Sura ya 1
Kuishi Milele Si Ndoto Tu
1, 2. Sababu gani ni vigumu kuamini kwamba watu wanaweza kuishi milele duniani kwa furaha?
FURAHA duniani—haionekani kuwa inawezekana kuwa nayo hata kwa muda mfupi. Mara nyingi magonjwa, kuzeeka, njaa na uhalifu, yanafanya maisha yawe ya kuhuzunisha sana. Basi, labda utasema, kuzungumza juu ya kuishi milele katika paradiso duniani ni kujifanya huoni namna mambo yalivyo kwa kweli. Labda unaona kwamba kuzungumza hilo ni kupoteza wakati, na kwamba kuishi milele ni ndoto tu.
2 Bila shaka watu wengi watakubaliana nawe. Hivyo, basi, sababu gani tunaweza kuwa na hakika kwamba unaweza kuishi milele katika paradiso duniani? Sababu gani tunaweza kuamini kwamba uzima wa milele si ndoto tu?
SABABU TUNAWEZA KUAMINI
3. Ni nini kinachoonyesha kwamba Mungu anataka wanadamu wawe wenye furaha hapa duniani?
3 Tunaweza kuamini kwa sababu Nguvu Kuu Kupita Zote, Mungu Mweza Yote, alitayarisha dunia ikiwa na kila kitu tunachohitaji ili kutosheleza tunayotaka. Aliifanya dunia ikatufaa kabisa! Na aliumba mwanamume na mwanamke kwa njia ya kuwafaa kabisa ili wafurahie maisha kikamilifu katika makao haya ya kidunia—milele.—Zaburi 115:16.
4. Wanasayansi wamejifunza nini juu ya mwili wa mwanadamu kuonyesha kwamba uliumbwa uishi milele?
4 Wanasayansi wamejua kwa muda mrefu kwamba mwili wa kibinadamu una nguvu za kujifanya upya. Kwa njia ya ajabu chembe za mwili zinakufa kisha nyingine zinakaa mahali pazo au zinajitengeneza kama inavyohitajiwa. Na inaonekana kwamba zinaweza kuendelea kujifanya upya milele. Lakini haziendelei, na wanasayansi hawawezi kueleza sababu haziendelei. Hata sasa hawafahamu sana kwa nini watu wanazeeka. Wao wanasema kwamba, wanadamu wakiwa katika hali zinazofaa, wanaweza kuishi milele.—Zaburi 139:14.
5. Biblia inasema nini juu ya kusudi la Mungu la kuumba dunia?
5 Lakini, je! kweli ni kusudi la Mungu watu waishi duniani milele kwa furaha? Ikiwa ndivyo, basi uzima wa milele si jambo la kujitakia tu au ndoto—utakuja hakika! Biblia, kile kitabu kinachoeleza makusudi ya Mungu, inasema nini juu ya jambo hilo? Inamtaja Mungu kuwa “aliyeiumba dunia na kuifanya,” na kuongeza hivi: “Ndiye aliyeifanya imara; hakuiumba ukiwa, aliiumba ili ikaliwe na watu.”—Isaya 45:18.
6. (a) Hali leo ziko namna gani duniani? (b Je! hivyo ndivyo Mungu anataka?
6 Je! wewe unaona kwamba dunia hii inakaliwa sasa kama Mungu alivyokusudia? Ni kweli watu wanaishi katika karibu sehemu zote za dunia. Lakini je! wanaishi pamoja kwa furaha wakiwa jamaa iliyoungana, katika njia ile nzuri ambayo Muumba wao alikusudia? Leo ulimwengu umegawanyika. Kuna chuki. Kuna uhalifu. Kuna vita. Mamilioni ya watu ni wenye njaa na ni wagonjwa. Wengine wana mahangaiko ya kila siku juu ya makao, kazi na gharama. Na hakuna moja la hayo linalomletea Mungu heshima. Kwa wazi, basi, dunia hii haikaliwi kama Mungu Mweza Yote alivyokusudia pale mwanzoni.
