Unaweza Kuboresha Kumbukumbu Yako

YEHOVA MUNGU aliumba ubongo wa binadamu ukiwa na uwezo wa ajabu wa kukumbuka mambo. Aliumba ubongo uwe kama hazina ambayo ingeweza kutumiwa daima bila kupoteza kitu. Jinsi ambavyo ubongo umeumbwa inapatana na kusudi la Mungu la wanadamu kuishi milele.—Zab. 139:14; Yn. 17:3.

Labda unaona kwamba unasahau mambo mengi yanayoingia akilini mwako. Ni kama huwezi kuyakumbuka. Unawezaje kuboresha kumbukumbu yako?

Upendezi ni muhimu sana ili kuboresha kumbukumbu. Akili zetu huchochewa tukiwa na mazoea ya kupendezwa na watu na vilevile mambo yanayoendelea karibu nasi. Ndipo itakapokuwa rahisi kuwa na upendezi tunaposoma au kusikia jambo linalotufaidi daima.

Ni tatizo la kawaida kusahau majina ya watu. Lakini, sisi Wakristo tunajua ya kwamba ni muhimu kukumbuka watu—Wakristo wenzetu, wale tunaowahubiria, na wengine tunaokutana nao katika shughuli zetu za kila siku. Tunaweza kukumbukaje majina ambayo hatupaswi kusahau? Mtume Paulo aliorodhesha majina ya washiriki zaidi ya 26 wa kutaniko aliloandikia barua. Mbali na kujua majina yao, pia alitaja mambo hususa kuhusu wengi wao. Hiyo inaonyesha kwamba alipendezwa nao. (Rom. 16:3-16) Baadhi ya waangalizi wasafirio wa siku hizi wa Mashahidi wa Yehova wanakumbuka majina ya watu, hata ingawa wanatembelea makutaniko mbalimbali kila juma. Ni nini kinachowasaidia? Huenda wana mazoea ya kutaja jina la mtu mara kadhaa wanapoongea na mtu huyo kwa mara ya kwanza. Wanajitahidi kuhusisha jina la mtu huyo na uso wake. Pia wanashirikiana na watu mmoja-mmoja katika huduma ya shambani na wanapokula pamoja. Unapokutana na mtu, utakumbukaje jina lake? Kwanza tafuta sababu nzuri inayokufanya ukumbuke jina lake; kisha jaribu baadhi ya madokezo ambayo yametolewa.

Ni muhimu pia kukumbuka mambo unayosoma. Unawezaje kukumbuka vizuri zaidi mambo unayosoma? Inafaa kuwa na upendezi na ufahamu. Lazima upendezwe sana na mambo unayosoma ili uyazingatie kabisa. Huwezi kukumbuka kitu ikiwa akili yako iko mbali unapojaribu kusoma. Unaweza kuboresha ufahamu wako unapolinganisha habari hizo na mambo ambayo tayari unayajua. Jiulize: ‘Naweza kutumia habari hii maishani mwangu jinsi gani na wakati gani? Naweza kutumiaje habari hii kumsaidia mtu mwingine?’ Pia unaweza kuboresha ufahamu wako unaposoma mafungu ya maneno badala ya kusoma neno moja-moja. Utafahamu kwa urahisi zaidi mawazo yanayotokezwa na kutambua mambo makuu na hiyo itafanya yawe rahisi kukumbuka.

Wataalamu wa elimu wanasisitiza kwamba ni muhimu kupitia habari uliyosoma. Profesa mmoja wa chuo kikuu alifanya uchunguzi, akathibitisha kwamba ukitumia dakika moja kupitia haraka habari uliyosoma, utazidisha mara mbili uwezo wako wa kukumbuka mambo hayo. Basi, baada tu ya kumaliza kusoma habari fulani—au sehemu yake kuu—jikumbushe mambo makuu ili uyakaze akilini mwako. Fikiria jinsi unavyoweza kueleza kwa maneno yako mwenyewe mambo mapya ambayo umejifunza. Ukijikumbusha jambo punde tu baada ya kulisoma, utalikumbuka kwa muda mrefu.

Kisha katika siku chache zijazo, tafuta nafasi za kujikumbusha mambo uliyosoma kwa kumweleza mwingine habari hiyo. Unaweza kumweleza mtu wa familia, mtu wa kutaniko, mfanyakazi mwenzako, mwanafunzi mwenzako, jirani, au mtu unayekutana naye katika huduma ya shambani. Jaribu kuwatajia mambo makuu na vilevile Maandiko yanayohusika. Kufanya hivyo kutakufaidi kwa kukaza mambo muhimu akilini na kuwafaidi wengine pia.

Mbali na kujikumbusha habari ambayo umesoma na kuwaeleza wengine juu yake, kuna faida ya kutafakari mambo muhimu ambayo umesoma. Waandishi wa Biblia Asafu na Daudi walifanya hivyo. Asafu alisema: “Nitayakumbuka matendo ya BWANA; naam, nitayakumbuka maajabu yako ya kale. Pia nitaitafakari kazi yako yote; nitaziwaza habari za matendo yako.” (Zab. 77:11, 12) Pia Daudi aliandika hivi: “Nakutafakari Wewe makesha yote ya usiku,” na “nimezikumbuka siku za kale, nimeyatafakari matendo yako yote.” (Zab. 63:6; 143:5) Je, wewe hufanya hivyo?

