Kwa Sababu Gani Uwe Mnyofu?

BIBLIA inamweleza Yehova kwa kufaa kuwa “Mungu wa kweli,” kuwa “asiyeweza kusema uongo.” (Zaburi 31:5; Tito 1:2) Tangu wakati wa kuumbwa kwa mwanadamu, Yehova amekuwa akiweka kwa upatani na bila kigeu-geu takwa la kwamba waabudu wake wa kweli wawe wanyofu katika mambo yote.​—Zekaria 8:16, 17.

Ili mtu awe mnyofu, ni jambo la maana aongozwe na viwango vya Yehova Mungu mwenyewe wala si na maoni ya watu wa mtaa wake. Viwango hivyo vimeandikwa katika Biblia.

Namna Mungu Alivyoshughulika na Israeli

Katika sheria aliyolipa taifa la Israeli, Yehova aliamuru hivi: “Msiibe, wala msidanganye, wala msiambiane uongo. Msiape uongo kwa jina langu, hata ukalinajisi jina la Mungu wako; Mimi ndimi [Yehova].”​—Mambo ya Walawi 19:11, 12.

Wevi hawakuponyoka vivi hivi tu. Walilazimika kumlipa mtu waliyemwibia. Na kama hawakuwa na bei iliyotakwa na sheria, walifanywa watumwa ili walipie deni kwa kufanya kazi.​—Kutoka 22:1-4.

Yehova alieleza waziwazi hata mambo yale madogo-madogo ili isikose kufahamika kwamba alikataza namna zote za udanganyifu. Alionya vikali kusiwe na ndimi zenye ujanja, kusiwe na maneno la-i-i-ini na kumbe ni ya udanganyifu. Akakataza wivi wa kutumia jeuri na hata wa siri, na vilevile mizani katika biashara.​—Mithali 1:10-19; Danieli 11:32; Mika 6:11, 12.

Takwa la Kikristo

Je! kanuni ya kimungu ya unyofu ilibadilika wakati kundi la Kikristo lilipoanzishwa? Aka!

Kwa habari ya kusema uongo na kuiba, Biblia inawaamuru Wakristo hivi: “Msiambiane uongo.” “Basi uvueni uongo mkaseme kweli kila mtu na jirani yake . . . Mwibaji asiibe tena; bali afadhali afanye juhudi, akitenda kazi iliyo nzuri kwa mikono yake mwenyewe, apate kuwa na kitu cha kumgawia mhitaji.” “Mtu wa kwenu asiteswe kama . . . mwivi, au mtenda mabaya.”​—Wakolosai 3:9; Waefeso 4:25, 28; 1 Petro 4:15.

Uzito wa jambo hilo unakaziwa na onyo hili: “Msidanganyike; waasherati hawataurithi ufalme wa Mungu, . . . wala wevi, wala watamanio [wenye pupa], wala walevi, wala watukanaji, wala wanyang’anyi. Na baadhi yenu mlikuwa watu wa namna hii.”​—1 Wakorintho 6:9-11.

Ona hapo panasema kwamba kati ya hao Wakristo wa kwanza walikuwako wengine waliokuwa wamekuwa wevi na wanyang’anyi, lakini walibadili njia yao ya maisha. Kwa habari ya sifa ya watu wa Krete, mtume Paulo alitumia maneno ya Mkrete mmoja, inawezekana ya mshairi Epimenide, yenye kusema:“Wakrete ni waongo sikuzote, hayawani wabaya, walafi wavivu.”(Tito 1:12) Kati ya Wagiriki, jina“Mkrete”lilikuja kuwa sawa na kusema “mwongo.” Lakini wengine kati ya wakaaji wa Krete walibadili njia zao wakawa Wakristo wa kweli. Katikati yao walikuwa na wazee Wakristo waliokuwa wamekuja kuwa na sifa nzuri za kuwa ‘bila shtaka, na kuwa si wenye pupa ya mapato ya udanganyifu, kuwa wapenda mema, waadilifu, washikamanifu, wenye kujiweza.’​—Tito 1:7, 8, NW.