7. Kusudi la Mungu lilikuwa nini kwa dunia alipoumba wale watu wa kwanza wawili?
7 Alipokwisha kuwaumba wale watu wa kwanza wawili, Mungu aliwaweka katika paradiso ya kidunia. Alitaka wafurahie milele uzima duniani. Alikusudia waieneze paradiso yao duniani pote. Hilo linaonyeshwa na maagizo haya aliyowapa: “Mwe wenye kuzaa sana na kuwa wengi na kuijaza dunia na kuitiisha.” (Mwanzo 1:28, NW) Ndiyo, Mungu alikusudia baadaye dunia nzima itawalwe na jamaa ya kibinadamu yenye uadilifu, wote waishi pamoja kwa amani na furaha.
8. Ijapokuwa watu wa kwanza wawili walikataa kumtii Mungu, kwa sababu gani tunaweza kuwa na hakika kwamba kusudi la Mungu kwa dunia halikubadilika?
8 Ijapokuwa hao watu wa kwanza wawili hawakumtii Mungu, na kwa njia hiyo wakawa wasiofaa kuishi milele, kusudi la Mungu la kwanza halikubadilika. Ni lazima litimizwe! (Isaya 55:11) Biblia inaahidi hivi: “Waadilifu wenyewe wataimiliki dunia, nao watakaa milele juu yake.” (Zaburi 37:29, NW) Mara nyingi Biblia inaeleza mpango wa Mungu wa kuwapa uzima wa milele wanadamu wanaomtumikia.—Yohana 3:14-16, 36; Isaya 25:8; Ufunuo 21:3, 4.
ILE TAMAA YA KUISHI—WAPI?
9. (a) Kwa kawaida watu wana tamaa gani? (b) Biblia ina maana gani inaposema ‘Mungu ameiweka milele ndani ya akili zao’?
9 Tunaweza kufurahi kweli kweli kwa vile ni kusudi la Mungu tuishi milele. Ebu fikiri: Ungechagua kufa tarehe gani kama ingekupasa kuamua hivyo? Ni wazi hungechagua. Hutaki kufa, wala mtu mwingineo aliye na akili nzuri na kadiri fulani ya afya hataki kufa. Mungu alituumba tukiwa na tamaa ya kuishi, si tamaa ya kufa. Biblia inasema hivi juu ya namna Mungu alivyowafanya wanadamu: “Ameiweka milele ndani ya akili zao.” (Mhubiri 3:11, Byington) Maana yake nini? Maana yake ni kwamba kwa kawaida watu wanatamani kuendelea kuishi milele, bila kufa. Kwa sababu ya tamaa hiyo ya wakati ujao usio na mwisho, wanadamu wametafuta kwa muda mrefu njia ya kuendelea kuwa vijana milele.
10. (a) Ni asili ya mwanadamu kutamani kuishi milele wapi? (b) Sababu gani tunaweza kuwa na hakika Mungu atafanya iwezekane tuishi milele hapa duniani?
10 Ni wapi ambapo kwa kawaida wanadamu wanataka kuishi milele? Ni pale ambapo wamezoea kuishi, hapa duniani. Mwanadamu aliumbwa aishi duniani, nayo dunia iliumbwa ikaliwe na mwanadamu. (Mwanzo 2:8, 9, 15) Biblia inasema hivi: “[Mungu] ameweka msingi wa dunia juu ya mahali payo palipoimarika; haitafanywa iyumbeyumbe kwa wakati usiojulikana, wala milele.” (Zaburi 104:5, NW) Kwa kuwa dunia iliumbwa idumu milele, basi inampasa mwanadamu pia aishi milele. Bila shaka Mungu mwenye upendo hangetaka kuumba wanadamu wakiwa na tamaa ya kuishi milele kisha asiwawezeshe kutimiza tamaa hiyo!—1 Yohana 4:8; Zaburi 133:3.
