Kutenga na Ushirika—Uandalizi Wenye Upendo?
“MTAKATIFU, mtakatifu, mtakatifu, ni Yehova Mungu, Mweza Yote.” (Ufunuo 4:8, NW) Kulingana na ufafanuzi huo, Yehova ndiye Chanzo cha viwango vitakatifu. Hivyo vimo katika “maandiko matakatifu,” na Wakristo wana wajibu wa kufuata miongozo hiyo. Kwa kweli, ni lazima waepuke chochote kile kisicho safi machoni pa Yehova.—2 Timotheo 3:15; Isaya 52:11.
Biblia huamuru hivi kwa wazi: “Kama yeye aliyewaita alivyo mtakatifu, ninyi nanyi iweni watakatifu katika mwenendo wenu wote; kwa maana imeandikwa, Mtakuwa watakatifu kwa kuwa mimi ni mtakatifu.” (1 Petro 1:15, 16) Tangu kutaniko la Kikristo lilipopata kuweko karne 19 zilizopita, Wakristo wa kweli wamepiga vita sana ili kulilinda dhidi ya ukosefu wa usafi wa kiroho na wa kiadili.—Yuda 3.
Sababu kwa Nini Ulinzi Wahitajiwa
Watumishi wote wa Mungu hukabili ugumu wa kuendelea kuwa safi kiadili na kiroho. Kwa kusudi hilo, ni lazima maadui watatu wenye nguvu wakinzwe—Shetani, ulimwengu wake, na mibetuko yetu ya kimwili yenye dhambi. (Warumi 5:12; 2 Wakorintho 2:11; 1 Yohana 5:19) Ulimwengu wa Shetani utakushawishi usiwe mwenye adili, utakushawishi ufuate njia zao, na utakutolea utajiri wa kimwili, umaarufu, cheo, umashuhuri, na mamlaka. Lakini wale wanaoazimia kufuatia ibada ya kweli hukinza yale ambayo Shetani huwatolea na huendelea kuwa “bila doa kutokana na ulimwengu.” Kwa nini? Kwa sababu wanataka kubaki wakiwa chini ya utunzaji wenye ulinzi na wenye upendo wa tengenezo safi la Yehova.—Yakobo 1:27; 1 Yohana 2:15-17.
Yehova ameandalia msaada mshiriki yeyote wa kutaniko la Kikristo anayetumbukia katika vishawishi vya Shetani kwa sababu ya udhaifu wa kibinadamu. Wazee wenye kustahili kiroho wamewekwa rasmi ili kulinda kutaniko na kusaidia kwa upendo wale wanaokosea ili watubu dhambi yao na kufanya marekebisho yanayohitajiwa ili kurudi kwenye hali nzuri tena. Mkristo yeyote ahusikaye katika kosa apaswa kusaidiwa kwa subira ili atubu na kubadili njia zake.—Wagalatia 6:1, 2; Yakobo 5:13-16.
Jinsi Kutenga na Ushirika Kulivyo Jambo Lenye Upendo
Watumishi wa Yehova waliobatizwa ambao hufuata mwendo mwovu kimakusudi na hukataa kubadilika lazima waonwe kuwa wasiotubu na hivyo kutostahili kwa ushirika wa Kikristo. (Linganisha 1 Yohana 2:19.) Watu hao hawawezi kuruhusiwa waendelee kuwa katika kutaniko safi la Kikristo na hivyo walichafue. Lazima waondoshwe.
Kwamba kwafaa kuondosha wale ambao huzoea mambo maovu kwaonyeshwa na hali ifuatayo: Kwa sababu ya ongezeko la mashambulio na uhalifu wenye jeuri dhidi ya wanafunzi, shule nyinginezo zimefuata sera inayohitaji “kuondolewa shuleni daima kwa wanafunzi wanaotumia au wanaotisha kutumia silaha,” laripoti The Globe and Mail, gazeti la habari katika Toronto, Kanada. Kuondosha huku kunafanywa ili kuwalinda wanafunzi wanaotaka kunufaika na programu ya elimu bila kupatwa na vitendo vya jeuri.
