Yesu Kristo Alikuwa Nani?

Wakati huu wa mwaka katika nchi nyingi ulimwenguni pote, kuna miadhimisho ya Krismasi. Mamia ya mamilioni ya watu wanaamini kwamba Yesu Kristo alizaliwa mnamo Desemba 25 miaka ipatayo 2,000 iliyopita. Kwenye picha na sanamu za kuchongwa, Yesu huonyeshwa kwa njia mbalimbali akiwa mtoto ndani ya hori. Lakini, bila shaka, alikua akawa mtu mzima akaishi duniani kwa miaka 33 1/2.

JE, UMEWAHI kujiuliza Yesu alifananaje alipokuwa mtu mzima? Alikuwa na rangi gani? Je, alikuwa mwenye misuli na mwenye sura nzuri, au alikuwa dhaifu na kuonekana mgonjwa-mgonjwa kwa njia fulani, kama ambavyo ameonyeshwa na wachoraji mbalimbali katika karne ambazo zimepita? Je, alinyoa ndevu au alikuwa na ndevu? Je, alikuwa na nywele ndefu?

Je, pia Yesu alikuwa na uzingo wa mtakatifu, kama vile nuru ambayo imezunguka kichwa chake kama achorwavyo na wachoraji fulani? Au alikuwa tofauti—kwamba hakuwa na mambo ya kumtofautisha na umati na angeweza kuchangamana nao?

Wanahistoria na wachoraji wa kilimwengu wametokeza mawazo yenye kuhitilafiana katika karne ambazo zimepita jinsi Yesu alivyofanana. Kwa kuongezea, vidokezi vyenye kutegemeka vimetolewa katika masimulizi ya watu waliomwona ambayo yaliandikwa na waandikaji wa Biblia walioishi katika karne ya kwanza walioandamana naye.

Hata hivyo, yafuatayo ni maswali muhimu kuliko jinsi alivyoonekana: Kwa kweli Yesu Kristo alikuwa nani? Anatimiza fungu gani katika kusudi la Mungu? Je, ametimiza fungu hilo? Yeye ni nani sasa, na yuko wapi? Je, ana wadhifa wa maana sana utakaoathiri wanadamu wote, hata wengi ambao wamekufa?

Kwanza, ebu tuchunguze uthibitisho kuhusu sura ya Yesu. Alifananaje?