Kuponywa Kimuujiza kwa Wanadamu Kuko Karibu
“HATUJAONA kamwe lenye kufanana na hilo.” Hivyo ndivyo walivyosema mashahidi wenye kujionea kuponywa mara moja kimuujiza, kwa mtu aliyepooza kulikofanywa na Yesu. (Marko 2:12) Yesu pia aliponya vipofu, mabubu, na vilema, na wafuasi wake walifanya vivyo hivyo. Je, Yesu aliponya kwa nguvu gani? Je, imani ilikuwa na sehemu gani? Je, mambo hayo yaliyoonwa ya karne ya kwanza hutupasha habari gani juu ya kuponywa kimuujiza leo?—Mathayo 15:30, 31.
“Imani Yako Imekufanya Upone”
Waponyaji kwa imani wa leo hupenda kutaja taarifa hii ya Yesu kwa mwanamke aliyeteseka muda wa miaka 12 kutokana na mtiririko wa damu, ambaye alimwendea kwa ajili ya ponyo: “Imani yako imekufanya upone.” (Luka 8:43-48) Je, taarifa ya Yesu ilionyesha kwamba kuponyeshwa kwake kulitegemea imani yake? Je, hicho kilikuwa kielelezo cha “uponyaji kwa imani” kama uzoewavyo leo?
Tusomapo kwa makini rekodi ya Biblia, twaona kwamba katika pindi zilizo nyingi Yesu na mitume wake hawakuhitaji kwamba wagonjwa watangaze imani yao kabla ya kuponywa. Mwanamke aliyetajwa juu alikuja na, bila kuwa amesema lolote kwa Yesu, akagusa vazi lake kimya-kimya kutoka nyuma “na mara hiyo mtiririko wake wa damu ukakoma.” Katika pindi nyingine, Yesu aliponya mtu ambaye alikuwa miongoni mwa wale waliokuwa wamekuja kumkamata. Hata aliponya mtu ambaye hakujua Yesu alikuwa nani.—Luka 22:50, 51; Yohana 5:5-9, 13; 9:24-34.
Basi, imani ilitimiza fungu gani? Yesu na mitume wake walipokuwa katika wilaya ya Tiro na Sidoni, mwanamke Mfoinike alikuja na kulia kwa sauti kubwa hivi: “Uwe na rehema juu yangu, Bwana, Mwana wa Daudi. Binti yangu ameshikwa vibaya na roho mwovu.” Wazia hali yake ya kukata tumaini aliposihi hivi: “Bwana, nisaidie!” Akiwa amejawa na huruma, Yesu alimjibu: “Ewe mwanamke, ni kubwa imani yako; acha itukie kwako kama utakavyo.” Na binti yake akaponywa “tangu saa hiyo na kuendelea.” (Mathayo 15:21-28) Kwa wazi, imani ilihusika, lakini imani ya nani? Ona kwamba ilikuwa imani ya mama, si ya huyo mtoto mgonjwa, ambayo Yesu alisifu. Na imani katika jambo gani? Kwa kumtaja Yesu kuwa “Bwana, Mwana wa Daudi,” huyo mwanamke alikuwa akikiri mbele ya watu kwamba Yesu alikuwa Mesiya aliyeahidiwa. Hilo halikuwa wonyesho sahili wa imani katika Mungu au imani katika nguvu ya mponyaji. Yesu aliposema, “Imani yako imekufanya upone,” alimaanisha kwamba bila imani katika yeye akiwa Mesiya, wale waliotaabika hawangemwendea ili kuponywa.
Kutokana na vielelezo hivyo vya Kimaandiko, twaweza kuona kwamba uponyaji uliofanywa na Yesu ulikuwa tofauti kabisa na ule unaoonekana kwa kawaida au kudaiwa leo. Hakukuwa na wonyesho wa kihisia-moyo wenye nguvu—kupiga kelele, kuimba kwa kurudia-rudia, kulia kwa huzuni, kuzirai, na kadhalika—kutoka kwa umati na hakukuwa wonyesho wa kutazamisha wenye kichaa kwa upande wa Yesu. Kwa kuongeza, Yesu hakushindwa kamwe kuponya waliokuwa na kasoro za mwili kwa kisingizio kwamba walikosa imani au kwamba upaji wao wa kifedha haukuwa wenye ukarimu vya kutosha.
Maponyo kwa Nguvu za Mungu
Maponyo ya Yesu na wanafunzi wake yalitukiaje? “Nguvu ya Yehova ilikuwa hapo ili afanye uponyaji,” Biblia yajibu. (Luka 5:17) Baada ya ponyo moja, chasema kitabu cha Luka 9:43, “wote wakaanza kustaajabishwa na nguvu yenye ukuu ya Mungu.” Kwa kufaa, Yesu hakuelekeza uangalifu kwake mwenyewe akiwa mponyaji. Katika pindi moja alimwambia hivi mwanamume mmoja aliyekuwa amemweka huru na hali ya kusumbuliwa na roho mwovu: “Nenda nyumbani kwa jamaa zako, ukaripoti kwao mambo yote ambayo Yehova amekufanyia na rehema aliyokuwa nayo juu yako.”—Marko 5:19.
