Endeleza Mwelekeo wa Kutazamia Mazuri
ILIKUWA mapema asubuhi moja ya wakati wa kiangazi. Lakini jua la Mashariki ya Kati lilikuwa tayari likiangaza sana wakati Baba mmoja alipopokea habari za kudhikisha. Mwanaye mzaliwa wa kwanza, mwenye umri wa miaka 22 alikuwa amekufa katika aksidenti ya gari wakati wa usiku.
Wewe ungalitendaje kwa kupata habari hizo? Kwa sababu washiriki wa jamaa walikuwa na uhusiano wa karibu, kama ilivyo kawaida katika Mashariki ya Kati, wazazi hao waliingiwa na hangaiko kubwa. Lingalielekea kuwa jambo la asili kwao kuona uchungu mwingi kwa sababu ya msiba huo wa ghafula. Hata hivyo, jambo lililoshangaza mtaa ni kwamba walionyesha mwelekeo thabiti wa kutazamia mazuri, hata katika siku ile ya kwanza. Ingawa walisikitika sana, walikuwa na tumaini kamili katika uwezo wa Yehova kufufua mwanao katika wakati aliouweka. Walitazamia mfumo mpya wa Mungu ulioahidiwa ambao “mauti haitakuwapo tena.” (Ufunuo 21:4) Hata leo, miaka mingi baadaye, watu wanaoijua jamaa hiyo wangali wanaongea juu ya mwelekeo wa wazazi hao na imani yao iliyo mfano mwema.
Maana yake nini kuwa na mwelekeo wa kutazamia mazuri? Mtu mwenye mwelekeo wa kutazamia mazuri anajidumisha katika usawaziko ijapokuwa hali zinazobadilika. Hata chini ya hali zenye majaribu yeye hageuki kuwa mtu wa kununa-nuna, akiacha mawazo yasiyofaa yamtawale. Jambo hilo linawezekanaje? Ili tupate majibu fulani acheni tuangalie mifano fulani ya Kibiblia.
Tunapokabili Hali ya Kuogopa Wanadamu
Wakati wa mwaka 1512 K.W.K., taifa la Israeli lilipokuwa katika jangwa la Parani, Musa alituma wapelelezi 12 wakaichunguze Nchi ya Ahadi. (Hesabu 13:17-20) Wapelelezi hao wote walikuwa wakuu katika makabila yao—wanaume mashuhuri waliopaswa kuwa mifano myema. (Hesabu 13:1) Lakini lo, aibu gani! Baada ya siku 40 kumi kati yao walitoa ripoti mbaya sana, hivi kwamba Waisraeli wakaasi mwelekezo wa Yehova na kutaka kurudi Misri! “Watu wanaokaa katika nchi ile ni hodari,” wakasema wapelelezi. “Hatuwezi kupanda tupigane na watu hawa.”—Hesabu 13:28, 31.
Lo! ni mwelekeo wa kutazamia mabaya kama nini! Lakini tofauti kubwa ilionekana kati ya mwelekeo wa kutazamia mazuri wa Yoshua na Kalebu, wale wapelelezi wawili waliobaki: “Nchi ile tuliyopita kati yake ili kuipeleleza, ni nchi njema mno ajabu. Ikiwa [Yehova] anatufurahia, atatuingiza katika nchi hii atupe iwe yetu, nayo ni nchi yenye wingi wa maziwa na asali.” (Hesabu 14:7, 8; 13:30) Vikundi vyote viwili viliona mambo yale yale mamoja wakati wa kuipeleleza nchi. Lakini lo, palikuwa na tofauti kubwa kama nini katika mwelekeo wavyo! Mwelekeo ule wa kutazamia mabaya wa wapelelezi kumi ulileta matokeo mabaya juu ya taifa zima, nao wakaanza kunung’unika. Ulifanya wote waliokuwa na umri wa miaka zaidi ya 20 wafe jangwani. Ni Yoshua na Kalebu tu waliopewa pendeleo la kuingia Nchi ya Ahadi kwa sababu ya kumtumaini Yehova kwa tazamio zuri. (Hesabu 14:22-30) Mfano wao unapasa kututia moyo katika siku hizi ili tubaki tukiwa waaminifu na kuendeleza mwelekezo wa kutazamia mazuri wakati wa mateso au upinzani unapokuja au kuongezeka.
