Kutoa Ushahidi Barabarani kwa Njia Inayofaa

 1. Tunaweza kumwiga Yesu kwa njia gani?

¹ Katika huduma yake, Yesu hakusita kuzungumza na watu ambao alikutana nao barabarani au katika sehemu nyingine za umma. (Luka 9:57-61; Yoh. 4:7) Alitaka kuwahubiria watu wengi iwezekanavyo ujumbe wake muhimu. Leo, kutoa ushahidi barabarani ni njia nzuri sana ya kuwasaidia watu kupata hekima inayotoka kwa Mungu. (Met. 1:20) Tutafanikiwa zaidi tukichukua hatua ya kwanza na kuwa wenye utambuzi.

 2. Tunaweza kuchukua hatua ya kwanza kwa njia gani tunapotoa ushahidi barabarani?

² Chukua Hatua ya Kwanza: Mara nyingi ni bora umwendee mtu badala ya kusimama au kuketi mahali fulani kungoja mpita njia akujie. Tabasamu unapomwendea mtu, umtazame, na uwe mtulivu na mwenye urafiki. Ukihubiri pamoja na ndugu au dada wengine, ni afadhali kila mhubiri amwendee mtu tofauti. Jitahidi pia kufanya mpango wa kuzungumza tena na mtu anayependezwa ili kumsaidia ajue mengi zaidi. Inapofaa, baada ya kumaliza mazungumzo pamoja na mtu anayependezwa, mwulize kwa fadhili jinsi ambavyo unaweza kuwasiliana naye tena. Baadhi ya ndugu na dada huhubiri katika sehemu fulani hususa kwa ukawaida. Hilo linawawezesha kuongea na watu walewale mara kwa mara, na kusitawisha hamu yao ya kujua zaidi.

 3. Tunaweza kuwa wenye utambuzi jinsi gani tunapotoa ushahidi barabarani?

³ Utambuzi Ni Muhimu: Utambuzi unahitajika ili kuchagua mahali bora pa kusimama na mtu utakayemzungumzia. Si lazima umhubirie kila mpita njia. Uwe mwepesi kutambua hali. Kwa mfano, iwapo mtu ana haraka sana, ni afadhali umwache apite. Unapohubiri nje ya duka au ofisi fulani, tenda kwa busara ili usimtie msimamizi wa biashara wasiwasi. Ni bora kuwahubiria watu wanaotoka dukani au ofisini badala ya wale wanaotaka kuingia. Waendee watu kwa njia ambayo haitawashtua au kuwaogopesha. Pia, tumia busara unapowatolea watu machapisho. Unaweza kuwapa watu wasiopendezwa sana trakti badala ya magazeti.

 4. Kwa nini kutoa ushahidi barabarani ni utumishi unaofurahisha na wenye manufaa?

⁴ Tunapotoa ushahidi barabarani tunaweza kutawanya mbegu nyingi za kweli kwa muda mfupi. (Mhu. 11:6) Huenda tukawapata watu ambao hatuwapati tunapoenda nyumba kwa nyumba. Jitahidi kufanya mpango wa kushiriki kutoa ushahidi barabarani. Huo ni utumishi unaofurahisha na wenye manufaa.