Usikose Kusudi la Uhuru wa Kupewa na Mungu

“Ilipo roho ya Yehova, pana uhuru.”—2 WAKORINTHO 3:17, NW.

1. Ni kwa nini Isaya 65:13, 14 huwahusu Mashahidi wa Yehova?

YEHOVA ndiye Mungu wa uhuru. Na uhuru wa kupewa na Mungu ni baraka iliyoje! Kwa sababu watumishi wake waliojiweka wakfu wana uhuru wa jinsi hiyo, maneno haya ya Yehova Bwana Mwenye Enzi Kuu huwahusu: “Tazama, watumishi wangu watakula, bali ninyi mtaona njaa; tazama, watumishi wangu watakunywa bali ninyi mtaona kiu; tazama, watumishi wangu watafurahi, bali ninyi mtatahayarika; tazama, watumishi wangu wataimba kwa furaha ya moyo, bali ninyi mtalia kwa huzuni ya moyo; mtapiga kelele kwa sababu ya uchungu wa roho zenu.”—Isaya 65:13, 14.

2. Ni kwa nini watu wa Yehova wamefanikiwa kiroho?

² Watu wa Mungu huonea shangwe hali hiyo ya kufanikiwa kiroho kwa sababu wanaongozwa na roho au kani ya utendaji yake. Mtume Paulo alisema: “Yehova ndiye Roho; na ilipo roho ya Yehova, pana uhuru.” (2 Wakorintho 3:17, NW) Ni nini kusudi la uhuru wa kupewa na Mungu? Na ni nini linalotakwa kwetu ili tuutumie kikamili?

Uhuru Alio Nao Mungu

3. Mungu ana uhuru wa aina gani, na kwa nini?

³ Yehova peke yake ndiye aliye na uhuru usio na mipaka. Hakuna yeyote wa viumbe wake awezaye kuwekea uhuru Wake mipaka kwa sababu yeye ndiye Mungu Mweza Yote na Bwana Mwenye Enzi Kuu ya Ulimwengu Wote Mzima. Kama vile yule mwanamume mwaminifu Ayubu alivyosema, “ni nani awezaye kumzuia? Ni nani awezaye kumwuliza, Wafanya nini?” (Ayubu 9:12) Vivyo hivyo, mfalme wa Babuloni Nebukadreza alilazimika kukubali: “Hapana awezaye kuuzuia mkono wake [Mungu] wala kumwuliza, Unafanya nini wewe?”—Danieli 4:35.

4. Ikoje kwamba Yehova haruki mipaka katika kutumia uhuru wake?

⁴ Hata hivyo, kanuni za Yehova mwenyewe za uadilifu huzuia uhuru huo usio na kipimo usitumiwe kuruka mipaka. Hilo lilitolewa kielezi wakati Abrahamu alipoonyesha hangaiko juu ya wakaaji wa Sodoma kisha akauliza hivi: “Mhukumu wa ulimwengu wote asitende haki?” Itikio la Mungu huonyesha kwamba Yeye hutambua daraka lake la kufanya yaliyo sawa. Yeye asingaliharibu Sodoma ikiwa wakaaji waadilifu wowote wangekuwa wamebaki ndani yalo. (Mwanzo 18:22-33) Mungu pia hutumia uhuru wake bila kuruka mipaka kwa sababu upendo na hekima yake humfanya asiwe mwepesi wa hasira na yeye huzoea kujidhibiti.—Isaya 42:14.

Mipaka ya Uhuru wa Kibinadamu

5. Ni mambo gani yanayowekea uhuru wa kibinadamu mipaka?

⁵ Ingawa Yehova ana uhuru usio na mipaka, wote wengine hutenda ndani ya mipaka iliyowekwa na asili yao, uwezo wao mbalimbali, na mazingira ya makao yao, na pia na mambo kama vile urefu wa maisha uliopo wa wanadamu wenye dhambi. Mungu alimwumba mwanadamu akiwa na uhuru mkamilifu wa kutenda ndani ya mazingira ambayo Yehova alikuwa amemwekea. Kuna sababu nyingine kadhaa kwa nini uhuru wa kibinadamu ni wa kadiri, wenye mipaka.

