Kwa Nini Umtumikie Yehova?

“SIKU ya Yehova i karibu! ‘Dhiki kubwa’ i karibu, na hutaiokoka usipomtumikia Mungu.” Ikiwa mtu fulani angekuambia hivyo, wewe ungeitikiaje?—Sefania 2:2, 3; Mathayo 24:21.

Ni kweli, tunapaswa kuikumbuka siku ya Yehova, na wokovu kupitia dhiki hiyo kubwa iliyo karibu sana hutegemea utumishi mwaminifu kwa Mungu. Lakini, je, mambo hayo ya hakika yapaswa kuwa sababu kuu ya sisi kumtolea Yehova Mungu utumishi mtakatifu? Kwa nini wewe humtumikia Yehova?

Uhitaji wa Kusudi Lifaalo

Ikiwa mtu hamtumikii Mungu kwa kusudi lifaalo, huenda akaacha kumtumikia ikiwa matazamio yake hayatimizwi katika kipindi fulani cha wakati. Kwa mfano, watu wengine walimtazamia Yesu Kristo arudi katika 1843 au 1844, tarehe zilizopita bila utimizo wa matumaini yao. Jambo la kupendeza kuhusu hilo ni yale yaliyoandikwa na George Storrs, mtangazaji wa Bible Examiner na aliyekuja kufahamiana baadaye na Charles Taze Russell, msimamizi wa kwanza wa Watch Tower Society. Katika Bible Examiner ya Septemba 1846, Storrs aliandika hivi:

“Wajibu wa kumtumikia Mungu ni kwa sababu ya juu kuliko uhakika kwamba siku hiyo [ya Bwana] i karibu sana. . . . Itikio litakalotukia ikiwa [miaka ya 1846 na 1847] itapita kama vile huenda [ikapita], bila kushuhudia kuja [kwa pili], litakuwa jambo la kukatisha tamaa kupita kiasi. Mambo yaliyoonwa huthibitisha hilo—ninamaanisha yale yaliyoonwa katika [miaka ya 1843 na 1844]. Wako wapi sasa wale wengi sana, waliodai, ‘kuchochewa kumtumikia Mungu’ wapasavyo kwa ajili ya lile tangazo kwamba huo ulikuwa wakati wa kuja kwa Bwana? Na mwangwi wasema—[WAKO] WAPI!!! Ni karibu mmoja tu kati ya kumi [wa wale waliosukumwa kumtumikia Mungu kwa ajili ya tangazo hilo] ambao wangali wakitembea sasa [katika imani] ili kuheshimu dai lao la kuwa Wakristo. Kwa nini sivyo? Kwa sababu walichochewa na makusudi yasiyofaa. Ubinafsi wao ndio jambo kuu lililovutiwa na kusisimuliwa. Walikuwa sawasawa na mtenda dhambi anayedhani yu karibu kufa akiwa mgonjwa kitandani au akiwa katika dhoruba baharini. Ikiwa ni lazima afe, atakuwa Mkristo. Ikiwa angejua hamo hatarini tena, asingejali kama kawaida.”

Kutumikia na Makusudi Yafaayo

Ubinafsi na hofu ya uangamizo huenda ikawasukuma wengine kufanya mapenzi ya Yehova kijuujuu tu. Huenda wengine wakasisimuliwa sana na tumaini la uhai katika Paradiso hivi kwamba wangemtumikia Mungu kwa sababu hiyo tu. Hata hivyo, ikiwa watu wanaosukumwa na makusudi hayo hasa wangefikiri kwamba siku ya Yehova na dhiki kubwa haikuwa karibu sana, huenda wasiwe na mwelekeo wa kumtumikia Mungu kwa bidii.

Bila shaka, si jambo lenye ubinafsi kushangilia katika ahadi za Mungu na baraka zilizotabiriwa. Anataka tufurahie matarajio ambayo yamewekwa mbele yetu tukiwa wafuasi wa Mwana wake, Yesu Kristo. “Kwa tumaini, mkifurahi,” akasema mtume Paulo, akiongeza hivi: “Katika dhiki, mkisubiri; katika kusali, mkidumu.” (Warumi 12:12) Pamoja na sala, “shangwe ya Yehova” hutusaidia kuvumilia majaribu na kungojea kwa saburi utimizo wa ahadi za Mungu. (Nehemia 8:10, NW) Kwa wakati uleule, tuna sababu nyingi za kumtumikia Yehova. Baadhi yazo ni zipi?

