Dhihirisha Mtazamo wa Akili wa Kristo

“Mungu apaye uvumilivu na faraja na awaruhusu miongoni mwenu wenyewe mwe na mtazamo uleule wa akili aliokuwa nao Kristo Yesu.”—WAROMA 15:5.

1. Maisha ya mtu yaweza kuathiriwaje na mtazamo wake?

MTAZAMO huathiri sana maisha ya mtu. Mtazamo baridi au wa bidii, mtazamo mzuri au mbaya, mtazamo wa ugomvi au wa ushirikiano, mtazamo wa kulalamika au wa kushukuru waweza kuathiri sana jinsi mtu anavyoshughulika na hali mbalimbali na jinsi watu wengine wanavyomtendea. Mtu akiwa na mtazamo mzuri, aweza kuwa na furaha hata katika hali ngumu sana. Mtu mwenye mtazamo mbaya haoni jambo lolote zuri, hata wakati ambapo maisha yanaonekana kuwa mazuri.

2. Mtu hujifunzaje mitazamo?

² Mtu aweza kujifunza mitazamo, iwe mizuri au mibaya. Naam, lazima watu wajifunze mitazamo. Kichapo cha Collier’s Encyclopedia chasema hivi kuhusu mtoto aliyezaliwa hivi karibuni: “Lazima mtoto ajitahidi kupata au kujifunza mitazamo inayokuwa sehemu ya utu wake baadaye, kama vile apaswavyo kujitahidi kupata au kujifunza lugha au ustadi mwingine wowote.” Sisi hujifunzaje mitazamo? Ingawa mambo mengi huchangia, mazingira na mashirika yana uvutano sana. Ensaiklopedia iliyotajwa awali yataarifu hivi: “Sisi hujifunza au kuiga mitazamo ya wale tunaoshirikiana nao kwa ukaribu.” Biblia ilisema jambo kama hilo maelfu ya miaka iliyopita: “Enenda pamoja na wenye hekima, nawe utakuwa na hekima; bali rafiki wa wapumbavu ataumia.”—Mithali 13:20; 1 Wakorintho 15:33.

Kiolezo cha Mtazamo Unaofaa

3. Ni nani aliyekuwa kielelezo bora kuhusu mtazamo wake, nasi twaweza kumwigaje?

³ Kama alivyofanya katika mambo mengine yote, Yesu Kristo aliweka kiolezo bora kwa habari ya mtazamo. Alisema hivi: “Mimi niliweka kiolezo kwa ajili yenu, ili, kama vile nilivyowafanyia nyinyi, nyinyi mpaswe kufanya pia.” (Yohana 13:15) Ili tuwe kama Yesu, sharti tujifunze juu yake kwanza.a Twajifunza maisha ya Yesu kusudi tufanye yale ambayo mtume Petro alipendekeza: “Kwenye mwendo huu mliitwa, kwa sababu hata Kristo aliteseka kwa ajili yenu, akiwaachia kigezo ili nyinyi mfuate hatua zake kwa ukaribu.” (1 Petro 2:21) Mradi wetu ni kuwa kama Yesu kadiri iwezekanavyo. Huo watia ndani kusitawisha mtazamo wake wa akili.

4, 5. Andiko la Waroma 15:1-3 linakazia jambo gani kuhusu mtazamo wa akili wa Yesu, na Wakristo waweza kumwigaje?

⁴ Inamaanisha nini kuwa na mtazamo wa akili wa Kristo Yesu? Sura ya 15 ya barua ya Paulo kwa Waroma yatusaidia kujibu swali hilo. Katika mistari michache ya kwanza ya sura hiyo, Paulo arejezea sifa muhimu ya Yesu asemapo hivi: “Ingawa hivyo, sisi tulio na nguvu twapaswa kuchukua udhaifu wa wale wasio na nguvu, na si kuwa tukijipendeza wenyewe. Acheni kila mmoja wetu ampendeze jirani yake katika lililo jema kwa ajili ya kujengwa kwake. Kwa maana hata Kristo hakujipendeza mwenyewe; bali kama vile imeandikwa: ‘Mashutumu ya wale waliokuwa wakikushutumu yameniangukia mimi.’”—Waroma 15:1-3.

