Sura 85

Kutafuta Waliopotea

YESU ana hamu nyingi ya kutafuta na kupata wale watakaotumikia Mungu kwa unyenyekevu. Kwa hiyo anatafuta-tafuta na kuongea na kila mmoja juu ya Ufalme, kutia na watenda dhambi wenye sifa mbaya. Watu hao sasa wanakuja karibu wamsikilize.

Wakiona hivyo, Mafarisayo na waandishi wanachambua Yesu kwa kuandamana na watu ambao wao wanawafikiria kuwa wasiostahiki. Wananung’unika hivi: “Mtu huyu huwakaribisha wenye dhambi na hula nao.” Hilo ni jambo lisilostahiki fahari yao kama nini! Hao Mafarisayo na waandishi hutendea watu wa kawaida kama mavumbi yaliyo chini ya nyayo zao. Kwa kweli, wao wanatumia usemi wa Kiebrania ‛am ha·’aʹrets, “watu wa ardhi [dunia],” kuonyesha madharau waliyo nayo kwa watu hao.

Kwa upande mwingine, Yesu hutendea kila mmoja kwa fahari, fadhili, na huruma. Tokeo ni kwamba, wengi wa watu hao dhalili, kutia na watu wanaojulikana sana kwa kuzoea dhambi, wana hamu ya kumsikiliza. Lakini namna gani juu ya uchambuzi wa Mafarisayo juu ya Yesu kwa sababu ya jitihada zake kwa niaba ya wale ambao wao wanawaona kuwa wasiostahiki?

Yesu anajibu upinzani wao kwa kutumia kielezi. Ananena kulingana na maoni ya Mafarisayo wenyewe, kana kwamba wao ni waadilifu na wako salama katika zizi la Mungu, hali wale akina ‛am ha·’aʹrets wenye kudharaulika wameacha njia na wamo katika hali ya kupotea. Msikilize anapouliza hivi:

“Ni mtu gani kati yenu akiwa na kondoo mia moja, akipoteza mmoja wao, hataacha nyuma hao tisini na tisa jangwani, na kumwendea huyo aliyepotea mpaka ampatapo? Na ampatapo anamweka juu ya mabega yake na kushangilia. Na afikapo nyumbani yeye anawaita marafiki na majirani wake pamoja, akiwaambia, ‘Shangilieni pamoja nami, kwa sababu mimi nimepata kondoo wangu ambaye alikuwa amepotea.’”

Ndipo Yesu anapofanya utumizi wa hadithi yake, akieleza hivi: “Mimi nawaambia kwamba hivyo kutakuwa na shangwe zaidi mbinguni juu ya mtenda dhambi mmoja anayetubu kuliko juu ya wale waadilifu tisini na tisa wasio na uhitaji wa toba.”

Mafarisayo hujiona wenyewe kuwa waadilifu na hivyo kuwa hawana uhitaji wa toba. Wakati baadhi yao walipochambua Yesu miaka kadhaa mapema kwa kula pamoja na mkusanya kodi na watenda dhambi, yeye aliwaambia hivi: “Mimi nilikuja kuita, si watu waadilifu, bali watenda dhambi.” Mafarisayo wenye kujiona kuwa waadilifu, ambao wanashindwa kuona uhitaji wao wa toba, hawaleti shangwe mbinguni. Lakini watenda dhambi wenye kutubu kweli kweli wanafanya hivyo.

Ili kuweka nguvu maradufu mkazo kwenye wazo la kwamba kurudishwa kwa watenda dhambi ni sababu ya shangwe kubwa, Yesu anasimulia kielezi kingine. Anasema: “Ni mwanamke yupi akiwa na sarafu kumi za drakma, ikiwa anapoteza sarafu moja ya drakma, asiyewasha taa na kufagia nyumba yake na kutafuta kwa uangalifu mpaka aipatapo? Na anapoipata anaita wanawake walio marafiki wake na majirani pamoja, akisema, ‘Shangilieni pamoja nami, kwa sababu mimi nimeipata sarafu ya drakma niliyopoteza.’”

Ndipo Yesu anatoa utumizi unaofanana. Yeye anaendelea kusema: “Hivyo, mimi nawaambia nyinyi, Shangwe huzuka miongoni mwa malaika wa Mungu juu ya mtenda dhambi mmoja atubuye.”

Ni lenye kusifika kama nini hangaikio hili lenye upendo la malaika wa Mungu kwa ajili ya kurudishwa kwa watenda dhambi waliopotea! Hasa inakuwa hivyo kwa kuwa hawa ambao hapo kwanza walikuwa ‛am ha·’aʹrets wa chini, wenye kudharauliwa hatimaye watakuja kuwa katika mstari wa kuwa na ushirika katika Ufalme wa Mungu wa kimbingu. Kama tokeo, wanafikia cheo katika mbingu cha juu kuliko kile cha malaika wenyewe! Lakini badala ya kuhisi wivu au kuwa wamepuuzwa, malaika hao wanathamini kwa unyenyekevu kwamba binadamu hawa wenye kujawa na dhambi wamekabili na kushinda hali mbalimbali katika maisha ambazo zitawafanya wafae kutumikia wakiwa wafalme na makuhani wa kimbingu wenye hisia-mwenzi na wenye rehema. Luka 15:1-10; Mathayo 9:13; 1 Wakorintho 6:2, 3; Ufunuo 20:6, NW.

▪ Kwa nini Yesu anashirikiana na wanaojulikana kuwa watenda dhambi, naye anajiletea uchambuzi gani kutoka kwa Mafarisayo?

▪ Mafarisayo wana maoni gani juu ya watu wa kawaida?

▪ Yesu anatumia vielezi gani, nasi twaweza kujifunza nini kutokana navyo?

▪ Kwa nini kushangilia kwa malaika ni jambo lenye kusifika?