Walinzi, Inueni Sauti Yenu

“Sikiliza! Walinzi wako mwenyewe wameinua sauti yao.”​—ISAYA 5:8, NW

 1, 2. (a) Kuhusiana na Isaya 52:8, ni ulizo gani linalotokea? (b) Kiongozi mmoja wa kidini anakiri wazi jambo gani?

WALINZI wanaotajwa hapa ni nani? Je! ni walinzi wa dini za Jumuiya ya Wakristo? Viongozi wa kidini wa Jumuiya ya Wakristo wanasema nini leo juu ya Ufalme wa Mungu? Mfano unaofuata huenda ukatusaidia kujibu ulizo hilo.

² “Reverendi Mtaalamu” mwenye kuheshimiwa wa Chuo Kikuu cha Aberdeen, Scotland, alitoa lalamiko hili:

“Wakati wa miaka kumi na sita iliyopita [1963-78] naweza kukumbuka pindi mbili tu ambazo nimesikia mahubiri yakielekezwa waziwazi kwenye habari ya ufalme wa Mungu. . . . Mimi nauona unyamavu huo kuwa wa kushangaza kwa sababu ni jambo linalokubaliwa ulimwenguni pote na wanachuo wa Agano Jipya kwamba kichwa kikuu cha zile injili na fundisho la Yesu kilikuwa ufalme wa Mungu. . . . Kwa sababu gani watu hawahubiri juu ya ufalme wa Mungu? Mimi nadhani sababu moja ya wazi ni kwamba, ‘Ni kwa sababu sisi hatukufundishwa namna ya kufanya hivyo.’”

 3. Maneno ya Isaya 56:10,11 yanatumikaje leo?

³ Ni wazi kwamba viongozi wa kidini wanaoshindwa kuuhubiri Ufalme wa Mungu hawajapata uzito wenyewe wa umaana wa habari njema. Hawajatii mwito wa Isaya wa kuamka. Wao hawawezi kutangaza habari njema za jambo lililo zuri zaidi, kwa sababu hawajui jambo lililo zuri zaidi ya imani za dini ya kilimwengu na ufuataji wa desturi zayo zisizobadilika. Wao ni ‘walinzi vipofu,’ ambao maelezo yanayowafaa sana yametolewa kwenye Isaya 56:10, 11, Authorized, Version.

 4. (a) Walinzi wanaotajwa katika Isaya 52:8 wanatofautianaje na viongozi wa kidini wa sasa? (b) Kwa sababu gani tumshukuru Mkufunzi Mkuu wetu?

⁴ “Sisi hatukufundishwa namna ya kufanya hivyo.” Hiyo ndiyo sababu ambayo “Reverendi Mtaalamu” anatoa kwa kutokuhubiri Ufalme wa Mungu. Lakini, jambo la kufurahisha ni kwamba wako walinzi wanaohubiri Ufalme wa Mungu leo,nao wanaweza kufanya hivyo kwa usadikishi, kwa sababu wao wamekwisha kufundishwa na wanaendelea kufundishwa. Wao ndio wale ambao nabii wa Mungu anataja anapoandika hivi: “Yehova ni Mungu wa hukumu. Wenye furaha ni wote wale wanaoendelea kutazamia yeye. . . . Mkufunzi Mkuu wako hatajificha tena, na macho yako lazima yawe macho yenye kuona Mkufunzi Mkuu wako. Na masikio yako mwenyewe yatasikia neno nyuma yako likisema: ‘Hii ndiyo njia. Tembeeni katika hiyo, enyi watu,’ iwapo ninyi watu mnaenda kulia au iwapo ninyi mnaenda kushoto.”​—Isaya 30:18, 20, 21, NW.

 5. (a) Ni mipango gani ya kitengenezo ambayo Yehova amefanyia watu wake? (b) Kwa habari ya Ufalme, ni katika mambo gani Mashahidi wa Yehova leo wanafanana na Yesu na mitume wake?