⁵ Kwa kuiga mtazamo wa Yesu, Wakristo watiwa moyo wawe tayari kuwahudumia wengine kwa unyenyekevu badala ya kutaka kujipendeza wenyewe tu. Kwa kweli, utayari huo wa unyenyekevu wa kuwatumikia wengine ni sifa ya wale ‘walio na nguvu.’ Yesu, aliyekuwa na nguvu kiroho kuliko mwanadamu yeyote aliyepata kuishi, alisema kujihusu: ‘Mwana wa binadamu alikuja, si kuhudumiwa, bali kuhudumu na kutoa nafsi yake kuwa fidia katika kubadilishana kwa ajili ya wengi.’ (Mathayo 20:28) Tukiwa Wakristo, sisi pia twataka kujitahidi kuwatumikia wengine, wakiwemo “wale wasio na nguvu.”

6. Twaweza kuigaje jinsi Yesu alivyoitikia alipopingwa na kushutumiwa?

⁶ Sifa nyingine nzuri ambayo Yesu alidhihirisha ni kwamba sikuzote alikuwa na fikira nzuri na matendo mazuri. Hakuruhusu kamwe mtazamo mbaya wa wengine uathiri mtazamo wake mzuri wa kumtumikia Mungu; nasi tusiuruhusu kamwe. Aliposhutumiwa na kunyanyaswa kwa maana alimwabudu Mungu kwa uaminifu, Yesu alivumilia kwa subira bila kulalamika. Alijua kuwa wale wanaojaribu kuwapendeza jirani zao “katika lililo jema kwa ajili ya kujengwa kwake” wanaweza kutarajia upinzani kutoka kwa ulimwengu usio na imani na usioelewa.

7. Yesu alidhihirishaje subira, na kwa nini tufanye vivyo hivyo?

⁷ Yesu alionyesha kwa njia nyingine mtazamo unaofaa. Hakukosa kamwe subira kwa Yehova bali alingojea kwa subira utimizo wa makusudi Yake. (Zaburi 110:1; Mathayo 24:36; Matendo 2:32-36; Waebrania 10:12, 13) Isitoshe, Yesu hakukosa kamwe subira kwa wafuasi wake. Aliwaambia hivi: “Mjifunze kutoka kwangu”; na kwa kuwa alikuwa “mwenye tabia-pole,” maagizo yake yalijenga na kuburudisha. Na kwa vile alikuwa wa “hali ya chini moyoni,” hakuwa kamwe mwenye majivuno au kiburi. (Mathayo 11:29) Paulo atutia moyo tuige sifa hizo za mtazamo wa Yesu asemapo hivi: “Tunzeni mtazamo huu wa akili ndani yenu uliokuwa pia ndani ya Kristo Yesu, ambaye, ijapokuwa alikuwa akiwako katika umbo la Mungu, hakufikiria upokonyaji, yaani, kwamba yeye awe sawa na Mungu. La, bali alijifanya mwenyewe kuwa mtupu na kuchukua umbo la mtumwa na kuja kuwa katika ufanani wa wanadamu.”—Wafilipi 2:5-7.

8, 9. (a) Kwa nini ni lazima tujitahidi kusitawisha mtazamo usio na ubinafsi? (b) Mbona tusivunjike moyo tunaposhindwa kufuata kikamilifu kiolezo alichotuachia Yesu, na Paulo aliwekaje kielelezo kizuri kwa habari hiyo?

⁸ Ni rahisi kusema kwamba twataka kuwatumikia wengine nasi twataka kutanguliza mahitaji yao kabla ya yetu. Lakini tunapouchunguza kwa unyofu mtazamo wetu wa akili, huenda tukatambua kwamba mioyo yetu haielekei kufanya hivyo kikamilifu. Kwa nini? Kwanza, ni kwa sababu tumerithi tabia ya ubinafsi kutoka kwa Adamu na Hawa; pili, ni kwa sababu twaishi katika ulimwengu unaoendeleza ubinafsi. (Waefeso 4:17, 18) Ili kukuza mtazamo usio na ubinafsi, mara nyingi tunahitaji kusitawisha njia ya kufikiri ambayo ni kinyume cha hali yetu ya asili isiyokamilika. Hilo huhitaji azimio na jitihada.

