“Nitamhofu Nani?”
“Vita vijapozuka dhidi yangu, bado nitakuwa na tegemeo wakati huo.”—ZAB. 27:3.
KULINGANA NA MAANDIKO YAFUATAYO, NI NINI KINACHOWEZA KUKUSAIDIA KUSITAWISHA UJASIRI?
1. Zaburi ya 27 itatusaidia kuelewa nini?
KWA nini kazi yetu ya kuhubiri inaongezeka licha ya kwamba hali za ulimwengu zinazidi kuwa mbaya? Kwa nini tunatumia kwa hiari wakati na nguvu zetu katika kazi hiyo ingawa watu wengi wanakabili matatizo mazito ya kiuchumi? Tunawezaje kubaki tukiwa wenye ujasiri wakati watu wengine wengi wanaogopa wakati ujao? Wimbo mmoja wa Mfalme Daudi ulioongozwa na roho ya Mungu na ambao unapatikana katika Zaburi ya 27, unajibu maswali hayo.
2. Hofu inaweza kumwathiri mtu jinsi gani, lakini tuna uhakika gani?
2 Daudi anaanza zaburi hiyo kwa maneno haya: “Yehova ni nuru yangu na wokovu wangu. Nitamwogopa nani? Yehova ni ngome ya uhai wangu. Nitamhofu nani?” (Zab. 27:1) Ingawa woga unaweza kumdhoofisha mtu, kuhisi hofu kunaweza kumfanya mtu asiweze hata kutimiza jambo lolote. Lakini hakuna hofu yoyote ambayo inapaswa kumtikisa mtu anayemtegemea Yehova. (1 Pet. 3:14) Tukimfanya Yehova awe ngome yetu, ‘tutakaa salama wala hatutasumbuliwa na hofu ya msiba.’ (Met. 1:33; 3:25) Kwa nini?
“YEHOVA NI NURU YANGU NA WOKOVU WANGU”
3. Yehova ni nuru katika maana gani, lakini ni lazima tufanye nini?
3 Mfano wa kwamba “Yehova ni nuru yangu” unakazia uhakika wa kwamba Yehova anatuweka huru kutokana na giza la kiroho na hali ya kutojua. (Zab. 27:1) Huenda nuru halisi ikaonyesha hatari au kizuizi fulani kilicho kwenye njia yetu, lakini nuru hiyo haiondoi hatari au kizuizi hicho. Ni lazima tutende kwa hekima kuhusiana na mambo tunayoona. Vivyo hivyo, Yehova anatufunulia maana hasa ya matukio ya ulimwengu. Anatuonya kuhusu hatari za mfumo huu mwovu wa mambo. Anatupatia kanuni za Biblia ambazo sikuzote zinafanya kazi, lakini ni lazima tufuate mambo tunayojifunza. Tukifanya hivyo, tunaweza kutenda kwa hekima zaidi kuliko maadui wetu au walimu wetu.—Zab. 119:98, 99, 130.
4. (a) Kwa nini Daudi alisema kwa usadikisho: “Yehova ni . . . wokovu wangu”? (b) Ni wakati gani hasa Yehova atakapokuwa wokovu wetu?
4 Maneno ya Daudi katika Zaburi 27:1 yanaonyesha kwamba Daudi alikumbuka jinsi Yehova alivyomkomboa, au kumwokoa wakati uliopita. Kwa mfano, Yehova alimkomboa “kutoka katika makucha ya simba na kutoka katika makucha ya dubu.” Pia, Yehova alimsaidia kumshinda Goliathi, lile jitu. Baadaye, Mfalme Sauli alijaribu kumuua Daudi kwa mkuki, lakini kila mara Yehova alimkomboa. (1 Sam. 17:37, 49, 50; 18:11, 12; 19:10) Haishangazi kwamba Daudi alisema hivi kwa usadikisho: “Yehova ni . . . wokovu wangu”! Yehova atakuwa wokovu wa watumishi wake kama tu alivyokuwa wokovu wa Daudi. Jinsi gani? Kwa kuwakomboa waabudu wake kupitia “dhiki kuu” inayokuja.—Ufu. 7:14; 2 Pet. 2:9.