⁵ Mashahidi wa Yehova wanafundishwa juu ya Ufalme wa Mungu, si katika seminari za mafunzo ya kidini ya madhehebu za Jumuiya ya Wakristo, bali katika Shule ya Huduma ya Kitheokrasi na mikutano mingine ya kila juma katika Majumba ya Ufalme yao. Wanapewa mazoezi katika kuuhubiri Ufalme kwa matokeo mazuri nyumba kwa nyumba na katika kuongoza mafunzo ya Biblia kwa watu wanaofundishika ambao wanataka kujifunza juu ya Ufalme. Mafundisho hayo yanatoka kwa Yehova kupitia tengenezo lake, ambalo anasema nalo, akiliambia hivi: “Watoto wako wote watafundishwa na [Yehova]; na amani ya watoto wako itakuwa nyingi.” Mashahidi wa Yehova wanajua Ufalme unahusu mambo gani hasa, na wanajua kwamba utaleta baraka nyingi ambazo wanadamu hawajapata kuziona hapa duniani. Kama Yesu na mitume wake, wao wanasali Ufalme wa Mungu uje kisha wanalihubiri kwa juhudi lile tumaini la Ufalme.​—Isaya 54:13; Mathayo 4:17 6:10; 10:7; 12:21; 24:14.

Walinzi, Paazeni Sauti!

 6. (a) Ni akina nani walio jamii ya mlinzi leo, nao wanafanya utumishi gani? (b) Sasa mlinzi anatoa onyo gani, na anatumia chombo gani?

⁶ Katika hesabu kadha ya maandiko, manabii Mungu wanataja walinzi. Katika nyakati za kale walinzi waliendelea kuchunga wakiwa macho, wakiwa tayari kusikisha watu onyo juu ya ushambulizi wa adui ye yote. Kwenye Isaya 21:8 mmoja wao anaripoti hivi: “Ee [Yehova], mimi nasimama daima juu ya mnara wakati wa mchana, na kila usiku ninakaa katika zamu ya ulinzi wangu.” Leo jamii ya mlinzi, yule “mtumwa mwaminifu mwenye akili” anayewakilisha Bwana Yesu Kristo hapa duniani, inafanya utumishi huo. Mlinzi huyo anatazama namna matukio yanavyoendelea kutendeka duniani kwa kutimiza unabii wa Biblia, anatolea watu onyo juu ya ‘dhiki kubwa inayokaribia sana ambayo haijatokea namna yake tangu mwanzo wa ulimwengu,’ kisha anatangaza “habari njema za jambo zuri zaidi.” Gazeti Mnara wa Mlinzi, ambalo linaenezwa ulimwenguni pote kwa nakala 10,200,000 kila toleo, ni kimoja cha vyombo ambavyo mlinzi anatumia katika kuzitangaza habari njema hizi.​—Mathayo 24:14, 21, 45-47, UV; Isaya 52:7, NW.

 7. Ni nani wanaotumikia wakiunga mkono “walinzi,” na kwa sababu gani msaada wao unahitajiwa?

⁷ Jamii ya “mtumwa” aliye mlinzi inaungwa sana mkono katika kutangaza habari njema. Kama vile makala iliyotangulia ilivyoonyesha katika kutoa ripoti ya hudhurio la Ukumbusho la mwaka wa 1983, waliosalia duniani wa yule “mtumwa” mpakwa mafuta wanazidi kidogo tu hesabu ya 9,000. Wanahitaji msaada katika kuitimiza kazi ya kuhubiri kwa matokeo mazuri. Na hakika wamekuwa wakipokea msaada huo! Mamilioni ya washirika wanamiminika upande wao, nao pia wanainua sauti zao pamoja na za “walinzi” ambao habari yao inaelezwa kwenye Isaya 52:8. Katika maana ya uhalisi sana, hao wanachanganya sauti zao pamoja na zile za “walinzi” katika kuzitangaza habari njema.

 8. (a) Orodha iliyo katika kurasa 10 inaonyesha nini juu ya mpanuko wa Ufalme? (b) Hali ikoje katika mahali mbalimbali ambako kazi ya Ufalme imewekewa vizuizi?

