Sababu Ibada ya Kikristo Ni ya Ubora wa Juu Zaidi

Mambo Makuu Kutoka Barua kwa Waebrania

YEHOVA MUNGU alitanguliza sehemu za ibada za ubora wa juu zaidi alipomtuma Mwana wake, Yesu Kristo, duniani. Ilikuwa hivyo kwa sababu Yesu, Mwanzishi wa Ukristo, ana ubora wa juu zaidi kuliko malaika na nabii Musa. Ukuhani wa Kristo ni wa ubora wa juu zaidi unapolinganishwa na ule wa Walawi katika Israeli wa kale. Na dhabihu ya Yesu ni ya ubora wa juu kuliko ya wanyama waliotolewa chini ya Sheria ya Kimusa.

Mambo hayo yanaelezwa wazi katika barua kwa Waebrania. Yaonekana iliandikwa na mtume Paulo katika Roma 61 W.K. hivi na kupelekwa kwa waamini Waebrania katika Yudea. Tangu nyakati za mapema, Wakristo Wagiriki na Waesia walishikilia kwamba Paulo ndiye alikuwa mwandikaji, na hilo laungwa mkono na uzoevu wenye kufahamu Maandiko ya Kiebrania wa mwandikaji na pia utumizi wake wa kukuza mawazo kwa mpangilio mzuri, ambayo ni mambo yaliyo asili ya mtume. Huenda ikawa aliacha jina lake kwa sababu ya ubaguzi wa Kiyahudi dhidi yake na kwa sababu alijulikana kama “mtume wa watu wa Mataifa.” (Warumi 11:13) Sasa acha tuangalie kwa ukaribu zaidi sehemu za ubora wa juu zaidi za Ukristo, kama zilivyofunuliwa na Paulo katika barua yake kwa Waebrania.

Kristo Ana Ubora wa Juu Zaidi Kuliko Malaika na Musa

Kinachoonyeshwa kwanza ni cheo cha ubora wa juu zaidi cha Mwana wa Mungu. (1:1–3:6) Malaika wanamwinamia kwa heshima, na utawala wake wa kifalme unategemezwa na Mungu. Kwa hiyo tunapaswa kuyaangalia zaidi kuliko kawaida yale yaliyonenwa na Mwana. Tena, tunapaswa kukumbuka kwamba hata kama binadamu Yesu alikuwa chini kuliko malaika, alikwezwa juu yao na kupewa mamlaka juu ya dunia yenye kukaliwa itakayokuja.

Yesu Kristo yuko na ubora wa juu zaidi kuliko Musa pia. Jinsi gani? Musa alikuwa mtumishi tu katika nyumba ya Mungu ya Kiisraeli. Hata hivyo, Yehova alimweka Yesu juu ya nyumba hiyo nzima, au kundi la watu wa Mungu.

Wakristo Waingia Pumziko la Mungu

Baada ya hapo mtume aonyesha kwamba inawezekana kuingia ndani ya pumziko la Mungu. (3:7–4:13) Waisraeli waliowekwa huru kutoka fungo la Kimisri walishindwa kuingia ndani ya pumziko hilo kwa sababu walikuwa wasiotii na walikosa imani. Lakini sisi tunaweza kuingia ndani ya pumziko hilo ikiwa tunazoea imani katika Mungu na kumfuata Kristo kwa utii. Halafu, badala ya kuadhimisha Sabato ya kila juma tu, kila siku tutaonea shangwe baraka ya ubora wa juu zaidi ya kuwa na pumziko kutoka kazi zote za ubinafsi.

Mwingio ndani ya pumziko la Mungu ni ahadi moja ya neno lake, ambalo “lina ukali kuliko upanga uwao wote ukatao kuwili, tena lachoma hata kuzigawanya nafsi na roho.” Linafanya hivyo linapopenya ili kutambua vichocheo na mielekeo, kutofautisha baina ya tamaa za kimnofu na mwelekeo wa akili. (Linganisha Warumi 7:25.) Ikiwa “nafsi” yetu, au maisha yetu tukiwa mmoja mmoja, inaunganishwa pamoja na “roho” au mwelekeo wa kimungu, tunaweza kuingia ndani ya pumziko la Mungu.

