Maoni ya Biblia

Sababu Inayofanya Kutenga na Ushirika Kuwe Mpango Wenye Upendo

KUONDOA katika ushirika—wazo hilo lenyewe huchochea hisia zilizochanganyika miongoni mwa watu wengi wa kidini.a Watu wengi hukubali kwamba dini huhitaji namna fulani ya nidhamu. Lakini wengi huona kuondoa katika ushirika kuwa itikadi ya kale—aina ya nidhamu iliyo kali, inayowakumbusha uwindaji wa wachawi na mabaraza ya kuhukumu wazushi.

Unaoongezea tatizo hilo ni uvutano ulioenea sana wa kilimwengu. Hivyo, dini nyingi za Jumuiya ya Wakristo zimeiga maoni ya kuvumilia dhambi. Si ajabu basi, kwamba mhudumu mmoja wa Kiepiskopali alisema: “Kuondoa katika ushirika ni sehemu ya desturi yetu, lakini sifikiri kumetumiwa katika karne hii.”

Hata hivyo, watu wengi huenda wakashangaa kujua kwamba miongoni mwa Mashahidi wa Yehova, kutengwa na ushirika (ambako ni sawa na kuondolewa katika ushirika) kunachukuliwa kwa uzito. Ni kweli, si hatua rahisi kuchukua, lakini ni mpango wenye upendo. Jinsi gani hivyo?

Hutegemeza Jina la Mungu

Yehova ni Mungu mtakatifu. Yeye havumilii dhambi ya makusudi kwa upande wa wale wanaodai kumwabudu. Mtume Petro aliandikia Wakristo hivi: “Iweni watakatifu katika mwenendo wenu wote; kwa maana imeandikwa, Mtakuwa watakatifu kwa kuwa mimi ni mtakatifu.” (1 Petro 1:15, 16) Kwa hiyo kutenga na ushirika watenda-dhambi wasiotubu hutegemeza jina takatifu la Mungu; huonyesha upendo kwa jina hilo.—Linganisha Waebrania 6:10.

Je, hili lamaanisha kwamba ikiwa Mkristo ashindwa na udhaifu au kujikwaa katika dhambi nzito, anaondoshwa katika kutaniko? Kwa hakika sivyo! Yehova si dikteta mwenye moyo mgumu. Yeye ni mwenye rehema na mwenye uelewevu. Yeye akumbuka kwamba sisi ni wasiokamilika. (Zaburi 103:14) Yehova atambua kwamba “wote wamefanya dhambi, na kupungukiwa na utukufu wa Mungu.” (Warumi 3:23) Mungu amepangia msaada wa kiroho kutanikoni ili kwamba Mkristo “akighafilika” au hata kutenda dhambi nzito, yeye aweze kwa upendo ‘kurejezwa upya’ katika roho ya upole. (Wagalatia 6:1) Kwa kukubali shauri kutoka Neno la Mungu na kudhihirisha huzuni yenye kuhisiwa moyoni na toba ya kweli, yule ambaye amekwenda kando kutoka kijia cha uadilifu aweza ‘kuponywa’ kiroho.—Yakobo 5:13-16.

Ingawa hivyo, namna gani ikiwa Mkristo aliyebatizwa akosea sana na jitihada zote za kumrudisha hazifaulu? Yaani, namna gani akikataa kwa shingo ngumu kurekebisha mwendo wake wenye dhambi?

Hufanya Kutaniko Libaki Salama

Biblia huwaamuru Wakristo: “Msichangamane na mtu aitwaye ndugu, akiwa ni mzinzi au mwenye kutamani au mwenye kuabudu sanamu au mtukanaji au mlevi au mnyang’anyi; mtu wa namna hii msikubali hata kula naye.”—1 Wakorintho 5:11.

Je, sheria ya Biblia ni yenye kudhulumu na yenye kushusha hadhi? Fikiria tu hili: Wakati mhalifu sugu anapopelekwa gerezani kwa kuvunja sheria, je, hilo huonekana kuwa lenye kudhulumu au lenye moyo mgumu? La, kwa sababu serikali ina haki ya kulinda amani na usalama wa jumuiya. Kwa hiyo, mhalifu huyo anatengwa kutoka jamii yenye kufuata sheria wakati wa kifungo chake.

Vivyo hivyo, kutaniko la Kikristo lina haki ya kuwaondosha miongoni mwao watenda-dhambi wasiotubu. Kwa nini? Kwa sababu ni lazima kutaniko liwe mahali salama na watu wasio na adili na watendaji dhambi wengine.

