‘Leteni Sehemu ya Kumi Yote Ghalani’

“Mkanijaribu kwa njia hiyo, . . . kama sitawafungulia madirisha ya mbinguni.”—MALAKI 3:10.

1. (a) Katika karne ya tano K.W.K., Yehova aliwatolea watu wake mwaliko gani? (b) Katika karne ya kwanza W.K., tokeo lilikuwa nini la kuja kwa Yehova kwenye hekalu kwa ajili ya hukumu?

KATIKA karne ya tano K.W.K., Waisraeli walikuwa wamekosa uaminifu kwa Yehova. Walikuwa wamezuia sehemu ya kumi na walileta wanyama wasiofaa kwenye hekalu wakiwa matoleo. Hata hivyo, Yehova aliwaahidi kwamba ikiwa wangeleta sehemu ya kumi nzima ghalani, yeye angemwaga baraka mpaka kuwe hakuna upungukio zaidi. (Malaki 3:8-10) Miaka 500 hivi baadaye, Yehova, akiwakilishwa na Yesu akiwa mjumbe Wake wa agano, alikuja kwenye hekalu la Yerusalemu kwa ajili ya hukumu. (Malaki 3:1) Israeli likiwa taifa lilipatikana kupungukiwa, lakini wale watu mmoja mmoja waliomrudia Yehova walibarikiwa sana. (Malaki 3:7) Walipakwa mafuta kuwa wana wa kiroho wa Yehova, uumbaji mpya, “Israeli wa Mungu.”—Wagalatia 6:16; Warumi 3:25, 26.

2. Malaki 3:1-10 lingekuwa na utimizo wa pili wakati gani, nasi tunaalikwa kufanya nini kuhusiana na hilo?

² Karibu miaka 1,900 baada ya hayo, katika 1914, Yesu alitawazwa kuwa Mfalme wa Ufalme wa kimbingu wa Mungu, na maneno ya Malaki 3:1-10 yenye kupuliziwa kimungu yakawa karibu kupata utimizo wa pili. Kuhusiana na tukio hilo lenye kusisimua, Wakristo wa leo wanaalikwa waleta sehemu ya kumi nzima ghalani. Tukifanya hivyo, sisi pia tutafurahia baraka mpaka kuwe hakuna upungukio zaidi.

3. Ni nani aliyekuwa mjumbe aliyetayarisha njia mbele za Yehova (a) katika karne ya kwanza? (b) kabla ya vita ya ulimwengu ya kwanza?

³ Kuhusu kuja kwake kwenye hekalu, Yehova alisema hivi: “Angalieni, namtuma mjumbe wangu, naye ataitengeneza njia mbele yangu.” (Malaki 3:1) Ukiwa utumizo wa karne ya kwanza wa hilo, Yohana Mbatizaji alikuja Israeli akihubiri toba ya dhambi. (Marko 1:2, 3) Je! kulikuwako kazi ya utayarisho kwa habari ya kuja kwa pili kwa Yehova kwenye hekalu lake? Ndiyo. Katika ile miongo kabla ya vita ya ulimwengu ya kwanza, Wanafunzi wa Biblia walitokea kwenye mandhari ya ulimwengu wakifundisha mafundisho safi ya Biblia na kufunua uwongo mbalimbali wenye kutomheshimu Mungu, kama vile mafundisho ya Utatu na moto wa helo. Walionya pia juu ya kuja kwa Nyakati za Wasio Wayahudi katika 1914. Wengi waliitikia wachukuaji nuru hao wa ukweli.—Zaburi 43:3; Mathayo 5:14, 16.

4. Ni swali gani lililohitaji kujibiwa katika siku ya Bwana?

⁴ Mwaka 1914 ulianza kile ambacho Biblia huita “siku ya Bwana.” (Ufunuo 1:10) Mambo ya maana yangetukia katika siku hiyo, kutia na kutambulishwa kwa “mtumwa mwaminifu mwenye akili” na kuwekwa rasmi kwa huyo “juu ya vitu [vya Bwana-Mkubwa] vyote.” (Mathayo 24:45-47) Huko nyuma katika 1914, maelfu ya makanisa yalidai kuwa ya Kikristo. Ni kikundi gani ambacho kingekubaliwa na Bwana-Mkubwa, Yesu Kristo, kuwa mtumwa wake mwaminifu mwenye akili? Swali hilo lingejibiwa wakati Yehova angekuja kwenye hekalu.