Kwa nini ni jambo lenye upendo kumwondosha mkosaji asiyetubu kutoka kutaniko? Kufanya hivyo ni wonyesho wa kumpenda Yehova na njia zake. (Zaburi 97:10) Hatua hiyo yaonyesha upendo kwa wale wanaofuatia mwendo mwadilifu kwa sababu yamwondosha kutoka kati yao mtu ambaye angeweza kutumia uvutano mbaya juu yao. Yalinda pia usafi wa kutaniko. (1 Wakorintho 5:1-13) Ikiwa ukosefu mbaya wa adili au ukosefu wa usafi wa kiroho ungekubaliwa uendelee kutanikoni, hilo lingechafuka na lisingefaa kwa kutoa utumishi mtakatifu kwa Yehova, aliye mtakatifu. Zaidi ya hayo, kuondolewa kwa mkosaji huenda kukamsaidia aone uzito wa mwendo wake mkaidi, akatubu, na kufanya mabadiliko yanayohitajiwa na hivyo akubaliwe kurudi kutanikoni tena.
Wengine Wanavyoathiriwa
Mshiriki wa kutaniko afanyapo dhambi nzito, kama vile uzinzi, yeye hafanyi moyo wa Yehova ushangilie. (Mithali 27:11) Mkristo yeyote atumbukiaye katika ukosefu wa adili katika ngono kwa hakika yeye hafikiri kama vile Yusufu alivyofikiri wakati mke wa Potifa alipojaribu kumshawishi afanye ngono naye. Itikio la Yusufu lilikuwa: “Nifanyeje ubaya huu mkubwa nikamkose Mungu?” (Mwanzo 39:6-12) Yusufu alistahi viwango vya Yehova vitakatifu akakimbia hali hiyo. Kwa upande mwingine, yaonekana kwamba mzinzi hampendi Mungu vya kutosha ili kuepuka kuridhisha ashiki yake ya kimwili.—Wagalatia 5:19-21.
Mtu aliyebatizwa avunjaye amri za Mungu haonyeshi ufikirio juu ya madhara na uchungu atakaosababisha kwa watu wa ukoo wake waamini. Kuathiriwa kihisiamoyo kwazidi uwezo wa wengine wa kustahimili. Baada ya kugundua kwamba mwana wake hakuwa mwenye adili, mwanamke Mkristo mmoja aliomboleza hivi: “Ni ndugu na dada wachache sana, ikiwa kuna wowote, waonekanao kuelewa jinsi tumeumia na kupatwa na hasara. . . . Tumevunjika moyo.” Jina zuri la familia nzima laweza kutiliwa shaka. Mshuko-moyo na kadiri fulani ya kujihisi kuwa na hatia kwaweza kuwapata washiriki waaminifu wa familia. Hivyo mwendo mwovu wa mkosaji huiletea familia uchungu wa moyo.
Msaada Wenye Upendo kwa Washiriki wa Familia
Wakristo waaminifu walio washiriki wa familia wa watu ambao wameondoshwa wahitaji kukumbuka kwamba kutenga na ushirika ni jambo lenye upendo na lenye ulinzi pia. Kila jitihada hufanywa ili kumsaidia mkosaji. Lakini akithibitika kutomtii Mungu na akataa kwa ushupavu kutubu, kutaniko lahitaji kulindwa na halina la kufanya ila tu kutenda kama vile Neno la Mungu huelekeza: “Mwondoeni yule mbaya miongoni mwenu.” (1 Wakorintho 5:13) Kama vile Shahidi mmoja alivyosema, “kutenga na ushirika ni jambo linalohusu uaminifu-mshikamanifu kwa Yehova.”
Mshiriki wa familia anapotengwa na ushirika, watu wa ukoo Wakristo hupatwa na uchungu. Kwa hiyo wazee waliowekwa rasmi wapaswa kufanya kadiri wawezavyo kuwa wenye kuwaburudisha kiroho. (1 Wathesalonike 5:14) Wazee waweza kusali kwa ajili yao na pamoja nao. Mara nyingi inawezekana kutembelea Wakristo hawa waaminifu ili kuzungumza juu ya mawazo ya Kimaandiko yenye kujenga. Wachungaji wa kundi wapaswa kutumia kila fursa ili kuwaimarisha wapendwa hawa kiroho kabla na baada ya mikutano ya Kikristo. Kitia-moyo cha ziada chaweza kutolewa kwa kuandamana nao katika huduma ya shambani. (Warumi 1:11, 12) Wachungaji wa kiroho wahitaji kuonyesha watumishi hawa waaminifu wa Yehova upendo na uangalifu wanaostahili.—1 Wathesalonike 2:7, 8.
