale makao ya 90 Sands Street. Majengo hayo yaliponunuliwa na Mashahidi wa Yehova katika Desemba 1986, ndani yalo mlikuwamo kiwanda kikubwa kwenye 160 Jay Street.c Hicho kiwanda kilibomolewa, na katika Agosti 30, 1990, familia ya Betheli ilijulishwa kwamba kibali kilikuwa kimetolewa ili kusimamisha jengo la makao lenye orofa 30 kwenye sehemu hiyo.

Kwenye mahojiano yaliyofanywa na mshiriki wa Baraza Linaloongooza Theodore Jaracz, mwangalizi wa kiwanda cha Sosaiti cha Brooklyn, Max Larson, alieleza jinsi ruhusa ilitolewa ili kujenga makao ya 90 Sands Street. Ndugu Larson alieleza kuwa yaliyokuwa yametendeka huko nyuma katika mwaka wa 1965, yalikuwa yenye umaana.

Nyuma huko Sosaiti ilitaka kujenga kiwanda chenye orofa kumi kwenye sehemu iliyo karibu na viwanda vyayo vingine, lakini viwango vya sehemu hiyo viliruhusu ujenzi wa orofa mbili tu. Mchoraji mmoja wa ramani za ujenzi alikubali kutayarisha ramani za ujenzi kwa ajili ya kiwanda kipya kilichonuiwa kujengwa, lakini akasema: “Siwezi kujiaibisha kwa kuzipeleka kwenye baraza.” Alikuwa na hakika kwamba Baraza la Viwango na Rufani kamwe halingebadili kanuni zalo kuhusu masharti ya kujenga katika sehemu ile. Wakati ramani za ujenzi zilipokubaliwa, alisema hivi kwa mshangao: “Mlifauluje!”

Sababu, Larson akaendelea kusema, ilikuwa kwamba wakati viwango vya kiwanda chetu cha orofa kumi vilipobadilishwa, viwango vya majengo yaliyokuwa karibu, kutia ndani lile lenye jengo la 160 Jay Street vilibadilishwa pia. Na kwa kushangaza, huko kubadilishwa kuliruhusu kujengwa kwa hoteli. Lakini, Larson akasema, hilo lilikuwa jambo ambalo hakuna yeyote alilitambua—angalau si mpaka miaka 25 baadaye, baada ya sisi kuanza kutafuta sehemu ya kujenga kao la Betheli jipya. Ndipo kule kubadilishwa kwa viwango kulipogunduliwa!

Ndugu Larson alieleza lililotokea: “Tulipotayarisha ramani kwa ajili ya makao yetu ya orofa 30 na kuzipeleka kwenye idara ya ujenzi, tuliambiwa: ‘Hamwezi kuwa na makao huko. Hiyo ni sehemu ya viwanda, na hawatabadili viwango kwa ajili yenu.’

“‘Si lazima wavibadili,’ tukawajulisha maofisa. ‘Tayari lina viwango vya hoteli.’ Walipotazama rekodi, hawakuamini kamwe! Basi hivyo ndivyo tulivyopata jengo letu la orofa 30,” Larson akamalizia.

Baraka za Yehova Zaonekana Wazi

Mtunga-zaburi mmoja wa Biblia aliandika: “BWANA asipoijenga nyumba waijengao wafanya kazi bure.” (Zaburi 127:1) Ni wazi kwamba, baraka za Yehova zilikuwa katika kazi ya ujenzi ya Mashahidi wa Yehova ili kuhimiza kazi ya ulimwenguni pote ya kuhubiri na kufundisha ambayo Yesu aliwaamuru wafuasi wake kuifanya.—Mathayo 24:14; 28:19, 20.

Waliokuwa na pendeleo la kusikiliza ile programu Septemba 18, 1995, walisisimuka kuona uthibitisho wa baraka hizo juu ya upanuzi kwenye makao makuu ya watumishi wa Yehova. Watu wa Yehova waweza kuwa na uhakika juu ya kuendelea kwake kuwabariki huku wakiendelea kufanya awaamuruyo.

[Maelezo ya Chini]

[Picha katika ukurasa wa 23]

90 SANDS ST. • 1995

[Picha katika ukurasa w24, 25]

Makao mengine yaliyoongezwa yaliyowekwa wakfu

97 COLUMBIA HTS. • 1986

BOSSERT HOTEL, 98 MONTAGUE ST. • 1983

34 ORANGE ST. • 1945

STANDISH HOTEL, 169 COLUMBIA HTS. • 1981

67 LIVINGSTON ST. • 1989

108 JORALEMON ST. • 1988

TOWERS HOTEL, 79-99 WILLOW ST. • 1975

[Picha katika ukurasa wa 26]

175 PEARL ST. • 1983

69 ADAMS ST. • 1991

360 FURMAN ST. • 1983