Sura 10

“Hawataona Njaa Tena”

1. Hangaiko la ulimwengu juu ya chakula ni zito kadiri gani?

TATIZO moja kati ya matatizo makubwa mengi yanayoupata ulimwengu leo linahusu chakula. Bei za juu zinafanyiza magumu kwa wengi. Kufa njaa kunawakabili wengine. Majuzi iliripotiwa kwamba kila mwaka watu milioni 40—miaka mingine hata kufika milioni 50—wanakufa kwa sababu hawana chakula wanachohitaji. Watu wengi mara kumi ya hesabu hiyo wanapatwa na ugonjwa mbaya unaosababishwa na kutopata chakula cha kujenga mwili. Ijapokuwa nchi fulani zinalima chakula kingi kuliko wanavyoweza kula, ushindani wa kisiasa na pupa ya kibiashara mara nyingi zinazuia jitihada za kuwapa chakula hicho kinachowazidi wale wanaokihitaji zaidi.—Linganisha Ufunuo 6:5, 6.

2. Hata katika nchi ambamo mna chakula kingi, kwa nini watu wana sababu ya kuhangaika?

² Hata nchi zinazoonekana kuwa zina chakula kingi zinakutana na wakati ujao wenye kusumbua. Kwa sababu gani? Njia zinazotumiwa sasa kwenye kilimo mara nyingi zinategemea mafuta, na akiba ya duniani pote ina kikomo. Kutegemea sana mbolea za kibiashara zinazotengenezwa na wanadamu kunachafua maji yao. Kutumiwa kupita kiasi kwa dawa za kuua wadudu, ambazo zinakusudiwa zilinde mazao, nako pia kunaharibu viini vyenye uhai ambavyo uzalishaji wa wakati ujao wa udongo unavitegemea. Matatizo makubwa yanaendelea kuongezeka katika karibu kila sehemu ya jitihada ya kibinadamu. Aurelio Peccei, msimamizi wa kikao cha mataifa yote cha wenye akili nyingi, aliufananisha ulimwengu na “risasi yenye kurukaruka inapoyumbayumba kutoka kwenye msiba huu na kwenda kwenye msiba huu.” Je! yamfaa mtu aweke matumaini yake ya wakati ujao juu ya ulimwengu wenye hali hiyo?—Yeremia 10:23; Mithali 14:12.

3. Ni nani anayeweza kuhakikisha kutolewa kwa chakula kwa wanadamu wote, na ni nini kinachokupa uhakika huo?

³ Kwa kutumia akili, mamilioni ya watu wametosheleza uhitaji wao wa msaada ambao Mungu peke yake ndiye anaweza kutoa. Wakiisha kuchunguza unabii wa Biblia, wanajua kwamba Yehova Mungu amekwisha kumtawaza Mwanaye wa kimbingu Yesu Kristo, akampa dunia yote iwe miliki yake. (Zaburi 2:7, 8) Anayo hekima na uwezo wa kuhakikisha kwamba wanadamu wote watapewa kwa ukarimu kutokana na mazao ya dunia. (Zaburi 72:7, 8, 16; Wakolosai 1:15-17) Mfumo wa sasa wenye choyo utakapoondolewa, Kristo ataelekeza jitihada za waokokaji wa kibinadamu hata dunia yote itakuwa Paradiso yenye kuzaa sana.

4. Ili tufaidike na maandalizi hayo ya kimwili, ni lazima tufanye nini sasa?

⁴ Ingawa hivyo, watakaopata faida za milele kutokana na utawala wake ni wale wanaofahamu kwamba mwanadamu haishi kwa mkate tu, watu wanaothamini faida za kiroho na uhitaji wa lazima wa kupata nguvu kwa kujifunza na kufanya mapenzi ya Mungu. Biblia inakazia mara nyingi umaana wa hilo. (Yohana 4:34; 6:27; Yeremia 15:16) Yesu alikazia hilo aliposema: “Imeandikwa, Mtu hataishi kwa mkate tu, ila kwa kila neno litokalo katika kinywa cha [Yehova].” (Mathayo 4:4) Tunakihitaji chakula hicho cha kiroho sasa, ikiwa tungeuokoka mwisho wa ulimwengu wa sasa. Jinsi tunavyoweza kukipata, tumepewa mfano katika simulizi la Biblia linalohusu Yosefu na ndugu zake.

