Maswali Kutoka kwa Wasomaji

■ Musa aliwaambia Waisraeli kwamba “mambo yaliyofunuliwa ni yetu sisi na wana wetu mpaka wakati usiojulikana.” (Kumbukumbu 29:29, NW) Je! hayo“mambo yaliyofunuliwa”yamekuja kutia ndani ile nuru ambayo imetolewa juu ya Neno la Mungu katika hizi siku za mwisho?

La, haingekuwa sahihi kuweka ule ufahamu wa unabii mbalimbali ambao tumepewa katika wakati wa hizi siku za mwisho katika kiwango kile kile kama “mambo yaliyofunuliwa” ambayo Musa alikuwa akisema juu yayo.

Kulingana na habari inayozunguka maneno ya Musa, “mambo yaliyofunuliwa” ambayo yeye alikuwa akizungumza yalihusiana na agano la Torati. (Kumbukumbu 29:25) Musa alionyesha kwamba hayo “mambo yaliyofunuliwa” yalikuwa na madaraka. Kushindwa kutimiza madaraka hayo kungemfanya Yehova awape nidhamu watu wake.

Agano la Torati, bila shaka, lilikuwa ufunuo kutoka kwa Yehova Mungu. Lilitanguliwa na mafunuo mengine waliyopewa wazee wa ukoo, Noa, na kurudi nyuma mpaka kwa Adamu. Musa alitumiwa kuandika mambo hayo yaliyofunuliwa kufikia wakati wake, nayo yamehifadhiwa kwa ajili yetu katika vile vitabu vitano vya kwanza vya Biblia. Baadaye, kama makala “Mambo Yaliyofunuliwa Ni Yetu Sisi” (Mnara wa Mlinzi, Mei 15, 1986) ilivyoeleza, hayo “mambo yaliyofunuliwa” yalikuja kutia ndani habari yote iliyoandikwa katika Biblia.​—2 Timotheo 3:16.

Hivyo, Biblia ina “matangazo matakatifu ya Mungu,” yale mambo yaliyofunuliwa naye. (Warumi 3:2, NW) Wayahudi wa asili walipothibitika kuwa wasioaminika, Wakristo waliopakwa mafuta wakawa watumishi-wa-nyumbani wa hayo “mambo yaliyofunuliwa” na kundi la Kikristo likawa “nguzo na tegemezo” layo. (1 Wakorintho 4:1, 1 Timotheo 3:15, NW) Kwa hiyo, washiriki wa kundi hilo leo wanaweza kwa kufaa kukubaliana na maneno ya Musa, kwamba “mambo yaliyofunuliwa ni yetu sisi.”

Leo, Yehova ametoa mwangaza mwingi juu ya hayo “mambo yaliyofunuliwa.” Kama alivyotabiri Danieli, watu wa Yehova ‘wameenda huku na huku’ katika Neno lililoongozwa kwa roho, na ‘maarifa ya kweli yamekuwa mengi.’ (Danieli 12.4, NW) Hivyo, sisi sasa twajua utambulisho wa wale “kondoo wengine.” (Yohana 10:16) Sisi tunatambua ule “mkutano mkubwa.” (Ufunuo 7:9-17) Sisi tunaona utimizo wa ule mfano wa kondoo na mbuzi. (Mathayo 25:31-46) Na kadhalika. Mambo haya yamefunuliwa, au kujulishwa, kwetu sisi lakini si katika maana ile ya “mambo yaliyofunuliwa” kama yalivyoandikwa katika Neno la Yehova lililoongozwa kwa roho.

Kwa hiyo, haingekuwa sahihi kuweka maendeleo kama hayo katika ufahamu katika kiwango kile kile na mafunuo yaliyoongozwa kwa roho yanayofanyiza “mambo yaliyofunuliwa” yaliyoondikwa katika Biblia. Badala yake, kupitia funzo la bidii la Biblia, watu wa Yehova wametafuta kwa sala ufahamu sahihi wa hayo “mambo yaliyofunuliwa.” Yehova, kupitia roho yake takatifu, ametoa ufahamu huo katika wakati wake mwenyewe.

Biblia inatuambia kwamba “kijia cha waadilifu ni kama nuru nyangavu inayoendelea kunururika zaidi na kunururika zaidi mpaka ile siku ipate kuthibitishwa kwa imara.” (Mithali 4:18, NW) Nuru inayoongezeka ambayo Yehova ametoa juu ya ‘mambo yaliyofunuliwa” huonyesha kwamba “siku” hiyo inakaribia, pamoja na kuthibitisha kwamba baraka yake iko juu ya kundi la Kikristo leo.