Kuja Kwenye Hekalu la Kiroho

5, 6. (a) Yehova alikuja kwenye hekalu jipi kwa ajili ya hukumu? (b) Jumuiya ya Wakristo ilipokea hukumu gani kutoka kwa Yehova?

⁵ Lakini, yeye alikuja kwenye hekalu jipi? Kwa wazi si kwenye hekalu halisi katika Yerusalemu. La mwisho kati ya mahekalu hayo liliharibiwa huko nyuma katika 70 W.K. Hata hivyo, Yehova ana hekalu kubwa zaidi lililofananishwa na lile katika Yerusalemu. Paulo alisema juu ya hekalu hilo kubwa zaidi na kuonyesha jinsi lilivyo tukufu kwelikweli, likiwa na patakatifu mbinguni na ua hapa duniani. (Waebrania 9:11, 12, 24; 10:19, 20) Yehova alikuja kwenye hekalu hilo kubwa la kiroho ili kufanya kazi ya hukumu.”—Linganisha Ufunuo 11:1; 15:8.

⁶ Hilo lilitukia wakati gani? Kulingana na uthibitisho wenye nguvu unaopatikana, ni katika 1918.a Tokeo lilikuwa nini? Kwa habari ya Jumuiya ya Wakristo, Yehova aliona tengenezo ambalo mikono yalo ilitiririka damu, mfumo wa kidini wenye ufisadi uliokuwa umefanya ukahaba na ulimwengu huu, ukijifanya rafiki na matajiri na kuonea maskini, ukifundisha mafundisho ya kipagani badala ya kuzoea ibada safi. (Yakobo 1:27; 4:4) Kupitia Malaki, Yehova alikuwa ameonya hivi: “Nami nitawakaribieni ili kuhukumu; nami nitakuwa shahidi mwepesi juu ya wachawi, na juu ya wazinzi, na juu yao waapao kwa uongo; na juu yao wamwoneao mwenye kuajiriwa, kwa ajili ya mshahara wake, wamwoneao mjane na yatima.” (Malaki 3:5) Jumuiya ya Wakristo ilikuwa imefanya yote hayo na hata mabaya zaidi. Kufikia 1919 ilionekana kwa wazi kwamba Yehova alikuwa ameilaani kuharibiwa pamoja na ile sehemu nyingine ya Babuloni Mkubwa, ule muundo wa dini bandia wa ulimwenguni pote. Tangu wakati huo na kuendelea, mwito ulitolewa kwa wale wenye mioyo ifaayo: “Tokeni kwake, enyi watu wangu.”—Ufunuo 18:1, 4.

7. Yesu alikubali nani kuwa mtumwa wake mwaminifu mwenye akili?

⁷ Basi, ni nani aliyekuwa yule mtumwa mwaminifu mwenye akili? Katika karne ya kwanza, alianza akiwa kikundi kidogo kilichoitikia kazi ya kutoa ushahidi ya Yohana Mbatizaji na ya Yesu, yule mjumbe wa agano. Katika karne yetu, walikuwa wale maelfu machache walioitikia kazi ya utayarishaji ya Wanafunzi wa Biblia katika miaka iliyotangulia 1914. Hao walivumilia majaribu makali katika vita ya ulimwengu ya kwanza, lakini walionyesha kwamba moyo wao ulikuwa na Yehova.

Kazi ya Kusafisha

8, 9. Huko nyuma katika 1918, mtumwa mwaminifu mwenye akili alihitaji kusafishwa katika njia zipi, na Yehova alikuwa amefanya ahadi gani kuhusu hilo?

