Shiriki Kwa Furaha Pamoja Na Yesu Kristo Katika Kazi ya Yehova
“Baba yangu anatenda kazi hata sasa, nami ninatenda kazi.”—Yohana 5:17
1. Ni kitu gani kinachoweza kusaidia mtu awe mfanya kazi mwenye furaha, na kukiwa na matokeo gani?
JE! WEWE ni mfanya kazi mwenye furaha? Je! umekuwa hivyo sikuzote, au nyakati nyingine umejiona mchovu na mwenye kukata tamaa, kuishiwa nguvu zote na nia ya kufanya jambo kwa sababu fulani? Ulijiona hungeweza kufanya kazi nyingine. Ndipo wakati huo jambo lisilotazamiwa lilitokea. Ukapewa kazi nyingine, yenye matokeo zaidi, yenye kutoa matunda au mavuno zaidi. Ndipo badala ya kujiona kwamba unakosa upendeleo na kwamba walaumiwa naye anayekuweka ufanye kazi, sasa ukapata tabasamu na maneno ya kukusifu. Lo! tofauti gani! Ukajiona kuamshwa na kutiwa moyo usonge mbele kwa shauku na bidii. Hakuna jambo ambalo lingeweza kukuzuia. Ndiyo, ukawa mfanya kazi mwenye furaha!
2. Isaya 12:1-6 inaelezaje juu ya tukio lisilotazamiwa katika siku zetu, na ni katika njia gani limekuwa na matokeo mema?
2 Biblia inasema vivyo hivyo juu ya mambo yaliyowapata watu wa Yehova wakati wetu. Yasimulia jambo lililotukia ghafula mwaka wa 1919 W.K. Twasoma juu ya hilo katika Isaya sura ya 12: “Na katika siku hiyo utasema, Ee [Yehova], nitakushukuru wewe; kwa kuwa ijapokuwa ulinikasirikia, hasira yako imegeukia mbali, kwa kuwa unanifariji moyo. Tazama, Mungu ndiye wokovu wangu; nitatumaini wala sitaogopa; maana BWANA YEHOVA ni nguvu zangu na wimbo wangu; naye amekuwa wokovu wangu.” Ndipo inaposimulia kazi yetu ya maana sana. “Basi, kwa furaha mtateka maji katika visima vya wokovu. Na katika siku hiyo mtasema, Mshukuruni [Yehova], liitieni jina lake; yatangazeni matendo yake kati ya mataifa, Litajeni jina lake kuwa limetukuka. Mwimbieni [Yehova]; kwa kuwa ametenda makuu; na yajulikane haya katika dunia yote. Paza sauti, piga kelele, mwenyeji wa Sayuni; maana Mtakatifu wa Israeli ni mkuu kati yako.”—Mist. 1-6.
‘PANDA KWA WINGI, VUNA KWA WINGI’
3. (a) Vivyo hivyo, ni katika njia gani Zaburi 126 inasema juu ya badiliko lililoleta furaha? (b) Ni tofauti gani mbili zenye kutokeza zinazoelezwa katika Zaburi 126:5, 6?
3 Pamoja na hayo, ebu tazama Zaburi 126, yenye kichwa “Wimbo wa Kupanda,” (katika tafsiri ya New World), moja ya zaburi walizoziimba Waisraeli yaelekea wakipanda juu Yerusalemu walipohudhuria kwa furaha sikukuu tatu za kila mwaka zilizofanywa huko. Kama Isaya sura ya 12, zaburi hii inasimulia juu ya wale ambao wamekuja Sayuni, tengenezo la Mungu. Ebu angalia inavyosomwa: “[Yehova] alipowarejeza mateka wa Sayuni, tulikuwa kama waotao ndoto.” Lilionekana jambo lisilosadikika! Nayo habari inaendelea: “Ndipo kinywa chetu kilipojaa kicheko, na ulimi wetu kelele za furaha.” Halafu angalia badiliko la kazi lenye kutia moyo linalotajwa katika mistari miwili ya mwisho: “Wapandao kwa machozi watavuna kwa kelele za furaha. Ingawa mtu anakwenda zake akilia, azichukuapo mbegu za kupanda. Hakika atarudi kwa kelele za furaha, aichukuapo miganda yake.” (Zab. 126:1, 2, 5, 6) Ingawa mwanzoni mambo yalikuwa magumu, bila cho chote cha kuonyesha kwa ajili ya kazi yake, jitihada zake za kuendelea kupanda mbegu kwa uvumilivu mwishowe zimebarikiwa kwa kupata mavuno mengi kuliko alivyokuwa akitazamia.