KUMBUKA KILA PINDI AMBAYO YEHOVA AMEKUSAIDIA
5, 6. (a) Kukumbuka mambo yaliyopita kunatusaidiaje kusitawisha ujasiri? (b) Kutafakari kuhusu jinsi Yehova alivyowasaidia watumishi wake kunawezaje kuimarisha ujasiri wako?
5 Jambo muhimu tunaloweza kufanya ili kusitawisha ujasiri linaonyeshwa katika andiko la Zaburi 27:2, 3. (Soma.) Daudi alikumbuka nyakati ambazo Yehova alimsaidia kuokoka. (1 Sam. 17:34-37) Kumbukumbu hizo zilimpa usadikisho mwingi wa kukabiliana na hali mbalimbali ngumu hata zaidi. Je, unakata kauli hiyohiyo kutokana na mambo ambayo yamekupata maishani? Kwa mfano, je, umewahi kusali kwa bidii sana kuhusu tatizo fulani lenye kufadhaisha na kisha ukaona jinsi Yehova alivyokupa hekima au nguvu za kuvumilia jaribu hilo? Au je, unaweza kukumbuka jinsi ambavyo vipingamizi katika utumishi wako wenye shangwe viliondolewa au jinsi mlango mkubwa wa utendaji ulivyofunguliwa mbele yako? (1 Kor. 16:9) Unahisije sasa unapokumbuka mambo hayo? Je, kumbukumbu hizo zinaendelea kukusadikishia kwamba Yehova anaweza kukusaidia kushinda au kuvumilia vipingamizi vikubwa hata zaidi au hali ngumu?—Rom. 5:3-5.
6 Namna gani ikiwa serikali fulani yenye nguvu ingepanga njama ya kuwaangamiza Mashahidi wa Yehova wakiwa tengenezo? Watu wengi katika nyakati za kisasa wamejaribu kufanya vivyo hivyo lakini wameshindwa. Kukumbuka jinsi Yehova alivyowasaidia watu wake wakati uliopita kutatupatia ujasiri wa kukabiliana na jaribu lolote litakalotokea wakati ujao.—Dan. 3:28.
THAMINI IBADA SAFI
7, 8. (a) Kulingana na Zaburi 27:4, Daudi alimwomba Yehova nini? (b) Hekalu kubwa la kiroho la Yehova ni nini, na ibada inatolewaje humo?
7 Jambo lingine muhimu ambalo litatusaidia kusitawisha ujasiri ni kuipenda ibada ya kweli. (Soma Zaburi 27:4.) Katika siku za Daudi, maskani ndiyo iliyokuwa “nyumba ya Yehova.” Daudi mwenyewe ndiye aliyefanya mipango ya hekalu kubwa ambalo lingejengwa na mwana wake Sulemani. Karne nyingi baadaye, Yesu alifunua kwamba kumtolea Yehova ibada inayokubalika hakungetegemea tena kuwa na jengo kubwa lililobarikiwa na Mungu. (Yoh. 4:21-23) Mtume Paulo alionyesha katika kitabu cha Waebrania sura ya 8 hadi 10 kwamba hekalu kubwa la kiroho lilianza Yesu alipobatizwa mwaka wa 29 W.K., wakati alipojitoa mwenyewe kufanya mapenzi ya Yehova. (Ebr. 10:10) Hekalu hilo kubwa la kiroho ni mpango ambao Yehova amefanya ili kwamba sisi, kupitia imani yetu katika dhabihu ya fidia ya Yesu, tuweze kumkaribia Mungu kwa njia inayokubalika. Tunaabuduje katika hekalu hilo? Kwa kusali “tukiwa na mioyo ya kweli katika uhakikisho kamili wa imani”; kwa kulitangaza tumaini letu hadharani bila kuyumba-yumba; na kwa kuwafikiria, kuwachochea, na kuwatia moyo waabudu wenzetu tunapokusanyika pamoja katika mikutano ya kutaniko na wakati wa ibada ya familia. (Ebr. 10:22-25) Kuthamini mpango wa ibada ya kweli kunatuimarisha katika siku hizi za mwisho zenye hatari.