Akitambua kwamba “mkosaji mmoja huharibu mema mengi,” mtume Paulo aliamuru waamini wenzake: “Mwondoeni yule mbaya miongoni mwenu.” (Mhubiri 9:18; 1 Wakorintho 5:13) Hatua hii humzuia mtenda-dhambi asieneze ufisadi kutanikoni, na hilo hulinda jina zuri la kutaniko.—Linganisha 1 Timotheo 3:15.

Ulinzi kwa Watu Mmoja-Mmoja

Kutenga na ushirika pia hulinda washiriki mmoja-mmoja wa kutaniko. Acheni tutoe kielezi: Wazia unaamshwa usingizini na honi yenye kelele au king’ora cha gari. Ni vigumu kupuuza sauti hiyo yenye kupenya; kwa kweli, hiyo hukushtua! Vivyo hivyo, wakati mtu fulani anaondoshwa kutanikoni, inatumainiwa kwamba hatua hiyo yashika uangalifu wa kila mshiriki wa kundi. Hiyo husumbua hisi zao. Haiwezi kupuuzwa. Hiyo yaweza kuwaje ulinzi?

“Niliposikia mara ya kwanza kwenye Jumba la Ufalme kwamba mtu fulani alikuwa ametengwa, itikio langu la kwanza lilikuwa mshtuko,” asema Shahidi mmoja. “Kisha hilo likaninyenyekeza. Lilinifanya nitambue kwamba mimi pia naweza kuanguka.” Kama maneno yake yaonyeshavyo, kutenga na ushirika kwaweza kusukuma wengine kuchunguza mwenendo wao.—1 Wakorintho 10:12.

Kwa kujiuliza maswali kama vile ‘Je, kuna maeneo yoyote ya maisha yangu ambamo naweza kudhurika kiroho kwa urahisi?’ twaweza kusaidiwa kwa kuchunguza msimamo wetu wenyewe pamoja na Mungu. Kwa njia hii twaweza kuendelea ‘kuutimiza wokovu wetu wenyewe kwa kuogopa na kutetemeka.’—Wafilipi 2:12.

Mrudie Mungu

“Hata ingawa ilikuwa ngumu sana,” akasema Mkristo mmoja aliyeondoshwa kwa muda fulani, “nidhamu hiyo ilikuwa ya muhimu na iliyohitajika sana, nayo ilithibitika kuwa yenye kuokoa uhai.” Hilo lakazia sehemu nyingine ya maana ya kutenga na ushirika. Kwaweza kusukuma watenda-dhambi waliokuwa wasiotubu kuchukua hatua za kwanza kumrudia Mungu.

Mtume Paulo alisema: “Maana yeye ambaye Bwana ampenda, humrudi.” (Waebrania 12:6) Na ingawa ni kweli kwamba “kila adhabu wakati wake haionekani kuwa kitu cha furaha, bali cha huzuni; lakini baadaye huwaletea wao waliozoezwa nayo matunda ya haki yenye amani.”—Waebrania 12:11.

Hilo ndilo lililompata Richard. Baada ya kutengwa na ushirika kwa karibu miaka miwili, yeye alitubu, akarekebisha mwenendo wake wa kutomheshimu Mungu, na kukubaliwa tena katika kutaniko la Kikristo. Akitazama nyuma, yeye asema kuhusu ono hilo: “Natambua kwamba ilikuwa ni lazima nitengwe na ushirika na kwamba nilistahili nilichopata. Ilikuwa hatua muhimu kikweli nayo ilinisaidia kuona jinsi mwendo wangu ulivyokuwa mbaya sana na uhitaji wa kutafuta msamaha wa Yehova.”

Huenda isiwe rahisi kuvumilia nidhamu. Inahitaji unyenyekevu kuikubali, lakini wale wanaojifunza kutokana nayo huvuna matunda kwa wingi.

Kwa hiyo, kutenga na ushirika ni mpango wenye upendo kwa sababu huko hutegemeza jina takatifu la Mungu na hulinda kutaniko na uvutano wa dhambi wenye kufisidi. Pia, hudhihirisha upendo kwa mtenda-makosa kwa kumtia moyo kutubu na ‘kurejea, ili dhambi zake zifutwe, zipate kuja nyakati za kuburudishwa kwa kuwako kwake Bwana.’—Matendo 3:19.

[Maelezo ya Chini]

[Hisani ya Picha katika ukurasa wa 26]

The New Testament: A Pictorial Archive from Nineteenth-Century Sources, kilichoandikwa na Don Rice/Dover Publications, Inc.