Je! Wakati Ujao Wako Unaamuliwa na Ajali?

KAMA ungaliokoka aksidenti ya kifo, je, ungehisi kwamba ulikuwa umependelewa na ajali? Au badala ya hivyo ungeshukuru kwamba ulikuwa mahali pafaapo kwa wakati ufaao?

Mtu mwenye hekima Sulemani alisema hivi: “Nikarudi na kuona chini ya jua, ya kwamba si wenye mbio washindao katika michezo, wala si walio hodari washindao vitani, wala si wenye hekima wapatao chakula, wala si watu wa ufahamu wapatao mali, wala wenye ustadi wapatao upendeleo; lakini wakati na bahati [tukio lisilotazamiwa, NW] huwapata wote.” (Mhubiri 9:11) Mambo yasiyotazamiwa hutukia mara nyingi kama nini! Mshindani wa michezo anayetazamiwa kushinda aumia, na yule asiye na uwezo mwingi ashinda. Aksidenti ya ghafula isiyoelezeka yaleta uharibifu wa kifedha kwa mfanya biashara mwenye kufuatia haki, ikiwezesha mshindani wake asiyefuatia haki awe tajiri. Lakini je, Sulemani alihesabia ajali mambo hayo yasiyo ya kawaida? Sivyo hata kidogo. Hayo ni matokeo tu ya “wakati na tukio lisilotazamiwa.”

Yesu Kristo alionyesha jambo hilo hilo. Akirejezea tukio ambalo kwa wazi lilikuwa habari iliyojulikana sana miongoni mwa wasikilizaji wake, Yesu aliuliza hivi: “Wale kumi na wanane, walioangukiwa na mnara huko Siloamu, ukawaua, mwadhani ya kwamba wao walikuwa wakosaji kuliko watu wote waliokaa Yerusalemu?” (Luka 13:4) Yesu hakulaumu ajali fulani ya kifumbo au mapenzi ya Mungu kuwa sababu ya vifo hivyo, wala hakuamini kwamba kwa njia fulani wajeruhiwa hao ndio waliokuwa wenye hatia zaidi ya wengine. Aksidenti hiyo yenye kuhuzunisha ilikuwa mfano mwingine tu wa utendaji wa wakati na tukio lisilotazamiwa.

Hakuna mahali popote ambapo Biblia inaunga mkono wazo kwamba Mungu ameamua kimbele wakati wa kifo chetu. Ni kweli kwamba Mhubiri 3:1, 2 husema hivi: “Kwa kila jambo kuna majira yake, na wakati kwa kila kusudi chini ya mbingu. Wakati wa kuzaliwa, na wakati wa kufa; wakati wa kupanda, na wakati wa kung’oa yaliyopandwa.” Hata hivyo Sulemani alikuwa akizungumzia tu hali yenye kuendelea ya maisha na kifo inayoipata ainabinadamu isiyokamilika. Tunazaliwa, na wakati unapofika, wakati urefu wa kawaida wa maisha unapofikiwa—kwa kawaida baada ya miaka 70 au 80 hivi—tunakufa. Hata hivyo, wakati hususa wa kifo haukuamuliwa kimbele na Mungu kama vile wakati ambao mkulima huamua “kupanda” au “kung’oa” usivyoamuliwa kimbele.

Kwa kweli, Sulemani aonyesha baadaye kwamba mtu huenda akafa mapema isivyofaa, akisema hivi: “Usiwe mwovu kupita kiasi; wala usiwe mpumbavu; kwani ufe kabla ya wakati wako?” (Mhubiri 7:17) Shauri hilo lingekuwa na umaana gani ikiwa wakati wa kifo cha mtu ungekuwa umeamuliwa thabiti kimbele? Hivyo Biblia yakataa wazo la ajali. Waisraeli waasi-imani waliofuata wazo hilo la kipagani walilaumiwa vikali na Mungu. Isaya 65:11 husema hivi: “Ninyi mmwachao BWANA [Yehova, NW], na kuusahau mlima wangu mtakatifu, na kuandika meza kwa ajili ya [mungu wa, NW] Bahati, na kuijazia [mungu wa, NW] Ajali vyombo vya divai iliyochanganyika.”