8 Duniani pote, watumishi waaminifu wa Yehova wanashiriki kwa bidii zaidi katika huduma, wanajifunza lugha mpya, na wanahamia katika maeneo yenye uhitaji mkubwa zaidi wa wahubiri wa Ufalme. Kama mtunga-zaburi, wanaonyesha kwa matendo yao kwamba wanamwomba Yehova jambo moja tu. Wanataka kufurahia uzuri wa Yehova na kushiriki katika utumishi mtakatifu hata wakikabili hali yoyote ile.—Soma Zaburi 27:6.
TEGEMEA MSAADA WA MUNGU
9, 10. Uhakikisho unaotolewa katika Zaburi 27:10 unamaanisha nini?
9 Daudi anakazia jinsi alivyotegemea sana msaada wa Yehova kwa kusema hivi: “Hata ikiwa baba yangu na mama yangu wangeniacha, Yehova mwenyewe angenichukua.” (Zab. 27:10) Tunaweza kukata kauli kutokana na matukio yanayotajwa katika 1 Samweli sura ya 22 kwamba wazazi wa Daudi hawakumwacha. Hata hivyo, watu wengi leo wamelazimika kuvumilia kwa sababu ya kukataliwa kabisa na familia zao. Lakini, wengi ambao wameachwa na familia zao wamepata msaada na ulinzi katika kutaniko la Kikristo lenye upendo.
10 Kwa kuwa Yehova yuko tayari kuwategemeza watumishi wake wakati watu wengine wanapowaacha, je, hilo halionyeshi kwamba atawategemeza pia wanapokabili dhiki nyingine yoyote? Ikiwa, kwa mfano, tunahangaika kuhusu jinsi ya kuiandalia familia yetu mahitaji ya kimwili, je, hatupaswi kuwa na uhakika wa kwamba Yehova atatusaidia? (Ebr. 13:5, 6) Anaelewa hali na mahitaji ya watumishi wake wote washikamanifu.
11. Kumtegemea Yehova kunaweza kuwa na matokeo gani juu ya wengine? Toa mfano.
11 Fikiria kisa cha Victoria, ambaye ni mwanafunzi wa Biblia huko Liberia. Alipokuwa akifanya maendeleo ili abatizwe, mwanamume aliyekuwa akiishi naye alimwacha yeye na watoto wake watatu. Licha ya kwamba hakuwa na nyumba wala kazi, Victoria aliendelea kufanya maendeleo ya kiroho. Baada ya Victoria kubatizwa, binti yake mwenye umri wa miaka 13 aliokota kibeti kilichojaa pesa. Ili kuepuka kushawishiwa, waliamua kwamba hata hawangehesabu pesa hizo. Badala yake, walimtafuta haraka askari-jeshi mwenye kibeti hicho. Askari-jeshi huyo aliwaambia kwamba ikiwa watu wote wangekuwa wanyoofu kama Mashahidi wa Yehova, ulimwengu wote ungekuwa bora na wenye amani zaidi. Victoria alitumia Biblia kumwonyesha askari-jeshi huyo ahadi ya Yehova ya ulimwengu mpya. Alivutiwa sana na imani na unyoofu wa Victoria hivi kwamba akampa kiasi kikubwa cha pesa zilizookotwa. Kwa kweli, kuamini kabisa kwamba Yehova anaweza kuwaandalia mahitaji yao kumewafanya Mashahidi wa Yehova wajulikane waziwazi kuwa watu wanyoofu.