Kutafakari sana matendo ya Yehova, sifa zake, na mapenzi yake kutakusaidia sana kukumbuka mambo. Ukiwa na mazoea ya kutafakari, kwa kweli moyo wako utazingatia mambo muhimu. Hiyo itajenga utu wako wa ndani. Kumbukumbu zako zitaonyesha mambo yaliyo moyoni mwako kabisa.—Zab. 119:16.

Tuna msaada tunapotaka kukumbuka kweli zinazohusu utendaji wa Yehova na mambo yaliyosemwa na Yesu Kristo. Yesu aliwaeleza hivi wafuasi wake usiku wa kuamkia kifo chake: “Nilipokuwa nikikaa pamoja nanyi nimesema mambo haya kwenu. Lakini msaidiaji, roho takatifu, ambayo Baba atapeleka katika jina langu, hiyo itawafundisha nyinyi mambo yote na kuwakumbusha mambo yote niliyowaambia.” (Yn. 14:25, 26) Mathayo na Yohana walikuwa miongoni mwa wale waliokuwapo. Je, roho takatifu iliwasaidia? Ndiyo, bila shaka! Miaka minane hivi baadaye, Mathayo alimaliza kuandika masimulizi marefu ya kwanza juu ya maisha ya Kristo. Masimulizi hayo yalitia ndani kumbukumbu muhimu sana ya Mahubiri ya Mlimani na ile ishara inayotaja matukio mengi kuhusu kuwapo kwa Kristo na umalizio wa mfumo wa mambo. Miaka 65 baada ya kifo cha Yesu, mtume Yohana aliandika Injili. Injili hiyo ilitia ndani mambo mengi ambayo Yesu alisema wakati mitume walipokuwa na Bwana usiku wa mwisho kabla ya kifo chake. Inaonekana Mathayo na Yohana walikumbuka vizuri sana mambo ambayo Yesu alisema na kufanya walipokuwa pamoja naye. Lakini roho takatifu ilisaidia sana kuhakikisha kwamba hawakusahau mambo muhimu ambayo Yehova alitaka yaandikwe katika Neno lake.

Je, roho takatifu inasaidia watumishi wa Mungu leo? Bila shaka! Roho takatifu haitukumbushi mambo ambayo hatujawahi kujifunza, lakini inatukumbusha mambo muhimu ambayo tulijifunza wakati uliopita. (Luka 11:13; 1 Yoh. 5:14) Kisha, kunapokuwa na uhitaji, akili zetu huchochewa “kukumbuka semi zilizosemwa hapo awali na manabii watakatifu na amri ya Bwana na Mwokozi.”—2 Pet. 3:1, 2.

Kwa kurudia-rudia Yehova alionya Israeli hivi: ‘Usisahau.’ Si kwamba alitazamia wakumbuke kabisa kila kitu. Lakini hawakupaswa kufuatilia mno mambo ya kibinafsi hivi kwamba wasahau jinsi Yehova alivyoshughulika nao. Walipaswa kukumbuka jinsi Yehova alivyowakomboa wakati malaika wake alipowaua wazaliwa wote wa kwanza wa Wamisri. Pia walipaswa kukumbuka jinsi Yehova alivyoifungua Bahari Nyekundu kisha kuifunga, na kuzamisha Farao na majeshi yake. Waisraeli walipaswa kukumbuka kwamba Mungu aliwapa Sheria yake kwenye Mlima Sinai akawaongoza kuvuka jangwa na kuwafikisha kwenye Nchi ya Ahadi. Hawakupaswa kusahau katika maana ya kwamba mambo hayo waliyoyaona yalipasa kuongoza maisha zao kila siku.—Kum. 4:9, 10; 8:10-18; Kut. 12:24-27; Zab. 136:15.

Sisi pia na tujihadhari tusiwe wasahaulifu. Tunapokabili mikazo ya maisha, tumkumbuke Yehova, tukikumbuka yeye ni Mungu wa aina gani na vilevile tukikumbuka upendo alioonyesha kwa kutoa zawadi ya Mwana wake, aliyetoa fidia kwa ajili ya dhambi zetu ili tuweze kuishi milele kwa ukamilifu. (Zab. 103:2, 8; 106:7, 13; Yn. 3:16; Rom. 6:23) Tutaendelea kukumbuka kweli hizo zenye thamani tukiendelea kusoma Biblia kwa ukawaida, kushiriki kwa bidii kwenye mikutano ya kutaniko na huduma ya shambani.

Unapofanya maamuzi makubwa au madogo, jikumbushe kweli hizo zenye thamani, na uache ziongoze fikira zako. Usisahau. Umtegemee Yehova akuongoze. Badala ya kuona mambo kwa njia ya kimwili tu, au kutumaini msukumo wa moyo wetu usiokamilika, jiulize, ‘Uamuzi wangu uongozwe na mashauri gani au kanuni zipi za Neno la Mungu?’ (Mit. 3:5-7; 28:26) Huwezi kujikumbusha mambo ambayo hujapata kusoma wala kusikia. Lakini unapoendelea kupata maarifa sahihi na kumpenda Yehova, hazina yako ya maarifa ambayo roho ya Mungu inaweza kukukumbusha itaongezeka. Na upendo wako kwa Yehova unaozidi kuongezeka utakuchochea kutenda ifaavyo.