Wajibu na Pendeleo

Akiwa Mwenye Enzi Kuu ya Ulimwengu Wote Mzima, Yehova hustahili na kutoza ujitoaji usiohusisha wengine. (Kutoka 20:4, 5) Kwa hiyo kila Mkristo ana kiwango kilekile cha wajibu kwa Mungu iwe dhiki kubwa yaanza kesho, mwaka ujao, au baadaye. Anapaswa kumtumikia Yehova bila ubinafsi kwa sababu ya kumpenda Mungu kwa moyo, nafsi, akili, na nguvu zake zote. (Marko 12:30) Wakristo wengine wa mapema walidhani kwamba siku ya Yehova ilikuwa karibu sana, lakini tazamio lao halikutimizwa, na walikufa bila kuona tukio hilo. (1 Wathesalonike 5:1-5; 2 Wathesalonike 2:1-5) Hata hivyo, ikiwa walikuwa waaminifu hadi kifo, wafuasi hao Wakristo waliopakwa kwa roho walipokea hatimaye zawadi ya ufufuo kwenye uhai wa kimbingu.—Ufunuo 2:10.

Mashahidi wa Yehova waliobatizwa wanapaswa kumtumikia katika uaminifu kwa sababu wamejitwalia kwa kujitolea ule wajibu wa kufanya mapenzi yake. Ebu fikiria! Kama vile malaika watakatifu, sisi tunaweza kufanya mapenzi ya yule Mwenye Enzi Kuu wa Ulimwengu Wote Mzima. (Zaburi 103:20, 21) Yesu alithamini sana pendeleo hilo hivi kwamba alisema hivi: “Chakula changu ndicho hiki, niyatende mapenzi yake aliyenipeleka, nikaimalize kazi yake.” (Yohana 4:34) Ikiwa tuna roho ileile, tutajulisha kwa bidii sifa za Yehova na kuwaambia wengine juu ya makusudi yake, kama yalivyofunuliwa katika Maandiko. Kwa njia hiyo, tuna pendeleo pia la kuwasaidia wengine kiroho. Na kwa hakika, kufanya mapenzi ya Mungu kwa ajili ya kumpenda ni pendeleo zuri ajabu, haidhuru ni wakati gani siku ya Yehova itakapoanza.

Shukrani Huandaa Kichocheo

Shukrani kwa ajili ya upendo wa Mungu katika kuandaa dhabihu ya fidia ya Mwana wake yapasa pia kutusukuma kumtumikia Yehova. Wakati mmoja tulifarikishwa na Yehova Mungu kwa sababu ya dhambi. Hata hivyo, Yesu alisema hivi: “Mungu aliupenda ulimwengu [wa ainabinadamu], hata akamtoa Mwanawe pekee, ili kila mtu amwaminiye asipotee, bali awe na uzima wa milele.” (Yohana 3:16) Yehova alichukua hatua ya kwanza katika jambo hilo, kama vile Paulo alivyoandika: “Mungu aonyesha pendo lake yeye mwenyewe kwetu sisi, kwa kuwa Kristo alikufa kwa ajili yetu, tulipokuwa tungali wenye dhambi.” (Warumi 5:8) Shukrani kwa ajili ya wonyesho huo wa upendo wa Mungu yapasa kutusukuma kumtumikia kwa moyo wote.

Uthamini kwa ajili ya maandalizi ya Yehova ya kiroho na ya kimwili hutupa sisi sababu zaidi ya kumtumikia kwa uaminifu. Neno la Mungu ni mwongozo hakika—mwanga wa njia yetu. Vichapo vinavyoandaliwa kupitia “mtumwa mwaminifu mwenye akili” hutusaidia tupatanishe maisha zetu na mapenzi ya kimungu. (Mathayo 24:45-47; Zaburi 119:105) Na kwa sababu tunautafuta Ufalme kwanza, Yehova hutupa sisi pia maandalizi ya kimwili. (Mathayo 6:25-34) Je! wewe unaonyesha uthamini wako kwa ajili ya mambo hayo?