⁸ Walakini, hata kikundi hicho kilihitaji kusafishwa. Wengine waliokuwa wamejishikamanisha nao walithibitika kuwa maadui wa imani na walihitaji kuondoshwa. (Wafilipi 3:18) Wengine hawakuwa na nia ya kuchukua madaraka yaliyohusika katika kumtumikia Yehova wakapeperuka. (Waebrania 2:1) Zaidi ya hayo, kulikuwako mazoea ya Kibabuloni yaliyobaki ambayo yalihitaji kuondolewa. Mtumwa mwaminifu mwenye akili alihitaji kusafishwa kitengenezo pia. Msimamo ufaao wa kutokuwamo kuelekea ulimwengu huu ulihitaji kufunzwa na kutumiwa. Na ulimwengu ulipozidi kuwa wenye ufisadi, alihitaji kupigana vita vikali ili kuzuia uchafu wa kiadili na wa kiroho usiingie makundini.—Linganisha Yuda 3, 4.

⁹ Naam, kusafisha kulihitajiwa, lakini Yehova alikuwa ameahidi kwa upendo kuhusu Yesu aliyetawazwa: “Naye ataketi kama asafishaye fedha na kuitakasa, naye atawatakasa wana wa Lawi, atawasafisha kama dhahabu na fedha; nao watamtolea BWANA [Yehova, NW] dhabihu katika haki [toleo la zawadi katika uadilifu, NW].” (Malaki 3:3) Kuanzia 1918, Yehova, kupitia mjumbe huyo wa agano, ametimiza ahadi yake na kuwasafisha watu wake.

10. Watu wa Mungu walileta toleo la aina gani, na Yehova aliwatolea mwaliko gani?

¹⁰ Ndugu wapakwa-mafuta wa Kristo na umati mkubwa waliojiunga nao baadaye katika utumishi wa Yehova wote walinufaika kutokana na kutenda kwa Yehova akiwa mtakasaji na msafishaji wa fedha. (Ufunuo 7:9, 14, 15) Wakiwa tengenezo walikuja, na wangali wakija, wakitoa toleo la zawadi katika uadilifu. Na toleo lao “[linapendeza] mbele za BWANA [Yehova, NW], kama katika siku za kale, na kama katika miaka ya zamani.” (Malaki 3:4) Ni hao ambao Yehova alialika hivi kiunabii: “Leteni zaka kamili [sehemu ya kumi yote, NW] ghalani, ili kiwemo chakula katika nyumba yangu, mkanijaribu kwa njia hiyo, asema BWANA [Yehova, NW] wa majeshi; mjue kama sitawafungulia madirisha ya mbinguni, na kuwamwagieni baraka, hata isiwepo nafasi ya kutosha [upungukio zaidi, NW], au la.”—Malaki 3:10.

Matoleo na Sehemu za Kumi

11. Kwa nini matoleo kulingana na mfumo wa Sheria ya Kimusa hayatakiwi?

¹¹ Katika siku ya Malaki watu wa Mungu walileta matoleo na sehemu za kumi halisi, kama vile nafaka, matunda, na mifugo. Hata katika siku ya Yesu, Waisraeli waaminifu walitoa matoleo halisi kwenye hekalu. Hata hivyo, baada ya kifo cha Yesu yote hayo yalibadilika. Sheria ilibatilishwa, kutia na ile amri ya kutoa matoleo na sehemu za kumi mahususi za kimwili. (Waefeso 2:15) Yesu alitimiza ufananisho wa kiunabii wa matoleo chini ya Sheria. (Waefeso 5:2; Waebrania 10:1, 2, 10) Kwa hiyo, Wakristo wanaweza katika njia gani kuleta matoleo na sehemu za kumi?

12. Ni aina gani ya matoleo na dhabihu za kiroho ambazo Wakristo hutoa?

¹² Kwao, matoleo ni ya aina ya kiroho hasa. (Linganisha Wafilipi 2:17; 2 Timotheo 4:6.) Kwa mfano, Paulo alisema juu ya kazi ya kuhubiri ikiwa toleo aliposema hivi: “Kwa njia yake yeye, na tumpe Mungu dhabihu ya sifa daima, yaani, tunda la midomo iliungamayo jina lake.” Alielekezea dhabihu nyingine ya aina ya kiroho alipohimiza hivi: “Msisahau kutenda mema na kushirikiana; maana sadaka kama hizi ndizo zimpendezazo Mungu.” (Waebrania 13:15, 16) Wazazi wanapowatia moyo watoto wao waingie utumishi wa painia, wao waweza kusemwa kuwa wanawatoa kwa Yehova, sawa sana na vile Yeftha alivyomtoa binti yake akiwa “toleo la kuteketezwa” kwa Mungu, aliyekuwa amempa ushindi.—Waamuzi 11:30, 31, 39, NW.