⁸ Fungua kurasa 10 za gazeti hili nawe utaona kwamba, duniani pote, Yehova anawabariki walinzi hao na washirika wao washikamanifu. Wao ‘wameinua sauti yao’ kwa kadiri ambayo ongezeko kubwa katika wahubiri linafurahiwa kila mahali. Hilo ni jambo la kutazamiwa kwa sababu sasa Kristo Yesu anatawala katika Ufalme wa Baba yake. Kwani je! Isaya 9:6, 7 haisemi hivi juu ya huyo “Mwana-Mfalme wa Amani”: “Juu ya ongezeko la serikali yake na amani hakutakuwa na mwisho”? (AV) Kama vile orodha inavyoonyesha, kuna sehemu za dunia, kutia ndani nyingine zenye watu wengi sana, ambazo kazi ya kuhubiri Ufalme imewekewa vizuizi vizito. Mashahidi katika sehemu hizo wanafanya wanaloweza kwa msaada wa roho ya Yehova. (Zekaria 4:6) Mamlaka za kiserikali zinazopinga, na jumuiya za watu zinazounga mkono mamlaka hizo, zitachukua hatia nzito ya damu wakati ile dhiki kubwa itakapoingia kwa mpigo.​—Linganisha Ezekieli 3:17-19.

Watangazaji Mapainia wa Habari Njema

 9. (a) Kwa kuiangalia orodha, wewe una maneno gani ya kusema juu ya ongezeko la mapainia? (b) Ni ripoti gani za kufurahisha ambazo matawi ya Sosaiti yamepeleka?

⁹ Ile orodha ya dunia nzima inaonyesha pia ongezeko la mapainia katika sehemu zote za dunia wakati wa mwaka wa 1983. Hilo ni jambo la kustaajabisha kweli kweli! Kama inavyoonyeshwa na mifano michache tu ya ripoti zilizo hapa chini, matawi ya Sosaiti ya ulimwenguni pote yanafurahia watu wengi wanaojitokeza washiriki utumishi wa painia msaidizi, painia wa kawaida na (mahali ambako unahitajiwa) wa painia wa pekee.

Barbados: Hesabu ya mapainia wasaidizi mwezi wa Aprili ilikuwa 292 mwaka wa 1981, 529 mwaka wa 1982 na 740 mwaka wa 1983.

Ubelgiji: Maombi ya upainia wa kawaida yaliongezeka kwa asilimia 30 mwaka wa 1983.

Chile: Wastani ya hesabu ya mapainia wasaidizi ilikuwa 987—ongezeko la asilimia 40.

Ivory Coast: Hesabu ya mapainia wa kawaida ilipanda kwa asilimia 15 juu ya ile ya mwaka uliopita.

Ureno: Chenye kustaajabisha kweli kweli kilikuwa kilele cha Aprili cha mapainia wasaidizi 3,064, hilo likiwa ni ongezeko la asilimia 140 juu ya kilele kilichotangulia.

Sweden: Kilele kisichopata kuonekana tena cha mapainia wa kawaida 796 kilitoa ripoti.

Thailand: Katika mwezi wa Aprili, asilimia 23 ya wahubiri wetu 821 waliripoti wakiwa mapainia.

Venezuela: Zaidi ya watu 200 walianza kazi ya painia wa kawaida mwaka wa 1983.

10. Ni nini kinachoonyesha kwamba mateso hayawezi kuwanyamazisha walinzi?

¹⁰ Nchi ambako kazi ya Ufalme imewekewa vizuizi vikubwa sana ziliripoti pia ongezeko katika wahubiri na mapainia. Nchi moja ya Kiafrika ambako mateso ya namna mbalimbali yalikuwa makali sana karibu miaka 15 iliyopita ilifikia vilele vya mapainia 616 wa kawaida na mapainia wasaidizi 207 wakati wa mwaka wa utumishi wa 1983. Na katika bara hilo hilo, katika nchi moja ambako ndugu 75 wamefungwa gerezani, hesabu ya wahubiri iliongezeka kwa asilimia 35 juu ya wastani ya mwaka uliotangulia, na hali mapainia wasaidizi wa Aprili walikuwa asilimia 151 zaidi ya kilele kilichotangulia. “Walinzi” na wenzi wao wanazidi tu kuinua sauti yao!