AINA YA MAISHA UNAYOTAMANI
11. Biblia inasema nini kuonyesha kwamba watu wanaweza kuishi milele wakiwa na afya bora kabisa?
11 Utazame ukurasa unaofuata. Watu hawa wanafurahia maisha ya aina gani? Ungependa kuwa mmoja wao? Ndiyo, unasema! Tazama afya nzuri na nguvu zao za ujana! Kama ungeambiwa watu hao tayari waliishi maelfu ya miaka, je! ungeamini? Biblia inatuambia kwamba wazee watakuwa vijana tena, wagonjwa wataponeshwa, na vilema, vipofu, viziwi na mabubu wataponeshwa maumivu yao yote. Alipokuwa hapa duniani Yesu Kristo alifanya miujiza mingi ya kuponesha wagonjwa. Alikuwa akionyesha namna, katika wakati huo mtukufu ulio karibu, wote wanaoishi watarejezwa kwenye afya bora kabisa.—Ayubu 33:25, 35:5, 6; Mathayo 15:30, 31.
12. Ni hali gani tunazoona katika picha hizi?
12 Tazama namna bustani hii ilivyo makao ya kupendeza! Kama Kristo alivyoahidi, ni paradiso kwelikweli, mfano wa ile iliyopotezwa na mwanamume na mwanamke wa kwanza wasiotii. (Luka 23:43, katika New World Translation na Zaire Swahili Bible) Tena angalia ile amani na upatano uliopo. Watu wa jamaa zote—weusi, weupe wa kimanjano—wanaishi ka-ma jamaa moja. Hata wanyama ni wenye amani. Mtazame yule mtoto anayecheza na simba. Lakini hakuna sababu ya kuogopa. Kwa habari hiyo Muumba anatangaza hivi: “Chui atalala pamoja na mwana-mbuzi; ndama na mwana-simba na kinono watakuwa pamoja, na mtoto mdogo atawaongoza. . . . Na simba atakula majani kama ng’ombe. Na mtoto anyonyaye atacheza penye tundu la nyoka.”—Isaya 1:6-9.
13. Ni nini kitakachotoweka duniani wakati makusudi ya Mungu yatakapotimizwa?
13 Katika ile paradiso ambayo Mungu anawakusudia wanadamu, mambo yote yatawafurahisha. Dunia hii itazaa vyakula tele vilivyo vizuri. Hakuna mtu atakayeona njaa tena. (Zaburi 72:16; 67:6) Vita, uhalifu, jeuri, hata chuki na choyo, hayatakuwapo. Ndiyo, yatakuwa yametoweka milele! (Zaburi 46:8, 9; 37:9-11) Je! unaamini kwamba yote hayo yatawezekana?
14. Ni nini kinachokufanya uamini kwamba Mungu atakomesha kuteseka?
14 Basi, fikiria hili: Kama ungekuwa na uwezo, je! ungeyakomesha yote yanayofanya wanadamu wateseke! Na je! ungeleta zile hali ambazo moyo wa mwanadamu unatamani sana? Bila shaka. Baba yetu wa kimbinguni mwenye upendo atafanya vivyo hivyo. Atashibisha matakwa na tamaa zetu, maana Zaburi 145:16 inasema juu ya Mungu hivi: “Waufumbua mkono wako, wakishibisha kila kilicho hai matakwa yake.” Lakini hayo yatatendeka wakati gani?
BARAKA ZA AJABU ZIKO KARIBU
15. (a) Mwisho wa ulimwengu utakuwa nini kwa dunia? (b) Utakuwa nini kwa watu wabaya? (c) Utakuwa nini kwa wale wanaofanya mapenzi ya Mungu?
15 Ili baraka hizo zipatikane duniani, Mungu anaahidi kukomesha uovu na wale wanaouleta. Pia, atalinda wale wanaomtumikia, maana Biblia inasema: “Ulimwengu pamoja na vitu vyake vyote vyenye kutamanika unapita; lakini mtu atendaye atakalo Mungu, anaishi milele.” (1 Yohana 2:17, HNWW) Litakuwa badiliko kubwa wee! Mwisho wa ulimwengu hautakuwa mwisho wa dunia yetu. Lakini, kama wakati wa gharika iliyoenea ulimwenguni pote siku za Noa, utakuwa mwisho wa watu wabaya tu na njia yao ya maisha. Lakini wale wanaomtumikia Mungu watauokoka mwisho huo. Kisha, wakiwa katika dunia safi, watafurahi kwa sababu wale wote wanaotaka kuwaumiza na kuwaonea hawatakuwapo.—Mathayo 24:3, 37-39; Mithali 2:21, 22.