6. Kumtolea Mungu hesabu kunahusuje uhuru wetu?

⁶ Kwanza, uhuru wa mwanadamu ni wa kadiri kwa sababu Mungu alimwumba mwanadamu atumikie kusudi Lake. Yehova ‘asta_-hili kuupokea utukufu na heshima na uweza kwa kuwa yeye ndiye aliyeviumba vitu vyote, na kwa sababu ya mapenzi yake vilikuwako, navyo vikaumbwa.’ (Ufunuo 4:11) Kwa hiyo binadamu anamtolea Mfanyi wake hesabu, ambaye kwa haki amefanya sheria ambazo kwazo wanadamu waweza kuongozwa. Katika Israeli ya kale chini ya Sheria ya Musa, Mungu alitaka kwamba watu mmoja mmoja wauawe ikiwa wangetukana jina lake au kuvunja sheria ya Sabato. (Kutoka 20:7; 31:14, 15; Mambo ya Walawi 24:13-16; Hesabu 15:32-36) Ingawa sisi tukiwa Wakristo hatuko chini ya Sheria hiyo, uhuru wetu ni wenye mipaka kwa sababu twamtolea hesabu Yehova, ambaye ndiye Hakimu, Mpaji-Sheria, na Mfalme wetu.—Isaya 33:22; Warumi 14:12.

7, 8. (a) Sheria za kimaumbile huwekeaje uhuru wa kibinadamu mipaka? (b) Ni sheria gani nyingine za Mungu zinazowekea uhuru wetu mipaka sisi wanadamu?

⁷ Pili, uhuru wa kibinadamu ni wenye mipaka kwa sababu ya sheria za kimaumbile za Mungu. Kwa mfano, kwa sababu ya ile sheria ya nguvu za uvutano, mtu hawezi kuruka kutoka jengo refu bila kujidhuru au kujiua mwenyewe. Kwa wazi, sheria za kimaumbile za Mungu huwekea mipaka uhuru wa mwanadamu kufanya mambo fulani.

⁸ Tatu, uhuru wa kibinadamu ni wenye mipaka kwa sababu ya sheria za maadili za Mungu. Yaelekea sana kwamba, umeona matokeo ya yale ambayo Paulo aliandika kwenye Wagalatia 6:7, 8: “Msidanganyike, Mungu hadhihakiwi; kwa kuwa cho chote apandacho mtu, ndicho atakachovuna. Maana yeye apandaye kwa mwili wake, katika mwili wake atavuna uharibifu; bali yeye apandaye kwa Roho, katika Roho atavuna uzima wa milele.” Pasipo shaka, sheria za maadili za Yehova Mungu pia huwekea uhuru wetu mipaka, lakini kuzitii kunatakiwa ili tupate uhai.

9. Kuwa kwetu sehemu ya jamii ya kibinadamu kunawekeaje uhuru wetu mipaka?

⁹ Nne, uhuru wa mwanadamu ni wenye mipaka kwa sababu yeye ni sehemu ya jamii ya kibinadamu. Kwa hiyo, yeye apaswa kuwa na uhuru kwa kadiri tu ambayo hauingilii ule wa wengine isivyo haki. Ni lazima Wakristo wajitiishe kwa “mamlaka iliyo kuu” ya kiserikali, wakizitii maadamu hazidai kwamba tuvunje sheria za Mungu. (Warumi 13:1; Matendo 5:29) Kwa mfano, twapaswa kutii sheria zinazohusu malipo ya kodi, mwendo ambao tunaendesha gari, na kadhalika. Jambo la kwamba ni lazima tutii sheria kama hizo za “Kaisari” huonyesha zaidi kwamba uhuru wetu wa kupewa na Mungu si kamili.—Marko 12:17; Warumi 13:7.

Kwa Nini Ni Uhuru wa Kadiri?

10, 11. Ni kwa nini Yehova aliwapa wanadamu uhuru wa kadiri?