Shukrani kwa ajili ya uhuru wa kupewa na Mungu kutoka katika dini bandia hutoa sababu nyingine ya kumtumikia Yehova kwa uaminifu. Yule kahaba wa kidini Babuloni Mkubwa “[aketi] juu ya maji mengi,” yakimaanisha “jamaa na makutano na mataifa na lugha.” (Ufunuo 17:1, 15) Hata hivyo, yeye haketi juu ya watumishi wa Yehova, akiwavuta na kuwadhibiti kidini. Kwa mfano, Wao hukatalia mbali lile fundisho bandia la kidini kwamba nafsi ya kibinadamu haiwezi kufa. Wanajua kwamba mtu aliumbwa akiwa “nafsi hai,” kwamba wafu “hawajui neno lo lote,” na kwamba kutakuwa ufufuo. (Mwanzo 2:7; Mhubiri 9:5, 10; Matendo 24:15) Kwa hiyo hawahofu wala hawaabudu wafu. Je! shukrani kwa ajili ya uhuru huo wa kiroho haikufanyi ukinze uasi-imani na kushikamana na ibada safi ya Yehova?—Yohana 8:32.

Uthamini kwa ajili ya utegemezo wa Yehova wa kila siku wapasa kuongeza azimio letu la kumtumikia kwa uaminifu-mshikamanifu. Mtunga zaburi Daudi alijulisha hivi: “Na ahimidiwe BWANA [Yehova, NW], siku kwa siku hutuchukulia mzigo wetu.” (Zaburi 68:19) Kwingineko mtunga zaburi alisema hivi: “Baba yangu na mama yangu wameniacha, bali BWANA [Yehova, NW] atanikaribisha kwake.” (Zaburi 27:10) Naam, mtu anayemtumikia Yehova kwa uaminifu aweza kumtwika Mungu mzigo wake wa kitamathali, kama vile mahangaiko na majaribu. Je! wewe unaonyesha uthamini kwa ajili ya utegemezo wa Yehova wa daima kwa kumtumikia kwa uaminifu?—Zaburi 145:14.

Msifu Yehova na Ufalme Wake

Tamaa ya kumtukuza Yehova inapasa pia kutusukuma kumtumikia. Viumbe wa kimbingu wanawakilishwa wakiwa wanamtukuza Mungu kwa maneno: “Umestahili wewe, Bwana [Yehova, NW] wetu na Mungu wetu, kuupokea utukufu na heshima na uweza; kwa kuwa wewe ndiwe uliyeviumba vitu vyote, na kwa sababu ya mapenzi yako vilikuwako, navyo vikaumbwa.” (Ufunuo 4:11) Mfalme Daudi alimsifa Mungu kwa kusema hivi: “Ee BWANA [Yehova, NW], ukuu ni wako, na uweza, na utukufu, na kushinda, na enzi . . . Ufalme ni wako, Ee BWANA [Yehova, NW], . . . Utajiri na heshima hutoka kwako wewe, nawe watawala juu ya vyote . . . Mungu wetu, twakushukuru na kulisifu jina lako tukufu.” (1 Mambo ya Nyakati 29:10-13) Tukiwa watumishi wa Yehova, je, hatuhisi kuwa na wajibu wa kumtukuza katika neno na katika tendo tunapongojea utimizo wa ahadi zake?—1 Wakorintho 10:31.

Hamu yenye nguvu ya kusema juu ya Ufalme wa Mungu hutoa kichocheo hata kingine cha kumtumikia Yehova. Kusudi hilo lifaalo huelezwa vema katika maneno ya mtunga zaburi: “Ee BWANA [Yehova, NW], kazi zako zote zitakushukuru, na wacha Mungu wako watakuhimidi. Wataunena utukufu wa ufalme wako, na kuuhadithia uweza wako. Ili kuwajulisha watu matendo yake makuu, na utukufu wa fahari ya ufalme wake. Ufalme wako ni ufalme wa zamani zote, na mamlaka yako ni ya vizazi vyote.” (Zaburi 145:10-13) Kuujulisha ujumbe wa Ufalme ni utume wa Mkristo na ni kazi ya maana zaidi inayofanywa katika siku yetu. (Mathayo 24:14; 28:19, 20) Je! una tamaa yenye hamu sana ya kumsifu Yehova na kuwaambia wengine juu ya Ufalme wake?