Ni jambo la upumbavu kama nini, basi, kuihesabia ajali au, hata vibaya zaidi, kumhesabia Mungu mwenyewe, aksidenti na misiba! “Mungu ni upendo,” husema Biblia, na kumlaumu kuwa ndiye mwanzishaji wa hali mbaya ya kibinadamu kunapingana moja kwa moja na ukweli huo wa msingi.—1 Yohana 4:8.

Makusudi ya Mungu kwa Wakati Ujao

Lakini, vipi matazamio yetu kwa ajili ya wokovu? Je, hakika ya kwamba hakuna ajali isiyoepukika inayoongoza maisha zetu inamaanisha kwamba ni lazima tupitie maisha bila kusudi? Sivyo hata kidogo, kwa kuwa Mungu ameamua wakati ujao wa ainabinadamu kwa ujumla. Biblia husema juu ya uumbaji wa “dunia mpya ambayo imejaa uadilifu.”—2 Petro 3:13, HNWW.

Ili kutimiza hilo, Mungu ataingilia mambo ya kibinadamu moja kwa moja. Huenda ikawa kwamba, bila kujua, wewe umesali ili hilo litukie kwa kurudia maneno ya sala inayosema hivi: “Ufalme wako uje, mapenzi yako yatimizwe hapa duniani kama huko mbinguni.” (Mathayo 6:9, 10) Ufalme huo ni serikali halisi iliyosimamishwa mbinguni. Kwa kusali ili uje, unasali ili Ufalme huo unyakue utawala wa dunia kutoka serikali za siku hizi.—Danieli 2:44.

Kufanya Wakati Ujao Wako Mwenyewe Uwe Salama

Jinsi matukio hayo yenye kutazamisha yatakavyoathiri wakati wako ujao inategemea, si ajali au hata wakati na tukio lisilotazamiwa, bali mwendo ambao wewe wachagua kufuata. Kumbuka msiba ule wa mnara wa Siloamu. Yesu alitumia tukio hilo lenye kuhuzunisha kufunza somo lenye maana. Waliouawa na anguko la mnara huo hawakuweza kuepuka lililowapata. Kwa upande mwingine, wasikilizaji wa Yesu wangeweza kuepuka uharibifu uliotokana na ghadhabu ya kimungu. Yesu aliwaonya hivi: “Msipotubu, ninyi nyote mtaangamia vivyo hivyo.” (Luka 13:4, 5) Kwa wazi, wangeweza kuchagua wakati ujao wao wenyewe.

Nafasi iyo hiyo yatolewa kwetu leo—tujifanyie wokovu wetu wenyewe. (Wafilipi 2:12) Mungu hutaka kwamba “watu wote . . . wapate kuujua [maarifa sahihi ya, NW] ukweli.” (1 Timotheo 2:4, HNWW) Na ingawa kila mmoja wetu huathiriwa kwa kadiri fulani na urithi na malezi, Mungu ametupa hiari ya kuchagua—uwezo wa kuamua jinsi tunavyotaka kutumia maisha yetu. (Mathayo 7:13, 14) Twaweza kufanya mambo mazuri au mabaya. Twaweza kupata msimamo wenye kupendeleka pamoja na Yehova Mungu na kupata uhai, au twaweza kumgeuzia visogo vyetu na kufa.

Wengi huchagua kuishi bila kumtegemea Mungu. Wao hutoa maisha yao kwa ufuatiaji wa vitu vya kimwili, anasa, au umaarufu. Lakini Yesu alionya hivi: “Angalieni, jilindeni na choyo, maana uzima wa mtu haumo katika wingi wa vitu vyake alivyo navyo.” (Luka 12:15) Basi, maisha zetu hutegemea nini? Kwenye 1 Yohana 2:15-17, Biblia hueleza hivi: “Msiipende dunia, wala mambo yaliyomo katika dunia. . . . Kila kilichomo duniani, yaani, tamaa ya mwili, na tamaa ya macho, na kiburi cha uzima, havitokani na Baba, bali vyatokana na dunia. Na dunia inapita, pamoja na tamaa zake, bali yeye afanyaye mapenzi ya Mungu adumu hata milele.”