¹⁰ Ni kwa nini Mungu aliwapa wanadamu uhuru wa kadiri? Sababu moja ilikuwa kwamba Muumba aweze kuwa na viumbe wenye akili duniani ambao wangemletea heshima na sifa kwa maneno na mwenendo wao mwema. Wanadamu waweza kufanya hivyo, lakini wanyama hawawezi. Wanyama wakiwa wanaongozwa na silika, hawajui lolote juu ya mwenendo wa kiadili. Wewe waweza kumzoeza mbwa asichukue kitu fulani, lakini huwezi kumfundisha ubaya wa kuiba. Mnyama akiwa kana kwamba vitendo vyake vimepangiwa tu ndani yake, hawezi kufanya maamuzi yanayomletea Mungu sifa na heshima, hali mwanadamu aweza kuchagua kwa hiari kumtumikia Mfanyi wake kwa ajili ya upendo na uthamini.

¹¹ Mungu pia huwapa wanadamu uhuru huo kwa ajili ya manufaa na furaha yao. Wanaweza kuzoea uhuru wao wa kadiri kwa kuwa wenye kubuni na kuvumbua, wakarimu na wenye kushirikiana. Wanadamu wana uhuru pia wa kuchagua katika mambo kama vile kazi na mahali pa kuishi. Leo, mambo ya kiuchumi na kisiasa mara nyingi huwekea uhuru huo wa kuchagua mipaka, lakini hilo huenda likawa kwa sababu ya pupa ya kibinadamu, si kwa sababu ya jinsi Mungu alivyoumba ainabinadamu mwanzoni.

12. Ni kwa nini walio wengi wa ainabinadamu wamo utumwani?

¹² Ingawa Yehova aliwapa wanadamu uhuru mkubwa, walio wengi leo wamo katika utumwa wenye kukatisha tamaa. Kulitukia nini? Wanadamu wawili wa kwanza, Adamu na Hawa, walikosa kusudi la uhuru wa kupewa na Mungu. Walipita mipaka ya kimungu ya uhuru wao na kupinga utawala wa Mungu wa haki juu yao akiwa Bwana Mwenye Enzi Kuu, Yehova. (Mwanzo 3:1-7; Yeremia 10:10; 50:31) Wakiwa hawatosheki kutumia uhuru wao kumheshimu Mungu, waliutumia kwa ubinafsi, wajiamulie yaliyo mema na yaliyo mabaya, hivyo wakiungana na Shetani katika uasi wake dhidi ya Yehova. Hata hivyo, badala ya kupata uhuru mwingi zaidi, Adamu na Hawa wenye dhambi walikuja kuwa chini ya vizuizi na utumwa wenye kujaribu, uhuru ulioendelea kuisha na hatimaye kifo. Wazao wao walirithi kupoteza huko kwa uhuru. “Kwa sababu wote wamefanya dhambi, na kupungukiwa na utukufu wa Mungu.” “Mshahara wa dhambi ni mauti.”—Warumi 3:23; 5:12; 6:23.

13. Ni kwa nini Shetani ameweza kufanya wanadamu wawe watumwa?

¹³ Kwa sababu ya ule uasi katika Edeni, Adamu na wazao wake pia waliingia katika utumwa wa Shetani Ibilisi. Kwani, “ulimwengu mzima uko katika uwezo wa yule mwovu”! (1 Yohana 5:19, NW) Ni kwa sababu ya nguvu na uwezo wake wa hali ya juu kwamba Shetani ameweza kudanganya na kuifanya ainabinadamu yote iliyotengwa na Mungu kuwa mtumwa. Isitoshe, wanadamu wenye ubinafsi wamewatawala wanadamu wenzao kwa hasara yao. (Mhubiri 8:9) Kwa hiyo, ainabinadamu kwa ujumla sasa imo katika utumwa wa dhambi na kifo, wa Shetani na roho waovu wake, na wa mifumo ya ulimwengu ya kisiasa, kiuchumi na kidini.