12. Tunaonyesha nini tunapoendelea kumtumikia Yehova licha ya kupoteza kazi au pesa? Toa mfano.
12 Au fikiria jinsi ambavyo Thomas, mhubiri ambaye hajabatizwa huko Sierra Leone, alihisi. Alianza kufanya kazi akiwa mwalimu wa shule ya sekondari, lakini hakulipwa mshahara wake kwa karibu mwaka mmoja hadi alipomaliza kazi yake. Thomas alihitaji kutimiza takwa gani la mwisho kabla ya kupokea mshahara wake? Alihitaji kuhojiwa na msimamizi wa shule hiyo ambaye ni kasisi. Kasisi huyo alimweleza Thomas kwamba mafundisho ya Mashahidi wa Yehova hayapatani na mafundisho ya shule hiyo. Kasisi huyo alisisitiza kwamba Thomas achague ama kazi au mafundisho yake yanayotegemea Biblia. Baada ya kuacha kazi hiyo na kupoteza mshahara wa karibu mwaka mmoja, Thomas alipata kazi nyingine ya kurekebisha redio na simu za mkononi. Mfano huo na mifano mingine kama hiyo inaonyesha kwamba tukimtegemea Yehova, hatutaogopa kamwe kwamba tutakosa mahitaji yetu kama watu wengine wanavyoogopa. Lakini kwa kuwa Yehova ndiye Muumba wa kila kitu na Mlinzi wa watu wake, tuna hakika kwamba atatuandalia mahitaji yetu.
13. Kazi ya kuhubiri kuhusu Ufalme inaendeleaje katika nchi ambako wahubiri hawana vitu vingi vya kimwili?
13 Katika nchi nyingi ambazo zina hali ngumu ya maisha, kwa kawaida wahubiri wa Ufalme wanahubiri kwa bidii sana. Kwa nini? Ofisi moja ya tawi inaandika hivi: “Wenye nyumba wengi wanaokubali kujifunza Biblia hawana kazi na hivyo wana wakati zaidi wa kujifunza wakati wa mchana. Ndugu pia wana wakati zaidi wa kuhubiri. Watu, hasa katika maeneo yenye hali ngumu zaidi za maisha, hawahitaji kuambiwa kwamba tunaishi katika siku za mwisho; wanaona hali mbaya kila mahali.” Mmishonari mmoja ambaye ametumika kwa miaka zaidi ya 12 katika nchi moja ambako kila mhubiri anaongoza, kwa wastani, zaidi ya mafunzo matatu ya Biblia, anaandika hivi: “Kwa kuwa wahubiri wengi wanaishi maisha rahisi na hawana mambo mengi yanayowakengeusha fikira, kwa ujumla wana wakati mwingi wa kuhubiri na kuongoza mafunzo ya Biblia.”
14. Umati mkubwa unaweza kufurahia ulinzi wa Mungu katika njia zipi?
14 Yehova ameahidi kuwasaidia, kuwalinda, na kuwakomboa watu wake kimwili na kiroho wakiwa kikundi, na tunaamini kwamba atatimiza ahadi yake. (Zab. 37:28; 91:1-3) Bila shaka, kutakuwa na umati mkubwa utakaookoka ile “dhiki kuu.” (Ufu. 7:9, 14) Kwa hiyo, umati huo mkubwa, ukiwa kama kikundi, utalindwa ili usiangamizwe katika kipindi chote kinachobaki cha siku za mwisho. Wataandaliwa kila kitu watakachohitaji ili kuvumilia majaribu na kulinda uhusiano wao pamoja na Yehova. Na katika kipindi chote cha mwisho cha ile dhiki kuu, Yehova atawalinda watu wake.
“UNIFUNDISHE NJIA YAKO, EE YEHOVA”
15, 16. Tunafaidikaje tunapofuata mambo ambayo Mungu anatufundisha? Toa mfano.