4. Je! Yesu alikuwa na jambo la maana la kusema juu ya wakati wa mavuno, likiongoza kwenye ulizo gani?
4 Ndiyo, huu ndio wakati wa mavuno. Sasa tuko katika mwisho wa taratibu ya mambo, na kama Yesu alivyosema katika mojawapo wa mifano yake: “Mavuno ni mwisho wa taratibu ya mambo.” (Mt. 13:39, NW) Yesu alikuwa na mambo yenye kupendeza ya kusema juu ya mavuno na kazi inayopatana nayo, sana sana juu yake mwenyewe kama mfanya kazi. Basi na tufungue andiko letu katika Yohana 5:17, ambalo ndilo msingi wa mazungumzo yetu. Wayahudi walikuwa wakimchukia Yesu kwa sababu ya kufanya kazi njema siku ya Sabato, naye akawajibu, akisema: “Baba yangu ameendelea kufanya kazi mpaka sasa, nami naendelea kufanya kazi.” (Tafsiri ya New World) Je! twajua muda ambao Yehova ameendelea kufanya kazi?
5. Yehova ni mfanya kazi wa namna gani, na hilo linaonyeshwaje katika Maandiko? (Zab. 33:4, 5)
5 Ajabu, kuna andiko linalotusaidia kujibu ulizo hilo nalo bila shaka linamtaja Yesu mbele ya kuwa mwanadamu, wakati huo akiwa “Neno” (anayetajwa katika Yohana 1:1). Akifananishwa na “hekima,” huyu anasema hivi; kama ilivyoandikwa katika Mithali 8:22, 23, NW, “Yehova mwenyewe alinifanyiza mimi niwe mwanzo wa njia yake, wa kwanza kabisa wa matendo yake ya kale na kale . . . tangu nyakati za mwanzo-mwanzo kuliko dunia.” Enhee! Yehova ni mfanya kazi mwenye matokeo nayo ndiyo njia ya kuwa mfanya kazi mwenye furaha. Yehova ni mfanya kazi mwenye furaha kwa sababu anafanyiza vitu vizuri vinavyoonyesha sifa zake njema. Yeye ni “Mwamba, kazi yake ni kamilifu; maana, njia zake zote ni haki . . . yeye ndiye mwenye haki na adili.” Yehova ndiye “Mungu Aliye juu sana, Muumba mbingu na nchi.”—Kum. 32:4; Mwa. 14:19, 22.
6. Ni ufahamu gani wa ajabu tunaopewa na Biblia kuhusu Yesu kama mfanya kazi?
6 Vilevile Mithali sura ya 8 inatuambia juu ya wakati Yesu alipoanza kufanya kazi. Tukianza na mstari wa 29, tunasoma hivi: “[Yehova] alipoiagiza misingi ya nchi; ndipo nilipokuwa pamoja naye, kama stadi wa kazi . . . nikiifurahia dunia inayokaliwa na watu.” Kwa hiyo yeye aliyekuja akawa Kristo Yesu alikuwa mfanya kazi tangu wakati wa kuumbwa kwake, akishiriki pamoja na Baba yake kwa furaha, ‘akifurahi daima mbele zake.’—Mit. 8:29-31.
7. Upatano ulionyeshwaje kati ya wafanya kazi hawa wawili, ukiongoza kwenye matokeo gani mazuri?
7 Ushirikiano wa karibu kati ya wafanya kazi mashuhuri (wenye sifa) hao wawili ulionekana mpaka kufikia upeo wa uumbaji wa kidunia, Mungu aliposema: “Na tufanye mtu kwa mfano wetu, kwa sura yetu.” Mwanamume na mwanamke wote wawili waliumbwa wawe wafanya kazi wenye furaha wakati “Mungu [alipowabarikia], Mungu akawaambia, Zaeni, mkaongezeke, mkaijaze nchi, na kuitiisha; mkatawale . . . kila kiumbe chenye uhai kiendacho juu ya nchi.” Na “Mungu akaona kila kitu alichokifanya, na tazama, ni chema sana.” Kilifanywa kizae.—Mwa. 1:26-31.