Uhuru wa Kweli Wafanywa Uwezekane

14. Tumaini la ainabinadamu la kupata uhuru wa kweli linafungamana na nini?

¹⁴ Kupata uhuru ili kutoka katika dhambi, kifo, na Ibilisi na ulimwengu wake kunafungamana na azimio la Mungu la kusuluhisha lile suala kuhusu haki yake ya kuwa mwenye enzi kuu ya ulimwengu wote mzima. Kwa sababu Shetani alitokeza suala hilo, Yehova alimruhusu aendelee kuwapo, sawa na vile alivyomkubali Farao kuendelea kwa muda fulani. Sababu ya hilo ni ili Yehova aweze kuonyesha kikamili nguvu yake na jina lake liweze kutangazwa duniani pote. (Kutoka 9:15, 16) Mungu karibuni atajitetea mwenyewe akiwa Bwana Mwenye Enzi Kuu ya Ulimwengu Wote Mzima na kulitukuza jina lake tukufu kwa kuondoa lile suto lililoletwa juu yalo kupitia uasi wa Shetani, Adamu, na Hawa. Hivyo, wale wanaomhofu Yehova wataawekwa huru na utumwa kwa dhambi na kifo na wataingizwa katika ulimwengu mpya wa uhuru wa kupewa na Mungu.—Warumi 8:19-23.

15. Yesu alikuwa na daraka gani katika urudishaji wa uhuru kwa ainabinadamu?

¹⁵ Ili kurudisha uhuru kwa aina ya kibinadamu, Mungu alimtuma Mwana wake duniani akiwa mwanadamu. Kwa kutoa uhai wake mkamilifu wa kibinadamu kwa hiari, Mwana wa Mungu, Yesu Kristo aliandaa dhabihu ya fidia, msingi wa kuweka ainabinadamu huru. (Mathayo 20:28) Yeye alipiga mbiu pia ujumbe wa uhuru. Mwanzoni mwa huduma yake, alitumia maneno haya kwake mwenyewe: “Roho ya Bwana MUNGU [Yehova, NW] i juu yangu; kwa sababu BWANA [Yehova, NW] amenitia mafuta niwahubiri wanyenyekevu habari njema; amenituma ili kuwaganga waliovunjika moyo, kuwatangazia mateka uhuru wao, na hao waliofungwa habari za kufunguliwa kwao.”—Isaya 61:1; Luka 4:16-21.

16. Wayahudi wa karne ya kwanza walipaswa kuchukua hatua zipi ili kupata uhuru wa kweli?

¹⁶ Watu wangeupataje uhuru huo? Yesu alisema hivi: “Ninyi mkikaa katika neno langu, mmekuwa wanafunzi wangu kweli kweli; tena mtaifahamu kweli, nayo hiyo kweli itawaweka huru.” Kwa hiyo, wafuasi wa Yesu wamepata kuuonea shangwe uhuru wa kiroho. (Yohana 8:31, 32, 36) Zaidi ya hayo, Yesu alimwambia gavana Mroma Pontio Pilato: “Mimi nimezaliwa kwa ajili ya haya, na kwa ajili ya haya mimi nalikuja ulimwenguni, ili niishuhudie kweli. Kila aliye wa hiyo kweli hunisikia sauti yangu.” (Yohana 18:37) Wayahudi waliokubali kweli kama ilivyohubiriwa na kutolewa mfano mzuri na Yesu walitubu dhambi zao, wakarekebisha mwendo wao wa kukosea, wakajitoa wenyewe kwa Yehova, na kubatizwa kama vile Yesu alivyokuwa amebatizwa. (Mathayo 3:13-17; Matendo 3:19) Katika njia hiyo walipata kuonea shangwe uhuru wa kupewa na Mungu wa kadiri.

17. Ni kwa nini Yehova huwapa watumishi wake uhuru?

¹⁷ Yehova huwapa watumishi wake waaminifu uhuru hasa katika kutetea enzi kuu yake mwenyewe na pia kwa ajili ya faraja au manufaa yao. Aliwaweka Waisraeli huru na utumwa wa Kimisri ili waweze kumtukuza wakiwa ufalme wa makuhani, mashahidi wake. (Kutoka 19:5, 6; Isaya 43:10-12) Vivyo hivyo, Yehova aliwatoa watu wake katika uhamisho wa Kibabuloni hasa ili kujenga upya hekalu lake na kurudisha ibada ya kweli. (Ezra 1:2-4) Wahamishwa hao walipojishughulisha tu na starehe zao wenyewe za vitu vya kimwili, Yehova aliwatuma manabii wake Hagai na Zekaria kuwajulisha wajibu wao mbele za Mungu. Kwa kuuona uhuru wao uliopewa na Mungu kwa njia inayofaa, kuliwasaidia kukamilisha hekalu, kwa utukufu wa Mungu, na pia kwa faraja na hali njema ya watu wake.