16. Ni matukio gani yaliyotabiriwa kutokea “siku za mwisho”?
16 Lakini labda mtu fulani atasema: ‘Hali zinazidi kuwa mbaya, wala si bora. Tunawezaje kuwa na hakika kwamba badiliko hilo kuu liko karibu?’ Yesu Kristo alitabiri mambo mengi ambayo wafuasi wake wa wakati ujao wangetazamia kujua ufikapo wakati wa Mungu wa kukomesha ulimwengu. Yesu alisema siku za mwisho za taratibu hii zingekuwa na mambo kama vita vikuu, upungufu wa chakula, matetemeko makubwa ya ardhi, kuongezeka kwa uvunjaji wa sheria na ongezeko la ukosefu wa upendo. (Mathayo 24:3-12) Alisema kungekuwapo “huzuni kuu ya mataifa, wasijue njia ya kutokea.” (Luka 21:25, NW) Vilevile, Biblia inaendelea kusema: “Siku za mwisho kutakuwako nyakati za hatari.” (2 Timotheo 3:1-5) Hizo ndizo hali zinazotupata sasa, sivyo?
17. Watu wenye kufikiri wamekuwa wakisema nini juu ya hali za leo?
17 Watu wengi wanaochunguza matukio ya ulimwengu wanasema badiliko kubwa liko karibu. Kwa mfano, mhariri wa gazeti Herald la Miami, katika Amerika, aliandika hivi: “Hata mtu asiyefikiri sana anaweza kujumlisha misiba mikubwa ya miaka michache iliyopita na kuona kwamba ulimwengu unaendelea kufikia kikomo kamili. . . . Kitabadili milele namna watu wanavyoishi.” Kupatana na hayo, mwandikaji Mwamerika Lewis Mumford alisema: “Ustaarabu unaharibika. Hiyo ni wazi sana. . . . Hapo zamani ustaarabu ulipoharibika, lilikuwa tukio la mahali fulani tu. . . . Sasa, kwa vile ulimwengu umefungamanishwa na kushikamanishwa karibu-karibu zaidi kwa mawasiliano ya kisasa, wakati ustaarabu unapoharibika, sayari nzima inaharibika.”
18. (a) Hali za ulimwengu zinaonyesha nini juu ya wakati ujao? (b) Ni nini kitakachochukua nafasi ya serikali za sasa?
18 Hali zenyewe zilizo katika ulimwengu leo zinaonyesha tunaishi katika wakati ambao uharibifu wa hii taratibu (mfumo) nzima ya mambo unakaribia kutukia. Ndiyo, karibu sana Mungu ataisafisha dunia hii kwa kuondoa wote ambao wanataka kuiharibu. (Ufunuo 11:18) Ataondoa serikali za sasa ziiachie nafasi serikali yake ya uadilifu itawale dunia yote. Hiyo ndiyo serikali ya Ufalme ambayo Kristo alifundisha wafuasi wake kuomba.—Danieli 2:44; Mathayo 6:9, 10.
19. Ikiwa tunataka kuishi milele, lazima tufanye nini?
19 Ikiwa unapenda uzima na unataka kuishi milele chini ya utawala wa Mungu, basi lazima ufanye haraka utwae maarifa sahihi ya kumjua Mungu, makusudi yake na matakwa yake. Yesu Kristo alimwambia Mungu hivi katika sala: “Hii ndiyo maana ya uzima wa milele, wapate maarifa ya kukujua wewe, Mungu wa kweli mmoja tu, na ya yeye uliyetuma, Yesu Kristo.” (Yohana 17:3, NW) Ni furaha kama nini kujua tunaweza kuishi milele—kwamba si ndoto tu! Lakini ili tufurahie baraka hiyo kutoka kwa Mungu ni lazima tujifunze juu ya adui anayejaribu kutuzuia tusipate baraka hiyo.
[Picha katika ukurasa wa 8, 9]
Je! Mungu alikusudia ulimwengu kuwa hivi?
[Picha ukurasa wote katika ukurasa wa 11]