ROHO YA KAZ! YA KUVUNA
8. (a) Yesu alionyesha nia gani juu ya kazi, katika huduma yake yote? (b) Upendo wake kwa watu ulionyeshwaje katika jambo hili?
8 Yesu alipokuja duniani akaanza huduma yake alionyesha nia ile ile. Alifanya kazi akaonyesha wengine namna ya kufanya kazi. Kwa habari ya kazi ya kuvuna, alisema haya mwenyewe kama tunavyosoma katika Yohana 4:34, 35: “Chakula changu ndicho hiki, niyatende mapenzi yake aliyenipeleka, nikaimalize kazi yake. Hamsemi ninyi, Bado miezi minne, ndipo yaja mavuno? Tazama, mimi nawaambieni, Inueni macho yenu myatazame mashamba, ya kuwa yamekwisha kuwa meupe, tayari kwa mavuno.” Ili tuwe na hakika ni mavuno gani ambayo Yesu alikuwa akifikiria, tunasoma juu ya pindi nyingine wakati “Yesu alikuwa akizunguka katika miji yote na vijiji, akifundisha . . . na kuihubiri habari njema ya ufalme, na kuponya magonjwa yote . . . Na alipowaona makutano aliwahurumia, kwa sababu walikuwa wamechoka na kutawanyika kama kondoo wasio na mchungaji. Ndipo alipowaambia wanafunzi wake, Mavuno ni mengi, lakini watenda kazi ni wachache. Basi mwombeni Bwana wa mavuno, apeleke watenda kazi katika mavuno yake.” (Mt. 9:35-38) Kwa hiyo katika masimulizi haya yote, ni wazi kwamba yale mavuno ambayo Yesu alisema hayakuwa mavuno ya nafaka. Yalikuwa mavuno ya watu, ambao Yesu alitaka sana kuona wanakusanywa.
9. Roho ya kuvuna ni gani, ikitokeza tamaa gani?
9 Kuna kufanana sana kati ya wakati huo na wakati wetu, naye Yesu anataka sisi tulio wafuasi wake tuingie katika roho ya kuvuna. Na roho hiyo ni ile ya kufurahi, roho ya kuthamini sana namna kazi hii inavyofaa sana, ikiongeza tamaa ya kuona imetimizwa kabisa. Kama ilivyosemwa katika Isaya 9:3: “Umeliongeza taifa, umezidisha furaha yao; wanafurahi mbele zako, kama furaha ya wakati wa mavuno, kama watu wafurahivyo wagawanyapo nyara.”
10. (a) Yehova anatoaje wafanya kazi zaidi kwa mavuno? (b) Tunapaswa kujifunza nini kutokana na Mithali 10:4, 5?
10 Kwa roho ile ile twamwomba Bwana apeleke wafanya kazi zaidi. Yehova hapeleki ‘watenda kazi hawa zaidi’ kwa mwujiza. Sana sana, yote hayo ni sehemu ya kazi ya mavuno, si kushiriki tu kuwaleta watu katika kweli, bali, kama Yesu alivyosema: “Basi, enendeni, mkawafanye . . . wanafunzi . . . na kuwafundisha kuyashika [kuyatimiza] yote niliyowaamuru ninyi.” (Mt. 28:19, 20) Ndiyo roho tunayohitaji kuonyesha. Twataka wafanya kazi zaidi shambani. Hiyo yamaanisha kuwa na kazi na kukesha sana wenyewe. Mithali 10:4, 5 yatofautisha haya hivi: “Atendaye mambo kwa mkono mlegevu huwa maskini; bali mkono wake aliye na bidii hutajirisha. Akusanyaye wakati wa hari ni mwana mwenye hekima; bali asinziaye wakati wa mavuno ni mwana mwenye kuaibisha.”—Lo! ni vibaya kama nini! Tofauti gani! Kinyume cha furaha kwa walegevu hao!
MAMBO YASIYO YA MAANA YANAPASWA KUWEKWA KANDO
11. Kazi ya kuvuna inapaswa ionweje, na kwa sababu gani?
11 Jambo jingine juu ya wakati wa mavuno ni hili, ya kwamba ni wakati wa pekee kwa wakulima. Hawawezi kuwa na maoni ya kwamba kazi hii ni ya sikuzote, ya kwamba lisilofanywa leo laweza kufanywa kesho. Mazao yanapokuwa tayari, ni lazima yavunwe na kukusanywa. Hakuna wakati wa kupoteza, wafanya kazi wote wa mashamba wanajua hilo vilevile. Mambo mengine yasiyo ya maana, yanawekwa kando. Wanakuwa tayari kufanya kazi mashambani tangu jua linapotoka mpaka linapotua.