⁹ Wakati mwingine, huenda hali yetu iliyo wazi ya kutokamilika, iliyo kinyume kabisa cha kiolezo kikamilifu ambacho Yesu alituachia, ikatuvunja moyo. Huenda tukashuku uwezekano wa kuwa na mtazamo wa akili kama wa Yesu. Lakini ona maneno ya Paulo yanayotia moyo: “Najua kwamba katika mimi, yaani, katika mwili wangu, halikai jambo lolote jema; kwa maana uwezo wa kutaka upo pamoja nami, bali uwezo wa kufanya lililo bora haupo. Kwa maana lile jema nitakalo silifanyi, bali lile baya nisilotaka ndilo nazoea kulifanya. Kwa kweli napendezwa na sheria ya Mungu kulingana na mtu niliye kwa ndani, lakini mimi naona katika viungo vyangu sheria nyingine ikifanya vita dhidi ya sheria ya akili yangu na kunichukua mateka kwa sheria ya dhambi iliyo katika viungo vyangu.” (Waroma 7:18, 19, 22, 23) Ni kweli, kutokamilika kwa Paulo kulimzuia mara nyingi asitekeleze mapenzi ya Mungu kama alivyotaka, lakini mtazamo wake, yaani, fikira na maoni yake kumhusu Yehova na sheria Yake, ulikuwa bora. Wetu waweza kuwa hivyo pia.

Kusahihisha Mitazamo Yenye Makosa

10. Paulo aliwatia moyo Wafilipi wasitawishe mtazamo gani wa akili?

¹⁰ Je, yawezekana watu fulani wanahitaji kusahihisha mtazamo wenye makosa? Ndiyo. Yaonekana Wakristo fulani katika karne ya kwanza walihitaji kufanya hivyo. Katika barua yake kwa Wafilipi, Paulo alizungumza juu ya kuwa na mtazamo unaofaa. Aliandika hivi: “Si kwamba tayari nimepokea [maisha ya mbinguni kupitia ufufuo wa kwanza] au tayari nimefanywa kuwa mkamilifu, bali ninafuatia kuona kama pia huenda nikashika lile ambalo kwa ajili yalo mimi pia nimeshikwa na Kristo Yesu. Akina ndugu, bado mimi sijifikirii mwenyewe kuwa nimekwisha kulishika hilo; bali kuna jambo moja juu ya hilo: Nikisahau mambo ya nyuma na kujinyoosha mbele kwenye mambo ya mbele, ninafuatilia sana kuuelekea mradi kwa ajili ya tuzo la mwito wa Mungu wa kwenda juu kwa njia ya Kristo Yesu. Basi, acheni wengi wetu kadiri tulivyo wakomavu, tuwe na mtazamo huu wa akili.”—Wafilipi 3:12-15.

11, 12. Ni katika njia zipi Yehova hutufunulia mtazamo wa akili unaofaa?

¹¹ Maneno ya Paulo yaonyesha kwamba yeyote ambaye, baada ya kuwa Mkristo, haoni haja ya kufanya maendeleo ana mtazamo mbaya. Ameshindwa kuiga mtazamo wa akili wa Kristo. (Waebrania 4:11; 2 Petro 1:10; 3:14) Je, mtu kama huyo amekosa tumaini kabisa? La, hasha. Mungu aweza kutusaidia tubadili mtazamo wetu ikiwa kweli tunataka. Paulo aendelea kusema: “Mkiwa na mwelekeo wa akili ulio tofauti katika jambo lolote, Mungu atawafunulia nyinyi mtazamo huo.”—Wafilipi 3:15.

¹² Hata hivyo, lazima tutimize sehemu yetu tukitaka Yehova atufunulie mtazamo unaofaa. Kujifunza kwa bidii Neno la Mungu kwa msaada wa vichapo vya Kikristo vinavyoandaliwa na “mtumwa mwaminifu na mwenye busara” kutawasaidia wale walio na “mwelekeo wa akili ulio tofauti” wasitawishe mtazamo unaofaa. (Mathayo 24:45) Wazee Wakristo, walioteuliwa na roho takatifu ili “kulichunga kutaniko la Mungu,” watafurahi kutusaidia. (Matendo 20:28) Twashukuru kama nini kwamba Yehova hukumbuka kutokamilika kwetu na kutusaidia kwa upendo! Na tuukubali msaada huo.