“KWENDENI KWA YOSEFU”

5. Yosefu alikujaje kuwa mtumwa katika Misri?

⁵ Yosefu, aliyekuwa kilembwe wa Abrahamu, alipewa na Mungu ndoto zilizoonyesha kwamba angekuwa na cheo kikubwa maishani. Kwa sababu hiyo, na pia kwa vile alivyopendwa na babaye kwa njia ya pekee, ndugu zake Yosefu, upande wa baba, walimchukia. Walifanya hila ya kumuua lakini hatimaye wakamuuza kuwa mtumwa, akapelekwa Misri. Kusudi la Mungu kumhusu Yosefu lingetimizwaje sasa?—Mwanzo 37:3-11, 28.

6. (a) Fikira za Farao zilielekezwaje kwa Yosefu? (b) Ni ndoto gani zilizomsumbua Farao?

⁶ Yosefu alipokuwa mwenye umri wa miaka 30, Yehova alimfanya Farao, mtawala wa Misri, aote ndoto mbili zilizomsumbua. Katika ndoto ya kwanza aliona ng’ombe saba “wazuri na wanono,” pia ng’ombe wengine saba “wabaya nao wamekonda.” Wale ng’ombe waliokonda wakaanza kuwala wale wanono. Katika ndoto nyingine Farao aliona masuke saba ya nafaka juu ya bua moja, “makubwa na mazuri,” na masuke mengine saba “membamba yaliyopigwa kwa upepo wa mashariki.” Tena, yale membamba yakameza masuke makubwa. Yote hayo yalikuwa na maana gani? Hakuna mmoja wa watu wenye hekima wa Misri aliyeweza kufasiri ndoto hizo. Lakini mnyweshaji wa Farao akakumbuka kwamba, alipokuwa yumo gerezani, mfungwa mwenzake, Yosefu, alikuwa amefasiri kwa usahihi ndoto. Mara hiyo Farao akapeleka ujumbe Yosefu aje.—Mwanzo 41:1-15, Zaïre Swahili Bible.

7. (a) Yosefu alipataje kuwa msimamizi wa chakula wa Misri? (b) Njaa ilipozidi kuwa kubwa, Wamisri walifanya nini ili waendelee kuishi?

⁷ Bila kujisifu mwenyewe, Yosefu akamwambia Farao: “Ndoto ya Farao ni moja; Mungu ameelezea Farao atakayofanya.” (Mwanzo 41:16, 25) Yosefu akaeleza kwamba ile ndoto ya pili ilikuwa na maana moja kama ile ya kwanza, kisha akakazia uhakika wayo. Miaka saba yenye shibe katika Misri ingefuatwa na miaka saba ya njaa kubwa. Akampa Farao shauri la kuweka mwanamume mwenye uwezo wa kusimamia kuwekwa akiba kwa nafaka wakati wa miaka ya shibe kwa kujitayarisha kwa ajili ya njaa kubwa. Akikubali kwamba Mungu mwenyewe ndiye aliyekuwa amemfunulia wazi Yosefu yote hayo, Farao akamweka Yosefu awe msimamizi wa chakula, akampa cheo chenye mamlaka ambacho ni cha pili kwa kile chake mwenyewe katika Misri. Ile miaka saba yenye chakula kingi ajabu ikaja kama ilivyokuwa imetabiriwa, na Yosefu akaweka akiba ya chakula kingi sana. Ndipo ile njaa kubwa iliyokuwa imetabiriwa ikaangukia nchi kwa nguvu sana. Watu walipomwomba sana Farao awape chakula, akajibu: “Kwendeni kwa Yosefu; neno analowaambia ninyi, fanyeni.” Basi Yosefu akawauzia nafaka—kwanza wakalipa fedha, halafu mifugo yao, hatimaye wakabadilishana kwa kujitoa wenyewe na nchi yao. Ili waendelee kuishi iliwabidi wajitoe wenyewe kabisa kwa utumishi wa Farao.—Mwanzo 41:26-49, 53-56; 47:13-26, Zaïre Swahili Bible.

8. (a) Ili wapate chakula walichohitaji, ndugu za Yosefu walitakwa wafanye nini? (b) Kwa nini habari ya jambo hilo imehifadhiwa?