Utakaso wa jina la Yehova na utetezi wa enzi kuu yake wapasa kuwa wenye umaana sana kwetu hivi kwamba tunataka kumtumikia kwa uaminifu. Twaweza kusali kwamba jina la Yehova litakaswe na enzi kuu yake itetewe. (Mathayo 6:9) Tunaweza kutenda kulingana na sala zetu kwa kushiriki katika huduma ya Kikristo kwa ukawaida na kwa kueneza kweli kuhusu mambo hayo ya maana sana.—Ezekieli 36:23; 39:7.

Shangwe na Uradhi

Kwa kumtumikia Yehova kwa uaminifu, tuna uradhi wa kufanya moyo wake ushangilie na kumthibitisha Ibilisi kuwa mwongo. Ingawa Shetani hudai kwa uwongo kwamba watu humtumikia Mungu kwa sababu zenye ubinafsi, utumishi wetu mwaminifu-mshikamanifu kwa Yehova, unaotolewa kwa ajili ya upendo, huthibitisha shindano la mdhihaki huyo kuwa la uwongo. (Ayubu 1:8-12) Hilo latupa sisi sababu nzuri ya kuendelea kufanya yale ambayo yamesemwa kwenye Mithali 27:11: “Mwanangu, uwe na hekima na kunifurahisha moyo wangu; ili nipate kumjibu anilaumuye.” Zaidi ya hayo, tunapomtumikia Yehova kwa uaminifu-mshikamanifu yajapokuwa yale yote ambayo Shetani hufanya ili kutuzuia, yaelekea mwendo wetu wa kushika uaminifu-maadili utaimarisha waamini wenzetu.—Wafilipi 1:12-14.

Shangwe na uradhi wa kushiriki katika mavuno ya kiroho vyapasa pia kutuchochea kumtumikia Yehova kwa uaminifu. Yesu alipata furaha katika kuwasaidia watu, hasa katika njia za kiroho. Mathayo 9:35-38 husema hivi: “Yesu alikuwa akizunguka katika miji yote na vijiji, akifundisha katika masinagogi yao, na kuihubiri habari njema ya ufalme, na kuponya magonjwa yote na udhaifu wa kila aina. Na alipowaona makutano aliwahurumia, kwa sababu walikuwa wamechoka na kutawanyika kama kondoo wasio na mchungaji. Ndipo alipowaambia wanafunzi wake, Mavuno ni mengi, lakini watenda kazi ni wachache. Basi mwombeni Bwana wa mavuno, apeleke watenda kazi katika mavuno yake.” Kazi ya mavuno ikichukua muda mrefu zaidi ya vile tulivyotazamia, hilo litatupa sisi fursa zaidi ya kupata shangwe na uradhi katika kuwasaidia wengine kiroho. Hiyo pia ni njia ya kuonyesha upendo wa jirani unaotazamiwa kwetu.—Mathayo 22:39.

Kwa Nini Wewe Humtumikia Mungu?

Tumechunguza sababu chache tu kati ya zile nyingi za lazima za kumtumikia Yehova kwa uaminifu. Ni vema kufikiria kwa sala sababu zetu za kibinafsi za kumtumikia Mungu, kwani kila mmoja wetu atapaswa kumtolea hesabu. (Warumi 14:12; Waebrania 4:13) Na wale wanaoendelea kuwa na makusudi ya kibinafsi tu hawatafurahia upendeleo wa kimungu.

Ni nini kiwezacho kutazamiwa ikiwa tunahangaikia hasa utakaso wa jina la Yehova na kumtolea Mungu utumishi mtakatifu bila makusudi yenye ubinafsi? Kwani, Yehova atatubariki sisi na huduma yetu! (Mithali 10:22) Tutapokea pia uhai wa milele kwa sababu tumemtumikia Yehova kwa uaminifu.

[Picha katika ukurasa wa 9]

Maelfu humtumikia Yehova katika Japani

[Picha katika ukurasa wa 10]

Kumtumikia Yehova katika Côte d’Ivoire

[Hisani ya Picha katika ukurasa wa 8]

SIX SERMONS, by George Storrs (1855)