Kutokosa Kusudi la Uhuru wa Kupewa na Mungu

18. Ni kwa nini yaweza kusemwa kwamba watumishi wa Yehova wa ki-siku-hizi hawajakosa kusudi la uhuru wao wa kupewa na Mungu?

¹⁸ Vipi juu ya watumishi wa Mungu wa ki-siku-hizi? Wakiwa tengenezo, hawajakosa kusudi la uhuru wao wa kupewa na Mungu. Katika miaka ya 1870 walianza kuwa huru na makosa ya Kibabuloni na kuonea shangwe uhuru wa Kikristo ulioongezeka. Hilo lilipatana na Mithali 4:18, ambayo husema hivi: “Njia ya wenye haki ni kama nuru ing’aayo, ikizidi kung’aa hata mchana mkamilifu.” Hata hivyo, kama vile watu wa Mungu wa kale walivyoingizwa katika utumwa wa Kibabuloni kwa muda fulani, katika 1918 watumishi wa Yehova walipata kuingia katika kadiri fulani ya utumwa wa Babuloni Mkubwa. (Ufunuo 17:1, 2, 5) Washiriki wa milki hiyo ya ulimwengu ya dini bandia walishangilia wakati wale ‘mashahidi wawili’ wa ufananisho walipokuwa wamelala wakiwa wamekufa kiroho. Lakini kwa fadhili za Mungu zisizostahiliwa, katika 1919 watumishi wake wapakwa-mafuta walihuishwa, wakiwa wamewekwa huru kiroho. (Ufunuo 11:3, 7-11) Wakitumia uhuru wao wa kupewa na Mungu, walikuja kuwa mashahidi wenye bidii wa yule Aliye Juu Zaidi. Kwa hiyo, ilifaa kama nini kwamba, katika 1931, walikubali kwa shangwe lile jina Mashahidi wa Yehova! (Isaya 43:10-12) Hasa tangu 1935 “mkutano mkubwa,” wanaotumaini kupata uhai wa milele duniani, wamejiunga na Mashahidi wapakwa-mafuta. Wao pia hawakosi kusudi la uhuru wao wa kupewa na Mungu.—Ufunuo 7:9-17.

19, 20. (a) Ni njia gani moja yenye kutokeza ambayo katika hiyo watu wa Yehova hutumia vizuri uhuru wao wa kupewa na Mungu? (b) Ni katika njia gani nyingine yenye kutokeza ambayo Mashahidi wa Yehova hutumia vizuri uhuru ambao Yehova amewapa?

¹⁹ Watu wa Yehova wanatumia uhuru wao wa kupewa na Mungu vizuri sana katika njia mbili zenye kutokeza hasa. Kwanza, wanautumia ili kufuatia mwendo wa unyofu. (1 Petro 2:16) Nao wana sifa njema kama nini! Kwa mfano, mwanamume mmoja aliingia Jumba la Ufalme wakati mmoja katika Zurich, Uswisi, na kusema kwamba alitaka kuwa mmoja wa Mashahidi wa Yehova. Alipoulizwa kwa nini, alisema kwamba dada yake alikuwa Shahidi na alikuwa ametengwa na ushirika kwa sababu ya ukosefu wa adili. Alisema hivi: ‘Hilo ndilo tengenezo ninalotaka kujiunga nalo—ambalo halivumilii mwenendo mbaya.’ Ni kwa sababu nzuri kwamba New Catholic Encyclopedia imeonelea kuwa Mashahidi wa Yehova wamepata sifa ya kuwa “kimojapo vikundi vyenye mwenendo bora zaidi ulimwenguni.”