11. Utendaji wa painia unafaidi kundi namna gani, na vilevile shamba lote la ulimwengu?

¹¹ Utendaji wote huo wa upainia wenye juhudi unaichochea kazi ya Ufalme kwa njia nzuri ajabu, Kwa mfano, unafanya eneo limalizwe kwa ukamili zaidi na kufanya saa nyingi zaidi zitumiwe katika kutangaza habari njema. Mwaka wa 1983 jumla ya wakati uliotumiwa ulimwenguni pote katika kuutangaza Ufalme ulijumlika kuwa saa 436,720,991, hilo likiwa ni ongezeko zuri sana la asilimia 13.5! Mafunzo mengi zaidi yanaanzwa​—mengi kati ya hayo yakianzwa na mapainia wasaidizi​—na watu wengi zaidi wanaopendezwa wanaelekezwa ndani ya ushirika pamoja na tengenezo la Mungu.

12. Kupainia kunaletea mtu binafsi faida gani?

¹² Kupainia pia kunaleta faida za kibinafsi. Wakati wa mwezi mmoja wa upainia msaidizi, mhubiri anakuwa mwenye matokeo mazuri zaidi na mfasaha katika kueleza wengine ujumbe wa Ufalme! Pia, kuna furaha kuu katika kushirikiana pamoja na wengine katika utumishi huu na kuona maangusho ya magazeti, ziara za kurudia na mafunzo yakiongezeka. Wengi wameifurahia sana miezi hiyo ya kufanya upainia msaidizi mara kwa mara mpaka wakafanya marekebisho yaliyo ya lazima ili wawe mapainia wa kawaida. Wengine wanafanya upainia msaidizi kwa ukawaida.

13. Tunaweza kujipatia kitia-moyo gani kutokana na mambo mawili yaliyoonwa kutoka Pakistani?

¹³ Eneo la Waislamu la Pakistani linaripotiwa kuwa gumu kufanyiwa kazi. Hata hivyo kutoka nchi hiyo inakuja ripoti hii:

Baada ya ndugu mmoja kufanya upainia msaidizi kwa ukawaida muda wa miezi 30 iliyopita alisema hivi: “Sasa inaelekea kuwa upainia wa imdadi (ambalo ni neno la Kiurdu la kusema msaidizi) umenishika kwa uthabiti mwingi sana, nami naona litakuwa tatizo kubwa kwangu kuuacha ikiwa siku moja nitataka kuuacha. Imekuwa sehemu ya maisha yangu na kawaida yangu ya kila siku kutumia saa zisizopungua mbili nikitolea wengine ushuhuda.”

“Saa zisizopungua mbili” kila siku katika utumishi wa Ufalme​—hizo tu ndizo zinazotakwa na upainia msaidizi. Je! wewe ungeweza kuzifanya? Huenda kufanya hivyo kukakupa afya nzuri zaidi na furaha nyingi zaidi, kama inavyoonyeshwa na jambo hili lililoonwa kutoka Pakistani:

Ndugu mwingine aliyeacha kazi ya kimwili kwa sababu ya kuwa na umri wa miaka 58, na ambaye tangu wakati huo amejiunga na kazi ya mapainia wasaidizi, anasema hivi: “Mimi nimekuwa Shahidi kwa muda wa miaka 28 iliyopita, lakini huko nyuma sijapata kufurahia hali yangu ya kuwa Shahidi na kuithamini sana kama mlivyofanya wakati wa miezi minane iliyopita ya kuwa painia msaidizi wa kawaida. Kwa kujibu ulizo kutoka kwa washirika wangu wa zamani juu ya kinachonifanya nionekane sihatmand (mwenye afya nzuri zaidi, Kiurdu) na khush (mwenye furaha nyingi zaidi, Kiurdu) baada ya kuacha kazi, mimi nawaambia kwamba kutumikia Mungu wa kweli, Yehova, kwa ukamili zaidi ndiko kunakonipa furaha na uradhi na kunifanya nionekane kuwa sihatmand na khush.”

