Sura ya 3

Vitu Ambavyo Lazima Vitukie Karibuni

1. Wewe unaweza kuepukaje kutekelezwa kwa hukumu ya Mungu juu ya ulimwengu huu?

INAKUPASA wewe uhangaikie sana matukio ya ulimwengu leo. Kwa nini hivyo? Kwa sababu ulimwengu huu hauwezi kuepuka kutekelezwa kwa hukumu ya Mungu. Lakini wewe unaweza kuepuka. Wewe unaweza kufanya hivyo kwa kujifanya mwenyewe ‘usiwe sehemu ya ulimwengu’ ambao umehukumiwa maangamizi. Hii haimaanishi kuchagua kufuata njia ya maisha ya kiutawa, ya kujinyima raha kupita kiasi. Inamaanisha kwamba ujitenge mwenyewe na ufisadi wa kisiasa, biashara yenye pupa, na dini yenye kuvunjia Mungu heshima, pamoja na mwenendo wenye jeuri na ukosefu wa adili, huku ukijifurahisha maisha yanayofaa, yenye kujaa maana. Wakati ule ule, lazima wewe ufuate viwango vya juu vya mwenendo vya Mungu na kutafuta kufanya penzi lake. (Yohana 17:14-16, NW; Sefania 2:2, 3; Ufunuo 21:8) Kitabu cha Biblia cha Ufunuo kinaonyesha jinsi lilivyo jambo la maana kwako ujitahidi katika mambo haya, ukifanya mabadiliko kadiri inavyohitajiwa kabisa katika njia yako ya maisha.

2. Mtume Yohana anajulishaje ule unabii mtukufu wa Ufunuo, naye Mungu alimpa nani ujumbe huu wenye maana kubwa?

² Mtume Yohana anajulisha unabii huu mtukufu kwa maneno haya: “Ufunuo kwa Yesu Kristo, ambao Mungu alimpa, aonyeshe watumwa wake vitu ambavyo lazima vitukie karibuni.” (Ufunuo 1:1a, NW) Kwa hiyo Yesu Kristo aliyefufuliwa ndiye aliyepokea ujumbe huu wenye maana kubwa kutoka kwa Mungu. Mbali na kuwa sehemu ya Utatu wa kifumbo, Yesu anaonyeshwa hapa kuwa akimtii Baba yake. Katika njia iyo hiyo, wale “watumwa” wanaofanyiza kundi la Kikristo wanamtii Yesu Kristo, hivi kwamba ‘huendelea kufuata yeye kokote aendako.’ (Ufunuo 14:4, NW; Waefeso 5:24) Lakini ni nani leo walio “watumwa” wa Mungu kikweli, nao Ufunuo unawanufaishaje?

3. (a) Ni nani walio “watumwa” ambao wanamtii Yesu Kristo? (b) Ni kazi gani wanayofanya wale “watumwa” waaminifu chini ya mwelekezo wa kimalaika?

³ Mtume Yohana, aliyeandika Ufunuo, anajieleza mwenyewe kuwa mmoja wa watumwa hao. Yeye ndiye aliyekuwa mtume wa mwisho kuishi na mmoja wa kile kikundi cha “watumwa” waliochaguliwa na kupakwa mafuta ambao wanarithi uhai usioweza kufa katika mbingu. Leo, kuna maelfu machache tu ya hawa yanayobaki duniani. Mungu ana watumishi wengine pia, kundi kubwa lao, wanaume, wanawake, na watoto, ambao sasa hesabu yao imefikia mamilioni. Chini ya mwelekezo wa kimalaika, hawa wanashiriki pamoja na “watumwa” wapakwa-mafuta katika kutangaza habari njema za milele kwa aina yote ya binadamu. Oh, jinsi “watumwa” wote hawa wanavyojitumikisha wenyewe ili kusaidia wapole wa dunia wapate wokovu! (Mathayo 24:14; Ufunuo 7:9, 14; 14:6) Ufunuo unaonyesha yale ambayo ni lazima wewe ufanye ili unufaishwe na habari njema zenye kuleta furaha.

4. (a) Kwa kuwa Yohana aliandika Ufunuo zaidi ya miaka 1,900 iliyopita, yeye angewezaje kusema juu ya “vitu ambavyo lazima vitukie karibuni”? (b) Ithibati inaonyesha nini sasa juu ya vitu vilivyotabiriwa?