15 Ili kuendelea kuwa na ujasiri, tunahitaji kuendelea kufundishwa njia ya Mungu. Hilo linaonekana wazi katika maneno ya Daudi anapomsihi Mungu hivi: “Unifundishe njia yako, Ee Yehova, na uniongoze katika njia ya unyoofu kwa sababu ya adui zangu.” (Zab. 27:11) Kutenda kulingana na sala hiyo kunamaanisha kuwa makini kufuata haraka mwongozo wowote unaotegemea Biblia ambao tunapokea kupitia tengenezo la Yehova. Wengi ambao wameepuka kuwa na madeni yasiyo ya lazima wanaweza kuthibitisha kwamba kufuata mashauri yenye hekima kuhusu kurahisisha maisha yao kumewafaidi wakati wa hali ngumu za kiuchumi za hivi karibuni. Badala ya kujikuta wamelemewa na vitu ambavyo hawawezi tena kugharimia, wanakuwa na uhuru wa kupanua huduma yao. Ni vizuri kila mmoja wetu ajiulize, ‘Je, ninafuata mara moja kila jambo ambalo ninasoma katika Biblia na katika machapisho ya jamii ya mtumwa mwaminifu na mwenye busara, hata ikiwa inanilazimu kujidhabihu kibinafsi?’—Mt. 24:45.
16 Tukimruhusu Yehova atufundishe na kutuongoza katika njia ya uadilifu, hatutakuwa na sababu yoyote ya kuhofu. Painia mmoja wa kawaida huko Marekani alipoomba kazi ambayo ingemsaidia yeye na familia yake yote kuendelea katika utumishi wa wakati wote, msimamizi wake alimwambia kwamba hangeweza kamwe kupata kazi hiyo bila kuwa na digrii ya chuo kikuu. Ikiwa ungeambiwa hivyo, je, ungejuta kwa sababu ulifuatia utumishi wa wakati wote badala ya elimu ya juu zaidi? Majuma mawili baadaye, msimamizi huyo alifutwa kazi, na msimamizi mwingine akamuuliza ndugu huyo kuhusu miradi au malengo yake. Ndugu huyo alimweleza kwamba yeye na mke wake walikuwa wahudumu wa wakati wote wa Mashahidi wa Yehova na walitaka kuendelea na utumishi wao. Kabla ndugu huyo hajasema neno lingine lolote, msimamizi huyo alisema hivi: “Nilijua kulikuwa na jambo fulani linalokufanya uwe tofauti! Baba yangu alipokuwa karibu kufa, waamini wenzenu wawili walikuja na kumsomea Biblia kila siku. Niliahidi kwamba ikiwa ningepata nafasi ya kumsaidia Shahidi wa Yehova, ningefanya hivyo.” Asubuhi iliyofuata, ndugu huyo alipewa kazi ileile ambayo msimamizi aliyetangulia alikataa kumpa. Kwa kweli, tukitanguliza masilahi ya Ufalme maishani mwetu, Yehova atatimiza ahadi yake ya kwamba hatutakosa mahitaji yetu ya lazima.—Mt. 6:33.
IMANI NA TUMAINI NI MUHIMU
17. Ni nini kitakachotuwezesha kukabiliana na wakati ujao tukiwa na uhakika?
17 Kisha, Daudi anakazia umuhimu wa imani na tumaini kwa kusema: “Kama nisingalikuwa na imani katika kuuona wema wa Yehova katika nchi ya walio hai—!” (Zab. 27:13) Kwa kweli, maisha yetu yangekuwaje bila tumaini tulilopewa na Mungu na ikiwa hatungethamini mambo yanayozungumziwa katika Zaburi ya 27? Basi, na tuendelee kusali kwa uhakika ili tupewe nguvu na kuokolewa tunapokabili matukio yanayoongoza kwenye Har–Magedoni.—Soma Zaburi 27:14.
[Picha katika ukurasa wa 23]
Daudi alipata nguvu kwa kukumbuka matendo ya Yehova ya wokovu
[Picha katika ukurasa wa 25]
Je, tunaona hali ngumu za kiuchumi kuwa fursa ya kupanua huduma yetu?