Je! wewe hungependa kuwa sihatmand na khush, pia? Basi tumia kwa ukamili nafasi za kufanya upainia msaidizi!

Kujitahidi Upate Baraka za Upainia

14. Kuhusu orodha iliyo katika kurasa 12-15, ni maendeleo gani ya wahubiri na mapainia yanayoonekana, na katika maeneo mangapi?

¹⁴ Na tuangalie Ripoti ya Mwaka wa Utumishi wa 1983 ya Mashahidi wa Yehova Ulimwenguni Pote kama inavyoonekana katika kurasa 12-15 za gazeti hili. Kurasa nne hizi hazituonyeshi sisi tarakimu zisizo na maana. Zinashuhudia kwamba wahubiri wa Ufalme wamefanya jitihada kubwa ajabu katika nchi au maeneo 205 ili kuhubiri habari njema. Pitisha kidole chako chini kutoka juu ya safu inayosema “Wastani Wahubiri Mapainia” uone namna nchi nyingi sana zimefanya ushiriki mkubwa katika utumishi huo. Na mapainia hao wameungwa mkono kwa ushikamanifu pia na wahubiri wa kundi ambao wameingia katika roho ile ile ya utumishi wa juhudi, ingawa huenda ushiriki wa wengine ukalinganishwa na ‘kile kisarafu cha mjane.’​—Marko 12:41-44.

15. Jamaa zinaweza kubarikiwaje zinaposhiriki kusaidia jitihada ya kufanya upainia?

¹⁵ Jamaa zinazojenga maisha zao kwa kutegemea utumishi wa painia zinabarikiwa. Jamaa nyingine zimejiwekea mradi ziwe jamaa ya mapainia na zimefikia mradi huo, zikashiriki kibarua zikiwa jamaa nzima ili kujisaidia katika mahitaji. Jamaa nyingine zinaungana kutolea mshiriki mmoja wa jamaa mahitaji yake ili awe katika kazi ya painia wa kawaida, na roho ya upainia inayoingizwa ndani ya jamaa kwa njia hiyo inafaidi kila mmoja.

16. (a) Wazazi wanaweza kuonyeshaje kwamba wanapendezwa na maendeleo ya kiroho ya watoto wao? (b) Tunaporudia kuchunguza maisha ya Yesu ya kidunia, tunaona mfano mwema wa namna gani?

¹⁶ Wote waliohudhuria “Umoja wa Ufalme” Kusanyiko la Wilaya lililopita walisikia hotuba nzuri juu ya kuweka miradi. Kwa kutaka kuona watoto wao wakiwa na hali iliyo bora zaidi, wazazi wanaweza kuzoeza watoto wadogo wawe na miradi yenye mafaa maishani. (Mithali 22:6) Mmoja wa miradi hiyo unaweza kuwa utumishi wa painia. Kumbuka mazoezi ambayo Yesu mwenyewe alipokea katika miaka yake ya utoto. Kufikia umri wa miaka 12 alikuwa amesomeshwa vizuri sana katika Maandiko hata akaweza kuzungumza na walimu hekaluni kwa kuwatolea sababu za mawazo yake. (Luka 2:46, 47) Yeye hakujitahidi afuatie kazi ya kimwili ya maisha, kama vile kuwa mwanasheria au daktari. Bali alijifunza kufanya kazi kwa mikono yake akiwa seremala, na wakati wote huo akawa akijitayarisha kiroho kwa ajili ya kazi iliyokuwa ikimngoja. (Marko 6:3; Yohana 7:46) Wanapokuwa shuleni, watoto wa Mashahidi wa Yehova wanaweza kujitahidi ivyo hivyo leo wakafikie miradi inayofaa. Wazazi wanaweza kuwatia moyo katika jambo hilo.