12. Yesu alikaziaje maana ya wakati wa mavuno, na tunawezaje kutumia jambo hilo leo?
12 Yesu alionyesha maoni yayo hayo. Mara alipokwisha kuwaambia wanafunzi wake kumwomba Bwana apeleke wafanya kazi katika mavuno yake, habari yasema hivi: “Akawaita wanafunzi wake kumi na wawili . . . [na] hao Thenashara Yesu aliwatuma, akawaagiza, akisema, . . . shikeni njia kuwaendea kondoo waliopotea wa nyumba ya Israeli” wakiwa na ujumbe wa Ufalme. Naye alitia mkazo wafanye haraka, akisema: “Msichukue dhahabu, wala fedha, wala mapesa mishipini mwenu; wala mkoba wa safari, wala kanzu mbili, wala viatu, wala fimbo; maana mtenda kazi astahili posho lake.” (Mt. 10:1-10) Yesu hakutaka wafanye mambo mengine. Wala hataki wafuasi wake leo wakengeushwe (waondoshwe) na mali wala jambo jingine la kuwafanya waache kazi. Ni wakati wa mavuno!
13. Katika karne ya kwanza, ni kazi gani ya kuvuna yenye kutokeza iliyotimizwa?
13 Labda tuulize, Je! kulikuwako mavuno katika karne ya kwanza? Bila shaka! Ebu angalia yaliyotukia mjini Yerusalemu siku ile ya Pentekoste. Wakiisha kuusikiliza ushuhuda kamili na kuonya kwa Petro, “watu wapata elfu tatu” walibatizwa wakaongezwa kwenye kundi lile la kwanza la watu wapata mia moja na ishirini (120). (Matendo 1:15; 2:37-42) Na kwa kweli kundi lenyewe lilikuwa limemaliza siku moja tu tangu lianzishwe!
14. Ni wakati kulipokuwa na upinzani gani kulipokuwa na ushuhuda wenye kutokeza wa baraka ya Yehova kwa watumishi wake?
14 Wayakumbuka maneno ambayo makuhani wa Kiyahudi waliwaambia mitume, punde kidogo baada ya hapo: “Mmeijaza Yerusalemu mafundisho yenu.” Lakini ijapokuwa ‘waliamriwa wasiendelee kufundisha,’ waliendelea kuzungumza nayo mavuno yakaendelea kukusanywa. (Matendo 5:28, 29) Bila shaka ilikuwako kadiri fulani ya mashahidi katika mji huo wenye ukubwa wapata maili moja (kilometre 1.375) ya mraba, lakini hawakulegea. Walikuwa na maoni mema wakazidi kutafuta watu zaidi. Kama inavyoelezwa katika Matendo 6:7: “Neno la Mungu likaenea; na hesabu ya wanafunzi ikazidi sana katika Yerusalemu; [hata] jamii kubwa ya makuhani wakaitii ile Imani.” Kweli kweli, yalikuwa mavuno!
KUNAYO MENGI ZAIDI YA KUFANYA
15, 16. (a) Je! tunaweza kusema leo kwamba kazi ya Yehova imemalizika? (b) Toa mifano kutoka kitabu 1978 Yearbook kuonyesha kwamba jitihada zetu zinabarikiwa sana, na kuwa na matokeo mema?
15 Je! leo twaionaje hali ya ulimwengu? Je! eneo limehubiriwa sana na kuenezwa mara nyingi sana hata twaweza kusema kwamba kazi imetimizwa? La, kuna zaidi, kuna zaidi ya kufanywa! Ebu wafikirie, kwa mfano, ndugu zetu huko Zambia. Kitabu 1978 Yearbook chaonyesha kwamba kadiri iliyoko huko ni mhubiri mmoja kwa kila watu 103. Ndugu zetu Wazambia wanazidi kutoa ushuhuda, wanazidi kusema na watu, nao wanaona wengi zaidi wanaoitikia na kuja katika kweli. Sana sana, mwaka jana watu 2,399 walibatizwa.