Kwa kuwa Yesu na mitume waliponya kwa nguvu ya Mungu, ni rahisi kuona kwa nini imani haikuhitajiwa sikuzote kwa upande wa yule aliyekuwa akiponywa ili aponywe. Hata hivyo, imani yenye nguvu kwa upande wa mponyaji ilikuwa lazima. Kwa sababu hiyo, wafuasi wa Yesu waliposhindwa kufukuza roho mwovu aliyekuwa mwenye nguvu hasa, Yesu aliwaambia sababu: “Kwa sababu ya imani yenu kidogo.”—Mathayo 17:20.
Kusudi la Kuponywa Kimuujiza
Hata ingawa Yesu alifanya uponyaji mwingi muda wote wa huduma yake duniani, hakuwa hasa akifuatia ‘huduma ya uponyaji.’ Uponyaji wake kimuujiza—ambao kamwe hakulipisha watu au kuomba upaji wowote—ulikuwa jambo la pili kwa hangaiko lake kuu, lile la “kuhubiri habari njema ya ufalme.” (Mathayo 9:35) Rekodi yasema kwamba katika pindi moja ‘aliwapokea kwa fadhili na kuanza kuwaambia juu ya ufalme wa Mungu, naye akawaponya wale wenye kuhitaji ponyo.’ (Luka 9:11) Katika masimulizi ya Gospeli, mara nyingi Yesu aliitwa “Mwalimu” lakini hakuitwa kamwe “Mponyaji.”
Kwa nini, basi, Yesu alifanya maponyo ya kimuujiza? Jambo kuu lilikuwa kuthibitisha utambulisho wake akiwa Mesiya aliyeahidiwa. Yohana Mbatizaji alipofungwa gerezani isivyo haki, alitaka uhakikisho wa kwamba alikuwa ametimiza yale ambayo Mungu alikuwa amemtuma kufanya. Alituma wanafunzi wake mwenyewe kwa Yesu na kuuliza hivi “Je, wewe ndiwe Yule Anayekuja, au je, twapaswa kutarajia aliye tofauti?” Ona yale Yesu aliyowaambia wanafunzi wa Yohana: “Shikeni njia yenu mwende na ripotini kwa Yohana yale mnayosikia na kuona: Vipofu wanaona tena, na vilema wanatembea huku na huku, wenye ukoma wanasafishwa na viziwi wanasikia, na wafu wanafufuliwa, na maskini wanatangaziwa habari njema.”—Mathayo 11:2-5.
Ndiyo, uhakika wa kwamba Yesu alifanya si uponyaji tu bali pia kazi nyingine za kimuujiza zilizorekodiwa katika Gospeli huthibitisha kwa uthabiti utambulisho wake akiwa “Yule Anayekuja” Mesiya aliyeahidiwa. Hakukuwa na uhitaji wa yeyote “kutarajia aliye tofauti.”
Maponyo ya Kimuujiza Leo?
Basi, je, twapaswa kutarajia Mungu athibitishe nguvu yake leo kupitia maponyo? La. Kwa kufanya kazi za kimuujiza kwa nguvu ya Mungu, Yesu alithibitisha bila shaka yoyote kwamba yeye alikuwa ndiye Mesiya ambaye Mungu alikuwa ameahidi angekuja. Matendo makuu ya Yesu yamerekodiwa katika Biblia ili wote wasome. Hakuna uhitaji wa Mungu kuthibitisha nguvu yake kwa kuyarudia matendo hayo kwa kila kizazi cha watu.
Kwa kupendeza, maponyo na kazi nyingine za kimuujiza zilisadikisha kwa kiwango fulani tu. Hata mashahidi fulani wenye kujionea miujiza ya Yesu hawakuamini kwamba alikuwa akiungwa mkono na Baba yake wa kimbingu. “Ijapokuwa alikuwa amefanya ishara nyingi sana mbele yao, hawakuwa wakiweka imani katika yeye.” (Yohana 12:37) Hiyo ndiyo sababu, baada ya kuzungumzia zawadi mbalimbali za kimuujiza—kutoa unabii, kusema kwa lugha, kuponya, na kadhalika—ambazo Mungu alikuwa amewapa washiriki mbalimbali wa kutaniko la Kikristo la karne ya kwanza, mtume Paulo alipuliziwa kusema hivi: “Kama kuna zawadi za kutoa unabii, zitaondolewa mbali; kama kuna lugha, zitaacha kuwako, kama kuna ujuzi, utaondolewa mbali. Kwa maana tuna ujuzi wa sehemu tu nasi twatoa unabii kwa sehemu tu; lakini wakati kile kilicho kamili kiwasilipo, kile kilicho cha sehemu tu kitaondolewa mbali.”—1 Wakorintho 12:28-31; 13:8-10.