Ni Nini Kilichowabadilisha?

Kupata kumjua Yehova, yule “Mungu wa kweli,” na kujifunza matakwa yake kwa watumishi wake ndiyo mambo yaliyotokeza badiliko hilo. Mtu aliye mfano mwema wa kufuatwa nao akawa ni Yesu Kristo, ambaye ‘aliwaachia kiolezo ili wakifuate sana.’ Walipochunguza kielelezo cha maisha ya Yesu, walikuta kwamba hakukuwa na udanganyifu wo wote katika kinywa chake.’ Kutokana na mafundisho yake walijifunza kwamba: “Kama mnavyotaka watu wawatendee ninyi, watendeeni vivyo hivyo.”​—1 Petro 2:21, 22, NW; Luka 6:31.

Bila shaka, haielekei kuwa walibadilika kwa ghafula tu. Hiyo ndiyo sababu, kwa mfano, mtume Paulo alimwandikia Tito ‘aendelee kuwakumbusha’ Wakristo katika Krete mambo fulani yaliyohusiana na mwenendo wa kimungu. (Tito 3:1-3, NW) Huenda ikawa kwamba mara ya kwanza waliona haingewezekana kuvaa utu mpya. Walipopatwa na vipingamizi huenda wakawa walishuka moyo. Lakini kuthamini mpango mzuri ajabu ambao Yehova amefanya ili kusamehe dhambi za mwendo wao wa zamani kwa kutegemea msingi wa kuiamini dhabihu ya Yesu Kristo kuliwasukuma wafanye mabadiliko. Tena, walipojifunza kumtegemea Yehova na kutafuta msaada wa roho yake, walikuta kwamba wameshindwa kuyafanya kwa kujitegemea wenyewe.​—Linganisha 1 Wakorintho 6:11.

Kwa Sababu Gani Uwe Mnyofu?

Lakini kwa sababu gani ujitahidi sana hivyo? Kwa sababu gani tujikaze kuwa wanyofu katika kila jambo?

Acha kwanza tuangalie hali za nyumbani. Inakuwaje wakati wenzi wa ndoa wanapokuta hawawezi kutumainiana? Huenda jambo hilo likaanza na mambo yanayoonekana kuwa madogo tu, lakini upesi uhusiano mzima unakutwa umekwisha kumomonyolewa. Kwa upande mwingine, kuwa wanyofu katika kila jambo kunakitia nguvu kifungo cha ndoa. Tena unyofu ni mavutano yenye nguvu yanayoleta faida katika maisha za watoto pia.

Nje ya nyumba yako, kuwa mnyofu kwa wengine kunaonyesha maoni uliyo nayo juu ya wanadamu wenzako. Katika jambo hili watu wengine wanaepuka kufanya mabaya kwa sababu ya adhabu tu. Lakini kuna kani nyingine zinazosukuma mtu atake kuepuka mabaya. Mtume Paulo aliandika hivi: “Kule kusema, . . . Usiibe, Usitamani; na ikiwapo amri nyingine yo yote, inajumlishwa katika neno hili, ya kwamba, Mpende jirani yako kama nafsi yako.” (Warumi 13:9) Ili tuweze kupokea upendo kwa wengine ni lazima sisi tuwape huo. Mtu mnyofu anafurahia uhusiano mzuri pamoja na wengine. Vilevile anakuwa mwenye amani na nafsi yake mwenyewe. Yeye hawi na dhamiri yenye kumsumbua na kumfanya akeshe usiku kutwa bila kulala. Yeye hapindui-pindui shingo akiogopa-ogopa kwamba sasa wanakuja kumkamata.​—Warumi 13:3-5.

Walakini, jambo la maana kupita yote ni uhusiano wa mtu pamoja na Mungu. Kumpenda Yehova kwa bidii na tamaa ya kupata kibali Yake ndiyo mambo yatakayovuta mtu amenyane na hali zake mwenyewe za kutokukamilika na kuwa mnyofu hata wengine wasipokuwa wanyofu.​—Zaburi 15:1-5.