13. Kwa nini Wakristo hawatakiwi kutoa sehemu ya kumi halisi ya machumo yao?

¹³ Lakini, namna gani sehemu za kumi? Je! Wakristo wana wajibu wa kuweka kando sehemu ya kumi ya machumo yao ya kimwili na kuitoa kwa tengenezo la Yehova, sawa na vile inavyofanywa katika baadhi ya makanisa ya Jumuiya ya Wakristo? La, hilo si takwa. Hakuna andiko lolote linalotaarifu kanuni ya jinsi hiyo kwa Wakristo. Paulo alipokuwa akikusanya michango kwa ajili ya wenye uhitaji katika Yudea, hakutaja kiasi fulani hususa ambacho kilipasa kitolewe. Bali, alisema hivi: “Kila mtu atende kama alivyokusudia moyoni mwake, si kwa huzuni, wala si kwa lazima; maana Mungu humpenda yeye atoaye kwa moyo wa ukunjufu [mtoaji mchangamfu, NW].” (2 Wakorintho 9:7) Akisema juu ya wale waliomo katika huduma mbalimbali ya pekee, Paulo alionyesha kwamba ingawa baadhi yao walitegemezwa ifaavyo sana kwa michango ya kujitolea, alikuwa tayari kufanya kazi na kujitegemeza mwenyewe. (Matendo 18:3, 4; 1 Wakorintho 9:13-15) Hakukuwa sehemu za kumi zozote zilizoamrishwa kwa kusudi hilo.

14. (a) Kwa nini kuleta sehemu ya kumi hakuwakilishi kumtolea kwetu Yehova vyote tulivyo navyo? (b) Ni nini kinachowakilishwa na sehemu ya kumi?

¹⁴ Kwa wazi, kwa Wakristo sehemu ya kumi hufananisha, au huwakilisha, jambo fulani. Kwa kuwa hiyo ni sehemu ya kumi na nambari kumi mara nyingi hufananisha ukamili wa kidunia katika Biblia, je sehemu ya kumi hufananisha kutoa kwetu vyote tulivyo navyo kwa Yehova? La. Tunapojiweka wakfu kwa Yehova na kuufananisha huo kwa ubatizo wa maji, huo ndio wakati tunapomtolea vyote tulivyo navyo. Kutoka wakati wa wakfu wetu, hatuna chochote ambacho si cha Yehova tayari. Hata hivyo, Yehova huwaruhusu watu mmoja mmoja watumie nyenzo zao. Kwa hiyo sehemu ya kumi huwakilisha sehemu ya vyote tulivyo navyo ambavyo twamletea Yehova, au kutumia katika utumishi wake, ili kuonyesha upendo wetu kwake na utambuzi wetu wa uhakika wa kwamba sisi ni mali yake. Sehemu ya kumi ya ki-siku-hizi haipasi kuwa sehemu ya kumi tu. Katika nyakati nyingine itakuwa kidogo. Nyakati nyinginezo itakuwa zaidi. Kila mtu huleta kile ambacho moyo wake humchochea alete na kile ambacho hali zake humruhusu.

15, 16. Ni nini kinachotiwa ndani ya sehemu ya kumi yetu ya kiroho?

¹⁵ Ni nini kinachotiwa ndani ya sehemu ya kumi hiyo ya kiroho? Kwanza, tunamtolea Yehova wakati na nishati yetu. Wakati tunaotumia mikutanoni, katika kuhudhuria makusanyiko na mikusanyiko, katika utumishi wa shambani, yote hayo ni kitu kinachotolewa kwa Yehova—fungu la sehemu ya kumi yetu. Wakati na nishati tunayotumia kuwatembelea wagonjwa na kuwasaidia wengine—tena, hayo ni fungu la sehemu ya kumi yetu. Kusaidia katika kujenga Majumba ya Ufalme na kushiriki katika kazi ya kudumisha na kusafisha jumba ni sehemu ya hiyo vilevile.

