IMANI​—Sifa Inayotuimarisha

IMANI hutupatia nguvu nyingi sana. Kwa mfano, ingawa Shetani anataka kutuangamiza kiroho, imani hutusaidia “[kuzima] mishale yote inayowaka moto ya yule mwovu.” (Efe. 6:16) Tukiwa na imani tunaweza kuvumilia matatizo yaliyo kama mlima. Yesu aliwaambia hivi wanafunzi wake: “Mkiwa na imani inayolingana na mbegu ya haradali, mtauambia mlima huu, ‘Ondoka hapa uende pale,’ nao utaondoka.” (Mt. 17:20) Kwa kuwa imani inaweza kutuimarisha kiroho, ni vema kujiuliza maswali haya: Imani ni nini? Hali ya moyo wetu inaweza kuathirije imani yetu? Tunaweza kuimarishaje imani yetu? Na tunapaswa kuwa na imani katika nani?—Rom. 4:3.

Imani inahusisha mengi zaidi ya kuamini au kujua tu kweli ya Biblia, kwa maana hata “roho waovu pia wanaamini [kwamba Mungu yupo] na kutetemeka.” (Yak. 2:19) Hivyo basi, imani ni nini?

Biblia inafafanua kwamba imani huhusisha mambo mawili. Kwanza, “imani ni tarajio lililohakikishwa la mambo yanayotumainiwa.” (Ebr. 11:1a) Ikiwa una imani, utaamini kabisa kwamba mambo yote ambayo Yehova anasema ni kweli na yatatimizwa. Kwa mfano, Yehova aliwaambia hivi Waisraeli: “Ikiwa mngeweza kulivunja agano langu kuhusu mchana na agano langu kuhusu usiku, ili kuzuia mchana na usiku usije kwa wakati wake, hapo ndipo agano langu pamoja na mtumishi wangu Daudi lingeweza kuvunjwa.” (Yer. 33:20, 21) Je, wewe huogopa kwamba jua litaacha kuchomoza na kutua, na hivyo kusababisha kusiwe na mchana na usiku? Ikiwa huna shaka kuhusu sheria za asili zinazoifanya dunia iendelee kuzunguka kwenye mhimili wake na kulizunguka jua, je, una sababu yoyote ya kumtilia shaka Muumba wa sheria hizo, kwamba atashindwa kutimiza neno lake? Bila shaka la!—Isa. 55:10, 11; Mt. 5:18.

Pili, imani ni “uthibitisho ulio wazi wa mambo halisi ambayo hayaonekani.” Imani inatajwa kuwa “uthibitisho ulio wazi,” au “uthibitisho wenye kuridhisha,” wa mambo halisi yasiyoonekana kwa macho. (Ebr. 11:1b; maelezo ya chini) Jinsi gani? Tuseme mtoto anakuuliza, ‘Unajuaje kwamba kuna hewa?’ Ingawa hujawahi kuona hewa, bila shaka utamsaidia mtoto huyo atafakari kuhusu uthibitisho uliopo, yaani, mambo kama vile kupumua, kuvuma kwa upepo, na kadhalika. Mtoto anapopata uthibitisho wenye kuridhisha, ataelewa kwamba kitu kinaweza kuwepo ingawa hakionekani kwa macho. Kwa njia hiyohiyo, imani hutegemea uthibitisho ulio hakika.—Rom. 1:20.

Kwa kuwa imani hutegemea uthibitisho uliopo, ili mtu awe na imani ni lazima kwanza apate “ujuzi sahihi wa kweli.” (1 Tim. 2:4) Lakini haitoshi tu kuwa na ujuzi. Mtume Paulo aliandika hivi: “Kwa moyo mtu huwa na imani.” (Rom. 10:10) Haitoshi tu kuiamini kweli, bali ni lazima pia kuithamini. Kwa kufanya hivyo, ndipo tu tutakapochochewa kuonyesha imani, yaani, kutenda kulingana na kweli. (Yak. 2:20) Mtu asiyethamini kweli kutoka moyoni anaweza kukataa hata uthibitisho ulio wazi, ikiwa anashikilia kwa ushupavu maoni aliyo nayo au anatafuta kisingizio cha kutetea tamaa zake za mwili. (2 Pet. 3:3, 4; Yuda 18) Hiyo ndiyo sababu hata katika nyakati za Biblia, si wote walioshuhudia miujiza waliositawisha imani. (Hes. 14:11; Yoh. 12:37) Roho takatifu ya Mungu hutokeza sifa ya imani kwa wale tu ambao mioyo yao inapenda sana kweli, badala ya uwongo.—Gal. 5:22; 2 The. 2:10, 11.

Mfalme Daudi, alikuwa miongoni mwa watu waliokuwa na imani yenye nguvu. (Ebr. 11:32, 33) Hata hivyo, si wote katika familia ya Daudi waliokuwa na imani kama yake. Kwa mfano, pindi moja Eliabu, ndugu yake mkubwa, hakuonyesha imani alipomkemea Daudi wakati Goliathi alipotishia vikosi vya Israeli. (1 Sam. 17:26-28) Hakuna mtu anayezaliwa akiwa na imani; na hakuna anayerithi imani kutoka kwa wazazi wake, hivyo, imani ya Daudi ilitokana na uhusiano wake mwenyewe pamoja na Mungu.