⁴ Ingawa hivyo, Yohana angewezaje kusema, hawa “watumwa” wangeonyeshwa “vitu ambavyo lazima vitukie karibuni”? Je! maneno hayo hayakusemwa zaidi ya miaka 1,900 iliyopita? Kwa maoni ya Yehova, ambaye machoni pake miaka elfu moja ni “kama siku ya jana,” miaka 1,900 ni wakati mfupi unapolinganishwa na vipindi virefu vya wakati aliotumia katika kuumba na kutayarisha dunia ikaliwe na wanadamu. (Zaburi 90:4) Mtume Paulo aliandika juu ya “taraja na tumaini lenye hamu nyingi” lake mwenyewe, kwa kuwa pasipo shaka uhakika wa thawabu yake ulionekana kwake kuwa karibu sana. (Wafilipi 1:20, NW) Hata hivyo, leo, ithibati ni tele kwamba vile vitu vyote vilivyotabiriwa vitatukia kwa wakati ulioorodheshwa. Wokovu wenyewe wa aina ya binadamu haujapata kamwe kuhatarishwa kabla ya sasa katika historia. Ni Mungu tu aliye na ufumbuzi!—Isaya 45:21.

Mfereji wa Mawasiliano

5. Ufunuo uliwasilishwaje kwa mtume Yohana na kisha kwa makundi?

⁵ Ufunuo 1:1b, 2, NW unaendelea kusema: “Na yeye [Yesu] alituma malaika wake na kuutoa [Ufunuo] kwa njia ya ishara kupitia yeye kwa mtumwa wake Yohana, ambaye alitoa ushahidi kwa neno ambalo Mungu alitoa na kwa ushahidi ambao Yesu Kristo alitoa, hata kwa mambo yote ambayo yeye aliona.” Hivyo, Yohana alipokea maandishi yaliyovuviwa kupitia mjumbe wa kimalaika. Yeye aliuandika katika hati-kunjo, akiupeleka kwa makundi ya wakati wake. Kwa furaha yetu, Mungu ameuhifadhi kwa ajili ya kitia-moyo cha yale makundi karibu 100,000 ya watumishi wake wenye umoja duniani leo.

6. Yesu alitambulishaje ule mfereji ambao angetumia kuandalia ‘watumwa’ wake chakula cha kiroho leo?

⁶ Mungu alikuwa na mfereji wa kuwasilisha Ufunuo katika siku ya Yohana, na Yohana alikuwa ndiye sehemu ya kidunia ya njia hiyo. Vivyo hivyo, Mungu ana njia ya kutolea ‘watumwa’ wake ulishaji wa kiroho leo. Katika unabii wake mkubwa kuhusu umalizio wa mfumo wa mambo, Yesu alitambulisha sehemu ya njia hii ya kidunia kuwa “mtumwa mwaminifu na mwenye uangalifu, ambaye, Bwana-mkubwa wake aliweka juu ya watu wake wa nyumba, kuwapa chakula chao kwa wakati unaofaa.” (Mathayo 24:3, 45-47, NW) Yeye anatumia jamii hii ya Yohana katika kufungua maana ya unabii huo.

7. (a) Ishara zinazopatikana katika Ufunuo zapasa zituathirije sisi? (b) Baadhi ya wale wa jamii ya Yohana wamekuwa wakishiriki katika utimizo wa njozi za Ufunuo kwa muda mrefu kadiri gani?

⁷ Mtume Yohana anaandika kwamba Yesu alitoa Ufunuo “kwa njia ya ishara,” au alama. Hiyo iko wazi na inasisimua kuichunguza. Hiyo inaonyesha utendaji wenye msukumo na inapasa, ituchochee, tutie jitihada za bidii katika kujulisha wengine unabii huu na maana yao. Ufunuo unatutolea njozi kadhaa zenye kusisimua, ambazo katika kila mojapo Yohana alishiriki ama kwa kutenda au akiwa mtazamaji. Wale wa jamii ya Yohana, ambao baadhi yao kwa muda unaopita makumi ya miaka wameshiriki katika utimizo wa njozi hizi, wanafurahi kwamba roho ya Mungu imefungua ile maana ili waweze kuifafanua kwa wengine.

8. (a) Ni jambo gani linalohusu kipekee kila mojapo njozi za Ufunuo? (b) Unabii wa Danieli unatusaidiaje kuelewa utambulisho wa wale hayawani wa Ufunuo?