Katika nchi ambayo imekuwa chini ya marufuku kwa miaka mingi, painia wa pekee alitiwa gerezani na kutendwa vibaya sana. Yeye anakumbuka hivi: “Kadiri ambavyo maafisa walizidi kunitenda mambo magumu, ndivyo mimi nilivyozidi kujisikia nikiwa karibu na Yehova. Niliimba nyimbo za Ufalme. Nikayakumbuka maandiko yote niliyoyajua. Nilitambua ya kwamba, ingawa Yehova alikuwa akiruhusu jambo hili litokee, yeye angeweza—wakati wo wote—kunifungua. Yote hayo yalinisaidia niwe na mwelekeo wa kutazamia mazuri. Kama vile mitume, nilijiona na furaha kwa kupigwa kwa ajili ya jina la Yehova lenye nguvu mno. Nilisali daima ili Yehova anitie nguvu. Yeye alinisaidia hata ikawa kwamba pigo la kwanza tu nililokuwa nikipigwa ndilo lililokuwa na maumivu. Nilitumia kila nafasi kuwahubiri wafungwa wenzangu.”
Baada ya kufunguliwa gerezani, Mkristo huyu alisema: “Kwa kuwa sisi tumeweka wakfu maisha zetu kwa Yehova na tumeahidi tubaki tukiwa waaminifu kwake, inatupasa tuendelee kumtumika Yeye kujapokuwa na magumu yo yote. Yeye anastahili ibada na kujitoa kwetu kikamili.”
Sisi, pia, tunaweza kukabili upinzani kama huo wakati ujao. Acheni sisi pia tuwe tumepiga moyo konde jinsi iyo hiyo kwamba hatutaogopa wanadamu. Tuendelee kuwa na mwelekeo wa kutazamia mazuri, na kama ilivyokuwa kwa habari ya Yoshua na Kalebu, tutapewa baraka na thawabu nyingi.
Wakati Mapendeleo ya Utumishi Yanapopotea
Musa, akiwa kiongozi wa taifa la Israeli, ndiye aliyewatuma wapelelezi wale 12. Yeye ndiye aliyekuwa ameliongoza taifa kutoka Misri na bila shaka alitazamia kuwa ndiye angewaongoza kuwaingiza katika Nchi ya Ahadi. Lakini, Musa alipoteza pendeleo hili wakati, katika kipindi cha kukasirika sana, alishindwa kutukuza jina la Yehova. (Hesabu 20:2-13) Hapo Musa alitendaje? Katika wimbo aliotunga baadaye, yeye alisema: “Nitalitangaza Jina la [Yehova] . . . Yeye Mwamba kazi yake ni kamilifu; maana, njia zake zote ni haki. Mungu wa uaminifu, asiye na uovu, Yeye ndiye mwenye haki na adili.” (Kumbukubu 32:3, 4) Musa alikuwa na mwelekeo wa kutazamia mazuri kama nini, ingawa alikuwa amepoteza pendeleo la maana la utumishi!
Sisi tutasaidika tukilikumbuka jambo hilo lililompata Musa tukikabili hali ya namna hiyo siku moja. Inaweza kutukia kwamba baraza la wazee katika kundi linapendekeza kuondolewa kwa mzee au mtumishi wa huduma, labda kwa sababu amekuja kupoteza sifa moja au zaidi za Kimaandiko zinaotakwa kwa pendeleo hilo la utumishi. Huenda ndugu yule akajisikia kwamba hakustahili kuondolewa, akaudhika, na kuleta fujo isiyohitajiwa kwa kuwa na mwelekeo mbaya, anaweza kuanza kunung’unika kutafuta-tafuta makosa katika wengine, hata kupiga porojo. Hatimaye, anaweza kuacha kuhudhuria mikutano na kushiriki katika kazi ya kuhubiri. Anakuwa amefikia hali mbaya kama nini! Ingekuwa afadhali kama nini kudumisha mwelekeo wa kutazamia mazuri na kuchukua kuondolewa kwake kuwa ni nidhamu au mazoezi ya kuwa mtumishi bora wa Yehova. Angeweza kutumia vizuri nafasi hiyo ajifunze na kutafakari juu ya Neno la Mungu ili apate tena sifa zinazohitajiwa ili amtumikie Yeye kwa ukamili. Wengi ambao wamefanya hivyo wamebarikiwa baadaye kwa kupata mapendeleo makubwa hata zaidi ya utumishi.—Waebrania 12:11.
Wakati Mabadiliko Yasiyotazamiwa Yanapotukia
Mara nyingi maisha yamejawa na mabadiliko yasiyotazamiwa yanayoweza kufanya wengine wakate tamaa na kuchagua mwelekeo mbaya. Wewe ulitendaje mara ile ya mwisho wakati jambo fulani halikwenda vizuri kama ulivyokuwa umetumainia? Hata matukio madogo yanaweza kutuvunja moyo tukiyaruhusu. Lakini usisahau kamwe: Kuendeleza mwelekeo wa kutazamia mazuri kutakusaidia ukabili hali iliyobadilika kwa njia nzuri zaidi.