Ukuhani na Agano za Ubora wa Juu Zaidi

Baada ya hapo Paulo aonyesha ukuu wa ukuhani wa Kristo na wa agano jipya. (4:14–10:31) Yesu Kristo asiye na dhambi ana huruma kwa ajili ya binadamu wenye dhambi kwa sababu, kama sisi, amejaribiwa katika yote. Tena, Mungu amemweka “kuhani milele kwa mfano wa Melkizedeki.” Tofauti na makuhani wa juu wa Kilawi, Yesu anamiliki maisha yasiyoweza kuharibiwa na kwa hiyo hahitaji waandamizi katika kazi yake ya kuokoa. Yeye hahitaji kutoa dhabihu za wanyama, kwa sababu ametoa mwili wake usio na dhambi ulio na ubora wa juu zaidi na ameingia mbinguni pamoja na thamani ya damu yake.

Agano jipya, lililohalalishwa na damu ya Yesu, lina ubora wa juu kuliko agano la Sheria. Wale walio katika agano jipya wana sheria za Mungu katika mioyo yao na huonea shangwe msamaha wa dhambi. (Yeremia 31:31-34) Shukrani kwa ajili ya hayo huwasukuma kufanya tangazo la peupe la tumaini lao na kukusanyika pamoja na waamini wenzi. Tofauti na wao, watenda dhambi makusudi hawana tena dhabihu kwa ajili ya dhambi.

Imani ni ya Maana Sana!

Ili kufaidika kutoka kwa agano jipya lililo na ubora wa juu zaidi, tunahitaji imani. (10:32–12:29) Uvumilivu unahitajiwa pia ikiwa tutapokea yale ambayo Mungu ameahidi. Likiwa kitia moyo kuvumilia, tunalo “wingu kubwa” la mashahidi wa kabla ya Ukristo linalotuzunguka. Hata hivyo, tunapaswa hasa kufikiria kwa ukaribu mwendo wa Yesu usio na waa chini ya kuteseka. Kuteseka kokote kunakokubaliwa na Mungu kutupate kunaweza kuonwa kuwa nidhamu inayoweza kutokeza tunda la amani la uadilifu. Utegemeo wa ahadi za Mungu wapasa kuongeza tamaa yetu ya kumtolea huduma takatifu “pamoja na unyenyekevu na kicho.”

Paulo amalizia kwa mahimizo. (13:1-25) Imani yapasa kutusukuma kuonyesha upendo wa kidugu, kuwa wakaribishaji wageni, kukumbuka waamini wenzi wanaoteseka, kushikilia ndoa kwa heshima, na kuwa ‘radhi na vitu tulivyo navyo.’ Tunapaswa kuiga imani ya wale wanaoongoza kundini na twapaswa kuwatii. Tena, ni lazima tuepuke uasi-imani, tuchukue shutumu alilochukua Yesu, ‘kumpa Mungu dhabihu ya sifa daima,’ na kuendelea kutenda mema. Mwenendo kama huo pia ni miongoni mwa sehemu zilizo na ubora wa juu zaidi za Ukristo wa kweli.

[Sanduku/Picha katika ukurasa wa 24]

Mabatizo Mbalimbali: Sehemu za ibada kwenye tabenakulo ya Israeli zilishughulika na “vyakula na vinywaji na kutawadha kwingine kwingine [ubatizo wa namna mbalimbali, NW].” (Waebrania 9:9, 10) Mabatizo haya yalikuwa miosho ya kawaida za dini iliyotakwa na Sheria ya Kimusa. Vyombo vilivyochafuliwa vilioshwa, na usafishaji wa kisherehe ulitia ndani mtu kufua nguo zake na kuoga. (Walawi 11:32; 14:8, 9; 15:5) Makuhani walioga, na vitu vilivyohusu matoleo ya kuteketeza vilisuzwa majini. (Kutoka 29:4; 30:17-21; Walawi 1:13; 2 Nyakati 4:6) Lakini yale “mabatizo mbalimbali” hayakutia ndani kule “kuosha [kubatiza, NW] vikombe, na midumu, na vyombo vya shaba” kwa kawaida za kidini kulikozoewa na Wayahudi fulani wakati Mesiya alipowasili; wala Waebrania 9:10 hairejezei ubatizo wa kuzamishwa uliofanywa na Yohana Mbatizaji au ubatizo wa wale wanaoonyesha mfano wa nje wa wakfu wao kwa Mungu wakiwa Wakristo.—Mathayo 28:19, 20; Marko 7:4; Luka 3:3.