Mwendo wenye dhambi wa mtu fulani si sababu ya kupuuza wowote katika familia yake waendeleao kuwa waaminifu kwa Yehova. Mfalme mwovu Sauli wa Israeli alikataliwa katakata na Mungu, lakini Daudi hakuruhusu hilo lizuie shauku yake mwenyewe kwa Yonathani mwana wa Sauli. Kwa kweli, kifungo kati ya Daudi na Yonathani kilikuwa chenye nguvu sana. (1 Samweli 15:22, 23; 18:1-3; 20:41) Kwa hiyo wote kutanikoni wapaswa kuwa wenye kutegemeza na wenye upendo kuelekea Wakristo ambao watu wa ukoo wao wafanya dhambi dhidi ya Yehova.
Jinsi lisingekuwa jambo lenye upendo kupuuza au kutokuwa wenye fadhili kwa waaminifu hao! Washiriki wa familia walio waaminifu-washikamanifu wana uhitaji wa pekee wa kupata kitia-moyo. Huenda wakahisi kuwa peke yao na huenda wakaona hali yao kuwa ngumu sana. Labda waweza kushiriki pamoja nao kupitia simu jambo la kiroho lenye thamani au ono lenye kujenga. Ikiwa yule mtu aliyeondoshwa ndiye ajibu simu, omba tu kusema na yule mtu wa ukoo Mkristo. Waweza kuwaalika washiriki waaminifu wa nyumba hiyo kwenye kikusanyiko cha kirafiki au kwenye mlo nyumbani mwako. Ukikutana nao unapokuwa ukinunua vitu dukani, waweza kutumia pindi hiyo kuwa na ushirika wenye kujenga. Kumbuka, Wakristo waaminifu-washikamanifu walio na watu wa ukoo waliotengwa na ushirika wangali sehemu ya tengenezo safi la Yehova. Wangeweza kwa urahisi kuwa wenye kujitenga na kuvunjika moyo. Kwa hiyo, uwe macho kuwaonyesha fadhili na upendo. Endelea kutenda mema ‘kuelekea wale ambao ni jamaa zako katika imani.’—Wagalatia 6:10, NW.
Thamini Uandalizi wa Yehova
Twaweza kuwa wenye shukrani kama nini kwamba Yehova Mungu huonyesha ufikirio mwororo kwa kila mmoja katika familia ya ulimwenguni pote ya waabudu wake. Kupitia tengenezo lake yeye ameandaa kwa upendo mpango wa kutusaidia katika kutembea mbele yake kwa njia ya uadilifu. Hata ikiwa mshiriki wa familia huzoea dhambi kimakusudi na ni lazima aondoshwe kutoka kutaniko, kuna njia ya kurudi akitubu kwa kweli. Hilo laonyeshwa na kielelezo kifuatacho:
Wazee walikuwa wamejaribu kumsaidia mtu fulani tutakayemwita Anna, lakini yeye alianza kuvuta sigareti, kunywa vileo, na kutumia madawa ya kulevya. Yeye alikataa kutubu naye hakuendelea kuwa kutanikoni. Hata hivyo, muda mfupi baadaye, Anna akaanza kukosa ushirika wenye upendo wa kutaniko safi la Yehova akasali kwake akimwomba msaada. Yeye akiri kwamba hakuthamini kikamili kadiri ambavyo wazee hujali wale wanaopotea njia. Anna alianza kuhudhuria mikutano tena, na hilo likaongoza kwenye toba. Baadaye, alikubaliwa arudi ndani ya kutaniko lenye upendo na lenye ulinzi. Mara nyingine tena, Anna anashika kiwango cha juu cha adili cha Yehova. Yeye anashukuru kwa ajili ya upendo uonyeshwao na wazee naye asema hivi pia: “Hamwezi kuwazia kadiri ambavyo vichapo vya Kikristo vimenisaidia. Kwa hakika Yehova hutunza mahitaji yetu vizuri.”
Ndiyo, Mungu ameandaa njia ya kurudi kwa wale ambao wameondoshwa kutoka kutaniko lakini wanaotubu baadaye. Tumeona kwamba hata kutengwa na ushirika kwenyewe ni uandalizi wenye upendo. Lakini ni bora zaidi kama nini kuepuka ono hilo la kuhuzunisha kwa kushikamana sikuzote na njia za uadilifu za Mungu wetu mtakatifu! Na tushukuru daima kwa ajili ya pendeleo la kumsifu Yehova tukiwa sehemu ya tengenezo lake safi, lenye upendo na lenye ulinzi.
[Picha katika ukurasa wa26]
Je, unaonyesha upendo kwa watu wa ukoo waaminifu wa wale ambao wameondoshwa kutoka kutaniko?