Kujifunza Kutoka kwa Wengine

13. Twajifunza nini kuhusu mtazamo unaofaa kutokana na masimulizi ya Biblia juu ya Ayubu?

¹³ Katika Waroma sura ya 15, Paulo aonyesha kwamba kutafakari vielelezo vya kale kwaweza kutusaidia kurekebisha mtazamo wetu. Aandika hivi: “Mambo yote yaliyoandikwa wakati wa mbele yaliandikwa kwa kufunzwa kwetu, ili kupitia uvumilivu wetu na kupitia faraja kutokana na Maandiko tupate kuwa na tumaini.” (Waroma 15:4) Baadhi ya watumishi waaminifu wa Yehova wa kale walihitaji kubadili sehemu fulani za mtazamo wao. Kwa mfano, Ayubu alikuwa na mtazamo mzuri katika mambo yote. Hakumhesabia Yehova uovu kamwe, na hakuruhusu kamwe mateso yake yadhoofishe tumaini lake kwa Mungu. (Ayubu 1:8, 21, 22) Na bado alikuwa na mwelekeo wa kujitetea. Yehova alimwelekeza Elihu amsaidie Ayubu arekebishe mtazamo huo. Badala ya kuudhika, Ayubu alikubali kwa unyenyekevu uhitaji wa kubadili mtazamo naye akaubadili mara moja.—Ayubu 42:1-6.

14. Twaweza kuwaje kama Ayubu tukishauriwa kuhusu mtazamo wetu?

¹⁴ Je, tungetenda kama Ayubu iwapo Mkristo mwenzetu angetuambia kwa fadhili kwamba tunadhihirisha mtazamo wenye makosa? Sawa na Ayubu, ‘tusimwazie kamwe Mungu kwa upumbavu.’ (Ayubu 1:22) Tukiteseka isivyofaa, tusilalamike kamwe wala kumlaumu Yehova kwa ajili ya magumu yetu. Na tuepuke kujitetea, tukikumbuka kwamba haidhuru mapendeleo tuliyo nayo katika utumishi wa Yehova, sisi bado ni “watumwa wasiofaa kitu.”—Luka 17:10.

15. (a) Baadhi ya wafuasi wa Yesu walidhihirisha mtazamo gani mbaya? (b) Petro alionyeshaje mtazamo mzuri?

¹⁵ Katika karne ya kwanza, watu fulani waliomsikiliza Yesu walionyesha mtazamo usiofaa. Pindi moja, Yesu alisema jambo gumu kueleweka. Kwa kuitikia, “wengi wa wanafunzi wake, waliposikia hilo, wakasema: ‘Usemi huu unashtua; ni nani ambaye aweza kuusikiliza?’” Ni wazi kuwa wale waliosema hivyo walikuwa na mtazamo mbaya. Na mtazamo wao mbaya ukasababisha wakome kumsikiliza Yesu. Maandiko yasema hivi: “Kwa sababu ya hili wengi wa wanafunzi wake wakaenda zao kwenye mambo yaliyo nyuma wakawa hawatembei tena pamoja naye.” Je, wote walikuwa na mtazamo mbaya? La. Maandiko yaendelea kusema hivi: “Kwa hiyo Yesu akawaambia wale kumi na wawili: ‘Nyinyi hamtaki kwenda pia, je, mwataka?’ Simoni Petro akamjibu: ‘Bwana, tutaenda zetu kwa nani?’” Kisha Petro akajibu swali lake mwenyewe: “Wewe una semi za uhai udumuo milele.” (Yohana 6:60, 66-68) Huo ni mtazamo mzuri kama nini! Tunapopata maelezo au uelewevu mpya wa Maandiko ambao huenda mwanzoni tukaona vigumu kuukubali, je, haingefaa kuonyesha mtazamo kama wa Petro? Ungekuwa upumbavu ulioje tukikoma kumtumikia Yehova au kusema kwa njia iliyo kinyume cha “kiolezo cha maneno yenye afya” eti kwa sababu mwanzoni mambo fulani ni magumu kuyaelewa!—2 Timotheo 1:13.

16. Viongozi wa kidini Wayahudi wa siku ya Yesu walidhihirisha mtazamo gani wenye kushtua?

¹⁶ Viongozi wa kidini Wayahudi katika karne ya kwanza walishindwa kudhihirisha mtazamo wa akili kama wa Yesu. Azimio lao thabiti la kutomsikiliza Yesu lilidhihirika alipomfufua Lazaro kutoka katika kifo. Kwa yeyote aliye na mtazamo unaofaa, mwujiza huo ungalikuwa uthibitisho kamili kwamba Yesu ametumwa na Mungu. Hata hivyo, twasoma hivi: “Kwa sababu hiyo makuhani wakuu na Mafarisayo wakaikusanya pamoja Sanhedrini na kuanza kusema: ‘Twapaswa kufanya nini, kwa sababu mtu huyu hufanya ishara nyingi? Tukimwacha hivyo, wao wote wataweka imani katika yeye, na Waroma watakuja na kuondolea mbali mahali petu na taifa letu pia.’” Utatuzi wao? “Tangu siku hiyo na kuendelea walifanya shauri kumuua.” Mbali na kupanga kumwua Yesu, waliazimia kuharibu ushuhuda ulio hai uonyeshao kwamba alikuwa mfanya-miujiza. “Sasa makuhani wakuu wakafanya shauri kumuua Lazaro pia.” (Yohana 11:47, 48, 53; 12:9-11) Ingechukiza kama nini ikiwa tungeendeleza mtazamo kama huo na kuchokozeka au kuudhika juu ya mambo ambayo kweli twapaswa kufurahia! Naam, ingekuwa hatari iliyoje!