Bila shaka, kuwa na imani katika Mungu ni muhimu kwa hali njema yetu. Hata hivyo, kutegemeza imani yako juu ya ahadi zisizo za kweli za maponyo huongoza tu kwenye kutamauka. Isitoshe, kwa habari ya wakati wa mwisho, Yesu alitoa onyo hili: “Makristo wasio wa kweli na manabii wasio wa kweli watainuka na kutoa ishara zilizo kubwa na maajabu ili kuongoza vibaya, ikiwezekana, hata wale wachaguliwa.” (Mathayo 24:24) Zaidi ya utapeli wa kitaalamu na udanganyifu, kungekuwa pia maonyesho ya nguvu za roho waovu. Tokeo ni kwamba, madai ya matukio yasiyoelezeka hayapaswi kutushangaza, na hayo bila shaka si msingi wa imani ya kweli katika Mungu.
Kwa kuwa leo hakuna mtu ambaye hufanya miujiza kama Yesu alivyofanya, je, tumepungukiwa? La hasha. Kwa hakika, wale walioponywa na Yesu hatimaye wangekuwa wagonjwa tena. Wote walizeeka na kufa. Manufaa ya uponyaji waliyopata yalikuwa ni ya muda mfupi kwa kulinganishwa. Hata hivyo, maponyo ya Yesu ya kimuujiza yana maana yenye kudumu kwa sababu yalitangulia kuonyesha baraka za wakati ujao.
Kwa sababu hiyo, baada ya kuchunguza Neno la Mungu, Biblia, Alexandre na Benedita, waliotajwa hapo awali, hawakuweka tena imani yao katika uponyaji kwa imani wa kisasa na maponyo ya uasiliani-roho. Hata hivyo, wamesadiki kwamba maponyo ya kimuujiza si mambo ya wakati uliopita. Kwa nini hivyo? Kama mamilioni ya watu ulimwenguni pote, wao hutazamia kwa hamu baraka za kuponywa chini ya Ufalme wa Mungu.—Mathayo 6:10.
Ugonjwa na Kifo Hazitakuwapo Tena
Kama ambavyo tumeona mapema, lengo kuu la huduma ya Yesu halikuwa kuponya wagonjwa na kufanya miujiza mingine. Badala ya hivyo, alifanya kuhubiri habari njema ya Ufalme wa Mungu kuwa kazi yake kuu. (Mathayo 9:35; Luka 4:43; 8:1) Ufalme huo ndio njia ambayo kwayo Mungu atatimiza kuponywa kimuujiza kwa wanadamu na atatangua madhara yote ambayo dhambi na hali ya kutokamilika imesababisha kwa familia ya kibinadamu. Atatimiza hayo jinsi gani na wakati gani?
Akitabiri juu ya wakati ujao uliokuwa mbali, Kristo Yesu alimpa mtume wake Yohana ono hili la kiunabii: “Sasa umekuwa wokovu na nguvu na ufalme wa Mungu wetu na mamlaka ya Kristo wake!” (Ufunuo 12:10) Uthibitisho wote waonyesha kwamba tangu mwaka wa 1914, Shetani, mpinzani mkuu wa Mungu, ametupwa chini kwenye ujirani wa dunia, na Ufalme sasa unatenda kazi kihalisi! Yesu ametawazwa kuwa Mfalme wa Ufalme wa Kimesiya na sasa yuko tayari kufanya mabadiliko makubwa duniani.
Katika wakati ujao ulio karibu sana, serikali ya Yesu ya kimbingu itatawala juu ya jamii mpya ya kibinadamu yenye uadilifu, kwa hakika “dunia mpya.” (2 Petro 3:13) Je, hali zitakuwa namna gani wakati huo? Hapa pana mwono wa kimbele wenye utukufu: “Nami nikaona mbingu mpya na dunia mpya; kwa maana mbingu ya kwanza na dunia ya kwanza zilikuwa zimepitilia mbali . . . Na [Mungu] atafuta kabisa kila chozi kutoka katika macho yao, na kifo hakitakuwapo tena, wala ombolezo wala kupaaza kilio wala umivu halitakuwapo tena kamwe. Mambo ya zamani yamepitilia mbali.”—Ufunuo 21:1, 4.
Je, waweza kuwazia jinsi maisha yatakavyokuwa kuponywa kimuujiza kwa wanadamu kunapotimia? “Hapana mwenyeji atakayesema, Mimi mgonjwa; watu wakaao humo watasamehewa uovu wao.” Ndiyo, Mungu atatimiza yale ambayo waponyaji kwa imani wasingeweza kamwe kufanya. ‘Atameza mauti hata milele.’ Kwa kweli, “Bwana MUNGU atafuta machozi katika nyuso zote.”—Isaya 25:8; 33:24.
[Picha katika ukurasa wa 7]
Chini ya Ufalme wa Mungu wanadamu wataponywa kimuujiza