²⁰ Mashahidi wa Yehova hutumia pia uhuru wao wa kupewa na Mungu kwa kutimiza utume wao wa kuhubiri habari njema za Ufalme, kama vile Yesu alivyofanya. (Mathayo 4:17) Kupitia neno la kinywa na kurasa zilizochapwa, kwa njia rasmi na isiyo rasmi, wao wanatangaza Ufalme wa Mungu. Kwa kufanya hivyo wanajinufaisha wenyewe sana kwa kuimarisha imani yao na kuangaza tumaini lao hata zaidi. Isitoshe, utendaji huo watumikia kuokoa wao na wale wawasikiao pia. (1 Timotheo 4:16) Kwa habari ya utendaji huo, kitabu Dynamic Religious Movements husema: “Ingekuwa vigumu kupata washiriki wa kikundi kingine chochote ambao hufanya kazi kwa bidii kuhusu dini yao kama wafanyavyo Mashahidi.”

21. Kuna ushuhuda gani kwamba Yehova anabariki huduma ya watu wake?

²¹ Yehova anatubariki kama nini katika kutimiza kusudi la uhuru wetu wa kupewa na Mungu! Hilo laweza kuonwa kutokana na ripoti ya utumishi wa shambani ya mwaka jana—kilele cha wahubiri wa Ufalme zaidi ya milioni nne, kukiwa na zaidi ya milioni kumi wakihudhuria Ukumbusho wa kifo cha Yesu. Katika uchunguzi mmoja, Ailandi ilikuwa na vilele 29 mfululizo vya wahubiri vya kila mwezi; Meksiko ilikuwa na vilele 78 katika miezi 80; na Japani ilikuwa na vilele 153 mfululizo!

Tumia Vizuri Uhuru Wako wa Kupewa na Mungu

22. Ni nini maana halisi ya baadhi ya maswali yenye kuchochea fikira ambayo twaweza kujiuliza wenyewe?

²² Ikiwa wewe ni mmoja wa Mashahidi wa Yehova aliyejiweka wakfu, je, unatumia vizuri ule uhuru ambao Mungu amekupa? Kila mmoja wetu aweza kujiuliza mwenyewe: ‘Je! mimi ni mwangalifu kutumia uhuru wangu niliopewa na Mungu ili kuepuka kukwaza yeyote kwa mwenendo mbaya? Je! mimi ninatii kwa kudhamiria sheria za Kaisari, lakini nikiweka sheria ya Mungu kwanza? Je! mimi hushirikiana kikamili na wazee katika kundi? Zaidi ya hilo, Je! mimi hutumia kikamili uhuru wangu wa kupewa na Mungu katika kuhubiri habari njema? Je! sikuzote mimi huwa na “mengi ya kufanya katika kazi ya Bwana”? Je! mimi ninafuatia kwa bidii kazi ya maisha ya kimwili hali ningekuwa nikitu_-mia vizuri zaidi uhuru wangu wa kupewa na Mungu kwa kupanua huduma yangu, nikifikilia daraka kubwa zaidi kundini, au katika utumishi wa wakati wote?’—1 Wakorintho 15:58, NW.

23. Twapaswa kufanya nini ili tusikose kusudi la uhuru wetu wa kupewa na Mungu?

²³ Sisi sote na ‘tuonje tuone ya kuwa Yehova yu mwema.’ (Zaburi 34:8) Acheni tumtumaini, tufuate sheria zake, na kutukuza jina lake takatifu kwa kutangaza kwa bidii Ufalme wake. Kumbuka kwamba wale ‘wapandao kwa ukarimu watavuna kwa ukarimu.’ (2 Wakorintho 9:6) Kwa hiyo, acheni tumtolee Yehova utumishi wa moyo wote na kuonyesha kwamba hatujakosa kusudi la uhuru wetu wa kupewa na Mungu.

Ungejibuje?

◻ Mungu ana uhuru wa aina gani?

◻ Uhuru wa kibinadamu una mipaka gani?

◻ Uhuru wa kweli ulifanywa uwezekane kwa jinsi gani?

◻ Ni lazima tufanye nini ili kuepuka kukosa kusudi la uhuru wa kupewa na Mungu?

[Picha katika ukurasa wa 9]

Uhuru wa kibinadmu unawekewa mipaka na mambo kama vile sheria ya nguvu za uvutano