¹⁶ Sehemu ya kumi yetu inatia ndani michango yetu ya kifedha. Kukiwa na ongezeko la ajabu la tengenezo la Yehova katika miaka ya hivi karibuni, wajibu mbalimbali wa kifedha umeongezeka. Majumba ya Ufalme mapya yanahitajiwa, pamoja na makao mapya ya tawi, na Majumba ya Kusanyiko mapya, pamoja na utunzaji wa yale ambayo yamejengwa tayari. Kulipia gharama za wale ambao wamejitoa wapatikane kwa ajili ya utumishi wa pekee—mara nyingi wakifanya dhabihu kubwa za kibinafsi ili kufanya hivyo—pia hufanyiza jambo kubwa mno la kukabiliana nalo. Katika 1991 gharama tu ya kudumisha wamishonari, waangalizi wasafirio, na mapainia wa pekee ilijumuika kuwa zaidi ya dola milioni 40, zote ambazo ziliandaliwa na michango ya kujitolea.

17. Tunapaswa kutoa nini hasa ikiwa sehemu ya kumi yetu ya kiroho?

¹⁷ Tunapaswa kutoa nini hasa ikiwa sehemu ya kumi yetu ya kiroho? Yehova haweki kiasi fulani. Hata hivyo, hisia ya ujitoaji, kumpenda kwa kweli Yehova na akina ndugu, pamoja na hisia ya uharaka kutokana na kutambua kwamba kuna maisha za kuokolewa, kunatutia moyo tulete sehemu ya kumi yetu nzima ya kiroho. Tunachochewa kumtumikia Yehova kwa kadiri kubwa zaidi tuwezavyo. Ikiwa tungejitoa wenyewe au nyenzo zetu kwa unyimivu au kwa kulalamika, huko kungekuwa sawa na kumwibia kwetu Mungu.—Linganisha Luka 21:1-4.

Kubarikiwa Mpaka Kuwe Hakuna Upungukio Zaidi

18, 19. Watu wa Yehova wamebarikiwaje kwa ajili ya kuleta sehemu ya kumi yao nzima?

¹⁸ Tangu 1919, watu wa Yehova wameitikia mahitaji ya kazi ya kuhubiri kwa ukarimu, wakitoa wakati, nishati, na nyenzo zao za kifedha. Kwa kweli wameleta sehemu ya kumi nzima ghalani. Likiwa tokeo, Yehova ametimiza ahadi yake na kumwaga baraka mpaka hakuna upungukio zaidi. Hiyo imeonekana kwa njia yenye kutokeza zaidi katika ukuzi wao wa idadi. Kutoka yale maelfu machache ya wapakwa-mafuta waliomtumikia Yehova alipokuja kwenye hekalu lake katika 1918, wamekua mpaka leo hii idadi ya wapakwa-mafuta hao pamoja na waandamani wao, wale kondoo wengine, imekuwa zaidi ya milioni nne katika mabara tofauti-tofauti 211. (Isaya 60:22) Hao pia wamebarikiwa na ukuzi wenye kuendelea katika uelewevu wa kweli. Neno la kiunabii limefanywa kuwa lenye uhakika zaidi kwao. Uhakika wao katika utimizo wa makusudi ya Yehova umethibitishwa kabisa. (2 Petro 1:19) Kwa kweli wao ni watu “waliofundishwa na Yehova.”—Isaya 54:13, NW.