Kwenye Zaburi ya 27, Daudi anafunua mambo yaliyomsaidia awe na imani yenye nguvu. (Mstari wa 1) Daudi alitafakari kuhusu mambo aliyojionea wakati uliopita na jinsi Yehova alivyoshughulika na wapinzani wake. (Mstari wa 2 na 3) Alithamini sana mpango wa Yehova wa ibada. (Mstari wa 4) Daudi alimwabudu Mungu pamoja na waamini wenzake katika hema la ibada. (Mstari wa 6) Alimsihi Yehova kwa bidii kupitia sala. (Mstari wa 7 na 8) Pia, Daudi alitaka afundishwe njia ya Mungu. (Mstari wa 11) Sifa ya imani ilikuwa muhimu sana kwa Daudi hivi kwamba aliuliza swali hili: “Ningekuwa wapi ikiwa singekuwa na imani?”—Mstari wa 13.

Unaweza kuwa na imani kama ya Daudi ikiwa utaiga mtazamo wa akili na mazoea mazuri yanayotajwa kwenye Zaburi ya 27. Kwa kuwa imani inategemea ujuzi sahihi, kadiri unavyojifunza Neno la Mungu na machapisho yanayotegemea Biblia, ndivyo itakavyokuwa rahisi zaidi kwako kusitawisha sifa hiyo ya tunda la roho ya Mungu. (Zab. 1:2, 3) Tenga wakati wa kutafakari unapojifunza. Kutafakari ni kama udongo mzuri, na uthamini wetu ni mmea unaositawi katika udongo huo. Kadiri unavyothamini mambo ambayo Yehova amekufanyia, ndivyo utakavyotamani zaidi na zaidi kuonyesha imani kwake kwa kumwabudu kwenye mikutano ya Kikristo na kuwatangazia wengine kuhusu tumaini lako. (Ebr. 10:23-25) Pia, tunaonyesha imani tunapoendelea “kusali bila kukata tamaa.” (Luka 18:1-8) Hivyo, ‘sali kwa Yehova bila kuacha,’ ukiwa na hakika kwamba ‘yeye anakujali wewe.’ (1 The. 5:17; 1 Pet. 5:7) Imani hutuchochea kutenda mambo mema, kisha mambo mema tunayotenda huimarisha imani yetu.—Yak. 2:22.

Usiku uliotangulia kifo chake, Yesu aliwaambia hivi wanafunzi wake: “Iweni na imani katika Mungu; iweni na imani pia katika mimi.” (Yoh. 14:1) Hivyo, tunahitaji kuwa na imani katika Yehova na Yesu pia. Unaweza kuwa na imani katika Yesu jinsi gani? Acheni tuchunguze njia tatu.

Kwanza, ione fidia kuwa zawadi ambayo Mungu amekupa wewe binafsi. Mtume Paulo alisema hivi: “Ninaishi kwa imani katika Mwana wa Mungu, aliyenipenda na kujitoa mwenyewe kwa ajili yangu.” (Gal. 2:20) Unapoonyesha imani katika Yesu, unaamini kabisa kwamba fidia inakuhusu wewe binafsi, kwamba fidia ndiyo msingi wa msamaha wa dhambi zako wewe binafsi, inakupa tumaini la uzima wa milele, na ndiyo uthibitisho mkubwa zaidi kwamba Mungu anakupenda wewe binafsi. (Rom. 8:32, 38, 39; Efe. 1:7) Kuamini kabisa mambo hayo kutakusaidia uwe na maoni yanayofaa kujihusu badala ya kujiona kuwa mwenye hatia.—2 The. 2:16, 17.

Pili, mkaribie Yehova katika sala kwa msingi wa dhabihu ya Yesu. Kwa sababu ya fidia tunaweza kusali kwa Yehova “tukiwa na uhuru wa kusema, ili tupokee rehema na kupata fadhili zisizostahiliwa tunapohitaji msaada.” (Ebr. 4:15, 16; 10:19-22) Sala huimarisha azimio letu la kupinga kishawishi cha kutenda dhambi.—Luka 22:40.

Tatu, mtii Yesu. Mtume Yohana aliandika hivi: “Yule anayemwamini Mwana ana uzima wa milele; yule asiyemtii Mwana hataona uzima, bali ghadhabu ya Mungu hukaa juu yake.” (Yoh. 3:36) Ona kwamba Yohana alionyesha tofauti kati ya mtu mwenye imani na yule asiyetii. Hivyo, unaonyesha imani katika Yesu unapomtii. Unamtii Yesu kwa kufuata “sheria ya Kristo,” yaani, mambo yote ambayo alifundisha na kuamuru. (Gal. 6:2) Pia, unamtii Yesu kwa kutii mwongozo anaotoa kupitia “mtumwa mwaminifu na mwenye busara.” (Mt. 24:45) Ukimtii Yesu, utapata nguvu za kuvumilia matatizo yaliyo kama dhoruba.—Luka 6:47, 48.

Pindi moja, mwanamume fulani alimwambia Yesu hivi kwa sauti kubwa: “Nina imani! Nisaidie mahali ambapo ninahitaji imani!” (Marko 9:24) Mwanamume huyo alikuwa na imani kadiri fulani, lakini kwa unyenyekevu alitambua kwamba alihitaji imani zaidi. Kama mwanamume huyo, wakati fulani sisi sote tutahitaji imani zaidi. Na sote tunaweza kuimarisha imani yetu sasa. Kama tulivyoona, tunaimarisha imani yetu tunapojifunza Neno la Mungu na kulitafakari—mambo yanayofanya uthamini wetu kwa Yehova uzidi kuongezeka. Pia, imani yetu itazidi kuimarika tunapomwabudu Yehova, tunapolitangaza tumaini letu hadharani, na kudumu katika sala pamoja na waamini wenzetu. Zaidi ya hayo, tunapoimarisha imani yetu, tunapata thawabu kubwa zaidi kupita zote. Neno la Mungu linatuhimiza hivi: “Wapendwa, jijengeni juu ya imani yenu takatifu zaidi . . . ili mwendelee kujitunza katika upendo wa Mungu.”—Yuda 20, 21.