⁸ Njozi hizi katika Ufunuo hazikutolewa kulingana na orodha ya wakati. Kila mojapo ina kipindi cha wakati chayo yenyewe cha utimizo. Nyingi za njozi hizo hurudisha mwangwi wa maneno ya unabii wa mapema zaidi unaoandaa vidokezo kwa habari ya kufasiri kwazo. Mathalani, unabii wa Danieli ulieleza hayawani-mwitu wanne wenye kutisha, ulitoa elezo kwamba hao huonyesha serikali zenye kutawala duniani. Kwa sababu hiyo, sisi tunasaidiwa kuelewa kwamba wale hayawani wa Ufunuo wanawakilisha serikali za kisiasa, kutia na zile zilizoko leo.—Danieli 7:1-8, 17; Ufunuo 13:2, 11-13; 17:3.

9. (a) Kama Yohana, jamii ya Yohana imeonyesha mwelekeo gani? (b) Yohana anaonyeshaje njia ambayo kwayo sisi tunaweza kuwa wenye furaha?

⁹ Yohana alikuwa mwaminifu katika kutoa ushuhuda wa ule ujumbe ambao Mungu alimpa kupitia Yesu Kristo. Yeye alieleza kirefu “vitu vyote ambavyo yeye aliona.” Ile jamii ya Yohana imetafuta kwa hamu nyingi mwongozo kutoka kwa Mungu na Yesu Kristo ili ielewe unabii huo kikamili na kujulisha watu wa Mungu mambo yao mema. Kwa manufaa ya kundi lililopakwa mafuta (na pia ya umati mkubwa wa kimataifa ambao Mungu atahifadhi hai kuipita ile dhiki kubwa), Yohana anaandika hivi: “Mwenye furaha ni yeye ambaye husoma kwa sauti kubwa na wale ambao husikia maneno ya unabii huu, na ambao hushika vitu vilivyoandikwa katika huo; kwa kuwa wakati uliowekwa u karibu.”—Ufunuo 1:3, NW.

10. Ni lazima sisi tufanye nini kuhusiana na Ufunuo ili tupate furaha?

¹⁰ Wewe utanufaika sana sana kwa kusoma Ufunuo na hata zaidi sana hivyo kwa kushika mambo yaliyoandikwa humo. Yohana anaeleza katika mojapo barua zake hivi: “Hivi ndivyo upendo wa Mungu unavyomaanisha, kwamba sisi tushike amri zake; na hata hivyo amri zake si zenye kulemea, kwa sababu kila kitu ambacho kimezaliwa kutoka kwa Mungu kinashinda ulimwengu. Na huu ndio ushindaji ambao unashinda ulimwengu, imani yetu.” (1 Yohana 5:3, 4, NW) Wewe unaweza kuwa mwenye furaha zaidi sana kwa kujenga imani kama hiyo!

11. (a) Ni kwa sababu gani ni jambo la muhimu sisi tuyashike maneno ya unabii huo? (b) Ni wakati gani ambao lazima uwe karibu sana sasa kihatari?

¹¹ Ni jambo la muhimu sisi tuyashike maneno ya unabii huo, “kwa kuwa wakati uliowekwa u karibu.” Wakati uliwekewa nini? Utimizo wa unabii wa Ufunuo, kutia hukumu za Mungu. Wakati uko karibu kwa Mungu na Yesu Kristo kutekeleza hukumu ya kukata maneno juu ya mfumo wa ulimwengu wa Shetani. Wakati Yesu alipokuwa hapa duniani, yeye alitaarifu kwamba baba yake pekee ndiye alijua “siku hiyo au saa.” Akitazama mbele kwenye taabu ambazo zimeongezeka duniani katika nyakati zetu, Yesu alisema pia hivi: “Kizazi hiki hakitapitilia mbali kwa vyovyote mpaka mambo haya yote yatukie.” Kwa hiyo wakati uliowekwa wa kutekeleza uamuzi wa Mungu ni lazima uwe karibu sana kihatari. (Marko 13:8, 30-32, NW) Kama Habakuki 2:3 hutaarifu: “Maana njozi hii bado ni kwa wakati ulioamriwa, inafanya haraka ili kuufikilia mwisho wake, wala haitasema uongo; ijapokawia, ingojee; kwa kuwa haina budi kuja, haitakawia.” Wokovu wetu kuipita ile dhiki kubwa unategemea kushika kwetu Neno la kiunabii la Mungu.—Mathayo 24:20-22.

[Sanduku katika ukurasa wa 15]

Ili kuelewa kitabu cha Ufunuo sisi tunahitaji

● Kupokea msaada wa roho ya Yehova

● Kufahamu wakati siku ya Bwana ilipoanza

● Kutambua yule mtumwa mwaminifu na mwenye uangalifu leo