Mahubiri ya Simu Yenye Matokeo

¹ Kusudi letu tukiwa Mashahidi wa Yehova si kuhubiri tu habari njema bali pia ni kuwatangazia watu wengi iwezekanavyo ujumbe wa Ufalme. (Mdo. 10:42; 20:24) Ingawa kuhubiri nyumba kwa nyumba ndiyo njia kuu ya kuwafikia watu, tunatambua kwamba hata tukifuata njia hiyo yenye utaratibu hatuwapati watu wote. Kwa hiyo, ili ‘kutimiza kwa ukamili huduma yetu,’ tunatumia njia nyingine kama vile kuhubiri kwa simu, ili kuwatafuta watu wenye mfano wa kondoo.—2 Tim. 4:5.

² Wahubiri wanapata matokeo wanapowahubiria watu kwa simu katika sehemu fulani za maeneo yetu. Wamepewa nambari za simu na watu wanaopendezwa na wanafuatia upendezi. Wahubiri fulani wamewahubiria watu wa ukoo na marafiki kupitia simu.

³ Utapata wapi nambari za simu? Huenda ukatumia kitabu cha simu kinachoorodhesha nambari za simu na anwani. Huenda watu wa ukoo, wafanyakazi wenzako, watu tunaokutana nao katika huduma ya shambani, na marafiki wengine wakakupa nambari zao za simu.

⁴ Wazee wanaweza kuonyesha wanathamini kazi hii kwa kufanya mipango ili wale walio na uzoefu wa kuhubiri kwa simu wawazoeze wengine, labda kupitia programu ya Mapainia Wasaidia Wengine. Mara kwa mara, sehemu ya mahitaji ya kwenu katika Mkutano wa Utumishi inaweza kutumiwa kuwazoeza wahubiri kuwa stadi katika mahubiri haya ikiwa yanafaa eneo lenu.

⁵ Wazee wanapofanya ziara za uchungaji kwa wagonjwa au walio dhaifu, wanaweza kuwatia moyo wahubiri kwa simu. Labda mzee anaweza kuwapigia simu watu kadhaa huku mhubiri akitazama, kisha mhubiri huyo anaweza kupewa nafasi apige simu. Wengi walioanza hivyo, sasa wanatumia dakika chache kila siku wakihubiri kwa simu, na wanafurahia sana mahubiri hayo.

⁶ Madokezo ya Kukusaidia Ufanikiwe: Yesu alipowatuma wanafunzi wake kuhubiri, ‘aliwatuma wawili-wawili.’ (Luka 10:1) Kwa nini? Alijua kwamba kwa kuhubiri pamoja wangeweza kujifunza kutoka kwa wenzao na kutiana moyo. Ndivyo ilivyo na mahubiri ya simu. Mnapohubiri wawili, unaweza kujifunza kutoka kwa mwenzako, kuzungumzia matokeo mliyopata, na kutoa madokezo kwa ajili ya mazungumzo yatakayofuata. Hata mnapozungumza kwenye simu, mnaweza kusaidiana kupata habari inayofaa.

⁷ Ili kukaza fikira na kuwa makini, keti mahali ambapo unaweza kuweka vifaa vyako vya kuhubiri kama vile Biblia, kitabu Kutoa Sababu, broshua Anataka, magazeti, na kadhalika. Andika tangulizi kadhaa, na kuziweka mahali ambapo unaweza kuziona. Uwe tayari kuandika maandishi sahihi na kamili, kutia ndani tarehe na saa ili ujue wakati wa kufanya ziara ya kurudia.

⁸ Unapomaliza mazungumzo, fikiria jambo ambalo litafungua njia ya kumtembelea nyumbani kwake au kumtumia kichapo. Ikiwa anasitasita kukuelekeza anakoishi, muulize kama unaweza kumpigia simu wakati mwingine. Huenda ukapiga simu mara kadhaa kabla hajakualika nyumbani mwake.

⁹ Kuwafundisha watu kweli kupitia simu kumekuwa njia yenye matokeo ya kuhubiri habari njema. Jitayarishe vizuri, na ushiriki kwa moyo wako wote. Usivunjike moyo ikiwa kwanza watu wachache wanakataa ujumbe wako. Mwombe Yehova mwongozo, na uzungumze na wengine wanaoshiriki katika mahubiri haya yenye kusisimua. Na tutimize huduma yetu kikamili na kwa juhudi huku tukiazimia kumhubiria kila mtu katika eneo letu.—Rom. 10:13, 14.