16 Tunapotazama kuzunguka dunia yote, tunaona kwamba mavuno mengi yanakusanywa. Nchi za Kikatoliki za Ulaya zaendelea kuwa na ongezeko kubwa. Katika muda wa miaka miwili tu tangu mwaka 1975, idadi ya watangazaji wa Ufalme katika Spain wameongezeka 25 kwa mia, katika Ureno kwa 26 kwa mia na katika Italia kwa 29 kwa mia, hivi kwamba zaidi ya Mashahidi wa Yehova 125,000 wanatenda kazi sasa katika nchi hizi zilizokuwa kama ngome ya Babeli Mkuu hapo zamani. Katika muda uo huo wa miaka miwili, kweli imepenya katika visiwa vingine vingi zaidi vya bahari; watumishi wa Yehova katika Tahiti wanaripoti ongezeko la 42 kwa mia katika sehemu hiyo, kukiwa na visiwa 40 kati ya visiwa 60 vinavyokaliwa na watu vinavyopata ushuhuda kamili. Kazi ya Yehova inaendelea kupenya katika maeneo mapya katika Mashariki ya Mbali, Hong Kong ikiwa inaripoti ongezeko la 52 kwa mia, na Japan ikiwa na mashahidi zaidi wa Ufalme 8,000 kutoka 1975 mpaka 1977. Na katika bara za Amerika na Ulaya, ko kote ambako kuhubiri Ufalme nyumba kwa nyumba kunafuatwa kwa bidii makundi wanaishiriki furaha iyo hiyo ya mavuno.
17. Juu ya jambo hili, ni onyo na kitia-moyo gani tunachopewa na Maandiko? (Luka 21:34-36)
17 Je! hatupaswi kuwa na furaha kwamba Yehova ameizuia “dhiki kubwa” mpaka saa hii ili “kondoo” hawa wenye thamani wapate kukusanywa? Lakini usikosee! Siku hiyo ya kufanya hesabu na mataifa inakaribia zaidi na zaidi! “Maana njozi hii bado ni kwa wakati ulioamriwa, inafanya haraka ili kuufikia mwisho wake, wala haitasema uongo; ijapokawia, ingojee; kwa kuwa haina budi kuja, haitakawia.”—Hab. 2:3.
18. Ni kanuni gani inayoonyeshwa katika 1 Wakorintho 3:7, na tunaweza kuitumiaje ituhusu leo?
18 Yehova ametuonyesha kwamba kazi hiyo haijatimizwa bado. Yatupasa tuzidi kuifanya, si mpaka sisi tutakapoamua kwamba imetimia, bali mpaka Yehova atakapoimaliza kulingana na mapenzi yake. Kweli, Yehova anazidi kutuonyesha kwamba kazi hiyo haijamalizika bado. Jambo hili linaonyeshwa na vile anavyoleta ongezeko mahali ambako watu wake wanaendelea kufanya kazi kwa furaha. Usisahau hata kidogo kanuni ambayo Paulo alisema waziwazi katika 1 Wakorintho 3:7: “Hivyo, apandaye si kitu, wala atiaye maji, bali Mungu akuzaye.” Basi yeye ndiye mwenye kustahili sifa yote hii kwa sababu ya wingi na ubora huu wa mavuno kupitia kwa Kristo Yesu.
19. Katika maneno yanayozunguka 1 Wakorintho 3:5-9, tunapata kitia-moyo gani?
19 Kama Paulo alivyotaja katika mstari wa tano unaotangulia, ni pendeleo kutumiwa kama “wahudumu ambao kwao mliamini; na kila mtu kama Bwana”—si wewe—“alivyompa. Naye bado anawaruhusu wengine wakusanywe katika ghala lake. Katika mwaka wa utumishi wa 1977 wapya zaidi ya 124,000 walichukua hatua ya kuzamishwa katika maji, wakionyesha mfano wa kujiweka wakf nafsi yote kwa Mungu wafanye mapenzi yake. Kwa sababu gani tusiyatazamie kuzidi kuongezeka? Mavuno hayajamalizika bado. Huu ni wakati wa kufikiria mavuno mpaka wote watakapokusanywa. Wakati wa furaha ya kuvuna waendelea!
[Picha katika ukurasa wa 9]
Wafuasi wa Yesu wanaingia katika roho ya kuvuna watu