¹⁹ Kupitia Malaki, Yehova alitabiri baraka ya ziada: “Ndipo wale waliomcha BWANA [Yehova, NW] waliposemezana wao kwa wao. Naye BWANA [Yehova, NW] akasikiliza, akasikia; na kitabu cha ukumbusho kikaandikwa mbele zake, kwa ajili ya hao waliomcha BWANA [Yehova, NW] wa majeshi, na kulitafakari jina lake.” (Malaki 3:16) Kati ya matengenezo yote yanayodai kuwa ya Kikristo, ni Mashahidi wa Yehova tu wanaolitafakari jina lake na pia kulitukuza miongoni mwa mataifa. (Zaburi 34:3) Wanafurahi kama nini kuhakikishiwa kwamba Yehova anakumbuka uaminifu wao!

20, 21. (a) Wakristo hufurahia uhusiano gani wenye kubarikiwa? (b) Kwa habari ya Ukristo, ni tofauti gani inayozidi kuonekana wazi?

²⁰ Mabaki ya wapakwa-mafuta ni watu wa Yehova wa pekee, na umati mkubwa, unaomiminika ili kushiriki nao, huvuna pamoja nao baraka za ibada safi. (Zekaria 8:23) Kupitia Malaki, Yehova aliahidi hivi: “Watakuwa wangu [kwa hakika, NW], asema BWANA [Yehova, NW] wa majeshi, katika siku ile niifanyayo; naam, watakuwa hazina yangu hasa; nami nitawaachilia [nitawaonyesha huruma, NW], kama vile mtu amwachiliavyo [amwonyeshavyo huruma, NW] mwanawe mwenyewe amtumikiaye.” (Malaki 3:17) Ni baraka iliyoje kwamba Yehova huwaona kwa wororo wa jinsi hiyo!

²¹ Kwa kweli, tofauti kati ya Wakristo wa kweli na bandia inazidi kudhihirika. Watu wa Yehova wanapojitahidi kuweka viwango vyake, Jumuiya ya Wakristo huendelea kuzama katika bwawa la uchafu la ulimwengu huu. Kwa kweli, maneno ya Yehova yamethibitishwa kuwa ya kweli: “Nanyi mtapambanua kati ya wenye haki na waovu, na kati ya yeye amtumikiaye Mungu na yeye asiyemtumikia.”—Malaki 3:18

22. Twaweza kuwa na uhakika wa kufurahia baraka zipi tukiendelea kuleta sehemu ya kumi nzima?

²² Hivi karibuni, siku ya kutoza hesabu itawajia Wakristo bandia. “Angalieni, siku ile, inakuja, inawaka kama tanuru; na watu wote wenye kiburi, nao wote watendao uovu, watakuwa makapi; na siku ile inayokuja itawateketeza, asema BWANA [Yehova, NW] wa majeshi.” (Malaki 4:1) Watu wa Yehova wanajua kwamba yeye atawalinda wakati huo, jinsi alivyolinda taifa lake la kiroho huko nyuma katika 70 W.K. (Malaki 4:2) Wao wanafurahi kama nini kuwa na uhakikisho huo! Kwa hiyo, mpaka wakati huo acheni kila mmoja wetu tumwonyeshe Yehova uthamini na upendo wetu kwa kuleta sehemu ya kumi nzima ghalani. Kisha twaweza kuwa na uhakika kwamba yeye ataendelea kutubariki mpaka kuwe hakuna upungukio zaidi.

[Maelezo ya Chini]

Je, Unaweza Kueleza?

◻ Katika nyakati za ki-siku-hizi, Yehova alikuja wakati gani kwenye hekalu pamoja na mjumbe wake wa agano?

◻ Ni nani aliye mtumwa mwaminifu mwenye akili, nao walihitaji kusafishwa kupi baada ya 1918?

◻ Ni aina gani ya matoleo ya kiroho ambayo Wakristo humletea Yehova?

◻ Ni nini iliyo sehemu ya kumi ambayo Wakristo wanaalikwa walete ghalani?

◻ Watu wa Mungu hufurahia baraka zipi kwa kutoa sehemu za kumi za kiroho?

[Picha katika ukurasa wa 15]

Sehemu za kumi zetu za kiroho zinatia ndani kutoa nguvu na nyenzo zetu ili kujenga Majumba ya Ufalme

[Picha katika ukurasa wa 16]

Yehova amewabariki watu wake kwa ongezeko ‘mpaka hakuna upungukio zaidi’