⁸ Njaa kubwa hiyo ilipata pia nchi zilizokuwa kando ya Misri. Mwishowe ndugu za Yosefu mwenyewe wakatelemka Misri kutoka Kanaani. Kulikuwa kumepita miaka zaidi ya 20 tangu walipokuwa wamemuuza utumwani, na hawakumtambua. Wakasujudu mbele yake, kama vile ndoto za Yosefu zilikuwa zimetangulia kutabiri muda mrefu, wakataka kununua chakula. (Mwanzo 37:6, 7; 42:5-7) Kwa ustadi Yosefu akawajaribu kisha akaona ushahidi wenye kusadikisha kwamba mwelekeo wao kwake na kwa baba yao ulikuwa umebadilika kweli kweli. Hatimaye akajitambulisha na kueleza kwamba kwa hakika Mungu alikuwa amemtuma awatangulie kwenda Misri ili “kuhifadhi maisha za watu.” Alipoelekeza, walienda kuchukua baba yao na jamaa zao, wakahamia Misri. (Mwanzo 45:1-11) Yote hayo yaliandikwa kwa faida yetu, na kinachomaanishwa na hayo kulingana na unabii kinahusu matukio ya wakati wetu.—Warumi 15:4.

KUTOSHELEZA NJAA NA KIU YETU SASA

9. (a) Kinachosababisha njaa kubwa ya kiroho katika ulimwengu leo ni nini? (b) Kwa nini hiyo ni moja ya visababishi vikubwa vya matatizo ya wanadamu?

⁹ Kimoja cha visababishi vikubwa vya tatizo la wanadamu ni njaa kubwa ya kiroho. Kwa sababu wamemwacha Yehova, yeye hawapendelei kwa kuwapa ufahamu wa Neno lake, na, matokeo ni kwamba, wanaona “si njaa ya kukosa chakula, wala kiu ya kukosa maji, bali ya kukosa kuyasikia maneno ya [Yehova].” (Amosi 8:11) Watu wenye kuona njaa kubwa ya kiroho hawajui majibu ya maulizo ya maana kama haya: Ni nini iliyo maana ya maisha? Kwa nini watu wanakufa? Je! kuna tumaini lo lote la kweli kwa wakati ujao? Kwa sababu ya kupatwa na kichaa cha njaa ya kiroho, watu hao mara nyingi wanajiumiza wenyewe na kuwaumiza wengine wanaposhiriki mwenendo usio wa adili na wenye uhalifu ili watosheleze tamaa zao.

10. (a) Kwa utimizo wa Isaya 65:13, 14, ni hali gani zilizomo kati ya watumishi wa Yehova? (b) Vipindi vya njaa kubwa ya kiroho na vya chakula kingi cha kiroho vinakuwa wakati gani?

¹⁰ Tofauti na hivyo, Yehova amewapa watumishi wake washikamanifu chakula tele cha kiroho, na kati yao kuna upendo wa kweli kweli. Amewafungulia kweli za kiroho zenye kutosheleza katika Neno lake lililoongozwa kwa roho yake wapate kuzifahamu. Na amewapa kazi ya kufanya wakiwa mashahidi wake. Wanashiriki kwa furaha kweli hizo pamoja na wengine wanaoona njaa ya kiroho na wanaotafuta kuishi katika uhusiano na Mungu. (Isaya 65:13, 14; Luka 6:21) Huko nyuma katika Misri ya kale miaka saba ya njaa kubwa ilifuata miaka saba ya shibe. Lakini wakati wetu vipindi vya njaa kubwa ya kiroho na vya chakula kingi vinaendelea vyote pamoja.

11. (a) Ni nani wanaofananishwa na Farao na Yosefu, na kwa nini hivyo? (b) Mwendo uliochukuliwa na “mkutano mkubwa” unafananaje na ule wa Wamisri waliopatwa na njaa kubwa?

¹¹ Leo mtawala si Farao. Yehova Mungu, Farao Mkubwa Zaidi, ndiye Mwenye Enzi Kuu ya Ulimwengu Mzima. Amempa Yesu Kristo cheo chenye mamlaka ambacho ni cha pili kwa kile chake mwenyewe. Yeye akiwa Yosefu Mkubwa Zaidi, Yesu Ndiye Yehova ameaminisha daraka la kutoa chakula cha kiroho chenye kuendeleza uhai. Falsafa za kidini na za kilimwengu zimeacha wanadamu wakiwa na njaa ya kiroho yenye kuuma sana. Wanaweza kuendelea kuishi kwa kumwendea tu Yesu Kristo na kupata chakula cha kiroho kwa njia anayoelekeza. Mamilioni ya watu, waliofananishwa na Wamisri wenye kupatwa na njaa, wanafanya hivyo. Wanajiweka wakfu kabisa kwa Yehova kwa wakati wote kupitia Yesu Kristo, na kwa njia hiyo wanatiwa katika ule umati mkubwa wa wanaotazamia kuwa waokokaji wa siku inayokuja ya hasira kuu ya kimungu.