17. Tofauti na vijana wa kilimwengu, mapainia vijana wenye kujinyima wanaweza kuwa na uhakika gani?

¹⁷ Inaripotiwa kwamba watu wengi wanaohitimu katika vyuo vya masomo ya juu hawana kazi. Lakini mara nyingi vijana Wakristo waliozoezwa vizuri wanaomaliza kidato (darasa) cha mwisho cha masomo ya shule za kawaida na kuingia moja kwa moja katika utumishi wa painia wanakuta kwamba kazi ya kibarua inapatikana wakati ule ule wanaoihitaji. Yehova anaweza kuwabariki na kuwapa riziki wale wanaomtegemea yeye huku wakiendelea ‘kuutafuta kwanza ufalme’ kwa roho ya kujinyima.​—Mathayo 6:19-21, 31-33; Mithali 3:5, 6; Malaki 3:10.

18. Mazungumzo juu ya utumishi wa painia yalifaidije kundi la Kifilipino?

¹⁸ Huenda wengine katika kundi wakasema, ‘Sababu gani upainia uwe ukitajwa-tajwa saa zote? Wengi wetu kusema kweli hatuuwezi.’ Lakini mapainia wenye furaha wanaweza kuongeza sana roho katika kundi na kushiriki sana mpanuko wa kazi katika eneo la kwenu! Mnara wa Mlinzi wa Aprili 15, 1983 ulitokeza makala ya kujifunza inayosema “Roho ya Huduma ya Kikristo.” Ulizo la fungu la 7 liliuliza hivi: “Ni ulizo gani ambalo kila mhudumu Mkristo anapaswa kujiuliza?” Ulizo hilo lilielekeza fikira kwenye ulizo lililo ndani ya fungu hilo, linalouliza: “Je! mimi naweza kweli kupata sababu nzuri ya kujitetea mbele za Yehova juu ya kinachofanya nisiwe painia?” Wakitoa maelezo juu ya fungu hilo kwenye Funzo la Mnara wa Mlinzi katika Visiwa vya Ufilipino, watatu kati ya waliokuwako, wa umri tofauti-tofauti, walisema kila mmoja kwa zamu yake kwamba kilichowaharakisha wawe mapainia ni kutafakari ulizo hilo. Walipigiwa makofi ya kuwapongeza na kundi lote.

19. Ni kwa njia gani wale wasioweza kupainia wanavyoweza kuleta ushiriki wenye faida katika kundi?

¹⁹ Ni kweli kwamba kuna Mashahidi walio wakf ambao machoni pa Yehova hawamo katika hali ya kuwawezesha kupainia. Huenda ikawa walio wengi katika makundi yetu wamo katika hali hiyo ya kutokuweza. Hata hivyo, watu hao wanaweza kusaidia sana kuendeleza roho ya upainia katika kundi. Wazee na vichwa vya jamaa wanaweza kuwatia moyo vijana wafanye mradi wao uwe kupainia. Kundi zima linaweza kuwaunga mkono kwa moyo wote wale ambao tayari ni mapainia. Kuna wengi wanaoweza kufanya jitihada ya kushiriki katika upainia msaidizi nyakati zinazofaa, kama katika majira ya Ukumbusho, wakati wa ziara ya mwangalizi wa mzunguko au wakati wa likizo la shule. Uwe na imani kwamba Yehova atakutia nguvu unapofanya jitihada hiyo. “Kulingana na imani yenu na itukie hivyo kwenu.” (Mathayo 9:29, NW) Lakini ikiwa afya mbaya, madaraka mbalimbali au mambo mengine yanakuzuia kufanya upainia msaidizi, endeleza nia inayofaa. Tumia kadiri ya wakati unayoweza utangaze “habari njema za jambo zuri zaidi” kisha uwasaidie na kuwatia moyo wale wanaopainia.

20. (a) Inatupasa tuwe tumeamka daima kuona hali gani ya ulimwengu? (b) Basi, nia yetu inapasa kuwa nini kuelekea ile kazi ya wokovu?