Mfano mzuri wa kukumbuka ni ule wa Ruthu. Akiwa amekwisha kuwa mjane mapema maishani, yeye alirudi Israeli pamoja na mama-mkwe wake, Naomi, wakati njaa ilipopungua kule. Akiwa hana mume wa kumpa hata yale mahitaji ya msingi, bado Ruthu alidumisha mwelekeo wa kutazamia mazuri. Kwa uchangamfu, yeye alienda nje kuokota masazo katika mashamba kwa kuwafuata nyuma wavunaji ili yeye na mama-mkwe wake wapate chakula. Kazi hiyo ngumu haikumvunja moyo. Yeye hakuchagua mwelekeo mbaya, akiomboleza kwamba alikuwa amefiwa na mumeye na sasa alikuwa mbali na jamaa yake na marafiki. Na kama vile kumbukumbu linavyoonyesha, Yehova alimthwabisha sana kwa mwendo wake mzuri.—Ruthu 4:13-17.
Jinsi ya Kuendeleza Mwelekeo wa Kutazamia Mazuri
Ni vigumu kwa wengine kuendeleza mwelekeo wa kutazamia mema. Mahangaikio ya maisha, hasa katika nyakati zenye msukosuko tunamoishi, yanaweza kunyang’anya mtu furaha—hasa wakati matatizo yenye kusumbua sana yanapoendelea bila kukoma. Lakini hata katika hali zisizofaa, mtu anaweza kudumisha mwelekeo wa kutazamia mazuri. Wengi wamefanya hivyo wakiwa katika hali zilizo za kujaribu zaidi. Ni kwa njia gani sisi tunaweza kufanya ivyo hivyo?
Jaribu kuzuia mawazo yako yasibaki daima juu ya mambo yasiyofaa. Hata wakati wa magumu makubwa, mambo mazuri ya kuangalia yanaweza kupatikana. Ingawa mara nyingi mitume waliteswa au kutiwa gerezani, bado walifurahi kuweza kumsifu Yehova. (Matendo 13:50-52; 14:19-22; 16:22-25) Tunaweza kutafakari juu ya mambo ambayo wao na watumishi wengine waamifu wa Yehova walifanya katika nyakati za majaribu kisha tutafute kuona ni masomo gani tunayoweza kupata kwa ajili ya maisha zetu. Mbona wao walikuwa wachangamfu na wenye mwelekeo wa kutazamia mazuri? Ni kwa sababu walimtumaini na kumwamini kabisa Yehova. Waliutumaini uwezo wake wa kuwafufua na kuwathawabisha. (Ufunuo 2:10) Vivyo hivyo, wewe endelea kuweka wazi akilini tumaini lako katika mfumo mpya wa Yehova wenye uadilifu.—Linganisha Waebrania 12:2.
Pia, inatupasa tuendelee kujichunguza sana sisi wenyewe, yasije mawazo yasiyofaa yakapenya na kutia mizizi ndani ya mioyo yetu. Ni jambo lenye faida kama nini tubaki tukiwa karibu na Yehova na kusali tupate msaada wake tunapovunjika moyo. (Zaburi 62:8) Msaada wenye kujenga unaweza kutafutwa kwa wazee pia. Sitawisha roho ya unyenyekevu na utii. (Zaburi 119:69, 70) Jiwekee miradi inayofaa, yenye kufikika katika maisha. Madokezo yote hayo yatatusaidia tuendeleze mwelekeo wa kutazamia mazuri na kuwa na “amani ya Mungu” ambayo ‘itahifadhi moyo na nia zetu.’—Wafilipi 4:6, 7.
Ni kweli kwamba si jambo jepesi sikuzote kuwa na mwelekeo wa kutazamia mazuri. Lakini, kwa kutia bidii na kusukumwa na imani yenye nguvu, mwelekeo kama huo unaweza kusitawishwa. Kwa hiyo, hata hali zetu ziwe nini, acheni sisi sote tupige moyo konde kuendeleza mwelekeo wa kutazamia mazuri. Matokeo hayatakuwa hasara kwetu, bali kufanya hivyo kutatuletea thawabu nyingi za kupendeza sasa na katika wakati ujao.
[Picha katika ukurasa wa 29]
Endeleza mwelekeo wa kutazamia mazuri, nawe utapata baraka na thawabu nyingi