Kuiga Mtazamo Mzuri wa Kristo

17. (a) Danieli alionyesha mtazamo wa ujasiri chini ya hali gani? (b) Yesu alionyeshaje kwamba alikuwa mjasiri?

¹⁷ Watumishi wa Yehova hudumisha mtazamo mzuri. Adui za Danieli walipopanga njama ya kupitisha amri iliyokataza kuomba dua kwa mungu au mwanadamu yeyote ila kwa mfalme kwa siku 30, Danieli alijua kuwa amri hiyo iliingilia uhusiano wake na Yehova Mungu. Je, angeacha kusali kwa Mungu kwa siku 30? La, aliendelea kusali kwa Yehova kwa ujasiri mara tatu kwa siku, kama kawaida yake. (Danieli 6:6-17) Hali kadhalika Yesu alikataa kutishwa na adui zake. Siku moja ya Sabato alikutana na mtu aliyepooza mkono. Yesu alijua kwamba Wayahudi wengi waliokuwa hapo wangeudhika akimponya mtu siku ya Sabato. Akawaomba moja kwa moja watoe maoni yao kuhusu jambo hilo. Walipokataa, Yesu akamponya mtu huyo. (Marko 3:1-6) Yesu hakuogopa kamwe kutimiza utume wake alipoona inafaa kufanya hivyo.

18. Kwa nini watu fulani hutupinga, lakini tuitikieje mtazamo wao mbaya?

¹⁸ Leo, Mashahidi wa Yehova hutambua kuwa wao pia lazima wasikubali kutishwa na maitikio ya wapinzani yanayoweza kuwa mabaya. Wakitishika, hawatakuwa wanadhihirisha mtazamo wa akili wa Yesu. Watu wengi huwapinga Mashahidi wa Yehova, wengine kwa sababu hawaelewi mambo ya hakika kuhusu Mashahidi, wengine nao kwa sababu wanawachukia Mashahidi au ujumbe wao. Lakini tusiruhusu kamwe mtazamo wao wenye uhasama uathiri mtazamo wetu mzuri. Tusiwaruhusu kamwe wengine watawale njia yetu ya ibada.

19. Twaweza kudhihirishaje mtazamo wa akili kama ule wa Yesu Kristo?

¹⁹ Sikuzote Yesu alidhihirisha mtazamo mzuri wa akili kwa wafuasi wake na kwa mipango ya Mungu, haidhuru ilikuwa vigumu jinsi gani kufanya hivyo. (Mathayo 23:2, 3) Tuige kielelezo chake. Ni kweli kwamba sisi, hali kadhalika ndugu zetu, hatujakamilika. Ni wapi tuwezako kupata waandamani bora na rafiki waaminifu kwelikweli isipokuwa katika udugu wetu wa ulimwenguni kote? Yehova bado hajatupa uelewevu kamili wa Neno lake lililoandikwa, lakini je, kuna kikundi kingine chochote cha kidini kinacholielewa zaidi kuliko sisi? Acheni sikuzote tuwe na mtazamo wa akili unaofaa, mtazamo wa akili aliokuwa nao Yesu Kristo. Kati ya mambo mengine, huo hutia ndani kujua jinsi ya kumngojea Yehova, kama tutakavyoona katika makala ifuatayo.

[Maelezo ya Chini]

Unaweza Kueleza?

• Maisha yetu huathiriwaje na mtazamo wetu?

• Fafanua mtazamo wa akili wa Yesu Kristo.

• Twaweza kujifunza nini kutokana na mtazamo wa Ayubu?

• Ni mtazamo gani unaofaa kuwa nao wakati wa upinzani?

[Picha katika ukurasa wa 7]

Mkristo mwenye mtazamo unaofaa hujitolea kuwasaidia wengine

[Picha katika ukurasa wa 9]

Kujifunza Neno la Mungu kwa bidii hutusaidia kuiga mtazamo wa akili wa Kristo