12. (a) Yesu akiwa mbinguni anafanyaje chakula cha kiroho kipatikane kwetu hapa duniani? (b) Ni nini kinachokusadikisha juu ya aliye “mtumwa mwaminifu mwenye akili”?

¹² Lakini Yesu yuko mbinguni. Anaandaaje chakula cha kutufaidi sisi hapa duniani? Alitabiri kwamba angefanya hivyo kupitia “mtumwa [wake] mwaminifu mwenye akili.” (Mathayo 24:45-47) “Mtumwa” huyo ni watu wengi, ambao ni kundi lake la wapakwa-mafuta kwa roho wakiwa bado duniani. (Linganisha Isaya 43:10.) Mabaki ya hao bado yapo hapa duniani. Kundi la Kikristo hilo la kweli linatambulikana vyepesi kwa kulinganisha mafundisho na mazoea yalo pamoja na Biblia. Linafundisha kikweli yale ambayo Yesu aliamuru. Kwa hiyo halijiingizi katika mambo ya kisiasa ya ulimwengu, bali washiriki walo ni watangazaji wa peupe wa Ufalme wa Mungu. Hawagawanyiki wawe madhehebu nyingi za Jumuiya ya Wakristo. Kwa kufuata mfano wa Bwana wao, Mashahidi wa Yehova wote wana umoja, kama Yesu alivyosema. (Ona Yohana 17:16, 20, 21; Mathayo 24:14; 28:19, 20; Ufunuo 1:5.) Wanafurahia chakula kingi cha kiroho na wako tayari kukishiriki pamoja na wengine.

13. (a) Ni kwa njia gani wamejionyesha wenyewe kuwa kama ndugu kumi wa Yosefu? (b) Sote tunaweza kufaidikaje na chakula cha kiroho kinachoandaliwa na Kristo kupitia jamii hiyo ya “mtumwa”?

¹³ Watu wengi wamedhihaki Wakristo hao wapakwa-mafuta, wakisema: ‘Mnadhani ninyi ni bora kuliko sisi? Mnadhani ninyi tu ndio mnaosema kweli?’ Lakini baadaye baadhi ya hao wanakuja kutambua kwamba kweli Yehova anao mashahidi duniani na kwamba hakika wanatangaza neno Lake. Wanapata kuthamini kwamba Biblia inaonyesha kungekuwapo kundi la Kikristo moja tu la kweli na kwamba washiriki walo wangekuwa na umoja. (Waefeso 4:5; Warumi 12:5) Wameongozwa kwenye tengenezo hilo kwa kuyachunguza mambo ya hakika kwa unyofu na kwa unyenyekevu. Ndugu kumi wa Yosefu walifananisha watu hao, ambao hapo zamani walitesa wafuasi wapakwa-mafuta wa Yesu au waliowaunga mkono kikamilifu watesi hao lakini sasa wanaonyesha badiliko la kweli kweli la moyo. (Yohana 13:20) Wanakikubali kwa shukrani chakula cha kiroho kinachoandaliwa na Yesu Kristo kupitia jamii yake ya “mtumwa mwaminifu.” Wanapata nguvu za kiroho wanapojilisha kweli za Biblia zinazozungumzwa katika vitabu vya Sosaiti yetu. Wanahudhuria kikawaida mikutano ya Mashahidi wa Yehova na kushiriki kwa bidii kufanya mapenzi ya Mungu. Je! wewe ni mmoja wa wanyenyekevu hao?—Waebrania 10:23-25; linganisha Yohana 4:34.

14. Ni hali gani za kiroho zinazofurahiwa na wale wanaoishi kupatana na kanuni tulizojifunza kutokana na mwigo huu wa Biblia?

¹⁴ Wote ambao kwa upendo wanatoa maisha zao wakfu kwa Muumba wao kupitia Yesu Kristo wanafurahia burudisho lenye furaha. Kiroho, “hawataona njaa tena, wala hawataona kiu tena, . . . Kwa maana huyo Mwana-Kondoo [Yesu Kristo], aliye katikati ya kiti cha enzi, atawachunga, naye atawaongoza kwenye chemchemi za maji yenye uhai.”—Ufunuo 7:16, 17; Isaya 25:6-9.