Usiwasahau Wasiotenda
1 Je, unamfahamu mtu yeyote asiyetenda? Huenda ameacha kushirikiana na kutaniko na ameanza kupeperushwa. Labda umekutana na mtu huyo ulipokuwa ukihubiri nyumba kwa nyumba. Tunapaswa kukumbuka kwamba mtu huyo bado ni ndugu yetu wa kiroho. Tunataka kumthibitishia upendo wetu na kumsaidia kurudi kwenye kutaniko na ‘kwa mchungaji na mwangalizi wa nafsi zetu.’—1 Pet. 2:25.
2 Onyesha Kuwa Unawajali: Tunaweza kuonyesha kwamba bado tunamkumbuka mtu huyo kwa kumpigia simu au kumtembelea. Tutasema nini? Huenda akatiwa moyo sana, akigundua kwamba tulitaka tu kumjulia hali. Fanya maongezi yenu yawe yenye kupendeza na yenye kujenga. (Flp. 4:8) Unaweza kutaja jambo ambalo umelifurahia mkutanoni hivi karibuni. Pia unaweza kumkaribisha kwenye mkutano au kusanyiko litakalofuata na kumweleza kwamba utamwekea mahali pa kukaa au kumsaidia usafiri.
3 Katika eneo moja dada ambaye alikuwa ameacha kutenda kwa zaidi ya miaka 20, alipatikana. Hata ingawa hakukubali kujifunza Biblia, dada aliyempata alimrudia, na kumwachia magazeti ya karibuni. Baada ya kusanyiko la wilaya, mhubiri huyo alimweleza dada yule asiyetenda mambo makuu ya kusanyiko, na hatimaye alianza kutenda tena.
4 Mtu Anaporudi: Tunapaswa kumtendeaje ndugu asiyetenda anapoanza kuhudhuria mikutano? Yesu aliwatendeaje wanafunzi wake walipomwacha kwa muda? Kwa uchangamfu aliwaita “ndugu” zake na kuonyesha kuwa anawatumaini. Na hata akawapa mgawo muhimu sana. (Mt. 28:10, 18, 19) Muda mfupi baadaye, walikuwa na kazi nyingi ya kuhubiri habari njema “bila kuacha.”—Mdo. 5:42.
5 Kabla ya kuomba ujifunze Biblia na mtu ambaye alikuwa ameacha kwa muda mrefu au kabla ya kwenda mahubiri pamoja naye, tunapaswa kupata maelekezo kutoka kwa wazee. Kama tunakutana na mhubiri asiyetenda katika eneo letu, tunapaswa kutoa taarifa kwa wazee ili waweze kutoa msaada unaohitajika.
6 Kama vile Biblia inavyoonyesha, ni wale tu wanaokimbia shindano la mbio mpaka mwisho ndio watakaopata wokovu. (Mt. 24:13) Hivyo, wafikirie wale ambao huenda wamekwazwa au wamepeperushwa. Ikiwa kwa subira tunaonyesha upendo wa Yehova na kupendezwa nao, tutapata shangwe tutakapowaona wakishiriki huduma takatifu pamoja nasi.—Luka 15:4-10.
[Maswali ya Funzo]
1. Kwa nini tunapaswa kujitoa ili kuwasaidia wale wasiotenda?
2. Tunaweza kutiaje moyo mtu asiyetenda?
3. Dada mmoja asiyetenda alisaidiwaje?
4. Tunapaswa kumtendeaje mtu anayeanza kuhudhuria mikutano tena?
5. Taja mambo tunayopaswa kuzungumzia na wazee kuhusu mtu asiyetenda.
6. Tutapata shangwe gani tukiwasaidia wale wasiotenda?