²⁰ Leo tunaishi katika ulimwengu wenye jeuri na ukosefu wa maadili. Yehova yuko karibu kufikiliza hukumu, kama alivyofanya nyakati za kale. (Mwanzo 6:11; 18:20; Luka 17:26-30) Hakika hizi ndizo “siku za mwisho.” (2 Timotheo 3:1-5, 13) Kadiri tulivyo na nafasi, acheni tushiriki ile kazi kubwa ya kutangazia wokovu wale ambao huenda bado wakatoka katika mfumo wa kale ili wachukue msimamo wao upande wa Ufalme wa Yehova, Sisi tunapiga asante kwamba Yehova amebariki sana kazi yake mwaka uliopita. Wakati wa mwaka wa 1984, na tuungane tena pamoja na walinzi wa Ufalme kila mahali katika kuinua sauti zetu kwa sifa ya Yehova.​—Isaya 62:6.

Maulizo fulani ya kurudia kujikumbusha:

◻ Ni habari njema gani ambazo viongozi wa kidini wameshindwa kuhubiri, na kwa sababu gani?

◻ Orodha iliyo katika kurasa 12 na 15 inaonyesha nini juu ya utendaji wa walinzi wa Sayuni?

◻ Kupainia kunaleta faida gani kwa mtu na kundi?

◻ Wahubiri wote katika kundi wanaweza kushirikije kuongeza roho nzuri ya upainia?

[Sanduku katika ukurasa wa 16]

Kwa wengi, hatua ya kuingia katika utumishi wa painia wa kawaida imemaanisha pia kuingia katika maisha yenye faida nyingi zaidi. Painia wa kawaida katika Nigeria alisema hivi:

“Mimi nikiwa painia wa wakati wote, nimepata baraka nyingi sana na lazima nihesabu nyingine kati yazo: (1) Sasa naweza kusoma kwa ufasaha kwa sababu ya kuhubiri nyakati zote. (2) Ingawa mimi sikwenda shule, naweza kuongoza mafunzo ya nyumbani ya Biblia kwa urahisi. (3) Nikiwa mzee, nimeweza kuongoza Funzo la Mnara wa Mlinzi na Shule ya Huduma ya Kitheokrasi kwa matokeo mazuri (4) Wakati wa Shule za Huduma ya Ufalme niliweza kuelewa kila jambo lililozungumzwa kwa Kiingereza. (5) Ikiwa mtu ye yote anataka kuharibu kazi yangu ya kuhubiri kwa kutumia maneno ya elimu-elimu, mimi naweza kumfahamisha kwa jibu langu kwamba naiweza kazi yangu. Yote hayo yamenifanya nikate maneno kwamba upainia ni kipawa nilichopewa na Yehova.”

[Chati katika ukurasa wa 10]

Mpanuko wa Ufalme Mwaka wa Utumishi wa 1983

“Sauti yao imeenea duniani mwote.”​—Warumi 10:18; Matendo 1:8.

Orodha hii inaonyesha ongezeko katika tarakimu za wastani ya kila mwezi ulimwenguni pote

Amerika Kaskazini

Wahubiri: 690,979; ongezeko: 6%

Mapainia: 58,381; ongezeko: 16%

Asia

Wahubiri: 122,726; ongezeko: 12%

Mapainia: 34,586; ongezeko: 24%

Ulaya

Wahubiri: 601,918; ongezeko: 5%

Mapainia: 38,978; ongezeko: 17%

Visiwa vya Pasifiki

Wahubiri: 117,816; ongezeko: 8%

Mapainia: 11,386; ongezeko: 24%

Latini Amerika

(Kutia Ndani Visiwa vya Karibbea)

Wahubiri: 472,816; ongezeko: 11%

Mapainia: 35,450; ongezeko: 23%

Afrika

Wahubiri: 266,375; ongezeko: 6%

Mapainia: 21,690; ongezeko: 17%

Nchi Zenye Vizuizi

Wahubiri: 229,092; ongezeko: 4%

Mapainia: 5,627; ongezeko: 20%

[Chati katika ukurasa wa 12-15]

1983 SERVICE YEAR REPORT OF JEHOVAH’S WITNESSES WORLDWIDE

(See bound volume)