Kuchagua Uhai

Wawezaje kuwa na hakika kwamba kwa kweli unafanya mapenzi ya Mungu? Yesu alitangaza rasmi hivi: “Uzima wa milele ndio huu, Wakujue wewe, Mungu wa pekee wa kweli, na Yesu Kristo uliyemtuma.” (Yohana 17:3) Maarifa sahihi kutoka Biblia huandaa msingi wa imani. “Pasipo imani haiwezekani kumpendeza; kwa maana mtu amwendeaye Mungu lazima aamini kwamba yeye yuko, na kwamba huwapa thawabu wale wamtafutao.” (Waebrania 11:6) Maarifa ambayo unahitaji kutwaa yapatikana kwa urahisi. Mashahidi wa Yehova wamesaidia mamilioni kuyapata kupitia funzo la Biblia la kawaida.a

Ili kumpendeza Mungu, utalazimika ufanye mabadiliko fulani. Huenda ikawa kuna tabia fulani mbaya ambazo zapasa kuachwa au hata mazoea yasiyo ya kiadili ambayo ni lazima yakomeshwe. Usiache jitihada hiyo ya kufanya mabadiliko, kana kwamba huwezi kabisa kufanya mabadiliko. Wazo kwamba mambo hayawezi kubadilika ni wazo jingine lililotokana na fundisho bandia la imani ya kwamba kila mtu ameandikiwa ajali yake. Kwa msaada wa Yehova, mtu yeyote aweza ‘kugeuzwa kwa kufanya upya nia yake’ na kupata “utu mpya.” (Warumi 12:2; Waefeso 4:22-24) Jitihada zako za kumpendeza Mungu hazitakosa kuonwa. Yeye yuko tayari kubariki wale wafanyao mapenzi yake.

Ni kweli kwamba, kujifunza Biblia hakutatatua matatizo yako yote. Watumishi wa Mungu wa kweli hupatwa na aksidenti na hali mbaya sana, kama wengine tu. Hata hivyo, Mungu aweza kutupa hekima ya kukabiliana na msiba. (Yakobo 1:5) Pia kuna ile shangwe ya kujua kwamba mtu ana uhusiano mzuri pamoja na Mungu. “Kila amwaminiye BWANA [Yehova, NW] ana heri [ni mwenye furaha, NW],” yasema Mithali 16:20.

Katika Paradiso itakayorudishwa chini ya Ufalme wa Mungu, hatutahisi tena kutishwa na wakati na tukio lisilotazamiwa. Kwa kweli, Mungu ataondoa mambo yote ambayo kwa sasa huharibu furaha ya kibinadamu. “Atafuta kila chozi katika macho [yetu], wala mauti [kifo, NW] haitakuwapo tena; wala maombolezo, wala kilio, wala maumivu hayatakuwapo tena,” yaahidi Biblia. (Ufunuo 21:4) Wengi sana waliokufa kwa aksidenti watapata ufufuo.—Yohana 5:28, 29.

Je, wewe utaurithi wakati ujao huo mtukufu? Waisraeli walipokuwa karibu kuingia Bara Lililoahidiwa, Musa aliwaambia hivi: “Nimekuwekea mbele yako uzima na mauti, baraka na laana; basi chagua uzima, ili uwe hai, wewe na uzao wako; kumpenda BWANA [Yehova, NW], Mungu wako, kuitii sauti yake, na kushikamana naye; kwani hiyo ndiyo uzima wako, na wingi wa siku zako.”—Kumbukumbu la Torati 30:19, 20.

La, sisi si vibaraka hoi tu wanaoongozwa na ajali isiyo na rehema. Furaha yako ya wakati ujao, kwa kweli wakati ujao wako wa milele, unaongozwa na wewe. Twakuhimiza uchague uhai.

[Maelezo ya Chini]

[Blabu katika ukurasa wa 5]

Waisraeli waasi-imani waliofuata wazo la kipagani la ajali walilaumiwa vikali na Mungu