Maswali Kutoka kwa Wasomaji

◼ Kwa nini 29 W.K. inaonwa kuwa tarehe ya mhimili katika historia ya Biblia badala ya 14 W.K., mwanzo wa utawala wa Kaisari Tiberio, anayetajwa kwenye Luka 3:1?

Mwanzo wa utawala wa Tiberio hautajwi katika Biblia, lakini tukio la sehemu ya mwisho ya mwaka wa utawala wake wa 15 latajwa. Hilo linasaidia wanafunzi wa Biblia kuweka tukio hilo katika mwaka wa 29 W.K., ambao waweza kuonwa kuwa tarehe ya mhimili kulingana na Biblia.

Utawala wa maliki wa Roma wa pili, Kaisari Tiberio, unakubaliwa sana katika historia. The New Encycloædia Britannica yasema hivi: “Katika AD 14, Agosti 19, Augusto [maliki wa kwanza] alikufa. Tiberio, sasa akiwa mkuu zaidi, aliongoza Bunge kwa faida yake mwenyewe na hakulikubali limfanye maliki kwa karibu mwezi mmoja, lakini Septemba 17 akawa mwandamizi wa mtawala yule.”a

Tarehe hiyo iliyowekwa kuwa mwanzo wa utawala wa Tiberio inapatana na Biblia kwa sababu Luka 3:1-3 husema juu ya huduma ya Yohana Mbatizaji hivi: “Mwaka wa kumi na tano wa kutawala kwake Kaisari Tiberio, Pontio Pilato alipokuwa liwali wa Uyahudi, . . . neno la Mungu lilimfikia Yohana, mwana wa Zakaria, jangwani. Akafika nchi yote iliyo karibu na Yordani, akihubiri ubatizo wa toba liletalo ondoleo la dhambi.”

Yohana hakuanza kuhubiri na kubatiza wakati Tiberio alipofanywa maliki bali alianza “mwaka wa kumi na tano wa kutawala kwake Kaisari Tiberio.” Mwaka huo wa 15 ulianzia vuli ya 28 W.K. hadi vuli ya 29 W.K. Hata hivyo, kujua hilo hakumwezeshi mtu kuamua kwa usahihi wakati huduma ya Yohana ilipoanza katika mwaka huo au jinsi ya kuhesabu wakati wa matukio mengine yanayohusika.

Lakini Biblia inatupa habari muhimu ya ziada. Kwa mfano, unabii wa Danieli wa “majuma sabini” ulielekezea 29 W.K. kuwa mwaka wa kutokea kwa Mesiya. Ulionyesha pia kwamba huduma ya Yesu ingekuwa yenye urefu wa miaka mitatu na nusu. (Danieli 9:24-27) Ongeza kwa hayo mambo haya madogo madogo ya Kibiblia: Yesu alizaliwa miezi sita baada ya Yohana; Yesu alipobatizwa, “alikuwa amepata umri wake kama miaka thelathini”; na Yesu alikufa katika masika ya 33 W.K. (wakati wa Kupitwa), alipokuwa mwenye umri wa miaka 33 1/2.—Luka 1:24-38; 3:23; 22:14-16, 54.b

Kukiwa na habari sahihi ya Kibiblia ya jinsi hiyo, pamoja na tarehe ya kilimwengu ya utawala wa Tiberio, wanafunzi wa Biblia wanaweza kuhesabu kwamba huduma ya Yohana ilianza katika masika ya 29 W.K. na kwamba miezi sita baadaye, katika vuli ya 29 W.K., Yohana alimbatiza Yesu. Kwa hiyo, si 14 W.K. ionwayo kuwa tarehe ya mhimili kulingana na Biblia bali ni 29 W.K.

[Maelezo ya Chini]